کیژی لادێ

کیژی لادێیی نه‌شمیلی جوان چاک

بێ فڕ و فێڵ و هێدی و داوێن پاک

ئه‌تۆ هه‌ر زگماگ وه‌ها جوانی

ته‌والێت چییه‌؟ناوی نازانی

نیته‌ کراسی حه‌ریر و پۆپلین

گه‌وهه‌ری پێچرای له‌ ناو خامی شین

پۆدر و کرێم و ماتیکت نییه‌

هه‌ر نه‌تبیستووه‌(ئۆدی کڵۆن) چییه‌؟

نه‌تکرد سووراو و سپیاو چون دووری

له‌ شاری،که‌چی هه‌ر سپی و سووری

فێڕت لێ نه‌دا بسکه‌که‌ت لووله‌

ڕێژیمت نه‌گرت به‌ژنت وه‌ک تووله‌

لاجانگت وه‌کوو گزنگی تاوێ

هه‌ر بۆ خۆی جوانه‌ تیف تیفه‌ی ناوێ

کوڵمه‌که‌ت وه‌کوو گوڵاڵه‌ی گه‌شه‌

بێ سوورمه‌ش چاوه‌ مه‌سته‌که‌ت ڕه‌شه‌

وه‌کوو فرمێسکی ئاشق ڕووناکی

وه‌کوو ئاونگی به‌یانان پاکی

فێر نه‌بووی سیحر و گشته‌ک و نوشتوو

نه‌ جگه ‌گورگت هه‌یه و نه‌ موروو‌

مایه‌ی هومێدی کیژی چاو هه‌ڵۆ

نازانی مه‌کر و جامبازی و درۆ

چارشێوت نیه‌ ڕوو ناگری له‌ که‌س

نامووسی خۆته‌ پاسه‌وان و به‌س

به‌ تاسکه‌تاسک و به‌ له‌نجه‌ و لارت

به‌ به‌ژن و باڵای به‌رز و له‌بارت

به‌ دڵی ساده‌ و به‌ هه‌ستی پاکت

به‌ شه‌رم و حه‌یا و ئاکاری چاکت

منت کردوه‌ شێت و وێتی خۆت

وه‌خته‌ له‌ سوێیان گیانم ده‌رچێ بۆت

مامۆستا هێمن

ده‌ردی دووری زۆر گرانه‌ دڵبه‌را هیجران به‌سه‌

دڵ وه‌کوو په‌روانه‌ سووتا چاوه‌که‌م سووتان به‌سه‌

عاقڵان شه‌یدا ده‌بن ڕووبوندی سه‌رو ڕوو لامه‌ده‌

عاشقان کوشته‌ی جه‌فاتن قه‌تڵی مه‌زلوومان به‌سه‌

مورغی دڵ پابه‌ندی دانه‌وداوی خاڵه‌وزولفی خاو

گیری به‌ندیخانه‌ تا که‌ی به‌ندی بێ ئامان به‌سه‌

هه‌رچی بووم بردی به‌تاڵان تورکی مه‌ستی چاوه‌که‌ت

تاقه‌ت و سه‌برو قه‌رارم پێ نه‌ما تاڵان به‌سه‌

شاهیدم فرمێسکی خوێنینه‌ که‌ تۆ جه‌رگت بڕیم

عاشقی ڕووتم ئه‌گه‌ر ته‌قسیره‌ گه‌ر تاوان به‌سه‌

ئێسته‌که‌ش مه‌جنوون و له‌یلێ هه‌ن له‌ عه‌سری تازه‌دا

شێت و سه‌رگه‌ردانی تۆم،حه‌یرانی تۆم ، حیرمان به‌سه‌

گه‌نجی عیشقت پڕ به ‌وێرانه‌ی دڵه و من پێم که‌مه‌

تا زیادبێ چاوه‌ڕێی دیشم مه‌ڵێ ئێحسان به‌سه‌

گه‌ر قسه‌ی عیشقی گۆڵ و بولبول له‌ لات ئه‌فسانه‌یه‌

تۆ گوڵی خه‌ندان و ئه‌منیش بولبولی گریان به‌سه‌

ئاورت به‌ردا دڵ و گیانی حه‌قیقی چاوه‌که‌م

ده‌ردی بێ ده‌رمانه‌ عیشقت ده‌ردی بێ ده‌رمان به‌سه

ماموستا حقیقی

شارەکەم،مەهاباد

هاتەوه بیرم شەوانی شادی

شەوانی خۆشی چۆاررای ئازادی

بەڵای چوارچرا و مەلاجامی دا

کوچه و کۆڵانی نێو مەهابادی

هەرگیز دەرناچێ یادو لەبیرم

ئاخر به عیشقی ئێوه ئەسیرم

گەرەکی خڕه گەرەکی شۆانان

پڕی هەڵاله و بۆنی رەیحانان

لەهەر کۆڵانێک دەهاتنه دەرێ

دەنگی هەڵپەرکێی مانگی خەرمانان

هەرگیز دەرناچێ یادو لەبیرم

ئاخر به عیشقی ئێوه ئەسیرم

زستانت جۆانه به کڵۆی بەفرین

پاییز و گەرمێن مەڵانت دەفڕین

یا بەهارانه بەبارانی توند

تۆزو غوبارت له خاکا ئەسرین

هەر کارێک بکەم ناچن لەبیرم

ئاخر به عیشقی تووه ئەسیرم

گشت پێنج شەممۆیان کاتی ئێواران

دەچوینه چیا بۆ دیتنی یاران

پرسیارمان دەکرد له ئەستێرەکان

پێمان نیشان دەن جێ پێی ڕێبوواران

دەشتو دەری تۆن ناچن لەبیرم

منیش به عیشقی تووه ئەسیرم

پەڵه و هەوڕازی بەرزی زمزیران

شوێنی هەواڕگەی تاوڵی دەستگیران

جێی حەسانەوەی کوێستانچێکانه

بۆیه ئەو شوێنه ناچێ لەبیرم

هەر شوێنێکی تۆ دایمه لەبیرم

منیش به عیشقی تووه ئەسیرم

شێعر : خاڵە قازی