خەم هات و نیگای شاری لەباڕووتەوە پێچام

بۆ وەی نەفڕم بەژنی لە تابووتەوە پێچام

کوێستان بەڵەک و، دیلی ڕنوو باڵی گەزیزەم

داوێ کەوی ڕۆحی لە سیاسووتەوە پێچام

من دەردی دڵی گەل گڕی بەردایە هەناوم

گەل هەستی لەدوودەی سڕی تانووتەوەپێچام

شۆخێ بەنیگایێکی ڕفاندم دڵ و، پێم گوت:

مەمنوون کەلە ئاونگی گوڵی ڕووتەوە پێچام

توورن گوڵم ئەودوندی لەسەر سینەتە بۆیە

ئەشقێکی خودایی دڵی لەو جووتەوە پێچام

سووتا بەترووسکێکی ئەوینت دڵ و جەستەم

بۆت بوومە کل و وەسمە لەپێڵووتەوە پێچام

ئەشکەوتی دڵت کردە سیا چاڵی و لەوێدا

پێست وڕەگی جەستەت لەسەرەبزووتەوەپێچام

با گێژی هەناسەم هەڵیکرد، لەچکەکەتی برد

شەو بردی دڵم، یا لەخەمی مووتەوە پێچام؟!

ئه مین گه ردیگلانی

مناڵ

مناڵ یانی من و ئاڵ مناڵ
یانی من و هه‌ڤال

مناڵ مانای خۆشه‌ویستی
یانی هه‌رچی به‌دڵ ویستی

مناڵ ته‌واو رووحی گه‌وره‌
دوور له‌ هه‌رچی فێڵ ‌وغه‌وره‌

مناڵ یانی دانان،رووخان
سازکردن و لێک هه‌لوه‌شان

مناڵ یانی خوو گرتنه‌وه‌
تۆران و زوو ئاشت بوونه‌وه‌

مناڵ یانی هه‌ستان،ڕامان
زۆر که‌وتن و جارجار شه‌مزان

مناڵ وایه‌، بۆخۆیی دیتن
بۆخۆی ئه‌زموون وه‌کۆکردن

مناڵ هه‌موی مێهر‌ه‌بانی
هه‌زار قسه‌ی بێ زمانی

گوڵاڵه‌ستاوه‌ند

بۆیادگار
له‌لای تۆبێ شوێنی په‌نجه‌ی سووری دڵم

ئه‌من ئێستا له‌ڕێزه‌ی‌

داره‌کانی سه‌رشه‌قامی ڕابوردنتم

وشکه‌سی بیره‌وه‌ریت

نچڕژێ له‌ژێر‌هه‌نگاوی

مه‌راقی بێ به‌زه‌یی ڕابوردندا

هه‌رله‌وساوه ‌تۆدڵ پڕی

من دڵپڕم

دونیاش دڵپڕ

له‌تێک شکانی ده‌نگی دڵ

له‌گه‌رووی هاوارمان

ئازارمه‌ده

با

پێ بگرێ

ڕه‌وڕه‌وه‌ی ئه‌ندێشه‌له‌هێزی ڕاکردن

پێش خشکان له‌هه‌ناسه‌سواری پێ نه‌گه‌یشتندا

وه‌ره‌دابڕان بچێنین

بۆیه‌کتردۆزینه‌وه‌مان

له‌به‌هه‌شتی پڕله‌عه‌تری گوڵه‌گێلاسی وه‌رزی سوور

له‌ماڵپه‌ری دۆزینه‌وه‌یه‌ک پڕبه‌ئامێز

جارجارئاره‌قه‌ی مه‌ینه‌ت ده‌کا په‌نجه‌م

له‌ژێرباری سوتمانێکی بێ گڕ

قاناوه‌کانیش لێوڕێژن له‌ئاوی بارانه‌ی حه‌سره‌ت

پچڕپچڕبه‌رۆکی شه‌قامی سینه‌ی مرۆڤ داده‌ڕنن

هه‌رله‌ئێستاته‌مام وایه‌

لێورێژبم له‌هه‌ور

بۆ

نه‌بریسکاندن

نه‌بارین

ئاسمانێک بۆ

ته‌قینه‌وه‌ی ئاواته‌کانی باڵگرتوو

له‌ سه‌ر

پشتی گاووماسی خه‌یاڵ

ئازارمه‌ده‌!

شه‌واره‌یه‌هه‌نیسک وئاخ

له‌سه‌رڕوومه‌تی

گوڵ په‌ڕی نیگای سۆزمان

گوڵاڵه‌ ستاوه‌ند

90 ورمێ

تام

لێره‌ دایه‌ هه‌میشه‌

حزوورێک پێویسته‌

تا ده‌سته‌کانت خه‌سار نه‌بن له‌ نووسینه‌وه‌م

زۆر که‌س هه‌ن به‌ هه‌نیسکیان دا ڕۆده‌چن

وه‌ زۆریشن ئه‌وانه‌ی بای زگیان سوک تر ده‌که‌ن

حزوورێک پێویسته‌ تا خه‌سار نه‌بن نیگاکان

له‌ خوێندنه‌وه‌ی ئه‌ندێشه‌یه‌ک تا ڕاده‌یه‌ک نه‌وه‌ک به‌تاڵ

حزوورێک وه‌ک چۆڕێ ئاو

له‌ نێو قاپی ده‌روێش

که‌ زۆر خۆش به‌ ئه‌ندێشه‌ی دا رۆده‌چێ

یا ئه‌سڵه‌ن به‌ من چی ، یانی چی ؟

وه‌ک سووکه‌ ئاوڕێک له‌ رووداو

لێره‌دایه‌ نه‌ک هه‌میشه‌

ئێمه‌ هه‌ین سدق ناکا

ده‌سته‌کانت به‌ من بسپێره‌ جوانێ

له‌ مه‌رگه‌سات دا جوانێ ، به‌ من ناکرێ

بۆ حزوورم له‌ خه‌ونت دا بپاڕێوه‌

من که‌ له‌ سه‌ره‌گێژه‌م تازه‌ خه‌ریکه‌ ببمه‌وه‌

بپاڕێوه‌ تا ده‌لیلێک بهێنمه‌وه‌ پڕاوپڕی حه‌قیقه‌ت

وه‌ چ مو‌عجزیه‌ک قه‌راره‌

له‌ قاپی ده‌روێش دا ڕوو بدا

هه‌ر ده‌بێ بزانم

جوانێ بوورهانی پێویسته‌

تا جوان لێت خوورد ببمه‌وه‌

هه‌میشه‌ بۆ حزوور له‌ ئه‌ندێشه‌ت دا که‌سیره‌ ده‌مێنم

له‌ سه‌ر ئیزنت جارێ تۆزێ وه‌ده‌حه‌سێم

با خودا عه‌فووم نه‌کا

له‌ نه‌گه‌یشتن به‌ ڕاستی و

چوار خوله‌ک نوێژ

ڕاستی ؟

له‌ ئه‌ندێشه‌ت دا چ ده‌که‌م جوانێ ؟

با هه‌ر پێ نه‌زانم

ده‌ترسم له‌من ڕا دزه‌ بکه‌نه‌ نێو شه‌وت

ئاڵۆز بکه‌ن خه‌وت

لێره‌دایه‌

هه‌میشه‌ به‌ به‌ڵگه‌ ده‌سنوێژ ده‌شۆن

تا له‌ کاتی حاجه‌تدا بپاڕێنه‌وه‌

یا پاش گوناه تۆبه‌ش هه‌ر زۆر باشه‌

وه‌ ئاه ، تازه‌ پێده‌گه‌م

بۆ گه‌یشتن به‌ حزوورت

له‌ هه‌رچی حه‌قیقه‌ته‌ ماڵئاوا

جه‌لال پوورحه‌سه‌ن

کاره‌سات

من ! کاره‌سات ده‌ژیم

له‌ شڵه‌ژانی ئه‌ستێره‌یه‌ک له‌ خه‌ون ڕا

تا چوونه‌ سه‌ری قه‌ندی خوێنی ئه‌و ته‌خته‌ی په‌نام

تاڵ مه‌به‌ لێم

شیرین ترین میوه‌ی جیهان که‌ تۆ ئه‌وی

ژانی گورچیله‌ که‌ هرووژمی هێنا

سامناک ترین کابووسه‌

سه‌ودا و موعامه‌له‌ له‌ سه‌ر ژیان یا نه‌ژیان

ــ راستی باپیرم چوار گورچیله‌ی بوو

ــ به‌ ره‌حمه‌ت بێ ــ

وه‌ تۆ پێده‌که‌نی

حه‌یفه‌ که‌ ژیانم به‌شی هه‌مووی خه‌نده‌ت نه‌کا

زیز مه‌به‌ لێم

راستیه‌کان راستیه‌کی تاڵ نه‌بوون

یانی هه‌ر له‌ سه‌ره‌تا دا تاڵ نه‌بوون

تۆزێ دوور که‌وتی گه‌ڕایه‌وه‌

ــ خودا گه‌وره‌یه‌

باش ، ده‌زانی چه‌ن میلیار کاکێشانمان هه‌یه‌ و

ئه‌رێ ! خودا چه‌نده‌ سه‌رقاڵه‌ به‌و هه‌موو کاره‌ ؟

ــ من نازانم

ــ یانی که‌ هه‌ر نه‌ده‌زانی نا ــ

هه‌ر ئه‌وه‌نده‌

ــ مچه‌ گیان ، ئه‌وشۆ قه‌ندی خوێنت

به‌شی دوو چایی و قه‌نداغێک ناکا ؟

تۆ لێوه‌کانت یاغی نه‌که‌ی لێم ؟

ده‌نا له‌ من دا گوزه‌ر ده‌کا

جۆرێ له‌ تاوانی هه‌رچی ماچه‌ نه‌مکردوون

وه‌ سوحبه‌تی ئه‌و ئێوارانه‌ی که‌ هه‌ر له‌ بیرت نه‌بوون

ئاخ ، خۆشه‌ویسته‌که‌م

تێت ده‌هاڵێن حه‌سره‌تێکی سڕ

ــ تۆزێ بنوو

ورده‌ ورده‌ ئارام ده‌بمه‌وه‌

تێم ده‌هاڵێی " په‌شمینه‌یه‌ک گڕ "1

وه‌ زه‌مانێک که‌ زه‌وی به‌شی نه‌ده‌کرد

تاڵ مه‌به‌ لێم

" شیرین ژیانێک سه‌خت "2 ژیاوم من


جه‌لال پوورحه‌سه‌ن

ڕه‌نگه‌

هه‌ر ئه‌وه‌نده ، شتێکی سه‌یر نییه

منیش له هه‌مان سه‌ره‌تای باران

که کۆڵان تا ئه‌و په‌ڕی گه‌ش بینیم ته‌ڕ ببوو

باوه‌ڕم نه‌کردبوو

وه ئێوه‌ش بینیوتانه که ڕه‌نگی ئاسمان

هه‌میشه هه‌ر شین نابێ

وه تازه ئه‌گه‌ر سوێندیش بخۆم :

« په‌پوله‌یه‌کم دیوه »

ڕه‌نگه باران هه‌ر ببارێ

عیشق قازانجی زۆره

ئه‌وه‌ش ته‌عبیری منه

- ئای گێژه باران باران

ئه‌ساسه‌ن ، ده‌تانهه‌ویست

تامی ماچ له بۆنی باران لێک بکه‌نه‌وه

هه‌ڵه‌تان کردبوو

وه تازه هیچ مه‌سه‌یجێکیش ڕه‌نگه نه‌توانێ ئاشتان کاته‌وه

هه‌ر ئه‌وه‌نده

باران باریبوو

وه ئێوه‌ش چیتر له په‌نجه‌ره ڕامه‌مێنن

جه‌لال پوورحه‌سه‌ن

چه‌ند کورته‌ شێعر

۱

کیژێک دڵی بردووم

ساڵه‌هایه‌ ، من ده‌ڕوانمه‌

له‌نجه‌ و گۆزه‌ی شانی

هه‌ر چه‌ند عاشقی بووم

به‌ڵام گه‌لێک تووڕه‌م

له‌و که‌سه‌ی وێنه‌ی ئاوا ده‌کێشێ

ئاخر چۆن نه‌یزانی ، ئه‌و نازداره‌

شان و پیلی دێشێ

۲

بوومه‌ پارتیزانی ئێواره‌ت

هێند به‌ دوات دا هاتووم و چووم

ئه‌وڕۆ له‌ که‌مینی بێ مه‌یلیت که‌وتم

زۆر بێ به‌زه‌ییانه

‌ شه‌هید بووم

۳

ده‌ڵێن : ده‌خورێی

هه‌ر که‌ ئێواره‌ ده‌هات

پێده‌که‌نی به‌ من به‌ هه‌ر رێبوارێ

چه‌ند گه‌مژه‌ بووم

نه‌مزانی به‌ ئاوی ڕوبارێش

له‌ گه‌رووی من ناچییه‌ خوارێ

۴

بۆ ساز کردنی ژینێکی پڕ سه‌مه‌ر

تۆ ببه‌ به‌ خاوه‌ن کار و

منیش ده‌بم به‌ به‌ڵێنده‌ر

۵

نازانن چی بکه‌ن له‌گه‌ڵ من

بوومه‌ چه‌قڵی چاوی دوژمن

۶

مێژوو ساز بوو

دوو دڵ له‌رزان

ئه‌‌ویان به‌ زرمه‌ی تۆپ و

ئه‌میشیان به‌ شکانی فنجان

۷

باشه‌ ، شه‌رم بۆ بمگرێ

نیگام که‌شتیه‌که‌ ، سه‌رگه‌ردان

لێی گه‌ڕێن ، له‌ ده‌ریایی چاوێک دا

ئاخرێکه‌ی ، که‌نار ده‌گرێ

۸

ڕۆژێک هه‌ر دێ بڵیند ‌بێ

دووکه‌ڵ له‌ کۆلکه‌ی بێدادی

شتێکم گووتووه‌ ئه‌وه‌ش ده‌ڵێم :

به‌ بڕین چێ ، سه‌رێک

تێیدا نه‌بێ ، سه‌ودایی ئازادی

۹

تۆ ده‌تگووت :

نێوانی من و تۆ

بۆشاییه‌کی‌ ئه‌سته‌مه‌

من ڕاناوه‌ستم

یا ئه‌و بۆشاییه‌‌ پڕ ده‌که‌م

یا پردێک هه‌ڵده‌به‌ستم

۱۰

قه‌ندیل ئه‌و به‌رزایه‌ی

بیر تێیدا ده‌فڕێ و ئازاده‌

چۆن ده‌هێڵم دوژمن

سه‌ری کوردی لێ باده‌

۱۱

من ئاماده‌م

با به‌ سه‌رنێزه‌ ، داگیر کار

هه‌موو له‌شم بکێڵێ

به‌ڵام گوڵێکی ئه‌و نیشتمانه‌م

له‌ ژێر پێی دا نه‌شێلێ

جه‌لال پوورحه‌سه‌ن

ژیان

ژيان ، خاچيكي گرانه

من وه ك عيسا،

به ره و گردي ياخي بوون ، كيشي ده كه م

يان، گاشه به ردي تاوانه

من وه ك سيزيف

له بناري منداليوه

هه تا لوتكه ي مه رگي ده به م!

هه رچه نده بارم زور گرانه و

هه زار ساله

ئه م هه ورازه تووشه ده برم

به لام شادم

كه سه ر ئه نجام

له جولجوتاي عيشقا ده مرم!

(جه لال مه له کشا)

چرای ئەسرين

دەستم لەمل ڕێگەی غەریبی کرد و ڕۆیشتم

خۆزگە و خەم و تەنیایی خۆمم برد و ڕۆیشتم

قرچەی دڵی خاکێکی توونی و خونچەیێکم بیست

چۆخەی ڕەشی هەورم لەبەر دڵ کرد و ڕۆیشتم

دەنگێکی تەنیا لەوپەڕی ئاسۆ زریکاندی

من ئەشق و ڕۆحم کردە ڕێگە و پرد و ڕۆیشتم

تەنیایی ئینسان، چاخی دووکەڵ، مردنی جوانی

نامۆییی دڵ، بەو دەردە ڕۆحمی برد و ڕۆیشتم

شەوبا لە ڕووی دام شەونمی ئەستێرەیێکی سوور

دەسنوێژی ئەشقم بەو دڵۆپەی شرد و ڕۆیشتم

تاریکی داباری ڕچەی هیوامی هەڵلووشی

چاوم چرای ئەسرینی بۆم هەڵکرد و ڕۆیشتم

ژاکانی ئەشق و مردنی دەریا و ژیانم دی

شێتانە ئەمنیش بۆیە ڕۆحم مرد و ڕۆیشتم.