(به‌فره‌ده‌نگ)

به‌فرکه‌ دێ

هه‌موو ساڵێ

له‌ گه‌رووی گوڵێکی ناوازه‌دا

سروودێک پڕ له‌ به‌رامه‌ و ڕه‌نگ

بۆ له‌دایکبوونێک ده‌خوێنێ

که‌چی ئێستا کاتێ نه‌رم

به‌ سه‌ربان و به‌رده‌رکه‌ی قوتابخانه‌که‌ی شیناوێدا دێته‌ خوارێ

له‌ حه‌نجه‌ره‌ی ده‌یان گوڵه‌زامی نه‌وڕه‌سدا

رۆحی په‌پووله‌ عاشقه‌کانی پۆل

له‌ ده‌نگێکی هه‌ڵپڕووزاو هه‌ڵده‌ژه‌نێ

{پپوله}


(ئایه‌تی مه‌رگ)

مرۆڤ بوونم

له عه‌شقێكی په‌تیاره‌وه ده‌ست پێده‌كا و

عاشق بوونم

بۆ مه‌رگ ئایه‌تی كۆتایی ده‌خوێنێ

من و عه‌شق

لفه‌دوانه‌ی په‌ری شێعرین

:53:

(باران)

هۆ بارانی به‌خوڕهاتوو

تۆزێ هێور

نه‌کا سه‌وزه‌ی نیگا و خه‌مم

ئاوێته‌بن

زۆرده‌ترسم له‌ ڕوانینما

که‌روێشکه‌ی خه‌م

به‌ڕووی نازتا

بشنێته‌وه‌

وته‌کانی نێلسۆن ماندێلا

من بڕوام وایه‌ ...

که‌ زه‌مانێکی دوور و درێژی پێویسته تا ببمه‌ ئه‌وکه‌سه‌ی که‌ ده‌مهه‌وێ.

من بڕوام وایه‌ ...

که‌ ئه‌بێ هه‌میشه به‌ وشه‌ و ده‌سته‌واژه‌ی جوان و پڕ له خۆشه‌ویستییه‌وه

‌ له‌و که‌سانه‌ ماڵاویی بکه‌م که‌ له‌ قووڵایی دڵمه‌وه‌ خۆشم ده‌وێن ، له به‌ر

ئه‌وه‌ی ڕه‌نگه‌ ئه‌مه‌ دوایین جار بێت که ده‌یانبینم.

من بڕوام وایه‌ ...

که‌ ئێمه‌ له‌و کارانه به‌رپرسین که‌ ده‌یانکه‌ین ، به‌ده‌ر له‌وه‌ی که‌ چ

هه‌ستێکمان هه‌یه‌ .

من بڕوام وایه‌ ...

که‌ ئه‌گه‌ر ڕوانگه‌ و شێوازی بیرکردنه‌وه‌م کۆنتڕۆڵ نه‌که‌م ،ئه‌وان من

کۆنتڕۆڵده‌که‌ن .

من بڕوام وایه‌ ...

قاره‌مان ئه‌و که‌سه‌یه‌ که کارێک ئه‌نجام ده‌دا له‌و کاته‌دا که ئه‌شێ ئه‌نجام

بدرێ، به‌ده‌ر له‌وه‌ی که چ ئاکامێکی ده‌بێت .

من بڕوام وایه‌ ...

که‌ هێندێ جار ئه‌و که‌سانه‌ی که‌له‌ کاتی داماویی و په‌رێشانیدا چاوه‌ڕوانی

زه‌بری گورچووبڕیان لێده‌که‌ین، یارمه‌تیمان بده‌ن و ڕزگارمان بکه‌ن .

من بڕوام وایه‌ ...

که ئه‌وکاتانه‌ی که‌ تووڕه‌م مافی خۆمه‌ که‌ تووڕه‌ بم ،به‌ڵام مافی ئه‌وه‌م نیه‌ که‌

بێڕه‌حم وزاڵم بم .

من بڕوام وایه‌ ...

که گه‌وره‌بوونمان زیاتر به‌ ئه‌زموون و ئه‌و شتانه‌ی که‌ لێیانه‌وه‌ فێر بووین

به‌ستراوه‌ته‌وه‌، تا به‌وه‌ی که چه‌ند جار جێژنی له‌دایکبوونمان گرتبێ .

من بڕوام وایه‌ ...

که ته‌نیا ئه‌وه‌ به‌س نیه‌ که لێمان خۆش بن ، به‌ڵکوو جاروبار ده‌بێ خۆشمان

له‌ خۆمان خۆش بین .

من بڕوام وایه‌ ...

که‌ با له‌وپه‌ڕی دڵشکاویش دابین ،گه‌ردوون له به‌ر خه‌م و ماته‌می ئێمه‌ له‌

چه‌رخ و خول ناوێستێ .

من بڕوام وایه‌ ...

که‌ ژێر نه‌خش و بارودۆخی بنه‌ماڵه‌یی و کۆمه‌ڵایه‌تی له‌ سه‌رم شوێندانه‌رن،

به‌ڵام خۆم به‌رپرسم له‌وه‌ی که‌ ده‌بم به‌ چی.

من بڕوام وایه‌ ...

که‌ ناشێ خۆم زۆر به‌ دۆزینه‌وه‌ی ڕازێکه‌وه‌ خه‌ریک بکه‌م ،چونکه ڕێی

تێده‌چێ که بۆ هه‌میشه‌ ببێته‌ هۆی گۆڕانی ژیانم .

من بڕوام وایه‌ ...

که‌ ڕه‌نگه دووکه‌س به وردی بڕواننه شتێک و دو شتی ته‌واو جیاواز ببینن.

من بڕوام وایه‌ ...

که ڕه‌نگه‌ ژیانمان ته‌نیا له‌ ماوه‌ی چه‌ند سه‌عاتێکدا به‌ ده‌ستی که‌سانێک

بگۆڕدرێ که‌ ته‌نانه‌ت ناشیان ناسین .

من بڕوام وایه‌ ...

که‌ ئه‌و بڕوانامه‌ و کارتی ڕێزلێنانه‌ی که‌ به‌ دیواره‌وه‌ هه‌ڵیان ده‌واسین ،ڕێز و

شکۆمه‌ندیمان پێنابه‌خشن .

من بڕوام وایه‌ ...

که‌ ئه‌و که‌سانه‌ی که پتر له هه‌موانم خۆش ده‌وێن ، زۆر زووترم لێ

ئه‌ستێندرێنه‌وه‌.

من بڕوام وایه‌ ...

شادمانترین که‌س ئه‌وه‌ نیه‌ که باشترین شته‌کانی هه‌یه‌ ، به‌ڵکوو که‌سێکه

که له شته‌کان به باشترین شێوه‌ که‌ڵک وه‌رده‌گرێ .

بێ تۆ

به‌ گوێچکه‌مدا ده‌چرپێنی :

به‌جێت دێڵم ...

ئه‌وسا ته‌مێ له‌به‌رپێمدا

ڕاده‌خه‌یت و

بێده‌نگ ده‌ڕۆی

باش ده‌زانی

تا شوێنه‌واری عه‌شقت مابێ

هیچ ڕێگایه‌ک

نامگرێته‌ خۆی

{پپوله}

(ژیان)

له‌ گێژه‌وی

شه‌و و ڕۆژا

بۆ چنینی تان وپۆی ژین

له هه‌ودای بیر ڕانامێنین

له به‌ر چرای گۆنای مانگدا

له داوێنی شه‌وه‌زه‌نگدا

پرچی زێڕینی خۆره‌تاو

ده‌هۆنینه‌وه‌ و

ده‌یپه‌تێنین

له‌ به‌ربه‌یانێکی لیخندا

به‌بێ ڕۆحی له قه‌دپاڵێ

خۆمانی پێ

ده‌خنکێنین

:53:


دێڕێک قه‌مچی و شووخاڵێک چه‌خماخه‌

له‌م گۆڕه‌ پان و

به‌رینه‌دا

به‌ده‌م هه‌راو زه‌نای زه‌مانه‌وه‌

بووکێ

به‌ پێڵاوی ڕکێفه‌وه‌

به‌ نه‌رمه‌ڕێی خانی زینا

تێده‌په‌ڕێ و

کچێنی به‌ دیواری خانه‌وه‌ هه‌ڵده‌واسێ

زاواش له‌ ته‌لاری گوێی گادا

له‌ کارتاسیس دانابه‌زێ

منیش هه‌موو شه‌وێ

به‌ ئه‌سپێکی به‌فرینه‌وه‌ خه‌وده‌بینم

هۆ که‌رته‌ لانه‌وازه‌که‌ی ڕۆحم

چه‌نده‌ به‌ قه‌و

له‌ گۆمی هه‌وه‌سی نێرێکا سه‌ما ئه‌که‌ی

چه‌نده‌ به‌ قیزه‌وه

‌
له‌ بیلبیله‌ی هزری منا خۆت دائه‌شۆی

تۆزێ هێور

ئه‌م بیلبیله

سپێنی په‌نجه‌ره‌یه‌که

که‌ تێیدا

گشت باڵنده‌کان

به‌ هێڵی بێ ڕه‌گه‌زیدا

پیاسه‌ ئه‌که‌ن

تۆ چ له‌ چه‌خماخه‌ ئه‌چوێی

یان ئه‌و قه‌مچییه‌ی

نیچه

دێڕه‌ بیری پێ ئه‌نووسێ

ڕه‌نگه‌ هێنده‌ی باڵای سه‌رچۆپی گرێک

که ده‌سرۆکه‌ی فواره‌ی خوێن نادابه‌ که‌س

هۆ که‌رته‌ لانه‌وازه‌که‌ی ڕۆحم

ئه‌مشه‌و به‌ باڵای شه‌هیدێکه‌وه‌ نووستم

خه‌ونی به‌ سه‌بووری ڕه‌شه‌باوه‌ ئه‌بینی

له‌ جۆلانه‌ی دیوه‌خان و

چوارئێسکه‌ی داهۆڵه‌کان ئه‌دوا

منیش به‌دوای زه‌نده‌قی خۆمدا ده‌گه‌ڕام و

خه‌وی پاپۆڕه‌کانم

به‌ لکه‌ی شه‌پۆله‌کانه‌وه‌ گرێ ئه‌دا

چه‌نده‌ له‌ ئامێزی

بێ وره‌ییدا گه‌ڵا ئه‌که‌ی

شه‌که‌تی داڕمانی شه‌وگه‌ڕی

میچی ئه‌م شه‌وه‌زه‌نگه‌ به‌رته‌سکه

له‌ به‌ژنی هیچ ڕۆچنه‌ و

گزنگێکت شه‌ته‌ک نادا

ئای چه‌نده‌ گڕکانی ته‌رکی زه‌وی و

ڕمبازێنی که‌ڵکه‌ڵه‌کانی مێشکت

به‌ لێواری سنووره‌وه‌ هه‌ڵده‌په‌سێری

تۆ له‌ ئاسمان و زه‌وی چده‌زانی؟

مرۆڤ تا ده‌رکه‌ی ئاسمان گاڵه‌نه‌دا

له‌ بزرکردنی ڕێگه‌ی ژیان نابێته‌وه

‌
تۆ

که‌ ده‌ست له‌ گراویی خاک و

هه‌وره‌گرمه‌ و

ساتێ برووسکه‌ی ده‌م نمه‌باران و

به‌ژنی نه‌رم و نیانی به‌فر هه‌ڵناژه‌نی

چیته‌ له‌ بووکه‌ بارانه و

خه‌ونی ته‌ڕ و

فه‌لسه‌فه‌ی پیاوێکی فێدار و

ڕۆڵی ژنه ئه‌ویندارێکی ژیان

هۆ که‌رته‌ لانه‌وازه‌که‌ی ڕۆحم

هێنده‌ به‌ ڕق

پرێسکه‌کانم تووڕ مه‌ده

‌
پیت به‌ پیت و

وشه به وشه‌م

له‌ دڕکستانی ترس و

که‌ناره‌کانی زه‌لکاو و

قووڵه برینان هه‌ڵگوێزیوه

حه‌زه‌کانم بیرت له‌ باڵی فریشته ئه‌سوێن

ئه‌و باڵانه‌ی به‌ شه‌قژنیان

له‌ گۆنای خۆشه‌ویستی ده‌شنێن و

سریوه‌ی ژیان وه‌ڕێ ئه‌خه‌ن

به‌ڵکوو بڵێی :

مرۆڤ فریشته‌یه‌ گه‌ر

باڵه‌کانی بداته‌ ده‌ست بای خۆسه‌ویستی

هۆ که‌رته‌ لانه‌وازه‌که‌ی ڕۆحم

خه‌رمانانی ئه‌مساڵیش

مێرووی ڕۆحم

خسته‌ ناو ده‌غڵ و دانی حه‌زه‌کانتان

ئه‌وه‌ی پۆل پۆل

مه‌لی وه‌ک خۆت

له‌ سه‌ر دڵی مێژوو هه‌ڵیان ڕشت

ده‌نک ده‌نکم ترووکاندن

ئاخ چ پووچه‌ڵستانێکه‌ کێڵگه‌ی حه‌زتان

له‌ سه‌ر لێوی وه‌رز و ساڵا

وشه‌یه‌کم نه‌هاته‌ گوێ

ئه‌وکاتانه‌ی که‌ ده‌بن کۆ

بڵێن بۆ گۆڕینی کێڵگه‌ی حه‌زمان

وره‌ و زاتمان خستۆته گۆ

چه‌ند کورته‌ شێعر

1- هه‌نارێکی مزر شاری جێهێشت

له‌و ڕۆژه‌وه‌

هه‌ناسه‌ی پیاوێکی عاشق

پڕبوو له‌ خه‌ونی ئه‌رغه‌وانی

2- که‌ له‌ ڕۆحم هیلاک بووی پێم بڵێ

به‌ بێ ڕۆحی له‌ به‌ر ده‌مت

ده‌بمه‌ په‌یکه‌ر

3- تاسه‌م به‌ قورگی ئاسمانه‌وه‌

هه‌ور بێده‌نگ

با بێده‌نگ

هه‌تاو بێده‌نگ

کێ ده‌زانی چیمه‌ له‌ تۆ

4- بۆنازدارێ ده‌بمه‌ په‌یکه‌ر

ئه‌وه‌ی بۆنی خاک و

هه‌ناسه‌ی نیشتیمان و

ڕه‌نگی چاوی مناڵان و

شه‌ونمی ئازادی له‌ هه‌ناودا

5- له‌ هیچ وڵاتێکدا

ئۆقره ناگرم

تا چاوی تۆ

نیشتمانمه‌

6- ئازادی له‌ وڵاتی من

به‌ غه‌ریبی سه‌ر هه‌ڵئه‌دا و

به‌ نامۆییش

سه‌رهه‌ڵده‌گرێ

7- بارانێکی به‌ خوڕهاتووم

هه‌رده‌بارێم

تاشه‌نگه‌ڕۆژت

تاق لێئه‌دا و

شێعری به‌ژنت

دێته‌ سه‌ما

8- کاتێ ده‌چیه‌ شه‌پۆله‌وه‌

ده‌ریا ده‌که‌ی به‌ بووکی ساڵ

که‌ له‌ ڕۆحی منیش ده‌خزێی

ده‌بمه‌ منداڵی ڕێی عه‌شق و

گڕوو ده‌گرم بۆ خه‌ت وخاڵ

9- شه‌و له‌هه‌وری هه‌ناسه‌م ده‌ئاڵێ و

به‌یان

شێعرێکی ته‌ر

له‌سه‌ر په‌لکی شعوورم

ده‌بێته‌ ئاونگ

سێ کورته‌ شێعر

۱-

به‌دوای حه‌زی مناڵیمدا

بۆ بۆنی نانی گه‌رم ‌ و گه‌رمه‌شانی

سه‌رم به‌ ڕۆچنه‌که‌دا گرته‌وه‌

بۆنی چه‌ت و په‌یامۆکی لێده‌هات

2-

ئه‌ی ئازادی

چاوه‌کانت په‌ڕه‌سێلکه‌ی

کام به‌هه‌شتن

وا له‌م به‌هاره‌ بۆژۆیه‌دا ئۆقره ناگرن؟

3-

به‌فر

تا به‌هار و گوڵ

پردێکی سپی هه‌ڵده‌به‌ستێ

وه‌کوو پۆلیسێکی عاشق

په‌نجه‌کانی ڕوو به‌ جوانی ڕاده‌گرێت و

تا هاتنی مامه‌ نه‌ورۆز

له‌ سه‌ر جێگه‌ی خۆی ده‌وه‌ستێ

غه‌زه‌لێکی مه‌له‌کوششوعه‌رای به‌هار

وه‌رگێڕ : ئیبراهیم ئیسماعیل پوور

شه‌معین ، دڵ پڕئاگری پڕتین و ئیتر هیچ

ڕۆژ و شه‌وان ڕوندک وناڵین وئیتر هیچ

ئه‌فسانه‌ بوو واده‌ی دیدارێکی‌ که دایان

پشت په‌رده له‌ سۆزێکی نه‌نگین وئیترهیچ

ویستووته‌ بزانی ، سڕ وڕازی مه‌زن بوون

جوامێری یه‌ و پێبه‌ند به‌ ئه‌وین وئیتر هیچ

چت ویستووه‌ له‌و خه‌ڵکه‌ که‌ وه‌ستای به‌زه‌بریان

بێشکه‌ بکه‌ن چێ و کفن دوورین و ئیتر هیچ

له‌م مه‌کته‌به‌ داوا مه‌که‌ زانست که‌ لێره

ته‌خته‌ ڕه‌شه‌ و که‌سی بێ زانین و ئیتر هیچ

تاقه‌ شتێکی که‌ به‌هار وێڵه‌ به‌ دڵ بۆی ‌

دیداره‌ له‌ گه‌ڵ شۆخی شیرین و ئیتر هیچ

غه‌زه‌لێکی چوارقۆڵی

(سەعید نەجاڕی ـ ئاسۆ،ئەمین گەردیگلانی،

ئیبراھیم ئیسماعیل پوورـ شەماڵ،ئەحمەد

یاسینی«پشکۆ»)

له‌ گوێمدا زه‌مزه‌مه‌ی دێ خیزەڵ و چه‌و

که‌وا کانی چ جار نابێ جیا له‌و

له‌ ناخمدا شه‌وی مێعراجی ئه‌شقه‌

ده‌بزوێ ‌‌هه‌ست به‌ بیری ئه‌و برووسکه‌وـ

شه‌و و ڕۆژ هه‌ر یه‌کن لایان ئه‌ویندار

به‌ سۆمای دڵ ده‌پێوێ ڕێگه،‌ شه‌وڕه‌و

به‌ ڕۆحم گوت له‌ تاریکی نه‌ترسی

له‌ ناخا مه‌شخه‌ڵی هیوایه هه‌ڵکه‌وـ

ببه ڕێبواری ڕێگه‌ی ڕژدی دوندێ

که گڕکانی ئه‌وین کردی به‌ پێخه‌و

منی ئاشق بە دووتا وێڵ و شەیدام

ئه‌رێ ئاسک هه‌تا که‌ی لێم ده‌که‌ی ڕه‌و

ده‌که‌م ئاژین له‌ وه‌رزی سه‌وزی یادت

شه‌واوی چاوه‌کانم من هه‌موو شه‌و

له‌ ئاورێشمی خه‌یاڵی تۆی ده‌پێچم

به‌ ئه‌سپایی له‌ جێدا کۆرپه‌ڵه‌ی خه‌و

ده‌خوێنم من به‌ یادی کۆنە دەردان

له‌ سه‌ر دوندی چیای کوردان وه‌کوو که‌و

ده‌سا خوێنم حه‌ڵاڵت بێ بخوێنه‌

که‌ سه‌ربه‌ستیی له‌ دوو دێ سێبه‌ری ئه‌و

به‌ڵێ هه‌ر ئافره‌تێ شیرین نییه،‌ نا

نه‌ هه‌ر ئاشق وه‌کوو فه‌رهاد و خه‌سره‌و

به‌ چاوی نوێی ببینی ورده‌کاری

نییه‌ فه‌رقی ئه‌دی سابڵاغ و مه‌سکه‌و

مەکە زەوتی لە کۆزا بەرخی بیرت

دەبا ئازاد بئاژۆن پاشی هه‌ر زه‌و

وەرن با شێعری پڕ مانا وەھۆنین

نەوەک ئەو تاقمەی دژوازی دژڕەو

له‌ ئاکاریان ده‌بارێ تۆزی کۆنی

به‌ڕووداری به‌ شێعری خۆ ده‌ڵێن نه‌و

دەقێکی پێی نەبزوێ ھەست و ئاوەز

ئیتر جا چۆن دەنێن ناوی شیعر لەو

ئه‌مین،ئاسۆ،شه‌ماڵ، پشکۆ، بڕاسێن

دەبا دانەگرێ چاوی شێعری کورد خەو

په‌تیاره‌

له‌ گریانێکی دووره‌وه‌ هاتووم

هه‌ره‌س

رۆ هاتۆته‌ نێو خه‌نده‌م

نووزه‌ی ده‌نگ و

باڵای هیچ حه‌زێکم

ده‌ستیان له‌ تاڵی خۆر گیرنابێ

هه‌ورێکی خه‌فه‌ت گرتووی

شه‌ڵاڵی تاریکیم

له‌ دڵی خه‌مێکی قووڵه‌وه‌

راساوم

جێگه‌م هه‌ناوێکی ئاگرین

یان سه‌هۆڵبه‌ندانێکی بێ جووڵه‌ و

هێندێ جار زه‌لکاوێکی قیزه‌ونه‌

هه‌ر به‌یانێک

شه‌که‌تی خه‌ونێکی ئاڵۆز و

داڕمانێکی مرۆڤانه‌م

مرۆڤ بوونم له‌ عه‌شقێکی په‌تیاره‌وه‌ ده‌ست پێده‌کا و

عاشق بوونم به‌ سه‌ر ته‌لی هه‌ناوێکی له‌رزۆکه‌وه‌

ئایه‌تی کۆتایی ده‌خوێنێ

بۆنی مه‌رگی حه‌ز و

ئاواته‌ بێستانی داڕزاوو

کرمێ بوونی کاکڵی ژین

بواری وه‌م ناده‌ن

به‌ بۆنی گوڵێکه‌وه‌

هه‌ڵزنێم و

له‌ باڵی په‌پووله‌یه‌کدا

وه‌حه‌سێم

من تاقه‌تێکی گوماناویم

به‌ سه‌ر هێڵی بێ سه‌برییه‌وه‌

گۆرانی سه‌بووری ده‌خوێنم

بۆ تاڵ تاڵ

قژه‌ به‌فرینه‌کانی دایکم

له‌ باران و سه‌وزه‌ ئه‌دوێم

ئای چ تاقه‌تێکی بێ تاقه‌ت و

چ عاشقێکی بێ ورته‌م

له‌ گریانێکی دووره‌وه‌ هاتووم

نزگه‌ره‌ی خه‌مێکی باڵابه‌رزم

هه‌ره‌س رۆ هاتۆته‌ نێو خه‌نده‌م

نووزه‌ی ده‌نگ و

باڵای هیچ حه‌زێکم

ده‌ستیان له‌ تاڵێ خۆر گیرنابێ!!!