هەی، کەرێکم بوو، چ پەیکەر؟ تەی کەری هەوراز و لێژ
سینە پان و موچە کورت و شانە بەرز و گوێ درێژ
بن زک و جەبهەت سپی، کلک ئێستر و دامەن سیا
یەککە تاز و سێ بڕ و دوو باد و شەش دانگ و درێژ
کەللە وەک جەڕڕەی شەرابی پڕ نیشات و تەڕ دەماغ
شێری نەڕ، ئاهویی بەڕ، گورگی سەفەر، قەمچی نەچێژ
مل عەلەم، شیرین قەلەم، ئاهو شکەم، مەیمون قەدەم
سم خڕ و کلک ئێستر و مەنزل بڕ و عارەق نەڕێژ
زەرق و زەڕڕاقیی وەکو خاکستەر، ئەمما بێ غوبار
بەرق و بەڕاقیی وەکو پیرۆزە، لاکین بێ کڕێژ
سم وەکو یەشم و لە پەشم و تووکی پێدا سەرنگون
چاو وەکو بیجادە یا دوو شەوچراغی شوعلەڕێژ
گوێ درێژێ، بار و کورتان بەرز و پاڵانی بەزێن
چوست و وریاتر لە گوێ کورتانی پاڵانیی و گێژ
قانیعی بابی ڕەزا و ڕازی بە پوش و دڕک و داڵ
سالیکی سەبر و تەحەممول، بوردەبار و هیچ نەوێژ
عاقڵێ بوو ناوی کەر بوو، قاتیعی ڕێگەی سەفەر
خۆش سلوک تر بوو لە سەد وێڵداشی هەرزە و گێژ و وێژ
(صائم الدهر)ی بە ڕۆژ، ئەمما بەڕۆژووی بێ نییەت
(قائم اللیل)ی سلوک، ئەمما سلوکی بێ نوێژ
چەندە پێم خۆش بوو زوبانی حاڵی دەیوت: (نالییا)
هەردوو حەیوانین، ئەتۆ گوێ کورت و ئەمنیش گوێ درێژ

نالى

بوومە خاکی سەری ڕێی ، پێیەکی تا پێما نا
وتی:سەد دەفحە بخۆ ئەی حەریکەی بێ مانا

تەڵەبی ڕەحم و مرووەت لە دڵی ئەهلی زەمانا
تـەڵـەبی ئاوی حــەیاتـە لە سـەڕابسـتـانا

... قاتی پیاوە لەسەر ئەم ئەرزە ، دەبینی مەنسور
بـەسـەری دارەوە ، (ذاالنون)ە لەبـن زیـندانـا

لە قسێکی لەبی پشکوتوە شۆری دو جیهان
قسـەیەک سـەد لەکی مانا لە لـکـی دامانا

قەسەمی گوێمی بە چاوی بەچە دا پیری موغان
کە لەمـەولا نەیبیێ وەعـز و قسـەی مەولانا

وۆوی سەر خستووە بن خاکە ، سەر ئەفرازی بەر
هەر لە ڕێگـەی تـەڵەبا بوو سـەری دانا ، دانا

وتم: ئەو خاڵە چ بوو هەر کەڕەتێکت دەرخسـت
وتی: داغێ بوو بە جەرگ و دڵی (مەحوی)ما نا

مه حوى