[behnam5555]

خمخۆرکی خوێن ( 2 )

شێرکۆ هەستا بە نێو ژوورەکەدا سووڕێکی لێدا و لەگەڵ ئەوەی دەیویست شاڵاو بۆ سۆما بەرێ، لەبەر خۆیەوە ورتەی دەهات و تفی لە دار و دیوارەکە دەکرد.
سۆماش جار لەگەڵ جار لە خەسووی دەچووە پێشێ و وای خۆی پێوە نووساند بوو دەتگوت هەر ئێستا دەچێتە باوەشی، سەری نابوو بە شانی خەسوویەوە و دەگریا و شۆڕشی برا چکۆلەشی لەولاوە سەری داخستبوو. جار جار سەری هەڵدێنا و لە کاکی و لە سۆما و دایکی دەڕوانی. حەپەسا و منداڵانە دەیڕوانی و نەیدەزانی چبووە و بۆ ئاوا دەکەن.
شێرکۆ دوای ئەوەی زۆری نەڕەنەڕ کرد و جنێوی دا، لە دایکی و براکەی و ژنەکەی مۆڕدەبۆوە و هەر جارەی دەیویست هۆمەن بۆ یەکیان بەرێ و وەک گورگی هار هەڵیاندڕێ. بە ڕقەوە دەستی کرد بە گیرفانیدا و مۆبایلەکەی دەرهێنا. ژومارەیەکی گرت و نای بە گوێیەوە و لێوی خۆی گەست:
ـ عەلۆ، کاک عەلی هەتا ماڵی ئێمە وەرە.... لەسەری مەڕۆ... زووکە هەتا ئێرە وەرە.
دایکی کەوتبووە دڵە کوتێ و سۆماش لەو خراپتر. هەردووکیان ڕەنگی مردوویان لێ نیشتبوو. سۆما دەمی وشک بووبوو و دەتگوت خۆڵەمڕەی تێکراوە بە زۆر زمانێکی بە لێویدا هێنا و گوتی:
ـ شێرکۆ دە پێمان بڵێی چبووە؟ کاکە عەلیمت بۆ چییە وا بانگت کرد بێ بۆ ئێرە؟ چبووە؟ بۆ پێمان ناڵێی؟
شێرکۆ مۆڕەیەکی لێکرد و بەرەو دەرگاکە ڕۆیشت. چووە دەرێ و شەق پێوەیدا لەوانەبوو شووشە و تایەکانی بکەونە خوارێ. دایکی شێرکۆ سەری سۆمای بە سینگییەوە گوشی و هەردووکیان دایان لە پڕمەی گریان.
دوای چەند خولەکێک عەلی لە دەرگای دا شێرکۆ کە هەر لە حەوشە دەهات و دەچوو خێرا دەرگاکەی لێکردەوە و دوای ئەوەی هێندێکیان قسە کرد هەردووکیان وەک گورگی برسی بەرەو ژوورێ ملیان پێوەنا. شێرکۆ خۆی کرد بەژوورێدا و عەلیش بەدوایدا. سۆما و دایکی و براکەی هەر سێکیان بە پێوە ڕاوەستا بوون. شێرکۆ هۆمەنی بۆ سۆما برد، قژی گرت و بە ڕاکێش ڕاکێش بردیە دەرێ. دایکی هەرچی هاواری کرد و ڕوومەتی خۆی ڕنی و پاڕایەوە کەڵکی نەبوو. عەلی سۆمای برد و دەرگای حەوشەکەی بە توندی پێوەدا.

**

لێفەکەی لە شانی کردەوە، چووە بەر پەنجێرەکە و چاوی لە ئاسمان بڕی، دیسان لە هەموو سووچێکی ئاسمانەوە چاوی سۆما ترووسکەیان دەهات و چاوەبڕکێنەیان لەگەڵ دەکرد. ئاراوقارای لێ هەڵگیرابوو، نەیدەزانی چبکا؟ دوو حەوتوویە لەو ژوورەدا خۆی زیندانی کردووە و دایکی ڕۆژی جارێک بەزۆر نان و ئاوی بۆ دێنێ و دەرخواردی دەدا. هەرچی گوشار بۆ مێشکی خۆی دێنێ و بیری لێدەکاتەوە نازانێ چۆن بڕوا بکات.
«باشە ئەوە کێ بوو ئەو ڕۆژە تەلەفۆنی بۆ کردم، وێدەچوو ئاشنا بێ. زۆر خۆمانە پێی گوتم: شێرکۆ، شتێکت پێدەڵیم باوەڕ دەکەی بیکە نایکەی کەیفی خۆتە. چونکە ئابڕووی منی پێ‌ناچێ و گوێشم لێ نییە. دەڵێم با گەڕەکەکەمان پیس نەبێت و ژنان شووی لێ‌هەڵنەکێشن. لەو ماوەیەدا کە لە ماڵێ نەبووی زۆربەی کات ماڵی ئێوە و بەتایبەت ژنەکەتم دەخستە ژیر چاوەدێری. ژنەکەت هەر ڕۆژی بەدەست یەکێکەوەبوو، چەند جار لەگەڵ منیش چاوەچاوی کرد بەڵام من قەت ویژدانم ڕازی نابێ لە ژنی مێرددار نزیک ببمەوە، ئەویش ژنی دەروجیران...»
تاسابوو، ئەوە دەبێ کێ بووبێ؟ دۆست بوو یان دوژمن؟
دایکی چەند جار گریابوو، سوێندی بۆ خواردبوو کوتبووی: «ڕۆڵە گیان تۆ بۆ خەریکی خۆت لەنێو دەبەی و ئەو ژنە بەستەزمانەشت ئاوا لێکرد؟ ئەو ژنە خۆ هیچی نەکردووە، مەگین بەر دەرگای حەوشەکەی گەسک دابێ دەنا پێی لەو ماڵە نەچۆتە دەرێ. تەنانەت لەو ماوەیەدا تۆ لەماڵێ نەبووی سەری لە ماڵی باوکیشی هەڵنەهێناوە.
خەونەکەی سەعاتێک لەمەوبەری وەبیر هاتەوە، خوێنەکە. ڕۆچوونەکەی بەنێویدا. چاوێکی لەدەستی خۆی کرد، ئەو دەستەی قژی سۆمای پێ‌گرتبوو.
نەیدەزانی چبکا. وەک شێت بەنێو ژوورەکەدا دەهات و دەچوو. لەبەر خۆیەوە قسەی دەکرد، دەگریا، لەرزی لێ‌دەهات و بەهەردوو دەستی سەری خۆی دەگرت. «نازانم من بۆ ئاوا دەرهەڵبووم . ژیانی خۆمم وێران کرد؟» وەبیری هاتەوە قژی سۆمای دابووە دەست عەلیی برای. عەلی کە قژی گرتبوو و بەڕاکێش ڕاکێش بردبوویە دەرێ گوتبووی: « تۆی ئابڕووبەرەی ڕووڕەش بۆ سەربڕین چاکی، کوڵکەی سەربەخوێن.»
دیسان جەستەی گەرم داهاتەوە و هەستی دەکرد هەر ئێستا ئێسکی لەشی دەسووتێن و پێست و دەمارەکانی دەتوێنەوە. ئازای ئەندامی لە ئارەقەدا شەڵاڵ بووبوو. خەم و گریان و تاویاو و چەقوچۆ یەک لەدوای یەک لە جەستە و ڕۆحی وەردەهاتن. سەری لە سەر کڵاوەی چۆکی هەڵگرت و چاوی لە سوچی نیوە تاریکی ژوورەکە بڕی.
« شێرکۆ گیان نازانی چەندەم خۆش‌دەوێی، دەڵێم بڵێی لە دنیادا ژنێکی تر هەبێ بەقەد من مێردەکەی خۆی خۆش بوێ؟ شێرکۆ بەو خودایە سەعاتێکم لێ‌دوور بی پێم بە ساڵێکە. توخودا قەتم لێ‌دوور مەکەوە...»
پەپوولەی ماچەکانیان باڵیان لە باڵی یەک دابوو و بە ئاسمانی ئەشقێکی وەنەوشەییدا فریبوون.
شتێکی قورس، گڵمتکێکی ڕەق، لە گەروویدا گیری کردبوو، نە گریانەکەی دەردەهات نە دەیتوانی هاوار بکا. سەری کردەوە سەر چۆکی.
کۆخەیەکی ویشک پیرانی پێ‌کرد، سۆما لەخەو ڕاچەنی و دەستی خستە سەر شانی: «چییە؟ بۆ ئاوا دەکۆخی؟» لە جێگاکەی دەرپەڕی و بە پەلە چوو پەرداخێک ئاوی هێنا کردی بە دەمییەوە.
لەپڕ بۆغمە قورسەکەی گەرووی ڕەوی و کوڵی گریانێک، ئاو و ئاور پێکەوە لە چاو و سینکیدا تەقینەوە. وەها دای لە قوڵپەی گریان ژوورەکە دەنگی دایەوە. دایکی بە هەڵەداوان هات بۆ ژوورەکەی و باوەشی پێداکرد. سەری کردە سەر ڕانی خۆی و لە گەڵ ئەوەی فرمێسک بە چاویدا دەهاتە خوارێ گوتی:
ـ شێرکۆ گیان! من ئەمڕۆش چوومەوە بۆلای سۆما. لەو ڕۆژەوە پێم لێ نەبڕیوە. هەموو شتێکی بۆ من و دایکی باس کرد. تۆ واتکردبوو لە خۆت نەمدەوێرا هیچت پێ‌بڵێم. خۆ بە کاری ئەوە نەدەھاتی قسەت لەگەڵ بکەم. تۆ نەتهێشت سۆماش قسەیەک بکات. ڕۆڵە گیان هەر ئەو لە تۆ چاکترە، دەیگوت خۆم بە شێرکۆ دەڵێم چیبووە. بەیانی بچۆ بۆلای.
کە خەبەری بۆوە سەری لە سەر کوشی دایکی بوو. دایکیشی پاڵی بە دیوارەکەوە دابوو و خەوی لێ‌کەوتبوو. وڵات ڕووناک بووبۆوە و گزنگی بەرە بەیان لە سەر لقی دارەتووەکەی دابوو و چۆلەکە لەنێو لق و گەڵاکانیدا جریوە و جووکەیان دەهات. هەستا سەر پێ و دەرپەڕی بۆ دەرێ. دایکی بە تەقەی دەرگاکە لە خەو ڕاچەنی:
ـ شێرکۆ!
شێرکۆ لە دەرگای حەوشە چووە دەرێ و بە پڕتاو ڕۆیشت بۆ گەڕەکی باخی قازی و خوی کرد بە کۆڵانەکەی ماڵی خەزووریدا. کە گەیشتە بەر دەرگای ماڵەکەیان، دەرگای حەوشەکە کەلێنێکی پێ‌درابوو. چووە ئەوسەری کۆڵانەکە و گەڕایەوە. چاوێکی لە حەوشەکە کرد، تایەکی پەنجێرە سەوزەکە کرابۆوە و سۆما سەری کێشابووە دەرێ. کە چاوی بە شێرکۆ کەوت چاوە شینەکانی بریقەیان لێوە هات و لەگەڵ بزەیەکی شیرین ئەستێرەی گەلاوێژیان وەبیر شێرکۆ هێنایەوە. شێرکۆ دڵۆپێک فرمێسک بە سەر ڕوومەتیدا خزی و خۆی کرد بەنێو ڕیشە زبرەکەیدا. بێ ئیختیار سەری داخست و چاوی لە بەر پێی خۆی کرد.

ته واو

ئەمین گەردیگلانی

ھاوینی1389