شه‌هیدم که،‌ با تێکه‌ڵی ده‌مارت بم

له‌ مژی نیگایێکته‌وه‌

دوکه‌ڵ ئاسا

لوول لوول له‌ ئاسمانی چاوه‌کانت خزیم

تروسکه‌یه‌ک ئه‌هوورایی و

لێڵ لێڵ

به‌ له‌پی خه‌یاڵی بزه‌ته‌وه‌

کۆتری جه‌سته‌مت خنکان

ئه‌تۆ مه‌ستا؛

نه‌ت ئه‌زانی

له‌ هه‌ناری لێوته‌وه‌

گوڵه‌باخی ماچم سوور ئه‌بێ و

بێڵوو بێڵوو

به‌ وشه‌ی ترێی سنگته‌وه‌

مه‌ست ئه‌بم؟!

ئه‌تۆ گێژه‌؛

نه‌ت ئه‌زانی

تیری نیگات نامگلێنێ و

فێری فڕینی شاخ ئه‌بم؟!

نه‌شت زانی

من له‌ تۆ دام و

کوشتنم

خوێنی گه‌رمم

له‌ ناو ده‌مارت ئه‌چزێنێ و

تۆش ناچاره‌ن خۆشمت ئه‌وێ!

بۆدواجار...

له‌گه‌ڵ ته‌نیاییا

هاوسه‌فه‌رم و

بۆ دواجار غه‌ریبی

ئه‌م هه‌رێمه‌

ئه‌که‌م به‌ قه‌سیده‌ی به‌رپێت

به‌ ئاشناترین وشه‌ی خۆشه‌ویستی

پیرۆزبایی مه‌رگی

دووریت لێ ئه‌که‌م

ئه‌بمه‌ هاوڕێی چی

بیره‌وه‌ریته‌و

ئاشنات ئه‌که‌م به‌

نامۆترین قوژبنی

ئه‌م شاره‌

فریشته‌ی ڕۆحم هاژه‌

بۆ دوا جاره‌

بۆدوا جاره‌.........

ئێواره‌

ئێواره‌یه‌و نم نم

خه‌می لێ ئه‌بارێ

له‌زه‌رده‌په‌ڕا

تڕاژدی کۆچی هه‌تاو

فلیمێکی کورته‌

به‌شریتی ئاسمانه‌وه‌

بۆ نادیارێ

هه‌ور بۆته‌ کورسی

بۆ په‌رده‌ی سینه‌مای ئه‌م ئێواره‌یه‌

هه‌ر مرۆڤێ به‌ چه‌شنێ سه‌یر ئه‌کا

سه‌یرئه‌م وێنه‌یه

له‌ کورسێکا

دوو دڵدارپێک گه‌یشتوون

نه‌هه‌ست به‌ خه‌م ئه‌که‌ن

نه‌به‌کۆتایی و نه‌به‌ ون بوون

له‌گۆشه‌یێکی تر

پیاوێ ئه‌گری

بۆ کورسیێکی چۆڵ و ڤاری

له‌مسه‌روله‌وسه‌را

که‌سانێ هه‌ن

که‌له‌گه‌ڵ هه‌مان تڕاژدیا

سه‌یری فلیمی

ئاوه‌ته‌کانیان ئه‌که‌ن

ده‌رهێنه‌ری ئه‌م فلیمه‌

په‌رده‌ی سینه‌مای شه‌و

ئه‌هێنه‌ته‌خوارێ و

هه‌موو ئه‌م هۆڵه‌ جێ ئه‌هێڵن

ته‌نیا کورسی خه‌م

لای من ئه‌مێنێ و

من هه‌ستیاری ئه‌م ئێواره‌م و

خه‌م یه‌خه‌ی گرتووم و

منیش یه‌خه‌ی پێنووس کاغه‌زو

کاغه‌زیش یه‌خه‌ی شێعر.........

...خه‌م...

خه‌م شه‌رابێکی کۆنی چه‌ن ساڵه‌ بوو

له‌ناو په‌رداخی سووری دڵمدا

من ئه‌م شه‌و پێک له‌ دوای پێک

هه‌ڵمدا!!!

تا کوو مه‌ستی خه‌م بووم و

خه‌و په‌رده‌ی کێشا

به‌ سه‌ر په‌نجه‌ره‌ی چاوما

کاتێ شووشه‌ی بێداری شکا

هاورێیان پێیان گوتم

که‌ ئه‌م شه‌و به‌ده‌م خه‌وه‌وه‌

چیڕۆکی ئه‌شقێکی چه‌ن ساڵه‌ت گێڕایه‌وه‌.......

مه‌رگ...

ده‌وله‌مه‌ندێ مرد

پاره‌پڕبه‌نرخه‌که‌ی پێکه‌نی

هه‌ژارێ کۆچی دوایی کرد

هه‌ژاری خۆی پرسه‌ی بۆ گرت

به‌لام کاتێ

شاعیرێ مالئاوایی له‌ژیان کرد

چی پێنووس وچی ده‌فته‌رو

چی عه‌شق و خۆشه‌ویستی بوو

هاتنه‌گریان و

شێعرخۆی پرسه‌ی بۆ گرت.....

ئاوێنه‌...

که‌ هاتیه‌نێوماله‌که‌م و

نه‌ختێ له‌ به‌ر ئاوینه‌دا

ڕاوه‌ستایی و

هه‌ندێ جوانی ڕوخسارت و

خشڵی قژه‌کانت جێ هێشت

ئاله‌وساوه‌

ئاوێنه‌که‌هه‌موو ڕۆژێ

نۆربه‌ نۆرجێگا ئه‌گۆڕێ و

جوانیت ئه‌کاده‌مامک و

قژه‌کانت له‌سه‌ر ئه‌کا

ئاخۆم ئه‌ویش له‌ناوتۆدا

ئه‌و جوانیه‌ئه‌بینێ....

...نامه‌...

نیوه‌ شه‌و

کچێک چاوه‌ڕێ بوو

له‌ درزی تریفه‌ی په‌نجه‌ره‌وه‌

نامه‌یه‌کی به‌ده‌ست بگاتێ و

په‌نجه‌یێک بیگوشێ و

ماچێکیش ببه‌خشێ!

له‌ ناکاو پرخه پرخی خه‌وێک

تریفه‌ی ئه‌ترساند

په‌نجه‌ی ئه‌له‌رزاندو

نامه‌ خۆی پێچاوه‌و

ماچ بۆلای گۆنا گه‌ڕاوه‌

به‌ڵام هه‌ر چۆنێ بێ

ماچی به‌خشی‌

تریفه‌ش پێکه‌نی

بۆ به‌یانی خرپه‌ بۆ بێداری گێڕاوه‌

ئیتر له‌و ڕۆژه‌وه‌

نه‌ تریفه‌ هاته‌ ژوورێ و

نه‌ په‌نجه‌ره‌ نامه‌و ماچی ئه‌گۆڕاوه‌

...تاوان...

زۆر له‌مێژه‌ هه‌ڵوه‌دای تۆن

تۆیان له‌ زه‌رده‌په‌ڕی ئێواره‌یه‌ک دا

گرتووه‌!

ئه‌ڵێن تۆقاتلی یه‌که‌م گزنگی

به‌یانیانی!

تۆبکوژی هه‌تاوی

تۆبکوژی رووناکی

ئه‌ی خوای جوانی

به‌م تاوانه‌وه‌ ناسراوی

......نا......

کاتێ وتم خۆشم ئه‌وێ

ئه‌و وتی نا

کاتێ وتم ئه‌تپه‌ره‌ستم

ئه‌و پێی وتم

ته‌نیاخوا!!!

کاتێ وتم

جێت ئه‌هێڵم

ئه‌و پێی وتم

توخوا نا...........!!!‌

پاییز

به‌یادی تۆی به‌هار

نه‌ختێ له‌ به‌هارم

برده ناودێڕی شێعرێکمه‌وه‌

شێعره‌که‌م بۆنی بارانی داو

ڕه‌نگی گوڵی گرتوو

ئه‌وینی له‌ ناوا،ژیاوه‌!!!

کاتێ به‌ هۆی دووریت

یه‌ک جارنووسیم پاییز

شێعرم زه‌رد هه‌ڵگه‌ڕاو

ده‌فته‌رم

گه‌ڵاگه‌ڵا وه‌را.......