من و ئه‌نفال و میری جه‌نگ ..
بۆ منخه‌وێکی تاڵتره له‌ژه‌قنه‌بووت
له‌قه‌ترانیترین شه‌وی بێ چرپه‌یا
هه‌موو گوڵه ئه‌ستێره‌کانی ملکه‌چن
هه‌موو مرۆڤه‌کانی، بێ روخسار
هه‌موو گه‌ڕیده‌کانی، بێ هه‌وار
هه‌موو دڕنده‌کانیشی له‌یه‌ک ئه‌چن
بۆ ئه‌وی شاره‌زاو لێزان
به‌هه‌موو جۆره‌کانی قومار
سه‌ر مێزی کازینۆیه‌که‌و
سواڵکه‌رانی سیاسه‌تی تێدا ئه‌بن
به‌ملیاردێر
ملیاردێره‌کانی عیشقیش
له‌نێویدا ئه‌بنه سواڵکار
بۆ من، ئه‌نفال
باگرۆیه‌کی شه‌یتانه‌یه‌و
له‌توونه تاریکه‌کانی دۆزه‌خه‌وه هه‌ڵئه‌کات
هه‌موو جه‌سته ئه‌سوتێنێ
روح له‌چوارچێوه‌ی گڕ ئه‌نێ و
له‌خه‌زێنه‌ی زاکیره‌یا هه‌ڵیئه‌گرێت
ئه‌وسا ده‌رزی ئاژنی ئه‌کا
بۆ ئه‌وی دڵ لێوان لێویش
له‌ترس و سامی میهره‌بان
سروه‌یه‌کی به‌هه‌شتیه‌و
هه‌رچه‌نده بۆن و به‌رامی حوزنی لێدێ
له‌وه‌رزی جورم و گوناهدا
ئاره‌قه‌ی شه‌رمی بۆ ئه‌سڕێت
بۆ من، ئه‌نفال
له‌نێوان پوش و په‌ڵاشی
کات و شوێنا
ته‌نیا بن ده‌وه‌نێک نیه له‌جوگرافیای
دورگه‌یه‌کی به‌خت سیاچه‌مانه‌یا
هه‌ر خۆی بۆ خۆی
کیشوه‌رێکه له‌زریکه‌و
ئۆقیانوسێکه له‌گریه‌و
هه‌ساره‌یه‌که له‌برین
بۆ ئه‌و
چه‌ند وورده خاڵێکه له‌سه‌ر کوڵمی
په‌یکه‌ری بێ گیانی مێژووی
له‌بۆنه‌و ساڵیاده‌کانا
پێشانگه‌یه‌کیان بۆ ئه‌کاو
له‌گه‌ڵ حاشیه‌و مه‌یته‌رو سوارچاکه‌کانی
نێو سوپاکه‌ی
وه‌ک نه‌ریتێکی شاهانه
به‌کۆڕاڵ بۆی، به‌کۆڵ ئه‌گرین
بۆ من، ئه‌نفال
بزمارێکی ژه‌نگاویه‌و
ئه‌هریمه‌نه شێته‌کانی شه‌ڕو کوشتار
ئه‌و پاڵتۆیانه‌ی پێدا هه‌ڵئه‌واسن
که‌شه‌ڵاڵه به‌خوێنی مه‌له کۆچه‌ریه‌کان
ئه‌و خاولیانه‌ی پێدا هه‌ڵئه‌واسن
که‌شوێن په‌نجه سووره‌کانی تیا ده‌رچووه‌و
ده‌ڵێی چه‌ند تابلۆیه‌کی سوریالین
بۆ ئه‌و
به‌شێکه له‌چێژ، له‌تام، له‌له‌زه‌ت
له‌زه‌تی ڕاوچی
به‌بینێنی لینگه‌فرتێی نێچیرکانی
له‌زه‌تی ڕه‌شه‌با
به‌له‌رزی درخته رووت و قووته‌کان
له‌زه‌تی ڕه‌هێڵه
به‌زه‌لیلی چۆله‌که ته‌ڕو هه‌ڵکوڕماوه‌کانی
وه‌رزی زریان
بۆ من ..ئه‌نفال
هه‌ر له‌زریانی روح ئه‌چێ
به‌ندی عه‌لی ..به‌هاری 2011
__________________
شاره که م , به ندی دلم , ئه ی باغی مه ن
ره وره وه ی ساوایه تیم , سابلاغی مه ن
دل به هیوات لیده دا , لانکی دلی
تو له وه رزی یادی مه ن دا , سه رچلی
خالید حسامی( هیدی )