|
دڵ وه‌کو بولبول له‌هیجری نه‌و گوڵێ ئه‌فغان ئه‌کا ناری جه‌رگ و سۆزی سینه‌م عاله‌مێ بوریان ئه‌کا وادیاره له‌م وڵاتی کۆهساره عاجزه مه‌یلی خاکی گه‌رمه سێرو هه‌م قه‌ڵای شیروانه‌کا ئه‌م وڵاته بێ سه‌فایه ،سارده بۆ عوششاقی رووت ئیشتیاقی به‌ر هه‌تاوی روومه‌تی خووبان ئه‌کا بارش و بارانی هه‌وری چاوه‌کانم جاری یه زڵمه یاخوود تانجه‌رۆیه تێکه‌ڵی سیروان ئه‌کا هه‌رکه‌سی ئه‌مرۆ له رێگای ئه‌و نیگاره ڕێی ببێ بۆسبه‌ینێ گه‌ث به موڵک و ته‌ختی شاو سوڵتان ئه‌کا ئافه‌رین بۆ له‌شکری موژگان و زولفه‌ینی سیات وابه یه‌ک ده‌م موڵکی جان و دڵ هه‌موو وێران ئه‌کا به‌رقی ئاه و سه‌یلی دیده‌ی من له هیجری دولبه‌رم هه‌ر ده‌ڵێی هه‌وری به‌هاره نه‌ڵه‌وو تۆفان ئه‌کا مه‌حمه‌لی له‌یلا ده‌خیلم تۆ به توندی وامه‌ڕۆ عاشقی مه‌جنوون سیفه‌ت له‌م ده‌شته دا گریان ئه‌کا وابه‌یادی تیغی ئه‌برۆی دولبه‌ری بێ ره‌حمی خۆی (ئه‌حمه‌د)ی عاشق خه‌ریکه رۆحی خۆی قوربان ئه‌کا احمد موختار جاف |
ئه‌گه‌ر مردم ئه‌گه‌ر مردم وه‌ته‌ن لاوانی تۆ خۆش ئه‌گه‌ر هیتله‌ر ناما، گاوانی تۆ خۆش موخه‌یه‌ر بم له‌به‌یــنی تۆ و به‌هه‌شــتا له جه‌نه‌ت دوور ئه‌بم سه‌یرانی تۆ خۆش قانع |
چاویلکه له‌و ده‌مه‌ی ڕا دڵم لێی داوه بۆ ژوان من دێوانه‌ی چاوی جوانم، چاوی جوان گه‌رچی خه‌ڵکی وڵاتی چاوجوانانم چاوی جوانم نه‌دی تێر به چاوانم هه‌تا لاو بووم چاوی جوانم لێ ون بوو په‌چه و ڕووبه‌ند و چارشێوم دوژمن بوو ئێستا پیرم و که‌وتوومه‌ته ئاویلکه چاوی جوانم لێ ون ده‌کا چاویلکه مامۆستا هێمن |
سەرمایەیی سەودا کە دەڵێن زوڵفی دوو تایە هەر پێچشی تایێکی سەد ئاشـــوەبی تیایـە بیدە بـــە دڵم، شیفتە بۆ شـــیفتە چــــاکـــە... بیخە ملم،ئەو قـــــــــــەیدە بۆ دێوانە رەوایـــە... ئەو خاکی دەرە مەسکەنی سەد ساڵەمە،شایەد جارێ لە دەمی تۆ ببیەم:"سەگ بەوەفـــایە" زوڵفت سەبەبە،دڵ بە عوزارت کە دەسووتێ سووچی شەوە وا قاتیلی پەروانە چرایـــــــە "نالی" کە ویقاری نییە،بێ باکە لە خەڵقی سۆفی کە سلوکێکی هەیە،عوجب ریایە نالی |
ده‌مێکی بابێ ده‌ای دلم کا به چاوی کالی نه‌ماوه حالم فه‌رمووت چلۆنی چۆن بم عه‌زیزم دوور له بالای تۆو کافر به حالم کوشته‌ی بالای تو سه‌ری گه‌ردانی تۆم وه‌ک زولفی شه‌یدا بۆتۆ عه‌ب دالم خۆش به‌و ده‌مانه گول گول ده‌پشکووت شه‌کر ده‌باری پرسی له حالم وه‌ک من به چاوت ئه‌سیری زولفم که‌س وا نه‌گری به داوی زالم (وه‌فایی)چی دیت له‌سه‌ر بگری نه‌ما له‌سه‌ر تۆ نه سه‌ر نه مالم (وه‌فایی) |
ئه‌ی مانگ عه‌جایه‌ب چۆنه واماوی؟ چۆن شه‌پۆلی عه‌شق قوتی نه‌داوی؟ ئه‌م هه موو زووڵم و زۆره ده‌بینی باشه كه هێشتا به‌رپێت ده‌بینی ئاهوو نزووله‌ی سته‌م دیده‌كان قه‌تاریان به‌ستووه ده‌ڕۆن بۆ ئاسمان به‌لاتا ده‌ڕۆن ده‌كه‌ن سكاڵا ده‌چن بۆ خزمه‌ت خواوه‌ندی باڵا نامه‌ی سه‌ر زه‌وین به عه‌شق نوسراون پۆل پۆل بۆ لای خوا ڕه‌وان كراون ئه‌ی مانگ عه‌جایه‌ب چۆن وه‌ڕس نابی؟ له‌م كوشتو بڕه چۆنه قه‌ڵس نابی؟ وه‌ڵامی داوه مانگ به ئه‌سپای: فیداكاری مه‌رد له‌سه‌ر هه قی خۆی به‌ژینم ده‌ده‌ن مایه‌ی ڕه‌نگو بۆی نه‌خۆش و مه‌ستی دوو چاوی كاڵــــم حه‌قم به‌ده‌سته ئه‌گه‌ر بنــــــــــــاڵم به‌غه‌مزه‌ی چاوت به‌خه‌نـده‌ی زارت بردیان به‌غاره‌ت خه‌و و خـــــه‌یاڵم فه‌رمووت چلۆنی چ بڵێم عه‌زیـــــزم دوور له زولفی تۆ، كافر به‌حاڵـــــم سه‌با ده‌خیلم هه‌ر تاكو مــــــــــاوم بڵێ به‌زاری بڕۆ به‌خاڵــــــــــــــــــم ده‌مێكی بابێ ده‌وای دڵم كــــــــــــا به‌‌چاوه‌كانی گه‌لێ بێ حاڵــــــــــم (وه‌فایی) چی دیت له‌سه‌ر بــگێڕێ نه‌ما له‌سه‌ر تۆ نه سه‌ر نه مـــاڵم وه‌فایی |
گوڵی خوێناوی کوڕ: بروانە، شاییە، چۆپییە لەو ماڵە گوێ بگرە، زوڕنایە، دەهۆڵە، شمشاڵە زەرد و سوور تێکەڵ بوون، ژن و پیاو، هەرایە لەوناوە هەر هاڕەی هەیاسەی تۆ نایە سا تو خوا خێراکە، با بڕۆین دەس بگرین بە کامی دڵداریی پێکەوە هەڵپەڕین کچ: گوڵ نەبێ بۆ سەرم، ئاڵ چەپکێ، زەرد چەپکێ نایەم بۆ زەماوەند، نایەم بۆ هەڵپەڕکێ کوڕ: کچ لەڕێی جوانیتا، کچ لەڕێی جوانیتا کچ لەڕێی نیونیگای هاتوچۆی کانیتا پایزە، گەڵای دار ڕژاوە، باخ ڕووتە گوڵ کوانێ؟ گوڵ لێوی بە بزە پشکووتە کچ: گوڵ نەبێ بۆ سەرم، ئاڵ چەپکێ، زەرد چەپکێ نایەم بۆ زەماوەند، نایەم بۆ هەڵپەڕکێ بتدایە دڵ بە من، بە هەموو ماناوە دوو چەپکت ئەهانی، لە باخچەی پاشاوە کوڕ ئەڕوا و لەبەرخۆیەوە گۆرانیی ئەڵێ: باخچەی پاشا لەوبەر ئاوە، خێڵی دوشمن دەورەی داوە ئەڕۆم، رێگام لێ گیراوە، ناڕۆم، چاوکاڵ لێم تۆراوە بەرەبەرە لە دێ دوور ئەکەوێتەوە..... کوڕ: بە باخچەی پاشادا ورد گەڕام، خوار و ژوور زەرد هەبوو بۆم چنیت، چنگ نەکەوت گوڵی سوور نازانم ئەمجا دێیت بۆ شایی و هەڵپەڕکێ؟! کچ: نایەم، گوڵ ماویەتی بۆسەرم، سوور چەپکێ کوڕ یەخەی مراخانیی ترازاند: ناتەوێ ئەم زامی سەر دڵەم لەباتیی؟! کچ: هەی هاوار، تفەنگی دوژمنیش پیکاتی؟! راکشێ، تاوێ سەر بنێ سەر ڕانم با بگریم بۆ دڵێ، بۆ گوڵی دۆڕانم مامۆستا گۆران |
مامۆستا هێمن لە شیعری "فرمێسکی گەش" دەڵێت: قەت لە دنیادا نەبوو بێجگە لە ناخۆشی بەشم مات و داماو و پەشێو و بێکەس و چارەرڕەشم سەردەمێک ئاوارە بووم و ماوەیێکیش دەسبەسەر نەمدی ڕووی ئاسوودەیی، هەر توشی گێرە و قەرقشم دابی کوردی وایە، کەس لاگیری لێقەوماو نیە بۆچی سەرکۆنەی بکەم، لێم زیزە یاری مەهوەشم؟ تیغی بێ مەیلی و جەفای ئەو نازەنینە دڵڕەقە جەرگی لەت کردم بە جارێک، ئەنجنیویە سینەشم کوشتمی و شەش خانی ئوممێدی لە من گرتن حەریف مۆرە هەڵداوێم و بێهودە بە هیوای دوو شەشم نابینی زەردە لە سەر لێوی کەسێ لەم شارە دا گەر خەم و دەردی دڵی خۆمیان بە سەردا دابەشم خۆشەویستی گۆشەکەی تەنیایی هەر ئەژنۆکەمە بۆیە ڕۆژ و شەو وەها گرتوومەتە نێو باوەشم نایەڵێ دوژمن بەڕەنگە زەردەکەی من پێکەنێ تا دەمی مردن ئەمن مەمنوونی فرمێسکی گەشم شاعیرێکی ڕاست و یەکڕووم و فیداکار و نەبەز کوردە موحتاجی محەک نیم، زێڕی بێ غەلل وغەشم |
یــار بـە مـاچـی لـێـوی خـۆی زامـی دڵان سـاڕێــژ ئـەکـا تونـد تەماشـا کردنێکیشی شەخسـی عاقـڵ گێـژ ئەکـا ئـەی خـودا تاکەی لە دەرهـەق من وەفـا و مەیلـی نیـە بـۆچ گڵـۆڵەی بەختـی من هەر ڕوو لە جێگەی لێـژ ئەکـا مــاڵــەکــەم وێــران ئـەکــا ڕۆژم ڕەش و تـاریــک ئــەبـــێ یار بە سورمەی ناز کةە وەختێ چاوی خۆی کل ڕێژ ئەکا وشکـە سۆفـی هاتبـوو ئەیـوت بەهەشـت هـەر بۆ منە ڕیشی خۆی جوڵان وەک و سابرێن کە شەو کاوێژ ئەکا کـەی خـوا تـوجـارە ؟ خـوا گـەورە و غـەفــور و عـادلــە چـۆن لەگـەڵ عەبـدا حسابـی قەرزی ڕۆژوو نوێـژ ئەکـا قافیە هەرچەندە تیکرارە بەڵام " ئەحمەد " هەر بە دڵ هـەر بـە یـادی تـاقـی ئەبرۆی تۆیە جار جار نوێـژ ئـەکـا احمد موحتار جاف |
عه‌جه‌ب ماوم له جه‌رگــــــــت، ئه‌ی دڵه‌ی غافڵ، که موددێکه له‌ســـــــــــــه‌ر ئه‌م ئاگــــــــره‌م داناوی، هێشتا هه‌ر نه‌برژاوی مه‌ثه‌ل دنیا ژن و، چه‌رخیش خه‌ڕه‌ک، ده‌م ده‌م به‌دۆخی غه‌م ڕه‌گی تاری وجــــــــــــــــــــــودت با ده‌دا، هێشتاکو هه‌ر خاوی زه‌مانه چه‌رخ و، چه‌رخی ئاســـــــــــــمانیشی، فه‌له‌ک فیلکه سه‌ری ڕشته‌ی وجودی چه‌نده بــــــــــــــــــاداوی و هه‌ر ماوی مه‌گه‌ر مه‌یخانه‌یه دنیا که‌وا کاســــــــــی له‌به‌ر کـــــــه‌ئـسی! به نه‌غمه‌ی عودی سوتاوی، به‌نه‌شــــــئه‌ی طاسی تاساوی! ئه‌مێسته‌یش، گـــه‌رچی عه‌یش و عوشره‌تت هه‌ر تاڵ و تاڵاوه به مه‌رگی تۆ، له پـــــــــــــــــــاشانیش ده‌خۆی تاڵاوی تاڵاوی نالی |
| اکنون ساعت 09:40 AM برپایه ساعت جهانی (GMT - گرینویچ) +3.5 می باشد. |
Powered by vBulletin® Version 3.8.4 Copyright , Jelsoft Enterprices مدیریت توسط کورش نعلینی
استفاده از مطالب پی سی سیتی بدون ذکر منبع هم پیگرد قانونی ندارد!! (این دیگه به انصاف خودتونه !!)
(اگر مطلبی از شما در سایت ما بدون ذکر نامتان استفاده شده مارا خبر کنید تا آنرا اصلاح کنیم)