زه لان هه لس ! بشیونه م !

چه نیگه هامه جه رخه گه ی

ولات چه فته چاره گان

زه لان هه لس ! بشیونه م !

هه جوور گیس دار گان

هه جوور یه ی شه واره که ر !

شه که ت شه که ت وه بی خه وه ر !

وه بی ت بوومه ده ر وه ده ر

له کیوچه گان شاره گان

وه سه ف وسانه یه ک وه یه ک

وه یه ی چراخ بی نزه و

منه ی مِ که ن په ژاره گان

منه ی ت ِ که ن هساره گان

چه نیگه بیستیون منه ی

فه رای عاشقی نیه که ی

له سال سمکوو سیه ی

شرین سه رسواره گان

چراخ تاشه گان به رز !

چه وه یل مانگ و خوه ر تنی !

دواره بال چه و بیه

سه حه ر له سه ردیاره گان

دلم گیر چه‌وه‌یلیگه
چه‌ووه یلِ کالِ له‌یلیگه

چه‌ویگ ئاگر وه کوولم که‌ی
هه چیو شاره‌یل چوولم که‌ی
وه‌لا به‌یده‌م وه‌روه‌و جاران
وه ملک سه‌وز نازاران
وه‌لا به‌یده‌م وه‌ره‌و رووژی
گ ها گیانی له گول تووژی
وه‌لا به‌یده‌م وه‌ره‌ومالی
گِ به‌رزه شین شمشالی

وه‌لا به‌یدم وه‌ره‌و هوهو
وه‌ره‌و وه‌فره‌یل دالاهو و ...
له ناو رووژه‌یل وارانی
هه‌رئه‌و جووره گِ خوه‌د زانی،

هه چیو مجنوونِ ئاواره
وه شیتی ریو نه‌مه‌ی شاره

منوو شه‌یو خیس دریایی
دلِ له دووس برپایی
منوو قرچه‌ی دلِ کالی
منوو ئه‌وره‌یل شه‌یو والی
...
وه تک تک ئه‌وره‌گه‌ی که‌و که‌و
هه چیو ئه‌وریشم خوه‌زیه‌و

تکی ، شووری په‌ژاره‌یلم
له نوو گول ده ی وه‌هاره‌یلم

دیوه‌ت قژهیول خوه‌زیه‌و تی
ده‌نگ چیوه‌زه‌یل که‌و‌ که‌و تی ...
له ناو رووژه‌یل وارانی
هه‌ر ئه‌و جووره گِ خوه‌د زانی،

ره فیقن ئه‌ولما هه‌ر سوو
مه‌لیوچک ، ئاسمان ، ئاسوو

بهار ٨٨

تِ هاتی !

شه‌واریو ، ئاسمان سالِ خه‌می بیو
سپای زمسانِ جاران هاوده‌می بیو

خه‌یالِ یه‌ی هساره‌ی کوورپه‌ بالی
نه‌یا چیوزه له ناو باخِ خه‌یالی

ته‌مام داره‌گان له به‌ر جیا بیون
ئرای فه‌سلِ خوه‌شی ده‌س وه‌ دوا بیون

**

تِ هاتی ! ئاسمان له‌ینوو که‌وه‌و بیو
دواره هاوره‌نگ مانگه‌شه‌وه‌و بیو

وه هه‌ر جا نوورسی بالِ فریشته‌یو
چه‌وه‌یل که‌وکه‌و و کالِ فریشته‌یو

گولِ گولباخیِ باخه‌یلِ بانان !
کلامد گول له‌قه‌ی شاخه‌یل بانان !

ت وارانید و ئیمه چیو که‌ویریم
چه‌نی چه‌ن ساله له عشقِ تِ پیریم

حه‌دیسد نیور ره‌حمان و ره‌حیمه
سلامد هد‌یه‌گه‌ی گه‌ورای که‌ریمه

هساره‌ی ئاسمان بی که‌سه‌یلی
گول نیور خودا له باخِ له‌یلی

هناسه سه‌وزه‌گه‌د فه‌سل وه‌هاره
قه‌رارِ عاشقه‌یلِ بیقراره

گول خوه‌ر چیوزه ده‌ی له ناو ده‌سه‌یلد
هساره‌یلِ فه‌له‌ک گِل خوه‌ن وه‌مه‌یلد

تمام که‌وتره‌یلِ حووزِ واران
خوه‌نن له به‌رزیِ سه‌وز نساران

تِ واران وه‌هاره‌یلِ عه‌زیزی
گولِ نیورِ هساره‌یل عه‌زیزی

هه‌نای واران سه‌وزی بان زه‌یو گرت
هساره‌ی دلخوه‌شی داوان زیوگرت

په‌لامارِ تِ به‌ن ئی ده‌روه‌چه‌یله
هه‌واخوادِن له بن ئی په‌لوه چه‌یله

خالوو چیلی که‌ر !


زمسان سه‌ردیگ وه دزی خوه‌ره و
ده‌نگ که‌سیگ هات له‌و یال سه‌ره و

ها ها ها هاواوار ! مه‌ی زه‌خم نوو که‌ر !
ته‌وره تیژه‌گه‌ی منه‌ی چروو که‌ر !

وه هاوشی خه‌مه و وه کیسه‌ی ژاره‌و
هه‌ر سوو چوه که‌یدن وه زه‌رده ماره‌و

تیوله ساچلگه‌ی به‌ریو خه‌م وه کوول
ته‌نیا وامه‌نه‌ی کیویله‌گه‌ی چوول

چه خه‌تای کردیو گلاگه‌ ی رشیا
هه‌م به‌ختی سزیا هه‌م بی که‌ س کوشیا

خالو چیلی که‌ر راسه‌و کرد قووخی
ناسی کیشا ئاگر دا چووخی

وه ت : چوه توای له ته ور من گونابارم
منم رچلک به‌ریو درارم

رای یه‌گ زه‌خم گیان خاسه‌و بوود
شوون هه‌ر ته‌ورم زه‌خمیگ راسه‌و بوود

هه‌رشه‌و تا وه سوو من کوشته ی ژانم
له ده س نامه ی ئالووش ده ی گیانم

زیره ی بی که سیم تا ئاسمان چوود
ناله ی نه داریم تا که شکه شان چوود

هه ر له ئیواره خه م میه وانمه
خه ت خه تی که ر ری بانانمه

زه حاک زالم ملک گیانمه
گریه کووره گه ی ریو زوانمه

ته ته نیا مه نیود بیوده ریارم
بیوده حاشاکه ر رووژه یل تارم

زانی وه ده رد مه نیه ت دچارم
منیش وه ی دونیا دی نیه کارم

وه و ئاه سه رد بی فریای ره سه و
خالوو چیلی که ر « ها » کرد وه ده سه و

ته ور گرته و هه وا وه و ئه خم خه سه و
دا له ساق خوه ی وه و زه رب شه سه و

دا له ساق خوه ی خیون کیوه پووشان
تلیشان جه رگ زه یو و ئاسمان

هه م خوه ی باله و گرت هه م خوسه یله گه ی
هه م پای له جه ور که فت هه م ده سه یله گه ی

چه نی چه ن سال سه وز وه هاره
ته قه ی ته ور نیه تی له ی زه رده ماره

وه لی له سه ردی سای سه ردیاران
له هوونکی سوو لای نه رمه واران

نه ر خاس هیورده و بیود له کزه ی جاران ،
گاجار « شه مال» تی شه کنی داران

وه کزه و چری : وه ره نج بیوه ر
ها ها هایده کوو خالوو چیلی که ر !؟

هه ر له و ساله وه داره یل مه دهووشن
تمام زمسان کول سیا پووشن

زه‌رده مار : ‌نام کوهی است در روستای هوشیار چله

چه‌نیگه هامه جه‌رخه‌گه‌ی ولات چه‌فته چاره گان

زه لان هه‌لس ! بشیونه‌م ! هه جوور گیس دار گان



هه جوور یه ی شه واره که ر !شه‌که‌ت شه‌که‌ت وه بی خه وه ر !

وه بی ت بوومه ده ر وه ده ر له کیوچه گان شاره گان



وه سه ف وسانه یه ک وه یه ک وه یه ی چراخ بی نزه و

منه ی مِ که ن په ژاره گان منه ی ت ِ که ن هساره گان



چه نیگه بیستیون منه ی فه رای عاشقی نیه که ی

له سال سمکوو سیه یشرین سه رسواره گان



چراخ تاشه گان به رز ! چه وه یل مانگ و خوه ر تنی !

دواره بال چه و بیه سه حه ر له سه ردیاره گان

گیان تنوو فریشته‌گان

په‌ری په‌ری له‌ ئی کیه‌نی وه ئه‌و کیه‌نی وسانه ‌هه‌م
« کونه‌وه‌کوول» و سه‌ر په‌تی دیوه‌ته‌یل سه‌ف به‌سانه ‌هه‌م

هه‌چیو هساره بربرن ، چه‌وه‌یلِ ئاگر گرن
دیوه‌ته‌یلِ ئیلِ که‌لهورن ک له‌ی وه‌ره وسانه‌ هه‌م

فریشته‌گان وه ده‌و ده‌وه‌و وه جامه‌که‌یلِ که‌و که‌وه‌و
ئرا یه‌گِ تِ بیوننه‌و ره‌سن وه‌ی ئاسمانه‌ هه‌م

هساره‌گه‌د له ناویان وه له‌رزه ‌له‌رزه له‌رزیه‌و
وه باله‌گانِ به‌رزیه‌و ریار که‌شکه‌شانه هه‌م

هناسه‌گه‌ی وه‌رِ سووه‌و دواره که‌وتره‌یل نوو
وه‌لِ یه‌کا کوروو کوروو باله‌گه‌یان به‌سانه‌هه‌م

***
گیان تنوو فریشته‌گان له مال خالوو ئاسمان
وه‌ خاتر چه‌وه‌یلِ تِ دواره چه‌پ کوتانه‌ هه‌م !

شه‌وه‌یلِ نوو

شه‌وه یلِ ئیره بیله‌جی هساره به‌و بچیمنه‌و
سه‌حه‌ر له‌ئی ولاته ده‌ی ئشاره به‌و بچیمنه‌و

چه‌نیگه هاله شوونمان چه‌وه‌یلِ کالِ عاشقیگ
گلاره‌گه‌م ! گلاره‌گه‌م ! گلاره به‌و بچیمنه‌و

ئرا یه‌گِ دواره شیشه‌گان ده‌روه‌چ دلد
نه‌پووشنی وه تووز و ته‌م په‌ژاره ، به‌و بچیمنه‌و

له ئیره پایز ئاخری تمام رووژه‌گان کوشی
ره‌فیق ئه‌و ولاته هه‌ر وه‌هاره به‌و بچیمنه‌و

ئرا یه‌گِ شه‌وه‌یلِ نوو له بانیان تِ پابنه‌ی
تمام جاده‌گان چرن : دواره به‌و بچیمنه‌و

ليموه‌يل قه‌سر

پري له ئه‌تر ليموه‌يل داره‌گان قه‌سر ئه‌زيز !
وه بوون چه‌و تنه‌و تيه‌ن هساره‌گان قه‌سر ئه‌زيز !

شه‌وانه هه‌ر خه‌وه‌يل كه‌و تِ هاله ناو خه‌ياليان
مه‌ليوچگه‌يل بي كه‌سِ چناره گان قه‌سر ئه‌زيز !

چه‌وه‌يله گه‌م ! چه‌وه‌يله‌گه‌م ! هساره‌گه‌ي شه‌وه‌يله‌گه‌م !
هه‌ميوشه رووشنه‌و تِ كه‌ي شه‌واره‌گان قه‌سر ئه‌زيز !

سيه‌پريوسنه‌ك وه ئزن چه‌و تِ چووده شوونيان
هه‌ناي دواره تووريه‌ن وه‌هاره‌گان قه‌سر ئه‌زيز !

ئراي ره‌سين وه ناو ده‌م تِ زيق كه‌ن شه‌وي ئه‌گه‌ر
ته‌ره‌ك بوه‌ن وه قه‌ي په‌له‌و ئه‌ناره‌گان قه‌سر ئه‌زيز !

فريشته‌گان وه‌تن وه خوه‌د ، شنه‌ي شه‌مال گيسه‌گه‌د
پره له ئه‌تر ليموه‌يل دار‌ه‌گان قه‌سر ئه‌زيز !

له خه‌يال ساله‌يلِ بانان

نخته
سه‌ر تمام ريه‌يل زنه‌ي
ئمشه‌و
وه‌فرو
هيور تمام كه‌متاره‌يل مليس
ريار ناسياي زه‌يون
ت په‌لام هه‌رپه‌ن شه‌مه‌يگ بوه‌ي
زه‌مان هه‌لگه‌رديه‌يده‌و !
ت په‌لام هه‌ر هيور تفه‌نگيگ بوه‌ي ،
خيون چرچگيه‌يده‌و !
نخته
سه‌ر تمام ئاوه‌يل بي ماسي‌و
هيور تمام تووره‌يل پاچياي !
ئمشه‌و ده‌ليا تيه‌ني تكي ئاوه‌و
تيه‌ني تكي ماسي سيه‌ي « سيروان » ...
نخته ، سه‌ر تمام جاشه‌يل مه‌حره‌مانه
له جار جيول جال ماسي خوه‌ره‌يل
له كه‌ش كه‌شين شه‌وه‌يل شه‌كه‌ت و سيه‌ي ده‌ليا
له‌يره چيمن ،
تاگه‌رپشت تمام په‌رانتزه‌يل تك تيژ
تاگه‌ر له‌ ژير پووشه‌يل مه‌حره‌مانه
خه‌يال كال كه‌ژاله‌يل نه دارزيه‌يد !
نخته
سه‌ر تمام خه‌ته‌يل
راس و چه‌فت و چركِن و تيوكن !
ئي زه‌يوه‌
شه‌وار رچگياييگ
له ‌ژزير پووس كه‌وه‌و بيوي
سه‌د هزار په‌پيوله شاردياسه‌و
تا گه‌ر
شه‌وه‌كيانگ له يه‌ي بانان ره‌نگ په‌ري
له وينه‌ي گول
چيوزه بيه‌ن‌ و
ده‌‌س يه‌ك بگرن و
تا ئاسمان كه‌وكه‌وي
ناونيشان ولاته گريان بنيوسن
ئمجا
كام بورديزل
كام گوله
كام سيم درگين
تيوه‌نيد تيژ باگيان بكه‌يد و
ئرايان ده‌سپيچگ بنيوسيد ؟
نخته
سه‌ر تمام ناونكيه‌يل له هيوره‌وچي !
له خه‌يال ساله‌يل بانان
جاشيگ يه‌ي شه‌و سقان ته‌زن زمسان
ئراي « عه‌لي شيميايي» سه‌ر سال گريد
گول سووه‌يل بانان
به‌ريوه‌يل زاگروس خيون گيرن و
دي هيوچ شه‌واريگ له دلي نيه‌تيه‌يد
په‌نشه‌مه بزايد و
مه‌مگ بنه‌يده ده‌م سانيه‌يل چيوزه‌داي بانان
تخته
سه‌ر تمام تاشه‌يل به‌رزِ « بره‌كه‌و » و « دالاهوو » و « شاهوو »
: ت له كام « مه‌رته‌و »
نيشاند دان تا گه‌ر بنيوسي :
چه‌پاله ،
گيسه‌يل چه‌پگ چه‌پگ ،
مه‌مگه‌يل برياي ،
تيخ ، وه‌فر ، وارووه ، په‌نشه‌مه ؟!
نخته
سه‌ر تمام ئاوه‌يل وه‌يلِ
« سه‌يمره‌» و « ئه‌لوه‌ن » و « سيروان »
بانان
تمام په‌ره‌يل ئينترنت
پرن له زه‌خمه‌يل له‌ش « به‌ريو » و
خه‌يال « هه‌لپه‌رگه‌يل » كورده مالان.