باوک

به شی 1

نوسینی:

یوهان ئاگوست ئێستریندبێرگ

وه‌رگێڕ: سه‌لاح محه‌مه‌دی

سایت گروه تئاتر شه وار

که‌سه‌کان:

کاپیتان
لۆرا: ژنی کاپیتان
بێرتا: کچ
دوکتور ئۆستێر مارک
مامۆستای ئایینی
دایه‌ن
نۆژێد: خزمه‌تکار
شوێن:
ژورێکی ماڵی کاپیتان


‌1) کاپیتان و مامۆستا دانیشتون.
مامۆستا: دیسان چی بووه؟
کاپیتان: دیسان له‌گه‌ڵ ئه‌و چه‌تیوه‌ی کاره‌که‌رمان خه‌ریک بووه‌. چ گیرێکمان کرده‌!
مامۆستا: نۆژێد؟ سه‌یره‌،پاریش له‌ گه‌ڵیا هه‌ر کێشه‌ت بوو!
کاپیتان: له‌ بیرته‌؟ به‌شکم قسه‌ی بۆ بکه‌یت،ره‌نگه‌ کاری تێ بکات. تێروپڕ جنێوم پێدا. به‌ڵام بو به‌ هیچ.
مامۆستا: ئه‌ته‌وێ مه‌وعیزه‌ی بۆ بکه‌م؟ پێتوایه‌ قسه‌ی خوا کاری تێ ئه‌کات؟
کاپیتان: خۆت ئه‌زانی. له‌ مندا کاری نه‌کرده‌.
مامۆستا: به‌ڵێ ئه‌زانم!
کاپیتان: به‌ڵام بۆ ئه‌و؟ ئه‌توانی تاقی بکه‌یته‌وه‌.

2) نۆژێد دێت.
کاپیتان: ده‌ی نۆژێد،خه‌ریکی چی بوویت؟
نۆژێد: خوا قه‌زاکه‌و کاپیتان، لای مامۆستا ناتوانم!
مامۆستا: وه‌ره‌،وه‌ره‌ رۆڵه‌،شه‌رمی ناوێت!
کاپیتان: هه‌ڵیڕێژه‌،ئه‌گینا باش ئه‌زانی چیت لێ ئه‌که‌م!
نۆژێد: ده‌ی،قوربان،ئه‌زانن چۆن بوو،به‌مجۆره‌ بوو. له‌ ماڵ گابریل خه‌ریک سه‌ماو خۆشی بووین،دواجار،ئه‌رێ ئیتر،لارێس وتی...
کاپیتان: لارێس بۆ تێکه‌ڵ ئه‌که‌یت؟ بچۆ سه‌ر باسه‌که‌!
نۆژێد: ده‌ی،وتی وه‌ره‌ بڕۆین،بچین بۆ ناو گه‌وڕ.
کاپیتان: که‌وا! واته‌ ئێما تۆی خڵه‌تاند!
نۆژێد: ده‌ی،وایه‌،راس ئه‌که‌م،تا داده‌ نه‌کا بۆره‌ بۆره‌...
کاپیتان: باشه‌ بزانم، باوکی مناڵه‌که‌ تۆی؟
نۆژێد: چۆن بزانم؟
مامۆستا: چه‌ن سه‌یره‌! نازانی!
نۆژێد: ده‌ی، پیاو قه‌ت له‌مه‌ ناتوانێ دڵنیا بێت!
کاپیتان: که‌سێتریش بوو یان ته‌نیا بوویت؟
نۆژێد: ئه‌مجاره‌یان ته‌نیا بووم،به‌ڵام مانای ئه‌وه‌ نیه‌ که‌سیتر نه‌بووه‌.
کاپیتان: یانی کاری لارێسه‌؟ ئه‌رێ؟
نۆژێد: نازانم کاری کێیه.
کاپیتان: به‌ڵام وتوته‌ به‌ ئێما‌ ئه‌یخوازی.
نۆژێد: ده‌ی،به‌ڵێ، پیاو ناچاره‌ جاروبار له‌م قسانه‌ بکات!
کاپیتان: (به‌ مامۆستا) ئه‌شا ئه‌و حه‌یاو شه‌رمه‌!
مامۆستا: هه‌ر ئه‌و باسه‌ کۆنه‌. ئه‌زانی چۆنه‌ نۆژێد،ئیتر مناڵ نیت و ئه‌بێ بزانی تۆ باوکی ئه‌و مناڵه‌یت یان نا!
نۆژێد: ده‌ی،له‌گه‌ڵیا بووم. به‌ڵام مامۆستا باشتر ئه‌زانن ئه‌مه‌ مانای ئه‌وه‌ نیه‌ که‌ کاری من بێت.
مامۆستا: ئه‌زانی چۆنه‌ رۆڵه‌،خۆت گێل مه‌که‌! ئه‌زانم ناته‌وێ له‌ کچێ که‌‌ سکی پڕه نه‌پرسیت! خۆ نامانه‌وێ به‌زۆر بیکه‌ینه‌ ملت. به‌ڵام ئه‌بێ ‌مناڵه‌که‌ به‌خێو که‌یت. ئه‌بێ به‌خێوی بکه‌یت!
نۆژێد: باشه‌،به‌ڵام ئه‌ی لارێس؟ ئه‌ویش ئه‌بێ به‌شدار بێت!
کاپیتان: زۆر باشه‌. بچنه‌ دادگا. ئه‌مه‌ کاری من نیه‌ بزانم کێ راست ئه‌کات. حه‌ز به‌ کێشه‌یش ناکه‌م. لاچۆ له‌به‌ر چاوم،خێرا!
مامۆستا: نۆژێد! راوه‌سته‌. ئه‌ڵێم،پێتوایه‌ پیاوی به‌شه‌ره‌ف خۆی له‌ کچێکی بێ که‌س و کاری سک پڕ گێل ئه‌کات؟ ها؟ ئه‌رێ؟ پێت وانیه‌ ئه‌مه‌...؟
نۆژێد: به‌ڵێ،وایه‌،به‌و مه‌رجه‌ی بزانی کێ باوکی مناڵه‌که‌یه‌! به‌ڵام پیاو قه‌ت ناتوانێ له‌مه‌ دڵنیا بێت مامۆستا. گاڵته‌ی پێناکرێت هه‌مو ته‌مه‌نت ته‌رخانی مناڵی پیاوێکیتر بکه‌یت. دڵنیام جه‌نابتان و هه‌روا کاپیتان له‌مه‌ ئه‌گه‌ن.
کاپیتان: بۆ ده‌رۆ!
نۆژێد: به‌سه‌ر چاو قوربان.(ئه‌ڕوات)
کاپیتان: له‌ ده‌ورو به‌ری چێشتخانه‌ خوله‌ت نێت،چه‌په‌ڵه‌ی پیسه‌. دایکێشه‌!

3)
کاپیتان: ئه‌وه‌ بۆ به‌ قسه‌ نه‌وتۆپان؟
مامۆستا: چی؟ ئه‌زانی چیم پێکرد.
کاپیتان: ئه‌رێ،هه‌ر له‌ ژێر لێو بۆڵه‌ت ئه‌هات.
مامۆستا: نه‌مئه‌زانی بڵێم چی. کچه‌که‌ ناوچاوی نه‌یهێناوه‌،باش،به‌ڵام کوڕه‌ش هه‌روا. ئه‌گه‌ر باوکی منداڵه‌که‌ نه‌بێت چی؟ کچه هه‌ر چوار مانگ کێشه‌ی شیردانی منداڵه‌که‌ی ئه‌بێت،دواجار خوات له‌گه‌ڵ. به‌ڵام کێشه‌ی کوڕه‌که‌ به‌رده‌وامه‌. کچه‌ ئه‌توانێ له‌ شوێنێتر،له‌ ماڵی پیاو ماقوڵێکیتر،کاره‌که‌ری بکات. به‌ڵام ئه‌گه‌ر کوڕه ده‌ر بکه‌ن، به‌وبه‌خت ئه‌بێت. ئیتر که‌س کاری پێنادات.
کاپیتان: وایه‌. منیش نامه‌وێ له‌م کێشه‌ به‌شدار بم. به‌ڵام کوڕه‌ بێ تاوانیش نیه‌و ناتوانی له‌مه‌ش دڵنیا بیت. به‌ڵام ئه‌توانی له‌ شتێک دڵنیا بیت. کچه‌که‌ تاوانباره‌... ئه‌گه‌ر بکرێ هه‌مو به‌ تاوانبار بزانی.
مامۆستا: وایه‌،به‌ڵێ! من که‌س تاوانبار ناکه‌م! ئه‌رێ باسی چیمان ئه‌کرد ئه‌م هه‌تیوه‌ لی قرتاندین؟ ئه‌ها، داهاتووی بێرتا،ئه‌رێ؟
کاپیتان:‌ هه‌ر ئه‌وه‌ نیه‌،باسی به‌خێو کردنی بێرتا بوو. ئه‌م ماڵه‌ پڕه‌ له‌و ژنانه‌ی هه‌ر کام ئه‌یانه‌وێ به‌ که‌یفی خۆ بێرتا به‌خێو بکه‌ن. خه‌سوم ئه‌یه‌وێ بیکاته‌ فاڵگیر و رۆحی مردووه‌کان بێنێته‌ قسه‌. لۆرا ئه‌یه‌وێ بیکاته‌ وێنه‌کێش. مامۆستاکه‌ی ئه‌یه‌وێت بیکاته‌ مێتۆدیست. ئه‌و پیرێژنه‌ چڕچۆڵه‌ش،مارگارێت،ئه‌یه‌وێت بێرتا ببێته‌ باپتیست. کاره‌که‌ره‌کان ئه‌یانه‌وێ بیکه‌نه‌ سوپای رزگاری. خۆ بنیام لێفه‌ی چل تیکه‌ نیه‌ هه‌ر یه‌که‌و به‌جۆرێ پینه‌ی بکه‌ن. ته‌نیا من ئه‌بێ سه‌باره‌ت به‌ داهاتووی کچه‌که‌م هه‌ڵوێست بگرم. بۆ هه‌ر لایێکیش ئه‌ڕۆم درگام لێ داخراوه‌. ناچارم له‌م ماڵه‌ بیبه‌مه‌ ده‌ر.
مامۆستا: ئه‌م هه‌موو ژنه‌ له‌ ماڵتا خوله‌یان دێت.
کاپیتان: ماڵ نیه‌،قه‌فه‌سی به‌بره‌. ئه‌بێ هه‌میشه‌ سیخێکی داخ به‌ ده‌سمه‌وه‌ بێ ئه‌گینا ده‌رفه‌تیان گیر که‌وێ سه‌رو چاوم به‌و په‌نجه‌ تیژانه‌یان هه‌ڵئه‌کۆڵن. ئه‌رێ پێکه‌نه‌ پیره‌ رێوی! خۆشکه‌که‌ت به‌س نه‌بوو،باوه‌ژنیشت ساوی به‌سه‌رما!
مامۆستا: په‌نا بۆ خوا. سه‌یره‌. پیاو چۆن ئه‌کرێ له‌گه‌ڵ باوه‌ژنیا هاوماڵ بێت!
کاپیتان: ئه‌ی خه‌سوو؟ خه‌سوو قه‌یدی نیه‌ له‌گه‌ڵ یه‌کێتر هاوماڵ بێت!
مامۆستا: باشه‌،باشه‌. که‌س ناچێته‌ قه‌بری که‌س.
کاپیتان: به‌ڵێ. به‌ڵام قه‌بری من چه‌نها نۆهۆمه‌! دایه‌نیشم ته‌شریفیان هه‌یه‌و وا ئه‌زانێ هێشتا منداڵم! پیرێژنێکی نازاره‌ به‌ڵام به‌ ئێمه‌ ناکه‌وێت!
مامۆستا: ئه‌بێ ئه‌و ژنانه‌ دامرکێنی ئادۆڵف. ته‌واو سواری سه‌رت بوون.
کاپیتان: ژن برای به‌ڕێز،ئه‌کرێ فێرم بکه‌یت پیاو چۆن ئه‌توانێ ژن دامرکێنێت؟
مامۆستا: ئه‌زانی چۆنه‌،لۆرا خۆشکی منه‌،به‌ڵام هه‌ر له‌ مناڵییه‌وه‌ ته‌با نه‌بوو.
کاپیتان: یه‌کجار وایش نیه‌.
مامۆستا: کوڕه‌ وازبێنا! باشی ئه‌ناسم!
کاپیتان: ده‌ی،نه‌ختێک هه‌ست ناسک بار هاتووه‌و ناتوانێ له‌گه‌ڵ بارودۆخی ژیانی ئاسایی رێکه‌وێت. به‌ڵام هه‌رچی بێت،ژنمه‌...
مامۆستا: هه‌ر بۆیه‌ باشترین ژنی دنیایه‌. نا ئادۆڵف،گه‌وره‌ترین کێشه‌ی ژیانت لۆرایه‌.
کاپیتان: ئه‌رێ،وایشه‌. ئه‌توانم بڵێم،لێره‌ ژیان له‌ تاقه‌ت به‌ده‌ره‌. لۆرا نایه‌وێت بێرتا لێی دوور که‌وێته‌وه‌، ته‌نانه‌ت بۆ چرکه‌یێک. به‌ڵام ناهێڵم کچه‌که‌م له‌م زیندانه‌دا بمێنێته‌وه‌.
مامۆستا: ده‌ی؟ لۆرا نایه‌وێت؟ به‌مجۆره‌ بێت ناتوانی به‌ که‌یفی خۆت هه‌موو کارێ بکه‌یت. لۆرا له‌ منداڵییه‌وه‌ هه‌ر وا بوو. شتێکی بویستایێت مانی ئه‌گرت و تا وه‌ری نه‌گرتایێت نقه‌ی له‌ خۆی ئه‌بڕی. به‌ڵام که‌ وه‌ری ده‌گرت دیسان ئه‌یگه‌ڕانده‌وه‌و ئه‌یوت ئه‌مه‌ ئه‌و شته‌ نیه‌ ئه‌یویست. مه‌به‌ستم ئه‌وه‌یه‌ بڵێم ته‌نیا ئه‌یویست قسه‌ی خۆی بباته‌ سه‌ر.
کاپیتان: یانی له‌ سه‌ره‌تاوه‌ هه‌روا بووه‌،به‌ڵێ؟ هم... جارجار ئه‌وه‌نده‌ جموجوڵی هه‌یه‌ که‌ ئه‌ترسم... نه‌کا نه‌خۆش بێت.
مامۆستا: چیت ئه‌وێ بۆ بێرتای بکه‌یت که‌ لۆرا نایه‌وێت؟ ناکرێ نه‌ختێک ئاستی خواسته‌کانت دابه‌زێنیت؟
کاپیتان: وا مه‌زانه‌ ئه‌مه‌وێ کچه‌که‌م ببێته‌ بلیمه‌تێکی بێ وێنه‌ی زانست یان ده‌قاوده‌ق بچێته‌وه‌ سه‌ر خۆم. نامه‌وێ هه‌ر بۆ شوو کردن به‌خێوی بکه‌م. گه‌وادی له‌مه‌ باشتره‌. بێتو وا بکه‌م و شوو نه‌کات،وه‌ک ئه‌و ترشاوانه‌ی لێ دێت که‌ هه‌ره‌ بۆڵه‌یان دێت و هیچیتر. نایشمه‌وێ وه‌ک پیاو باری بێنم بۆ ئه‌وه‌ی ساکار نیه‌و چه‌نا ساڵ تێبینی و خوێندنی زانستی ئه‌وێت. ده‌ی که‌ شوو بکات هه‌مووی به‌ فیڕۆ ئه‌چێت.
مامۆستا: ئه‌ی چیت ئه‌وێت؟
کاپیتان: ئه‌مه‌وێ ببێته‌ مامۆستای مه‌کته‌ب. ئه‌گه‌ر شوویش نه‌کات خۆ ئه‌توانێ خۆی به‌خێو بکات. خۆ له‌و کچه‌ ترشاوانه‌ی به‌ مووچه‌ی مه‌کته‌بداری بنه‌ماڵه‌یان به‌خێو ئه‌که‌ن خراپتر نابێت. که‌ شوویشی کرد ئه‌توانێ له‌و زانسته‌ بۆ په‌روه‌رده‌ کردنی مناڵه‌کانی که‌ڵک بگرێت. وا نیه‌؟
مامۆستا: ته‌واوه‌. به‌ڵام پێت وا نیه‌ له‌ وێنه‌ کێشانا وریاتره‌؟ ناترسی له‌وه‌ی وره‌ی وێنه‌کێشانی سه‌رکوت بکرێت؟
کاپیتان: نا،نا. ئه‌و وێنانه‌ی کێشابووی پیشانی هونه‌رمه‌ندێکی گه‌وره‌ دا،وتی ئه‌مه‌ هه‌ر ئه‌و شته‌یه‌ له‌ مه‌کته‌ب فێریان ئه‌که‌ن. به‌ڵام دواجار کوڕێ که‌ سه‌ری له‌م شتانه‌ ئه‌خورا هات و وتی کچه‌که‌تان بلیمه‌ته‌. ئیتر هه‌ر ئه‌مه‌ به‌س بوو که‌ لۆرا دڵنیا بێت که‌ بێرتا ببێته‌ وێنه‌کێش.
مامۆستا: کوڕه‌که‌ بێرتای خۆش ئه‌ویست؟
کاپیتان: پێموابێ.
مامۆستا: که‌ وابێت،خوا خۆی فریات که‌وێت دۆستی به‌ڕێز. بۆ ئه‌وه‌ی هیچت پێناکرێت! چیرۆکێکی تراژیکه‌و لۆرا به‌ باشی ده‌ور ئه‌گێڕێت.
کاپیتان: ها، به‌ڵێ،پێویست ناکات بترسی! بنه‌ماڵه‌م ته‌یاری به‌ربه‌ره‌کانێن. لای خۆمان بێت،هیچ به‌ربه‌ره‌کانه‌یێ پیاوانه‌ نیه‌.
مامۆستا: پێتوایه‌ نازانم چی قه‌ماوه‌؟(هه‌ڵساوه‌)
کاپیتان: تۆیش؟
مامۆستا: سه‌یر ئه‌مێنی؟
کاپیتان: له‌ گشتی خراپتر ئه‌و هه‌ڵوێسته‌یه‌ بۆ داهاتووی بێرتای ئه‌گرن. قیناویه‌و هه‌ر بۆڵه‌یان دێت که‌ پیاو ئه‌بێ بڵێت ژن وایه‌و ژن ئه‌توانێ ئه‌مه‌ بکات و ئه‌وه‌ بکات و له‌م شتانه‌. باسیان هه‌ر ئه‌مه‌یه‌. ژن پیاو،پیاو ژن،شه‌و و رۆژ. ئه‌بێ هه‌ر ئێستا بڕۆیت؟ بمێنه‌وه‌و پێکه‌وه‌ شێو ئه‌خۆین. ناتوانم پا داگرم. ئه‌زانی ماتڵم دوکتور بێت؟ دوکتورێتره‌. دیوته‌؟
مامۆستا: ئه‌رێ،له‌ هاتنما چاوم پیکه‌وت. به‌ رواڵه‌ت پیاوخاس دیار بوو.
کاپیتان: باشه‌! پێتوایه‌ لایه‌نی من بگرێت؟
مامۆستا: چۆن بزانم؟ ئه‌بێ بزانین چه‌نێ له‌گه‌ڵ ژنان به‌ینی بووه‌!
کاپیتان: ئه‌ها،وازبێنا،بمێنه‌وه‌!
مامۆستا: سپاس دۆستی نازار،ناتوانم. وتومه‌ بۆ خواردن دێمه‌وه. دره‌نگ بکه‌م ژنه‌ ئازیزه‌که‌م دڵی ئه‌که‌وێته‌ خورپه‌!
کاپیتان: دڵه‌خورپه‌؟ مه‌به‌ستت ئه‌وه‌یه‌ توڕه‌ ئه‌بێت! باشه‌ چۆنت پێخۆشه‌ وا بکه‌.
مامۆستا: له‌و شه‌وه‌ ساردانه‌یه‌. هۆشی خۆتت بێ ئادۆڵف. په‌رۆش ئه‌نوێنی.
کاپیتان: نا؟
مامۆستا: با. نه‌ختێ په‌رۆشی. وا نیه‌؟
کاپیتان: په‌نی لۆرایه‌! بیست ساڵه‌ وه‌ک جه‌نازه‌ چاوم لێئه‌کات.
مامۆستا: لۆرا؟ نا،نا. ته‌نیا پرسیارێک بوو،هۆشی خۆتت بێ! خوات له‌گه‌ڵ پیره‌پیاو. ئه‌رێ باسی بێرتامان ته‌واو نه‌کرد.
کاپیتان: نایه‌وێ،خوات له‌گه‌ڵ! سڵاوی ژنه‌که‌ت بگه‌یێنه‌!
مامۆستا: خوات له‌گه‌ڵ برا! سڵاوی لۆرا بگه‌یێنه‌!

4)
کاپیتان:‌ (له‌ پشت مێزه‌که‌ خه‌ریک ژماردنه‌) سیوچوار،نۆ،چلوسێ،حه‌و هه‌شتی،په‌نجاو شه‌ش...
لۆرا: ئه‌کرێ...
کاپیتان: بوێسته‌،شه‌ستو شه‌ش،حه‌فتاو یه‌ک،هه‌شتاو چوار،هه‌شتاو نۆ،نه‌وه‌و دوو،سه‌د. چیه‌؟
لۆرا: ناوه‌خت هاتم!
کاپیتان: نا،نا. پاره‌ت ئه‌وێ،وایه‌؟
لۆرا: ئه‌رێ،پاره‌.
کاپیتان: فاکتۆره‌کان دابنێ بیانبینم.
لۆرا: فاکتۆره‌کان؟
کاپیتان: ئه‌رێ.
لۆرا: هه‌ر ئێستا ئه‌ته‌وێ؟
کاپیتان: ئه‌ی چۆن. باری ماڵیمان باش نیه‌. ئه‌بێ هۆشم پێوه‌ بێت. ئه‌گینا وه‌ک ماڵ کاولێکی تاوانبار ئه‌توانن سزام بده‌ن.
لۆرا: خه‌تام نیه‌ وای لێ هاتووه‌.
کاپیتان: ئه‌مه‌ هه‌ر ئه‌وه‌یه‌ فاکتۆره‌کان پیشانی ئه‌ده‌ن.
لۆرا: من بڵێم چی کابرای کرێنشین کرێ نادات.
کاپیتان: کێ پیدا؟ تۆ. بۆ وات کرد؟ ناوی بنێین چی؟ روت و ره‌جاڵی وا؟
لۆرا: ئه‌گه‌ر روت و ره‌جاڵه‌ بۆ پێتدا؟
کاپیتان: بۆ ئه‌وه‌ی نه‌مدایێ،خه‌وو خۆراک و ژیانمت گو تێئه‌کرد. تۆ ئه‌تویست،بۆ ئه‌وه‌ی کاکت ئه‌یویست له‌ کۆڵ خۆی کاته‌وه‌. دایکت ئه‌یویست،بۆ ئه‌وه‌ی من نه‌مئه‌ویست. مامۆستاکه‌ی بێرتا ئه‌یویست،بۆ ئه‌وه‌ی مێتۆدیست بوو. مارگارێته‌ چڕچۆڵیش ئه‌یویست،بۆ ئه‌وه‌ی له‌ منداڵیه‌وه‌ دایکه‌که‌ی ئه‌ناسی. بۆیه‌ پێمدا. نه‌مدایێ ئێستا یا له‌ شێتخانه‌ بووم یان له‌ قه‌برا. ئیتر دراوه‌و کارێ ناکرێ. بیگره‌(پاره‌ی ئه‌داتێ) بڕێ ورده‌شی له‌گه‌ڵه‌. دواجار ئه‌توانی فاکتۆره‌کان بێنی.
لۆرا کڕنۆش ئه‌بات) زۆر سپاس،قوربان. فاکتۆریشت بۆ خه‌رجه‌کانی خۆت هه‌یه‌؟
کاپیتان: به‌ تۆ مه‌ربوت نیه‌.
لۆرا: وایه‌. جگه‌ مناڵ به‌خێو کردن هیچیتر به‌ من مه‌ربوت نیه‌. توانیتان له‌و کۆبونه‌وه‌ی ئێواره‌تان به‌ شتێک بگه‌ن؟
کاپیتان: پێشتر پیگه‌یشتبووم. ته‌نیا ئه‌مویست ئه‌ویش وه‌ک تاقه‌ دۆستی خۆم و بنه‌ماڵه‌م ئاگادار بکه‌مه‌وه‌. بریاره‌ بێرتا بنێرمه‌ شار. پانزه‌ رۆژیتر ئه‌ڕوات.
لۆرا: ئه‌توانم پرسیار بکه‌م له‌گه‌ڵ کێ ده‌بێته‌ هاوماڵ؟
کاپیتان: جێبه‌جێم کرده‌ له‌گه‌ڵ وه‌کێڵه‌که‌م،سیوبێرگ.
لۆرا: ئه‌و کافره‌ی بێ دین و ئیمانه‌!
کاپیتان: یاسا ئه‌ڵێت منداڵ ئه‌بێ به‌ ئایینی باوک په‌روه‌رده‌ بکرێت.
لۆرا: ئیتر دایک فت؟ مافی هیچی نیه‌؟
کاپیتان: هیچ. به‌ پێی یاسای ماره‌بڕین،هه‌موو مافێکی دایکانه‌ ئه‌فرۆشرێت و هیچ داوایێک نامێنێت. به‌ڵام پێویسته‌ شوو هه‌موو شتێک بۆ ئاسایش و خوردو خۆراکی ژن و منداڵ ته‌یار بکات.
لۆرا: ئه‌ی ناکرێ باوک و دایک پێکه‌وه‌ بگه‌نه‌ ئه‌نجامێ؟ وه‌ها که‌ نه‌ ئه‌م بێت نه‌ ئه‌و؟
کاپیتان: شتی وا چۆن ئه‌بێت؟ من ئه‌مه‌وێ بێرتا له‌ شار بژی،تۆ ئه‌ته‌وێ له‌ ماڵه‌وه‌ بمێنێت. بگه‌ینه‌ ئه‌نجام مانای ئه‌وه‌یه‌ له‌ نیوه‌ڕێ بمێنێته‌وه‌. نابێت.
لۆرا: که‌وایه‌ ئه‌بێ به‌ زۆر چاره‌ی بکه‌ین. نۆژێد بۆ هاتبوو؟
کاپیتان: نهێنیه‌.
لۆرا: هه‌موو ئه‌زانن.
کاپیتان: ده‌ی ئه‌بێ تۆیش بزانیت.
لۆرا: ئه‌زانم.
کاپیتان: رات چیه‌؟
لۆرا: یاسا روونه‌.
کاپیتان: له‌م بابه‌ته‌وه‌ که‌ کێ باوکی ئه‌و منداڵه‌یه‌،یاسا روون نیه‌.
لۆرا: نا،نیه‌. به‌ڵام بنیام ئه‌بێ بزانێ.
کاپیتان: پیاوی تێگه‌یشتوو لای وایه‌ قه‌ت ناکرێ له‌و شته‌ دڵنیا بیت.
لۆرا: ناکرێ دڵنیا بێت کێ باوکی منداڵه‌که‌یه‌؟
کاپیتان: وا ئه‌ڵێن.
لۆرا: ئه‌ی خوای گه‌وره‌! ده‌ی باوکێک چۆن ئه‌توانێ ببێته‌ خاوه‌نی منداڵێک که‌ له‌ ژن بووه‌؟
کاپیتان: باوک کاتێ ئه‌م مافه‌ی هه‌یه‌ که‌ به‌خێو کردنی منداڵه‌که‌ له‌ ئه‌ستۆ بگرێت یان به‌ سه‌ریا دایسه‌پێنن. به‌ڵام له‌ ژن و شووی یاسایی ناکۆڵنه‌وه‌ کێ باوکی منداڵه‌که‌یه‌.
لۆرا: قه‌ت ناکۆڵنه‌وه‌؟
کاپیتان: هیوادارم.
لۆرا: ئه‌ی ئه‌گه‌ر ژنه‌که‌ بێوه‌فا بێت؟
کاپیتان: باسی ئێمه‌ ئه‌مه‌ نیه‌. پرسیارێترت هه‌یه‌؟
لۆرا: نا. هیچ پرسیارێکم نیه‌.
کاپیتان: که‌ وایه‌ ئه‌چمه‌ ژوره‌که‌ی خۆم. دوکتور هات ئاگادارم بکه‌...(هه‌ڵئه‌سێت)
لۆرا: باش.
کاپیتان به‌ده‌م رۆشتنه‌وه‌) ‌هه‌ر ئه‌و ئانه‌ که‌ ئه‌گات! نه‌کا لای وابێ سوکایه‌تی پێئه‌که‌م. تێگه‌یشتیت؟ (ئه‌ڕوات)
لۆرا: تێگه‌یشتم.

5)
نۆژێد: دوکتور ئوستێر مارک!
دوکتور: (دێته‌ ژور) خاتو لاسێن!
لۆرا: (به‌ره‌و پیری ئه‌چێت) باشن،دوکتور؟ به‌خێر بێن. کاپیتان له‌ ماڵ نین. به‌ڵام زوو ئه‌گه‌ڕێنه‌وه‌.
دوکتور: بمبورن دره‌نگم کرد. سه‌ردانی چه‌ن نه‌خۆشیکم کرد.
لۆرا: فه‌رمون دانیشن.
دوکتور: سپاس،خاتو لاسێن،سپاس.
لۆرا: به‌ڵێ،به‌ینێکه‌ نه‌خۆشین زۆر بووه‌. هیوادارم لێره‌ خۆش رایبوێرن. لێره‌ له‌گه‌ڵ که‌س هاتوچومان نیه‌،بۆیه‌ بۆمان گرینگه‌ له‌گه‌ڵ دوکتورێکی ئه‌مه‌کناس هاوده‌م ئه‌بین. دوکتورێ که‌ گرینگی به‌ نه‌خۆشه‌کانی ئه‌دات. شتی باشم سه‌باره‌ت به‌ جه‌نابتان بیستووه‌،به‌م بۆنه‌وه‌ حه‌ز ئه‌که‌م زیاتر بتانبینم.
دوکتور: رێزتان هه‌یه‌ خاتو لاسێن. به‌ڵام دڵنیام،له‌به‌ر دڵی ئێوه‌،هاتنم هه‌ر بۆ کاری دوکتوری نابێت! بنه‌ماڵه‌ چۆنن؟ ساخ و سڵامه‌تن؟
لۆرا: به‌ خۆشیه‌وه‌ ئه‌بێ بڵێم تا ئێستا نه‌خۆشینێکی مه‌ترسیدارمان نه‌بووه‌. به‌ڵام ئه‌وجۆره‌ش نیه‌ بیری لێ ئه‌که‌نه‌وه‌.
دوکتور: راسته‌؟
لۆرا؟ به‌ داخه‌وه‌ ئه‌وجۆره‌ی ئه‌مانویست نیه‌.
دوکتور: دڵم دا مه‌خه‌ن!
لۆرا: بڕێ کێشه‌ی بنه‌ماڵه‌یی هه‌یه‌ که‌ ژنی به‌ حه‌یاو شه‌رم ناچاره‌ له‌ هه‌مووانی بشارێته‌وه‌...
دوکتور: به‌ڵام له‌ دوکتور نا.
لۆرا: وایه‌. هه‌ربۆیه‌ هه‌ست ئه‌که‌م باشتره‌ له‌گه‌ڵتان روڕاس بم.
دوکتور: باشتر نیه‌ ئه‌م باسه‌ دابنێین بۆ دواجار؟ دوای ئه‌وه‌ی کاپیتانیشم بینی؟
لۆرا: نا. ئه‌بێ پێش له‌ دیتنی کاپیتان،گوێ له‌و قسانه‌ بگرن که‌ ناچارم بیگێڕمه‌وه‌!
دوکتور: واته‌ باسی کاپیتانه‌؟
لۆرا: به‌ڵێ. شووه‌ به‌وبه‌خته‌ خۆشه‌ویسته‌که‌م!
دوکتور: ئه‌مترسێنن،خاتو لاسێن. بڕوا بکه‌ن پڕ به‌ دڵ بۆتان خه‌مینم!
لۆرا: (ده‌سره‌ی ده‌ور ملی ئه‌کاته‌وه‌) شووه‌که‌م،مێشکی شڵه‌قاوه‌! جارێ ئه‌مه‌ بزانن تا دواجار خۆتان رای له‌سه‌ر ئه‌ده‌ن.
دوکتور: سه‌یره‌! کاپیتان،به‌و وتاره‌ زانستیه‌ بێ وێنانه‌ی سه‌باره‌ت به‌ سه‌رچاوه‌ سروشتیه‌کان،هه‌میشه‌ لام وابوو ئه‌وه‌ی ئه‌م شتانه‌ی نووسیوه‌ ئه‌بێ مێشکێکی تایبه‌ت و بیر و زه‌ینێکی قوڵی هه‌بێت.
لۆرا: راستیته‌؟ سه‌یر ئه‌و کاته‌یه‌‌ بزانین هه‌موومان هه‌ڵه‌مان کردووه‌!
دوکتور: هه‌رچه‌ن ره‌نگه‌ سه‌باره‌ت به‌ بڕێ شتیتر راکانی جێی متمانه‌ نه‌بن!
لۆرا: ئێمه‌ش له‌مه‌ ئه‌ترسین. ئه‌زانن چۆنه‌،جاروبار بیری سه‌یر سه‌یر دێته‌ مێشکی به‌ڵام ئه‌ترسین ژیانی بنه‌ماڵه‌مان ‌که‌وێته‌ مه‌ترسی ئه‌گینا پێمان خۆشه‌. بۆ نمونه‌،شێتانه‌ی سه‌ندن!
دوکتور: جێگه‌ی داخه‌! چی ئه‌سێنێت؟
لۆرا: مۆڵه‌قێ کتێب که‌ قه‌ت نایانخوێنێته‌وه‌.
دوکتور: ده‌ی ئه‌مه‌ بۆ وه‌ها که‌سێک سه‌یر نیه‌.
لۆرا: بڕوام پێ ناکه‌ن؟
دوکتور: با،بڕوام پێتانه‌ خاتو لاسێن. دڵنیام راس ئه‌که‌ن.
لۆرا: ئێوه‌ بڕوا ئه‌که‌ن که‌سێ بڵێت به‌ میکڕۆسکۆپ ئه‌توانێ رووداوه‌کانی هه‌ستێره‌کان ببینێت؟
دوکتور: له‌م قسانه‌ ئه‌کات؟
لۆرا: به‌ڵێ.
دوکتور: به‌ میکڕۆسکۆپ؟
لۆرا: به‌ڵێ به‌ میکڕۆسکۆپ.
دوکتور: گه‌ر وا بێت، به‌راستی جێگه‌ی داخه‌...
لۆرا: گه‌ر وا بێت؟ ئێوه‌ بڕوام پێ ناکه‌ن دوکتور. هه‌موو نهێنیه‌کانی بنه‌ماڵه‌م ئه‌گێڕمه‌وه‌و...
دوکتور: تکایه‌ گوێ بگرن خاتو لاسێن. سپاس له‌وه‌ی متمانه‌م پێئه‌که‌ن به‌ڵام وه‌ک دوکتور ئه‌بێ شته‌کان لێک بده‌مه‌وه‌ تا دواجار بتوانم نه‌خۆشینه‌که‌ ده‌سنیشان بکه‌م. هیچ دیوتانه‌ شک بکات یان هه‌ر تاوێ شتێکی بوێت؟
لۆرا: تا دڵ بخوازێت! بیست ساڵه‌ ژن و شووین. له‌م ماوه‌دا نه‌مدیوه‌ شتێکی وتبێت که‌ دواجار حاشای نه‌کردبێت.
دوکتور: لاساره‌؟
لۆرا: خوا نه‌کات شتێکی گه‌ره‌ک بێت،ئه‌وه‌نده‌ له‌ سه‌ری ئه‌ڕوات تا پیبگا. به‌ڵام دوا به‌ دوای ئیتر نایه‌وێ و داوا له‌ من ئه‌کات هه‌ڵوێست بگرم.
دوکتور: جێگه‌ی داخه‌. ئه‌بێ له‌ نزیکه‌وه‌ بیبینم. ئه‌زانن چۆنه‌ خاتو لاسێن،خواستن بنه‌مای ئه‌قڵه‌. خواستن لاواز بێت،ئه‌قڵیش لاواز ئه‌بێت.
لۆرا: خوا خۆی ئه‌زانێ چیهام نه‌کرده‌ بۆی. بیست ساڵ چه‌رمه‌سه‌ری که‌م نیه‌ به‌ڵام هه‌ر کارێ بتوانم ئه‌یکه‌م. ئه‌گه‌ر بزانن چی پێم نه‌کرده‌! ئه‌گه‌ر ئه‌تانزانی!
دوکتور: خاتو لاسێن،له‌ خه‌متانا به‌شدارم و به‌ڵێن ئه‌ده‌م ئه‌وه‌ی پێویست بێت بیکه‌م. به‌ڵام تکایێکم هه‌یه‌. تکایه‌ هه‌ر شتێک که‌ ئه‌زانن شووه‌که‌تان توڕه‌ ئه‌کات مه‌یکه‌ن. له‌ مێشکی بنیامی نه‌خۆشدا،خه‌ون و خه‌یاڵ وه‌ک دڕک و داڵ سه‌ر هه‌ڵئه‌دات و ئه‌توانێ ببێت به‌ دڵ پیسی و ته‌نانه‌ت شێتیش. تێئه‌گه‌ن؟
لۆرا: ئه‌تانه‌وێ هۆشیار بم نه‌که‌وێته‌ داوی دڵ پیسی؟
دوکتور: به‌ڵێ هه‌ر ئه‌مه‌یه‌. ئه‌مجۆره‌ نه‌خۆشانه هه‌مووشتێ به‌ خۆیان ئه‌گرن و له‌ کا کێو دروست ئه‌که‌ن.
لۆرا: به‌ڕاس؟ به‌ڵێ تێئه‌گه‌م. به‌ڵێ. به‌ڵێ. (ده‌نگی زه‌نگ) ببورن دایکم کاری پێم بوو‌. ئێستا دێمه‌وه. ئه‌مه‌ ئه‌بێ ئادۆڵف بێت!

6)
کاپیتان(دێته‌ ژور): لێره‌ن دوکتور؟ به‌خێر بێن!
دوکتور: ئێواره‌ باش کاپیتان. دیتنی زانایێ بلیمه‌ت وه‌ک ئێوه‌ شانازیه‌ بۆم.
کاپیتان: ئای. به‌سی که‌ن. کاروباری سه‌ربازی ده‌رفه‌تی پشکنین و به‌ دواداچون نادات. هه‌رچه‌ن خه‌ریکم شتێ نوێ ئه‌دۆزمه‌وه‌.
دوکتور: به‌ڕاس؟
کاپیتان: به‌ڵێ. تیشکی به‌رده‌ ئاسمانیه‌کانم پشکنی و توانیم که‌ربۆن بدۆزمه‌وه‌! نیشانه‌ی ژیان! پێتان چۆنه‌؟
دوکتور: توانیتانه‌ به‌ میکڕۆسکۆپ بیبینن؟
کاپیتان: میکڕۆسکۆپ؟ خوایه‌،نا... ئێسپێکتڕۆسکۆپ!
دوکتور: ئێسپێکتڕۆسکۆپ؟ به‌ڵێ،به‌ڵی،مه‌به‌ستم هه‌ر ئه‌وه‌یه‌. ده‌ی... واته‌ به‌م زووانه‌ پێمان ئه‌ڵێن له‌ موشته‌ری خه‌ریکه‌ چی روو ئه‌دات.
کاپیتان: چی روو ئه‌دات نا،چی رووی داوه‌. ئای ئه‌گه‌ر ئه‌و کتێب فرۆشه‌ پیسکه‌ی پاریس کتێبه‌کانی ئه‌نارد. هه‌ست ئه‌که‌م هه‌موو کتێب فرۆشی ئه‌م جیهانه‌ پێکه‌وه‌ خه‌ریک داو نانه‌وه‌ن بۆم. دوو مانگه‌ جوابی هیچ نامه‌و نوسراوه‌و ته‌نانه‌ت ته‌له‌گرافه‌کانیشم ناده‌نه‌وه‌! تێناگه‌م. خه‌ریکه‌ شێت ئه‌بم.
دوکتور: ئای،هه‌ر ئه‌و ته‌مبه‌ڵیه‌ مێژوییه‌. نابێ زۆر بیری لێ بکه‌نه‌وه‌.
کاپیتان: به‌ڵێ،به‌ڵام،به‌ توون. هه‌روا بڕوات ناتوانم تێزه‌که‌م له‌ کاتی دیاریکراو ئاماده‌ بکه‌م. کابرایێکیش له‌ بێڕلین له‌ سه‌ر ئه‌م بابه‌ته‌ خه‌ریکه. به‌ڵام مه‌به‌ستمان له‌م دیداره‌ جه‌نابتانن نه‌ک ئه‌و شتانه‌ی من دۆزیومه‌ته‌وه‌. پێتان خۆش بوو لێره‌ بمێننه‌وه‌ ئه‌وا ژورێکی بچوکمان له‌ولا هه‌یه‌. یان ئه‌تانه‌وێ له‌و شوێنه‌ بمێننه‌وه‌ که‌ به‌ڕێزه‌که‌ی پێش جه‌نابتان تێیدا بوو؟
دوکتور: هه‌رچۆن پێتان باشه‌.
کاپیتان: نا،ئه‌وجۆره‌ی ئێوه‌ پێتان باشه‌. بڵێن بزانم.
دوکتور: رای ئێوه‌یه‌،کاپیتان.
کاپیتان: نا،نا. من ناتوانم. ئێوه‌ بڵێن چیتان ئه‌وێت. من رای ئێوه‌ نازانم.
دوکتور: راسته‌،به‌ڵام ناتوانم هیچ بڵێم...
کاپیتان: توخوا بڵێ چیت ئه‌وێ! پیاو! بۆم گرینگ نیه‌ چی ئه‌که‌یت! ئه‌وه‌نده‌ که‌ری نازانی چیت ئه‌وێ؟ بڵێ با توڕه‌ نه‌بم!
دوکتور: ئه‌گه‌ر قسه‌ی منه‌،ئه‌وا ئه‌ڵێم لێره‌ ئه‌مێنمه‌وه‌!
کاپیتان: چ باش! سپاس. بمبوره‌ دوکتور به‌ڵام به‌ده‌س خۆم نیه‌ توڕه‌ ئه‌بم ئه‌گه‌ر پیاوێ بڵێ هه‌موو شتێک وه‌ک یه‌کن بۆی‌! (زه‌نگ لێئه‌دات. دایه‌ن دێت) ئای مارگارێت،ئه‌وه‌ تۆی؟ داخۆ ژوره‌که‌ی دوکتور ئاماده‌یه‌ ئازیزه‌که‌م؟
دایه‌ن: به‌ڵێ قوربان،ئاماده‌ی ئاماده‌.
کاپیتان: باشه‌ ئیتر ماتڵت ناکه‌م دوکتور. ئه‌زانم هیلاکی. شه‌و باش. به‌یانی ئه‌تبینمه‌وه‌.‌
دوکتور: شه‌و باش کاپیتان.
کاپیتان: ژنه‌که‌م سه‌باره‌ت به‌ ئێره‌ شتێکی پێ وتی که‌ له‌ بارودۆخه‌که‌ بگه‌یت؟
دوکتور: شتگه‌لێکی وت که‌ پیوابو که‌سێ وه‌ک من بزانێ باشتره‌. شه‌و باش کاپیتان.

7)
کاپیتان: چیت ئه‌وێ ئازیز؟ چی بووه‌؟
دایه‌ن: باشه‌ ده‌ی،گوێ بگره‌. ئاغه‌ گیان...
کاپیتان: چیه‌ مارگارێت؟ بڵێ بزانم. ته‌نیا گوێدان به‌ قسه‌ی تۆ نامخاته‌ خورین.
دایه‌ن: باشه‌ ده‌ی،گوێ بگره‌. ئاغه‌ گیان،بۆچی له‌گه‌ڵ خاتون ناکه‌ونه‌ یه‌ک؟ هه‌رچی بێت دایکه‌.
کاپیتان: منیش باوکم.
دایه‌ن: باشه‌،باشه‌،باشه‌! باوک جگه‌ مناڵ شتیتریشی هه‌یه‌،به‌ڵام دایک هیچی نیه‌ مناڵه‌که‌ی نه‌بێ.
کاپیتان: وایه‌. ئه‌و ته‌نیا یه‌ک کێشه‌ی هه‌یه‌ به‌ڵام من سیانم هه‌یه‌ که‌ یه‌کیان خۆیه‌تی. وا ئه‌زانی ئه‌گه‌ر خۆیو مناڵی به‌ ریشمه‌وه‌ نه‌ئه‌بوون،هه‌روا ته‌مه‌نم له‌ سه‌ربازخانه‌ به‌ فیڕۆ ئه‌دا؟
دایه‌ن: ئای،مه‌به‌ستم ئه‌وه‌ نه‌بوو.
کاپیتان: دڵنیام مه‌به‌ستت ئه‌وه‌ نه‌بوو. به‌ڵام خه‌ریکی تاوانه‌که‌ به‌ ته‌نیا ئه‌خه‌یته‌ ئه‌ستۆی من.
دایه‌ن: من چاکه‌ی تۆم ئه‌وێ ئاغه‌ گیان،ئه‌مه‌ نازانی؟
کاپیتان: با،با،ئازیزه‌که‌م له‌وه‌ دڵنیام. به‌ڵام نازانی چی بۆ من چاکه‌. هه‌ر ئه‌وه‌ی مناڵم دروست کردووه‌ رازیم ناکات. ئه‌بێ رۆحیشمی بده‌مێ.
دایه‌ن: باشه‌،من له‌مانه‌ تێناگه‌م. به‌ڵام ئه‌ڵێم ئه‌بێ یه‌ک بکه‌ون.
کاپیتان: دۆستی من نیت،مارگارێت.
دایه‌ن: من؟ بۆ؟ چۆن ئه‌توانی ئه‌مه‌ بڵێیت؟ پێتوایه‌ له‌ بیرم ئه‌چێت هه‌ر مناڵه‌که‌ی خۆمی؟
کاپیتان: ئه‌ی وائه‌زانی من له‌ بیرم ئه‌چێ ئازیزه‌که‌م؟ تۆ بۆ من هه‌میشه‌ وه‌ک دایک بوویت و پشت و په‌نام تا ئێستا. به‌ڵام ئێستا که‌ هه‌موو دژ به‌ من وێستاون پشت هه‌ڵئه‌که‌یت و لایه‌نی دوژمن ئه‌گریت.
دایه‌ن: دوژمن؟
کاپیتان: ئه‌رێ،دوژمن! له‌ هه‌موو باشتر ئه‌زانی و بینیوته‌ له‌م ماڵه‌ چی ئه‌کرێت.
دایه‌ن: وایه‌،که‌میشم نه‌دیوه‌. ئه‌ی خوا بۆچی بنیامه‌کان ژیانی یه‌کتر ئه‌که‌نه‌ جه‌حانم؟ ئێوه‌ به‌ جووت باشن و مێهره‌بان. خاتون قه‌ت له‌ گوڵ کاڵتری پێم نه‌وته‌. نه‌ک هه‌ر به‌ من،به‌ هه‌موو.
کاپیتان: ته‌نیا به‌ من نه‌بێ. ئه‌رێ ئه‌زانم. ئێستا پێت ئه‌ڵێم،بێتو پشتم چۆڵ که‌یت،تاوانباریت. خه‌ریکن داوم بۆ ئه‌نێنه‌وه‌و ئه‌م دوکتوره‌ش دۆستی من نیه‌.
دایه‌ن: ئای ئاغه‌ گیان،له‌ هه‌موو شتێ دوو شکیت. بؤ ئه‌وه‌ی دین و ئیمانی راسته‌قینه‌ت نیه‌.
کاپیتان: هه‌ر تۆ به‌ ته‌نیا هه‌ته‌. تۆ و هاوڕێکانت. تؤیش ناوچاوت نه‌یهێناوه‌!
دایه‌ن: باشه‌،به‌ڵام له‌ تۆ باشتری هێناوه‌ ئاغه‌ گیان. باشتر وایه‌ له‌ ئه‌سبی فیز دابه‌زی تا ببینی خوا گیان به‌خته‌وه‌رت ئه‌کات و ئه‌توانی هاوسێکانتو خۆش بوێت.
کاپیتان: چه‌ن سه‌یره‌... که‌ باسی خوا ئه‌که‌یت و خۆش ویستن،ده‌نگت ئه‌گۆڕێت و چاوه‌کانت پڕ ئه‌بن له‌ قین و توڕه‌یی. نا مارگارێت،ئیمانی راسته‌قینه‌ت نه‌دۆزیوه‌ته‌وه‌.
دایه‌ن: ئاخ که‌ چه‌ن به‌ فیزی. ئه‌م زانسته‌ له‌ رۆژی مه‌حشه‌ر فریات ناکه‌وێت.
کاپیتان: چه‌ن به‌ فیزه‌وه‌ ئه‌ڵێیت،ئاخ چه‌ن به‌ فیزی! ئه‌رێ باش ئه‌زانم ئه‌م زانسته‌ بۆ ئێوه‌ی نابنیام تورێ ناهێنێت.
دایه‌ن: داڕزه‌! قه‌ی ناکات. ئه‌م پیرێژنه‌ له‌ هه‌مووکه‌س زیاتر کوڕه‌ زه‌لامه‌که‌ی خۆی خۆش ئه‌وێت. کاتی ته‌نگانه‌ش به‌ گاوڵکێ ئه‌گه‌ڕێته‌وه‌ باوه‌شی دایه‌نه‌ پیره‌که‌ی.
کاپیتان: بمبوره‌ مارگارێت! بڕوا بکه‌ جگه‌ تۆ که‌س لێره‌ خۆشمی ناوێت. یارمه‌تیم بده‌. هه‌ست ئه‌که‌م خه‌ریکه‌ شتێ ئه‌قه‌ومێت. نازانم چی به‌ڵام شتێ خراپ خۆی مڵاس داوه‌. (ده‌نگی قیژه‌ دێت) چی بووه‌؟ کێ قیژاندی؟

8)
بێرتا(دێت): باوکه‌! فریام که‌وه‌! رزگارم بکه‌!
کاپیتان: چیه‌ کچه‌ نازاره‌که‌م؟ بڵێ بزانم.
بێرتا: فریام که‌وه‌! ئه‌یه‌وێ لێمدا!
کاپیتان: کێ؟ پێم بڵێ! پێم بڵێ!
بێرتا: دایه‌ گه‌وره‌. خه‌تای خۆم بوو. فریوم دا.
کاپیتان: چی بووه‌.
بێرتا: نابێ بیگێڕیته‌وه‌! بۆ هیچ که‌س! به‌ڵێن بده‌!
کاپیتان: باشه‌،به‌ڵام پێم بڵێ چی بووه‌.
(دایه‌ن ئه‌ڕوات)
بێرتا: ئه‌زانی چیه‌،ئه‌و شه‌وانه‌ چراکه‌ کز ئه‌کات و له‌ پشت مێزه‌که‌ به‌ قه‌ڵه‌م و کاغه‌زێکه‌وه‌ دامئه‌نیشێنێت و ئه‌ڵێ رۆحیانه‌تی مردووه‌کان ئه‌یانه‌وێ بنوسن.
کاپیتان: چی! بۆ پێشتر نه‌توت؟
بێرتا: ببوره‌،ئه‌ترسام. دایه‌گه‌وره‌ ئه‌ڵێت نابێ باسی بکرێت ئه‌گینا مردووه‌کان تۆڵه‌ ئه‌که‌نه‌وه‌. دواجار قه‌ڵه‌م ده‌س به‌ نووسین ئه‌کات. به‌ڵام نازانم کێ ئه‌ینووسێت،من یان مردووه‌کان. بڕێجار باش ئه‌نووسێت به‌ڵام بڕێجار هه‌ر ناجوڵێت و که‌ هیلاکیش بم هه‌ر هیچ نانووسێت. به‌ڵام ئه‌بێ بنووسێت! ئه‌مشه‌و پێموابو باش ئه‌نووسم به‌ڵام دایه‌گه‌وره‌ وتی خه‌ریکم شێعرێکی کۆن ئه‌نووسم و فریوی ئه‌ده‌م. بۆیه ئه‌وه‌نده‌ توڕه‌ بوو!
کاپیتان: تۆ بڕوات به‌ رۆح هه‌یه‌؟
بێرتا: نازانم.
کاپیتان: به‌ڵام من ئه‌زانم نین!
بێرتا: به‌ڵام دایه‌گه‌وره‌ ئه‌ڵێ ئێوه‌ تێناگه‌ن. ئه‌ڵێ ئێوه‌ شتی پیستان هه‌یه‌ که ئه‌توانن رووداوی هه‌ستێره‌کانیتر ببینن.
کاپیتان: دایه‌گه‌وره‌ ئه‌مانه‌ ئه‌ڵێت؟ ئیتر چی ئه‌ڵێت؟
بێرتا: ئه‌ڵێت ئێوه‌ ناتوانن حه‌لا‌مات بکه‌ن.‌
کاپیتان: قه‌ت نه‌موتوه‌ ئه‌توانم. تۆ ئه‌زانی به‌رده‌ ئاسمانیه‌کان چین؟ ئه‌و به‌ردانه‌ی له‌ هه‌ستێره‌کانیتره‌وه‌ ئه‌که‌ونه‌ ئاسمان. من ئه‌توانم بیانبینم و بیانپشکنم و بڵێم وه‌ک به‌ردی زه‌وی خۆمانن یان نا. ئه‌مه‌ هه‌مووی ئه‌و شته‌یه‌ ئه‌توانم بیبینم.
بێرتا: به‌ڵام دایه‌گه‌وره‌ ئه‌ڵێت بڕێ شت ئه‌و ئه‌توانێ بیبینێت به‌ڵام تۆ ناتوانیت.
کاپیتان: ده‌ی درۆ ئه‌کات.
بێرتا: دایه‌گه‌وره‌ درۆ ناکات.
کاپیتان: چۆن ئه‌زانی؟
بێرتا: ئه‌گه‌ر وابێت واته‌ دایکیشم درۆ ئه‌کات.
کاپیتان: ئه‌ها!
بێرتا: ئه‌گه‌ر بڵێیت دایکم درۆ ئه‌کات ئیتر بڕوام به‌ قسه‌ت نامێنێت!
کاپیتان: من وا ناڵێم. ئه‌ڵێم به‌خته‌وه‌ری و داهاتوت به‌ستراوی رۆشتن لێره‌یه‌. ئه‌بێ بڕوام پێبکه‌یت. پێت خۆشه‌ لێره‌ بڕۆیت؟ ئه‌ته‌وێ له‌ شار بژیت و شتی باش فێر بیت؟
بێرتا: ئای،زۆر پێم خۆشه‌ له‌ شار بژیم و لێره‌ نه‌بم... هه‌ر کوێ بێت! به‌و مه‌رجه‌ی جاروبار بتانبینم. زۆرجار دڵم پڕ ئه‌بێت،ئه‌ترسم،وه‌ک شه‌وی زستان ساردو سڕه‌ ئێره‌. به‌ڵام کاتێ ئێوه‌ دێن،باوکه‌،وه‌ک ئه‌وه‌یه‌ په‌نجه‌ره‌کان به‌ رووی به‌هارا ئه‌کرێنه‌وه‌!
کاپیتان: کچی خۆم! کچی خۆم1
بێرتا: به‌ڵام باوکه‌،ئه‌بێ له‌گه‌ڵ دایکم مێهره‌بان بیت. گوێت لێمه‌؟ دایکه‌ هه‌میشه‌ دڵی پڕه‌و ئه‌گری.
کاپیتان: ئه‌ها! واته‌ ئه‌ته‌وێ له‌ شار بژیت؟
بێرتا: ئه‌رێ! ئه‌رێ!
کاپیتان: ئه‌ی ئه‌گه‌ر دایکت نه‌یه‌وێت؟
بێرتا: ئه‌بێ بیه‌وێت!
کاپیتان: هاتو نه‌یویست؟
بێرتا: ده‌ی نازانم. به‌ڵام ئه‌بێ بیه‌وێت! ئه‌بێ بیه‌وێت!
کاپیتان: ئه‌کرێ له‌ خۆی پرسیت؟
بێرتا: خۆتان ئه‌بێ بپرسن. به‌ زمانی خۆش. دایکه‌ قه‌ت گوێ به‌ قسه‌م نادات.
کاپیتان: ئه‌ها! ده‌ی ئه‌گه‌ر تۆ بته‌وێ بڕۆی،من بمه‌وێ بڕۆی،به‌ڵام ئه‌و نه‌یه‌وێ،ئه‌وکات ئه‌بێ چی بکه‌ین؟
بێرتا: ئای،به‌مجۆره‌ هه‌موو شتێک تێک ئه‌چێت. بۆچی ناکرێ ئێوه‌ هه‌ر دوو...؟

9)
لۆرا(دێت): ئه‌وه‌ بێرتا لێره‌یه‌. کاتێ باشه‌ له‌ خۆی پرسین بزانین رای چیه‌.
کاپیتان: نابێ ته‌مایه‌ری ئه‌وه‌ بین منداڵێ بتوانێ خاس و خراپی خۆی بزانێت. ئێمه‌ سه‌دان کچی وامان دیوه‌و باشتر ئه‌توانین هه‌ڵوێست بگرین.
لۆرا: به‌ڵام ئێمه‌ وه‌ک یه‌ک بیر ناکه‌ینه‌وه‌. واته‌ باشتره‌ خۆی هه‌ڵوێست بگرێت.
کاپیتان: نا! ناهێڵم که‌س به‌شم بخوات. نه‌ ژن،نه‌ مناڵ. بێرتا بڕۆ ژوره‌که‌ی خۆت،ئه‌مانه‌وێ ته‌نیا بین.
(بێرتا ئه‌ڕوات)
لۆرا: تۆ ترسای بێرتا قسه‌ی دڵی بکات،ئه‌زانی لایه‌نی من ئه‌گرێت.
کاپیتان: به‌ پێچه‌وانه‌. زانیم که‌ ئه‌یه‌وێ لێره‌ بڕوات. به‌ڵام ئه‌وه‌ش ئه‌زانم ده‌سه‌ڵاتی ئه‌وه‌ت هه‌یه‌ راکه‌ی بگۆڕیت.
لۆرا: یانی ئه‌ونه‌ ده‌سه‌ڵاتم هه‌یه‌؟
کاپیتان: ئه‌رێ. شه‌یتانێکی که‌ توانای ئه‌وه‌ت هه‌یه‌ هه‌ر شتێکت ویست به‌ ده‌ستی بێنیت. به‌ڵام ئه‌مه‌ بۆ ئه‌و که‌رانه‌ باشه‌ که‌ نازانن چیان ئه‌وێت. بۆ نمونه‌،چۆن توانیت دوکتور نورلینگ وه‌ده‌ر نێیت و ئه‌م زه‌لامه‌ بدۆزیته‌وه‌؟
لۆرا: ده‌ی خۆت بیڵێ چۆن؟
کاپیتان: به‌ تانه‌و ته‌شه‌ر تۆراندت و براکه‌ت ناچار کرد ئه‌م کابرایه‌ بێنێت.
لۆرا: ده‌ی ئه‌مه‌ ساکاره‌،وا نیه‌؟ به‌ پێی یاسا. بێرتا به‌م زووانه‌ ئه‌ڕوات؟
کاپیتان: پانزه‌ رۆژیتر.
لۆرا: دڵنیایت؟
کاپیتان: ئه‌رێ.
لۆرا: له‌گه‌ڵ بێرتا قسه‌ت کرد؟
کاپیتان: ئه‌رێ.
لۆرا: که‌ وایه‌ ئه‌بێ به‌ری بگرم.
کاپیتان: ناتوانیت.
لۆرا: ناتوانم؟ پێتوایه‌ ئێڵم کچه‌که‌م له‌گه‌ڵ ئه‌و چه‌په‌ڵه‌ پیسانه‌ تێکه‌ڵ بێت که‌ ئه‌یانه‌وێ وای لێبکه‌ن ئه‌و شتانه‌ی فێرم کرده‌ به‌ توڕڕه‌هاتی بزانێ و ئه‌ونه‌ بیڕێسن که‌ دایکی له‌به‌ر چاوی که‌وێت؟
کاپیتان: ئه‌ی پێتوایه‌ ئێڵم چوار ژنه‌تیوی بێ سه‌وادی له‌خۆ بایی مێشکی کچه‌که‌م به‌وه‌ پڕ که‌نه‌وه‌ که‌ باوکی لات و به‌ڕه‌ڵایه؟
لۆرا: ئه‌مه‌ گرینگ نیه‌.
کاپیتان: بۆچی؟
لۆرا: بۆ ئه‌وه‌ی دایک به‌ مناڵه‌که‌ی نزیکتره‌. بۆ ئه‌وه‌ی حوکمێ تازه‌ش ده‌رچووه‌ که‌ که‌س ناتوانێ له‌وه‌ دڵنیا بێت کام پیاو باوکی منداڵه‌.
کاپیتان: ده‌ی به‌ ئێمه‌ چی؟
لۆرا: تۆ ناتوانی دڵنیا بیت که‌ باوکی بێرتایت.
کاپیتان: من... ناتوانم دڵنیا بم...!
لۆرا: نا. که‌س ناتوانێ دڵنیا بێت. تۆیش یه‌ک له‌وانه‌یت.
کاپیتان: ئه‌ته‌وێ گاڵته‌ بکه‌یت؟
لۆرا: من هه‌ر ئه‌وه‌ ئه‌ڵێم وا خۆت فێرت کردوم. ده‌ی، چۆن ئه‌زانی خه‌یانه‌تم پێت نه‌کرده‌؟
کاپیتان: ئه‌وه‌ی سه‌باره‌ت به‌ تۆ بڵێن بڕوا ئه‌که‌م جگه‌ ئه‌مه‌. ئه‌گه‌ریش وا بوایێ قه‌ت باسیت نه‌ئه‌کرد.
لۆرا: وا بزانه‌ هه‌موو کارێکم ئه‌کرد،هه‌ر کارێ،له‌ ماڵ ده‌رم بکه‌یت،سوکایه‌تیم پێبکه‌یت،هه‌ر کارێ،جگه‌ ئه‌وه‌ی مناڵه‌که‌م لێ بستێنی. ئه‌و کات چی؟ وا بزانه‌ ئێستا که‌ ئه‌یڵێم"بێرتا مناڵی منه‌ به‌ڵام مناڵی تۆ نیه"‌ راست ئه‌که‌م. وا بزانه‌!
کاپیتان: به‌سی که‌!
لۆرا: بیری لێبکه‌وه‌،به‌مجۆره‌ ئیتر ده‌سه‌ڵاتی باوکانه‌ت نیه‌.
‌کاپیتان: ئه‌گه‌ر بیسه‌لمێنی که‌ من باوکی نیم.
لۆرا: ئاسانه‌،ئه‌ته‌وێ بیسه‌لمێنم؟
کاپیتان: به‌سی که‌! خێرا!
لۆرا: هه‌ر ئه‌وه‌یه‌ ناوی باوکه‌ راسته‌قینه‌که‌ بڵێم و کات و شوێنه‌که‌ی. وه‌ک... بێرتا که‌ی له‌ دایک بوو؟ سێ ساڵ پاش زه‌ماوه‌نده‌که‌مان. له‌ کوێ...
کاپیتان: به‌سی که‌،ئه‌گینا...!
لۆرا: ئه‌گینا چی؟ باشه‌،به‌سه‌. باشتره‌ پێش هه‌مووشتێ سه‌ره‌تا بیری لێبکه‌یته‌وه‌. له‌ هه‌موو گرینگتریش ئه‌وه‌یه‌ خۆت گه‌وج نه‌که‌یت.
کاپیتان: ئه‌ی خوا،له‌ داخی تۆ،ئه‌مه‌وێ بگریم...!
لۆرا: یه‌کجاری بڵێ ئه‌ته‌وێ خۆت که‌ر بکه‌یت!
کاپیتان: به‌ڵام تۆ،نا!
لۆرا: نا. باری من باشتر له‌وه‌یه‌ وام لێبێت!
کاپیتان: هه‌ر بۆیه‌ بنیام ناتوانێ له‌گه‌ڵتا به‌ شه‌ڕ بێت.
لۆرا: بنیامی ژیر له‌گه‌ڵ به‌هێزتر له‌ خۆی شه‌ڕ ناکات!
کاپیتان: به‌هێزتر؟
لۆرا: ئه‌رێ. پێت سه‌یره‌؟ قه‌ت نه‌بووه‌ پیاوێ ببینم و هه‌ست نه‌که‌م به‌هێزترم.
کاپیتان: باشه‌،ئه‌مجاره‌یان ئه‌یدۆڕێنیت. وا که‌ قه‌ت له‌ بیری نه‌که‌یت.
لۆرا: خۆش ئه‌بێت!
دایه‌ن(دێت): شێو ته‌یاره‌،ته‌شریف ئێرن؟
لۆرا: سپاس.
(کاپیتان وچانێ ئه‌دات و دائه‌نیشێت)
لۆرا: نان ناخۆیت؟
کاپیتان: نا،سپاس. هیچ ناخۆم.
لۆرا: لوت ئه‌که‌یت؟
کاپیتان: نا. برسیم نیه‌.
لۆرا: هه‌سته‌،بێرۆ. وا ئه‌زانن چی بووه‌. ده‌ی،مان مه‌گره‌. نایی،باشه‌. ئه‌ونه‌ دانیشه‌ تا گیانت ده‌رچێ!
(لۆرا ئه‌ڕوات)
دایه‌ن: ئاغه‌ گیان! بۆ وا ئه‌که‌یت؟
کاپیتان: نازانم. ئه‌کرێ پێم بڵێیت بۆچی به‌م ته‌مه‌نه‌ش هێشتا ژنان به‌ مناڵمان ئازانن؟
دایه‌ن: له‌ من مه‌پرسه‌. بۆ ئه‌وه‌ی هه‌مووتان،گه‌وره‌ تا بچوک،له‌ ژن داکه‌وتوون.
کاپیتان: به‌ڵام هیچ ژنێ له‌ پیاو دانه‌که‌وته‌. وایه‌. به‌ڵام من باوکی بێرتام! پێم بڵێ بڕوات به‌مه‌ هه‌یه‌؟ ئه‌رێ مارگارێت؟
دایه‌ن: گه‌وره‌م،چه‌ن مناڵی! هه‌ڵبه‌ت تۆ باوکی کچه‌که‌ی خۆتی! ئێستا هه‌سته‌. چیته‌ دانیشتی و لوتت کرده‌! هه‌سته‌ ده‌ی!
کاپیتان: (هه‌ڵئه‌سێت) بڕۆ ده‌رۆ،ژنه‌تیوه‌ی...! هه‌مووتان وه‌ک یه‌کن،جنۆکه‌ن! (بانگ ئه‌کات) ئۆسوارد،کالیسکه‌! خێرا!
دایه‌ن: کاپیتان! ئۆهۆی، گوێ بگره‌...!
کاپیتان: ده‌رۆ،چه‌تیوه‌ پیسه‌! خێرا!
دایه‌ن: په‌نا بۆ خوا،ئه‌یه‌وێ چی بکات؟
کاپیتان خۆی کۆ ئه‌کاته‌وه‌) تا نیوه‌شه‌و نایێمه‌وه‌! ماتڵم مه‌بن! (ئه‌ڕوات)
دایه‌ن: ئه‌ی خوای گه‌وره‌،ئه‌یه‌وێ چی بکات؟
............................................................ ....

باوک

به شی 2

هه‌ر ئه‌و شوێنه‌ی پێشوو،شه‌وه‌،چراکه‌ ئه‌گڕێت.

1)
دوکتور: له‌گه‌ڵ شووه‌که‌تان قسه‌م کرد. ناتوانم له‌ قسه‌کانتان دڵنیا بم. ئێوه‌ ئه‌تانوت به‌ میکڕۆسکۆپ ئه‌و شتانه‌ی دیوه‌،به‌ڵام هه‌ڵه‌تان کرد. زانیم که‌ مێشکی ساخه‌و خزمه‌تی باشی به‌ زانست کردووه‌.
لۆرا: من وام نه‌وت.
دوکتور: خاتون،من قسه‌کانتم ئه‌نوسی و به‌ تایبه‌ت دوجار لێتانم پرسی که‌ نه‌کا به‌ هه‌ڵه‌ تێگه‌یشتبێتم. نابێ هه‌روا تانه‌ له‌ که‌س به‌ین. ئه‌و شتانه‌ی ئێوه‌ باستان کرد ئه‌توانێ ببێته‌ هۆی به‌ شێت ناسینی کابراو ئیتر‌ توانای به‌خێو کردنی بنه‌ماڵه‌که‌ی نیه‌.
لۆرا: ئه‌توانێ ببێته‌ هۆی...!
دوکتور: به‌ڵێ. ئه‌زانن شێتیش هیچ مافێکی به‌ سه‌ر ماڵ و مناڵیه‌وه‌ نامێنێ.
لۆرا: نا، نازانم.
دوکتور: شتیتریش هه‌یه‌ که‌ زیاتر په‌رۆشم ئه‌کات. ئه‌یوت جوابی نامه‌کانم نایێته‌وه‌. ئیزن فه‌رمون بپرسم که‌ داخۆ ئێوه‌،هه‌ڵبه‌ت ئه‌زانم ویستێکی خێرخوازانه‌تان بووه‌،نه‌تانهێشتووه‌ نامه‌کان بگه‌نه‌ ده‌س خاوه‌نه‌کانی؟
لۆرا: به‌ڵێ،ئه‌مه‌م کرده‌. ده‌بوا نه‌مهێشتایێ بنه‌ماڵه‌م له‌به‌ر هیچ و پوچ تیاچێت.
دوکتور: بمبورن،به‌ڵام پێموابێ نه‌تانئه‌زانی ئاکامی وه‌ها کارێ چیه‌. به‌مه‌ بزانن گڕ ئه‌گرن. ئێوه‌ ئه‌زانن چه‌ن سه‌خته‌ به‌ر به‌ حه‌زی که‌سێ بگیرێت و باڵی فڕینی بسوتێنن.
لۆرا: به‌ڵێ ئه‌زانم.
دوکتور: ده‌ی ئه‌بێ چۆن بیر بکاته‌وه‌و هه‌ست به‌ چی بکات؟
لۆرا: (هه‌ڵئه‌سێت) نیوه‌شه‌وه‌و هێشتا نه‌هاتوه‌ته‌وه‌. ئه‌بێ خۆمان بۆ خراپتر له‌مانه‌ ته‌یار بکه‌ین.
دوکتور: بڵێن بزانم،دوای رۆشتنم چی روویدا؟ ئه‌بێ هه‌موو شتێ بزانم.
لۆرا: ئای،هاوارو داوی رێخست و ئه‌وه‌ی هات به‌ ده‌میا وتی. ئه‌زانن وتی چی؟ وتی،بڵێی ئه‌و باوکی بێرتا بێت!
دوکتور: زۆر سه‌یره‌! ئه‌مه‌ چۆن دای له‌ مێشکی؟
لۆرا: نازانم. ئه‌ها،له‌ پیاوێکی پرسی باوکی فڵان مناڵ کێیه‌،که‌ من لایه‌نی ژنه‌که‌م گرت،ئه‌و توڕه‌ بوو وتی که‌س ناتوانێ دڵنیا بێت باوکی منداڵه‌که‌ کێیه‌. خوا بیزانێ زۆرم هه‌وڵدا له‌ دڵی ده‌ر بێنم به‌ڵام نه‌متوانی و هیچیشمان له‌ ده‌س نایێت. (ده‌س به‌ گریان ئه‌کات)
دوکتور: نابێ بێڵین وای لێ بێت. ئه‌بێ کارێ بکه‌ین. به‌ڵام نابێ شک بکات. پێشتریش له‌م قسانه‌ی ئه‌کرد؟
لۆرا: شه‌ش ساڵ له‌مه‌وبه‌ر شتێ وا روویدا. ئه‌و ساڵه‌ نامه‌یێکی بۆ دوکتورێ نارد و وتی هه‌ست ئه‌کات ئه‌قڵ و فامی ته‌واو نیه‌.
دوکتور: هه‌ی داو! ئه‌مه‌ زۆر قووڵه‌! من نابێ ئه‌ونه‌ له‌م نهێنیانه‌ بکۆڵمه‌وه‌. باشتره‌ خۆم کۆ بکه‌مه‌وه‌و هه‌ر به‌وه‌ی ئه‌یبینم و ئه‌یبیسم رازی بم. به‌ داخه‌وه‌ کار له‌ کار ترازاوه‌. به‌ڵام هێشتا دێر نه‌بووه‌. پێتوایه‌ ئێستا له‌ کوێ بن؟
لۆرا: نازانم. به‌ینێکه‌ کاری گه‌وجانه‌ی زۆر ئه‌کات.
دوکتور: پێتان خۆشه‌ ماتڵیان بم؟ ئه‌توانم بڵێم دایکتان نه‌خۆش بوو،بۆیه‌ لێره‌م. با شک نه‌کات.
لۆرا: به‌ڵێ،ئه‌مه‌ باشه‌. تکایه‌ با ته‌نیا نه‌وێت. نازانن چه‌ن په‌رۆشم! باشتر نیه‌ راس پی بڵێن ده‌ردی چیه‌؟
دوکتور: نا،نابێ وا بکه‌ین. ئه‌مجۆره‌ نه‌خۆشانه‌ ئه‌بێ خۆیان باسه‌که‌ دامه‌زرێنن. ئه‌وه‌ش رێگه‌ی خۆی هه‌یه‌. ئێستا باشتره‌ لێره‌ نه‌بین با شک نه‌کات.
لۆرا: به‌ڵێ،ته‌کبیرێ باشه‌. مارگارێت ئه‌توانێ لێره‌ دانیشێت. ئه‌و ماتڵی ئه‌بێت تا کاپیتان دێته‌وه‌،عاده‌تیه‌تی. کاپیتانی وه‌ک مۆم لێکردووه‌. (بانگ ئه‌کات) مارگارێت،مارگارێت.
دایه‌ن: چیه‌ خاتون؟ کاپیتان هاتنه‌وه‌؟
لۆرا: نا‌(دایه‌ن دێت) لێره‌ دانیشه‌ تا دێته‌وه‌. پی بڵێ دایکم نه‌خۆشه‌و دوکتور له‌ لایه‌تی.
دایه‌ن: باشه‌،خه‌مت نه‌بێ.
لۆرا: ته‌شریف ئێرن،دوکتور؟
دوکتور: سپاس.
(دایه‌ن ده‌س ئه‌کا به‌ دۆعا خوێندن. ورته‌ی دێت. بێرتا دێت. که‌شه‌فه‌ی پێیه‌)
بێرتا: مارگارێت،ئه‌کرێ لای تۆ دانیشم. ئه‌وێ زۆر ناخۆشه‌.
دایه‌ن: په‌نا بۆ خوا،هێشتا نه‌خه‌وتوویت؟
بێرتا: ئه‌بێ ئه‌مه‌ ته‌واو بکه‌م. جیژنانه‌یه‌ بۆ باوکم. ئه‌ها! بۆ تۆیشم داناوه‌!
دایه‌ن: به‌ڵام،بێرتا خانم،نابێ ئێستا لێره‌ بیت. کاتی خه‌وتنته‌و به‌یانیش ئه‌بێ زوو هه‌ستیت. نیوه‌شه‌وه‌.
بێرتا: باشه‌،ئه‌ڵێی چی؟ ناوێرم له‌وێ به‌ ته‌نیا بم. ئه‌زانم پڕه‌ له‌ رۆح. ده‌نگیان ده‌بیسم.
دایه‌ن: له‌ بیرته‌ چیم پێ وتیت؟ ئه‌رێ،له‌ بیرت بێ هیچ رۆح و فریشته‌یێکی خاس له‌م ماڵه‌دا نیه‌. چی ئه‌بیسیت؟
بێرتا: ئه‌زانی،وه‌ک ئه‌وه‌یه‌ که‌سێ له‌و دیوه‌ بچوکه‌ی سه‌ر بان گۆرانی بخوێنێت!
دایه‌ن: دیوه‌ بچوکه‌که،به‌م بێوه‌خته‌؟
بێرتا: ئه‌رێ. خه‌مینیش ئه‌خوێنێت. پێشتر نه‌مبیستووه‌. ئه‌ڵێی له‌ دیواره‌که‌وه‌ دێت.
دایه‌ن: وه‌ی،وه‌ی! له‌و باو بۆرانه‌ی ئه‌مشه‌و! (دۆعا ئه‌خوێنێت و فوو به‌ ده‌وریا ئه‌کات) باشه‌ کچه‌ جوانه‌که‌م،خوا گیان ئه‌یه‌وێ جێژنێکی خۆشمان بۆ دیاری بکات!
بێرتا: مارگارێت،راسته‌ ئه‌ڵێن باوکه‌ نه‌خۆشه‌؟
دایه‌ن: به‌داخه‌وه‌،ئه‌رێ.
بێرتا: وابێ ناتوانین جێژن بکه‌ین. ئه‌گه‌ر باوکه‌ نه‌خۆشه‌ ئه‌ی بۆ ئێمه‌ ساخین؟
دایه‌ن: کچی خۆم،نه‌خۆشینه‌که‌ی باوکه‌ وا نیه‌ که‌س تووش کات. بێده‌نگ! یه‌کێ خه‌ریکه‌ دێت. بڕۆ بخه‌وه‌، خێرا، ئه‌میشه‌ بشاره‌وه‌ ئه‌گینا کاپیتان توڕه‌ ئه‌بێت.
بێرتا: (ئه‌ڕوات) شه‌و باش مارگارێت.
دایه‌ن: شه‌و باش کچی خۆم. خوات له‌گه‌ڵ.

2)
کاپیتان: (باڵتاکه‌ی ده‌ردێنێت) هێشتا نه‌خه‌وتیت؟ بڕۆ بخه‌وه‌!
دایه‌ن: ماتڵ بووم بیته‌وه‌ تا...
(کاپیتان چه‌ن نامه‌و رۆژنامه‌ له‌ گیرفانی باڵتاکه‌ی ده‌ردێنێت و له‌ پشت مێزه‌که‌ دائه‌نیشێت)
دایه‌ن: ئاغه‌گیان!
کاپیتان: چیه‌؟
دایه‌ن: دایکی خاتون نه‌خۆشه‌و دوکتور له‌ لایه‌تی.
کاپیتان: چییه‌تی،خه‌ته‌ره‌؟
دایه‌ن: نا،له‌وه‌ ناچێ. سه‌رمای بووه‌.
کاپیتان: (هه‌ڵئه‌سێت) مارگارێت،باوکی منداڵه‌که‌و کێ بوو؟
دایه‌ن: سه‌د جار وتومه‌،ئه‌و جانسۆنه‌ واوا لێهاتووه‌.
کاپیتان: دڵنیای بۆ خۆی بوو؟
دایه‌ن: خۆت که‌ر مه‌که‌. دڵنیای دڵنیام. ته‌نیا و ته‌نیا هه‌ر ئه‌و بوو.
کاپیتان: ئه‌رێ. به‌ڵام جانسۆنیش دڵنیا بوو که‌ هه‌ر خۆی به‌ ته‌نیا بوو؟ نا. نه‌یئه‌توانی دڵنیا بێت. به‌ڵام تۆ ئه‌وتوانی. ئه‌زانی چیه‌،جیاوازیان هه‌یه‌.
دایه‌ن: تێناگه‌م جیاوازیان چیه‌.
کاپیتان: دیاره‌ ناتوانی تێبگه‌یت. به‌ڵام جیاوازن. (ئه‌لبۆمی وێنه‌کان ده‌ردێنێ و سه‌یری ئه‌کات) پێتوایه‌ بێرتا له‌ من ئه‌چێ؟
دایه‌ن: سێوێکن کریاون به‌ دوو کوتۆ.
کاپیتان: جانسۆن خۆی به‌ باوکی منداڵه‌کی ئه‌زانی؟
دایه‌ن: بۆ ئه‌یتوانی نه‌زانێت؟
کاپیتان: تۆقێنه‌ره‌! ئه‌وه‌ دوکتوریش.

3)
کاپیتان: شه‌وباش دوکتور،خه‌سوم چۆنه‌؟
دوکتور: باشن،پای ره‌گاو ڕه‌گ بووه.
کاپیتان: پێموابێ مارگارێت وتی سه‌رمای بووه‌. وا دیاره‌ بۆچونتان جیاوازه‌. بڕۆ بخه‌وه‌ مارگارێت. (دایه‌ن ئه‌ڕوات) فه‌رمو دانیشن دوکتور.
دوکتور: (دائه‌نیشێت) سپاس.
کاپیتان: ئه‌ڵێم،راست ئه‌که‌ن ئه‌ڵێن له‌ په‌ڕینی که‌ره‌کێوی و ئه‌سپ،به‌چکه‌که‌ری رێ ڕێ دێته‌ دنیا؟
دوکتور سه‌یر ماوه‌) ته‌واو راسته‌!
کاپیتان: ئه‌مه‌ش راسته‌ ئه‌ڵێن هه‌ر له‌و مایینانه‌ که‌ که‌ری نێر سکیان پڕ ئه‌کات،دیسان به‌چکه‌که‌ری رێ رێ دێت؟
دوکتور: به‌ڵێ،ئه‌مه‌ش راسته‌.
کاپیتان: که‌ وایه‌،نێره‌که‌رێ قاوه‌یی ئه‌توانی باوکی به‌چکه‌ که‌رێکی رێ رێ بێت و به‌ پێچه‌وانه‌ش؟
دوکتور: وا دیاره‌.
کاپیتان: که‌ وایه‌ مناڵ له‌ باوکی خۆی بچێ بێ مانایه!
دوکتور: ئم...
کاپیتان: که‌ وایه‌ قه‌ت ناکرێ به‌ دڵنیاییه‌وه‌ بڵێین کام پیاو باوکی مناڵه‌که‌یه‌؟
دوکتور: ده‌ی،ئم...
کاپیتان: تۆی ژن مردوو،چه‌ن مناڵت هه‌یه‌؟
دوکتور: ده‌ی... به‌ڵێ...
کاپیتان: بڕێجار پێت وا نیه‌ چ که‌ر بازاڕێکه‌؟ له‌وه‌ که‌رانه‌تر نیه‌،بنیام، پیاوێ ببینێ که‌ خه‌ریکه‌ باسی مناڵه‌که‌ی ئه‌کات. ئه‌بێ بڵێت مناڵی ژنه‌که‌م. قه‌ت بووه‌ شک که‌یت و له‌ ترسا گیانو بنیشێته‌ سه‌ر ئاره‌ق؟‌ ناڵێم دڵ پیسی،ئه‌ڵێم شک،بۆ ئه‌وه‌ی وه‌ک پیاو ماقوڵێک وا دای ئه‌نێم ژنه‌که‌ت جێی شک نه‌بووه‌.
دوکتور: ئه‌بێ بڵێم نا! ئه‌م قسه‌ی "گوته"‌ت نه‌بیستووه‌ ئه‌ڵێ: پیاو ئه‌بێ مناڵه‌کانی به‌ دڵنیایی به‌خێو بکات؟
کاپیتان: دڵنیا؟ ژن له‌ کوێ و دڵنیایی له‌ کوێ؟ ئه‌مه‌ تۆقێنه‌ره‌.
دوکتور: به‌ڵام ژنان هه‌موو وه‌ک یه‌ک نین.
کاپیتان: ئه‌ڵێن ته‌نیا یه‌کجۆر ژن هه‌یه‌و ئه‌مه‌یان سه‌لماندووه‌. چه‌ن نمونه‌ت ئه‌وێ بیگێڕمه‌وه‌ بزانی چه‌ن پیسن؟ ئه‌ونه‌ پیسن خۆیشیان نازانن چه‌ن پیسن! کاتی لاویم،رێک و پێک و به‌خۆ بوم. ژنان خۆیان ئه‌هاتن بۆ لام. شوو دار و بێ شوو. نه‌ختێ خۆیان خه‌مین پیشان ئه‌داو منیش خێرا دڵداریم ئه‌دانه‌وه‌و ئیتر ته‌واو!
دوکتور: ئه‌م بیرو هزرانه‌ ساخ نین. باشتر وایه‌ به‌ خۆتانا بێنه‌وه‌.
کاپیتان: نابێ له‌م وشه‌ی ساخ نین که‌ڵک بگریت. باش ئه‌زانی هه‌موو وه‌ک یه‌ک ناته‌قێنه‌وه‌! تێئه‌گه‌یت؟ هاتویته‌ ئێره‌ که‌ چاودێری من بکه‌یت. به‌ڵام خۆم به‌ پیاو ئه‌زانم و ناکرێ هه‌روا تانه‌ت لێده‌م. به‌م بۆنه‌وه‌ ئه‌بێ به‌داخه‌وه‌ نقه‌ له‌ خۆم ببڕم تا گیانم ده‌ر ئه‌چێت. شه‌و باش.
دوکتور: کاپیتان! ئه‌گه‌ر نه‌خۆشن به‌ من بڵێن! به‌ وتن ناماقوڵ نابن! ئه‌بێ قسه‌ی هه‌ر دوو لا ببیسم.
کاپیتان: ئه‌شیا بمزانیبا تاقه‌تی بیستنی قسه‌ی بنیامت نیه‌!
دوکتور: نا،کاپیتان. وا نیه‌. شه‌وێکیان له‌ پرسه‌ بووم. ژنه‌ خه‌ریکی لاواندنه‌وه‌ی شووه‌ مردووه‌که‌ی بوو،لای خۆم وتم،چه‌ن ناخۆشه‌ کابرا مردووه‌و ناتوانێ جواب باته‌وه‌!
کاپیتان: پێت وایه‌ به‌ زیندوویی ئه‌یوێرا ده‌م کاته‌وه‌؟ پێتوایه‌ پیاو له‌ قه‌بریش بێته‌ ده‌ر که‌س گوێ بۆ قسه‌ی شل ئه‌کات؟ شه‌و باش دوکتور. ئه‌بینی،من به‌ ته‌واوی له‌سه‌ر خۆم. که‌ وایه‌ ته‌خت بگره‌ بخه‌وه‌!
دوکتور: شه‌و باش. وا دیاره‌ هیچم له‌ ده‌س نایێت.
کاپیتان: ئێمه‌ دوژمنی یه‌کترین؟
دوکتور: نا،نا. خراپه‌که‌ی ئه‌وه‌یه‌ ناتوانین دۆستی یه‌کتر بین. شه‌و باش. (ئه‌ڕوات. کاپیتان تا لای درگاکه‌ له‌گه‌ڵیا ئه‌ڕوات.)
کاپیتان: وه‌ره‌ ژور. ئه‌زانم گوێت ئه‌دا.

4)
(لۆرا دێت. په‌شۆکاوه‌. کاپیتان له‌ پشت مێزه‌که‌ی دائه‌نیشێت)
کاپیتان: ‌شه‌و دره‌نگه‌،به‌ڵام ئه‌بێ خۆمان یه‌ک لا که‌ینه‌وه‌. دانیشه‌. ئێواره‌ چوم بۆ پۆسخانه‌و نامه‌کانم وه‌رگرت. زانیم که‌ به‌ر به‌ ناردنی نامه‌کانمت گرته‌و هه‌روا ئه‌وه‌یشی که‌ بۆیان ئه‌ناردم. ئه‌م کاره‌ت هه‌موو هه‌وڵ و پشکنین و لێکۆڵینه‌وه‌کانمی فه‌وتانه‌.
لۆرا: ئه‌مویست چاکه‌و بۆ بکه‌م. ویستم ئێمه‌ت له‌ بیر نه‌چێت.
کاپیتان: نا،ئه‌مه‌ چاکه‌ نیه‌. ئه‌ترسای به‌م کارانه‌م که‌ومه‌ به‌ر چاو،تۆیش حه‌ز به‌مه‌ ناکه‌یت. بۆ ئه‌وه‌ی پێتوایه‌ به‌مه‌ سووکتر ئه‌بیت. منیش چه‌ن نامه‌ی تۆم لای خۆم راده‌گرم.
لۆرا: نیشانه‌ی ماقوڵیتانه‌.
کاپیتان: باشه‌ به‌س نیه‌ قه‌درم ئه‌زانیت! ئه‌م نامانه‌ ئه‌ڵێن به‌ینێکه‌ خه‌ریک ئه‌وه‌یت قاو داخه‌یت که‌ مێشکم شڵه‌قاوه‌و قسه‌ی هه‌ڵیت و پڵیت ئه‌که‌م تا به‌مجۆره‌ ئه‌وه‌ی ئه‌مناسێت لێم دور که‌ونه‌وه‌. ئه‌بێ بڵێم توانیوته‌،بۆ ئه‌وه‌ی ناتوانم ته‌نانه‌ت یه‌کێ له‌وانه‌ که‌ ئه‌م باسانه‌ت بۆ ناردون بدۆزمه‌وه که‌ به‌ ساخم بزانن. به‌ڵام خۆت له‌ هه‌مو که‌س باشتر ئه‌زانی،مێشکم ساخه‌و ئه‌توانم هه‌موو کاره‌کانم بکه‌م و وه‌ک باوکیش باوکیه‌تی ئه‌که‌م و وه‌ک شوویش هێشتا شتێکم پێیه‌و به‌ هێزم. له‌م ماوه‌دا ئه‌وه‌نده‌ تێت کوتاوم که‌ شه‌ل و په‌ل بووم و له‌وانه‌یه‌ هه‌ست و هێزم به‌ پێچه‌وانه‌ خۆیان پیشان بده‌ن! من هیوام به‌ ره‌حم و مێهره‌بانیت نیه‌،چون نیته‌! به‌ڵام هیوام ئه‌وه‌یه‌ تێبگه‌یت کام لا خێری بۆت هه‌یه‌.
لۆرا: ده‌ی ئیتر!
کاپیتان: وات لێ کردووم له‌ هه‌موو شت شک که‌م و بڕوام نه‌مێنێ و نه‌زانم خاس و خراپ کامه‌ن. ئه‌مه‌ هه‌ر ئه‌و شێتییه‌ زوو ره‌سه‌یه‌ که‌ به‌ ته‌مای بوویت. زۆریشی نه‌ماوه‌! ئێستا ئه‌بێ له‌ خۆت بپرسیت،ساخ بوونم خێری بۆت هه‌یه‌ یان شێتیم؟ بیرت له‌مه‌ کردوه‌ته‌وه‌؟ بێتو له‌ پا که‌وم،له‌ کار ده‌رم ئه‌که‌ن و ئیتر ناتوانم خه‌رجتان بده‌م به‌ڵام بیمه‌ی عومرم ئه‌گا به‌ تۆ. به‌ڵام ئه‌گه‌ر خۆم بکوژم هیچت به‌ر ناکه‌وێت. که‌ وایه‌ خێری تۆ له‌وه‌دایه‌ زیندوو بمێنم،تا ده‌مرم.
لۆرا: ئه‌مه‌ داوه‌؟
کاپیتان: ئه‌رێ. خۆت هه‌لبژێره‌ که‌ تێیکه‌وی یان نا.
لۆرا: تۆ ناتوانی خۆت بکوژیت!
کاپیتان: دڵنیایت؟ پێتوایه‌ پیاوێ که‌ هیچ که‌س و هیچ شتێک شک نه‌بات ئه‌توانێ زیندوو بمێنێت؟
لۆرا: واته‌ خۆت ئه‌ده‌ی به‌ ده‌سته‌وه‌؟
کاپیتان: نا،ئاشت بینه‌وه‌.
لۆرا: مه‌رجه‌کانت چین؟
کاپیتان: ته‌نیا مه‌رجێک،شک له‌ دڵم ده‌ر بکه‌.
لۆرا: کام شک؟
کاپیتان: کێ باوکی بێرتایه‌؟
لۆرا: له‌مه‌ دو شکیت؟
کاپیتان: ئه‌مه‌ له‌ مێشکمدایه‌و کاری خۆته‌.
لۆرا: من؟
کاپیتان: ئه‌رێ. نه‌خته‌ نه‌خته‌ وه‌ک ژار تکانته‌ گوێم و نیشانه‌کان که‌ به‌ دوایدا هاتن شکمی قورستر کرد. رزگارم بکه‌و بڵێ راسته‌! منیش خێرا ئه‌تبه‌خشم!
لۆرا: چۆن ئه‌کرێ ئه‌وه‌ی که‌ نه‌مکرده‌ بڵێم کردوومه‌؟
کاپیتان: بۆ ناکرێت؟ خۆت ئه‌زانی به‌ که‌س ناڵێم. وا ئه‌زانی پیاو ئه‌توانێ جاڕ بدات که‌ پیاو نیه‌؟
لۆرا: بڵێم نا،شکه‌که‌ت هه‌ر ئه‌مێنێت. به‌ڵام بڵێم راسته‌،شکت نامێنێت. واته‌ حه‌ز ئه‌که‌یت ئه‌مه‌ راست بێت!
کاپیتان: ئه‌رێ سه‌یره‌! پێموایه‌ ناکرێ ئه‌میان بسه‌لمێنین به‌ڵام ئه‌ویان ئه‌کرێت!
لۆرا: به‌ڵگه‌ت بۆ ئه‌م شکه‌ هه‌یه‌؟
کاپیتان: ئه‌رێ و نا.
لۆرا: حه‌ز ئه‌که‌یت تاوانبار بم که‌ بتوانیت ده‌رم بکه‌یت و مناڵه‌که‌ لای خۆت راگریت. ناتوانی به‌مه‌ که‌رم بکه‌یت.
کاپیتان: پێتوایه‌ بمزانیبا خه‌یا‌نه‌تت کردووه‌ لێت خۆش ئه‌بووم و مناڵی کابرایێکیترم به‌خێو ئه‌کرد؟
لۆرا: دڵنیام نه‌تئه‌کرد. هه‌ر بۆیه‌ زانیم درۆ ئه‌که‌یت وتت ئه‌مبه‌خشی.
کاپیتان: (هه‌ڵئه‌سێت) لۆرا،فریام بکه‌وه‌. یارمه‌تیم بده‌ مێشکم تێک نه‌چێت. تێناگه‌یت چی ئه‌ڵێم. بێرتا کچی من نه‌بێ مانای ئه‌وه‌یه‌ هیچ مافێکیشم نیه‌. تۆ هه‌ر ئه‌مه‌ت ئه‌وێت؟ یان شتێترت ئه‌وێت؟ ئه‌ته‌وێ ده‌سه‌ڵاتی ئه‌وه‌ت ببێ مناڵه‌که‌ به‌ ته‌نیا هی خۆت بێت و منیش ته‌نیا به‌خێوتان بکه‌م؟
لۆرا: ده‌سه‌ڵات؟ ئه‌رێ. ئه‌ی شه‌ڕی مه‌رگ و مانه‌وه‌ ته‌نیا بۆ گرتنی ده‌سه‌ڵات نیه‌؟
کاپیتان: من ئیمانم به‌ قیامه‌ت نیه‌. پێموابوو مناڵ مانای ژیانه‌وه‌مه‌. ئه‌وه‌ی ئێوه‌ پی ئه‌ڵێن ژیانی ئه‌و دونیا. ره‌نگه‌ ته‌نیا ئیمانێ که‌ بمبێت ئه‌مه‌یه‌. ئه‌مه‌م لێ بستێنی ئه‌مرم.
لۆرا: بۆچی کاتێ ئه‌توانین جیا بینه‌وه‌،جیا نه‌بینه‌وه‌؟
کاپیتان: بۆ ئه‌وه‌ی مناڵ هه‌ر دووی ئه‌وێت. باوک و دایکیش. چۆن و بۆچی وامان به‌سه‌ردا هات،نازانم. قه‌ت بیرم لێ نه‌کردوه‌ته‌وه‌. به‌ڵام ئێستا بیر ئه‌که‌مه‌وه‌. ئه‌گه‌ڕێمه‌وه‌ بۆ سه‌ره‌تای ژیانی هاوبه‌شمان. دوو ساڵ تێپه‌ڕی و هێشتا مناڵمان نه‌بوو. خۆت باش ئه‌زانی نه‌خۆش بووم. خه‌ریک بوو بمرم. له‌ بیرمه‌ ده‌نگی دوو که‌س ئه‌هاته‌ گوێم که‌ سه‌باره‌ت به‌ پاره‌و سامانی من قسه‌یان ئه‌کرد. ئه‌رێ،تۆ بوویت و وه‌کێڵه‌که‌م. ئه‌و کات هێشتا بڕێک سامانم بوو. ئه‌و خه‌ریکه‌ پێت ئه‌ڵێ له‌ سامانی من هیچت ناکه‌وێ چون مناڵمان نیه‌. لێت ئه‌پرسێ سکت هه‌یه‌. من جوابه‌که‌ت نابیسم. من چاک بوومه‌وه‌و مناڵمان بوو. باوکی ئه‌و مناڵه‌ کێیه‌؟
لۆرا: تۆ!
کاپیتان: نا. وا نیه‌! بڕێ شت له‌م ناوه‌دا شاراوه‌یه‌. ژنان ئه‌ونه‌ هه‌ست ناسکن که‌ ئه‌توانن بۆ گه‌یشتن به‌ خواسته‌کانیان زۆر شت بکه‌ن. من له‌به‌ر تۆ،له‌به‌ر منداڵی تۆ،له‌به‌ر دایکی تۆ،خزمه‌تکاری تۆ،ره‌نجم کێشاو نۆکه‌ری ئه‌م و ئه‌وم کرد. ئه‌شکه‌نجه‌،شه‌للاق و شه‌ق و بێخه‌وی و ئه‌وه‌ی بیری لێ بکه‌یته‌وه‌،له‌به‌ر تۆ،به‌ سه‌رمدا هات و نقه‌م نه‌هات و موم سپی کرد ته‌نیا بۆ ئه‌وه‌ی به‌ خۆشی و ئارامی بژیت و کاتی پیری چێژ له‌ ژیانی خۆت و مناڵت بگریت. قه‌ت گله‌ییم نه‌کردو تاقه‌تم هێنا،بۆ ئه‌وه‌ی پێموابوو باوکی بێرتام. دزی له‌مه‌ پیستر هه‌ر نابێت. حه‌فده‌ ساڵ دیلی زیندانێک بیت به‌ ئه‌شکه‌نجه‌و ئازاره‌وه‌ به‌ تاوانی بێ تاوانی. تۆ چیت هه‌یه‌ بیده‌یت؟
لۆرا: ئێستا ئیتر ته‌واو شێتیت!
کاپیتان: (دائه‌نیشێت) له‌ خواته‌ شێت بم. ئه‌زانم چیهات نه‌کرده‌ ئه‌مه‌ بشاریته‌وه‌. دڵم بۆت ئه‌سوتا کاتێ نه‌مئه‌زانی له‌ چی دڵگیریت. زۆرجار ئه‌و دڵه‌ پیسه‌تم هێمن ئه‌کرده‌وه‌و پێموابوو بیره‌ پیسه‌کان دور ئه‌خه‌مه‌وه‌. ئێستا شه‌وی پێش شه‌وی ئاخرم دێته‌وه‌ بیر! رۆژی له‌ دایک بوونی بێرتا. دووی نیوه‌شه‌و من خه‌ریک کتێب خوێندنه‌وه‌ بووم. که‌ قیژاندت وه‌ک ئه‌وه‌ بوو که‌سێ ئه‌یه‌وێ بتخنکێنێت. "مه‌بیسه‌! مه‌بیسه‌!" سه‌رم ئه‌کوتا به‌ دیوارا،که‌ هیچ نه‌بیسم. به‌ینێ بوو شکم بوو به‌ڵام ئه‌ترسام ئه‌و شتانه‌م بیر که‌وێته‌وه‌ که‌ ئه‌یسه‌لماند شکم بێ شکه‌! هه‌موو ئه‌مانه‌م له‌به‌ر تۆ کرده‌ دڵ و تاقه‌تم هێنا. تۆ بۆ من چی ئه‌توانی بکه‌یت؟
لۆرا: من چیم له‌ده‌س دێت؟ هه‌ر ئه‌توانم سوێند بخۆم به‌ خواو ئه‌وه‌ی موقه‌ده‌ساته‌ که‌ تۆ باوکی بێرتای.
کاپیتان: که‌ڵکی چیه‌؟ خۆت وتت دایک له‌به‌ر مناڵه‌که‌ی هه‌موو کارێ ئه‌کات. تکا ئه‌که‌م،ئه‌پاڕێمه‌وه‌،وه‌ک پیاوێکی دڵسوتاو،بیکه‌ به‌ خاتری رابردوو،ره‌حمێ بکه‌و پێم بڵێ! نامبینی وه‌ک مناڵ ئه‌گریم و ئه‌پاڕێمه‌وه‌؟ به‌ زه‌لیلی و داماوی تکای به‌خشینم لێته‌،له‌به‌ر ژیانم.
لۆرا: (لێی نزیک ئه‌بێته‌وه‌) ئه‌وه‌ ئه‌گریت! تۆ پیاوی!
کاپیتان: ئه‌رێ،ئه‌گریم و پیاویشم! مه‌گه‌ر پیاو چاوی نیه‌،ده‌سی نیه‌،پا،دڵ،هه‌ست و بیری نیه‌؟ مه‌گه‌ر پیاو هه‌ر ئه‌و شته‌ ناخوات که‌ ژن ئه‌یخوات،هه‌ر به‌و چه‌که‌ بریندار نابێت که‌ ژنیش،هه‌ر به‌و زستان و هاوینه‌ سه‌رماو گه‌رمای ناوێ که‌ ژن؟ ئه‌گه‌ر بریندارمان که‌ن،خوێنمان ناڕژێت؟ به‌ ختلیک ناکه‌وینه‌ پێکه‌نین؟ ژار خۆرمان که‌ن نامرین؟ بۆچی پیاو نه‌توانێ گله‌یی بکات یان نه‌توانێ بگری؟ بۆ ئه‌وه‌ی پیاومان پێ ئێژن؟
لۆرا: بگری،کوڕم. دایکت له‌ لاته‌ که‌ هێمنت کاته‌وه‌. بیرته‌ وه‌ک دایک هاتمه‌ ژیانته‌وه‌؟ جه‌سته‌ی زه‌لام و به‌ هێزت ئه‌ترسا،وه‌ک مناڵێ زه‌لام که‌ نابه‌دڵ هاتوه‌ته‌ دنیا.
کاپیتان: ئه‌رێ،پێموایه‌ هه‌ر وا بوو. باوکم و دایکم بێ ئه‌وه‌ی بیانه‌وێ منیان بوو. که‌ هاتی پێموابوو ته‌واوم. بۆیه‌ هێشتم فه‌رمان به‌یت و ببمه‌ فه‌رمانبه‌ر. من مناڵه‌ گه‌وجه‌که‌ی خۆت بووم.
لۆرا: ئه‌رێ،هه‌روا بوو. وه‌ک مناڵی خۆم خۆشم ئه‌ویستی. به‌ڵام که‌ وه‌ک شوو لێم نزیک ئه‌بوویته‌وه‌،ترێق ئه‌بوومه‌وه‌،هه‌رچه‌ن خه‌وتن له‌ باخه‌ڵتا خۆش بوو به‌ڵام دواجار وه‌ک خه‌یانه‌ت ئه‌هاته‌ بیرم. دایک ئه‌بوو به‌ سۆزانی. تف!
کاپیتان: ئه‌رێ،له‌ بیرمه‌. به‌ڵام نه‌مه‌فامی. وام ئه‌زانی قینته‌ له‌وه‌ی وه‌ک شوو نه‌ودوێنم. ئه‌مویست پیاو بم که‌ خۆشمت بوێت.
لۆرا: هه‌ڵه‌ت کرد. دایک دۆسی تۆ بوو به‌ڵام ژن دوژمنت. ئه‌شقێنی ژن و پیاو شه‌ڕه‌و کێبه‌رکێ. وا مه‌زانه‌ خۆم به‌ ده‌سته‌وه‌ ئه‌دا،نا،نه‌مه‌دا. من ئه‌وه‌ی ئه‌مویست وه‌رم ئه‌گرت. سه‌ره‌تا تۆ سه‌ر بوویت. ئه‌مه‌م هه‌ست ئه‌کرد. ئه‌مویست تۆیش هه‌ست به‌وه‌ بکه‌یت.
کاپیتان: نا،ئه‌وه‌ که‌ هه‌میشه‌ سه‌ر بوو تۆ بوویت. توانای هیپنۆتیسمت بوو،وا که‌ کوێر و که‌ڕ ئه‌بووم و ته‌نیا فه‌رمانم ئه‌برد. توانات بوو ته‌ماته‌ی کاڵ بده‌یته‌ ده‌سم و وام لێبکه‌یت وا بزانم قۆخه‌. توانای ئه‌وه‌ت بوو قسه‌ی گه‌وجانه‌ت وه‌ک بیرێکی ژیر بکه‌یته‌ مێشکم. ئه‌وتوانی ئه‌وه‌ی پێت خۆش بوو پێمی بکه‌یت ته‌نانه‌ت دزی و حیزیش. به‌ڵام که‌ له‌ خه‌و راچڵه‌کام و زانیم چه‌ن سووک و چروکم،ویستم کارێ گه‌وره‌ بکه‌م. پاڵه‌وانی بێت یان زانست یان خۆکوژی،ببم به‌وه‌ی که‌ ئه‌بێ ببم. ویستم بچم بۆ شه‌ر که‌ ببمه‌ پاڵه‌وان به‌ڵام نه‌کرا. ئیتر رووم له‌ زانست کرد. ئێستا که‌ ئه‌بێ به‌ره‌ی کار و زه‌حمه‌تم ده‌س که‌وێت،ده‌سم ئه‌قرتێنیت. ئیتر هیچم نه‌ماوه‌. بێ فیز ناتوانم بژیم.
لۆرا: به‌ڵام ژن...
کاپیتان: مناڵه‌کانی هه‌یه‌. به‌ڵام پیاو هیچی نیه‌. تا ئێستا،تۆ و من و ئه‌وه‌ی ژن و پیاوی ئه‌م دنیایه‌،وه‌ک مناڵ،دڵمان به‌ خه‌ون و خه‌یاڵ خۆش بوو. ئێستا ئێمه‌ به‌خه‌به‌ر هاتووینه‌وه‌. به‌ڵام هێشتا له‌ سه‌ر ئه‌و باڵنجه‌ ئه‌خه‌وین که‌ ژن بۆمانی داناوه‌. ژن که‌ پیر ئه‌بێت له‌ چه‌ناکه‌ی مو ئه‌ڕوێت. له‌ خۆم ئه‌پرسم،ئه‌ی پیاو که‌ پیر ئه‌بێت و ئیتر پیاوه‌تی نه‌ماوه‌،چی لێ ئه‌ڕوێت؟
لۆرا: ئه‌زانی چیه‌،ئه‌شا تۆ شاعێر بوایێتی.
کاپیتان: ئه‌رێ،ره‌نگه‌.
لۆرا: ده‌ی باشه‌،من خه‌وم دێت. ئه‌گه‌ر له‌م خه‌یاڵانه‌ت ماوه‌ داینێ بۆ به‌یانی.
کاپیتان: شتێتر،ئه‌مه‌ ئیتر خه‌یاڵات نیه‌. قینته‌ له‌ من؟
لۆرا: بڕێجار. کاتێ که‌ ئه‌بی به‌ پیاو!
کاپیتان: ئه‌مه‌ وه‌ک شوینیسمه‌. ئه‌گه‌ر راست بێت که‌ بنیام له‌ به‌ره‌ی مه‌یمونه‌،ئه‌بێ له‌ دوو به‌ره‌ی جیاواز بین. خوێنمان یه‌کێ نیه‌،وایه‌؟
لۆرا: ئه‌ته‌وێ بڵێی چی؟
کاپیتان: هه‌ست ئه‌که‌م له‌م شه‌ڕه‌دا یه‌کمان ئه‌یدۆڕێنێت.
لۆرا: کاممان؟
کاپیتان: لاوازتره‌که‌.
لۆرا: یانی ئه‌وه‌ی به‌هێزتره‌،راست ئه‌کات؟
کاپیتان: هه‌میشه‌. بۆ ئه‌وه‌ی ده‌سه‌ڵاتی هه‌یه.
لۆرا: که‌ وایه‌ من راست ئه‌که‌م.
کاپیتان: پێت وایه‌ ده‌سه‌ڵاتت هه‌یه‌؟
لۆرا: ئه‌رێ. سبه‌ینێ به‌ پێی یاسا ده‌سه‌ڵات ئه‌گرمه‌ ده‌ست. کاتێ ده‌نگ به‌ شێت بوونت درا.
کاپیتان: شێت...؟
لۆرا: ئه‌رێ. ئیتر بێئه‌وه‌ی گوێ بۆ خه‌ون و خه‌یاڵه‌کانت بگرم‌،مناڵه‌که‌م گه‌وره‌ ئه‌که‌م.
کاپیتان: من نه‌بم کێ خه‌رجی گه‌وره‌ کردنی مناڵه‌که‌ت ئه‌دات؟
لۆرا: مووچه‌ی خانه‌نشینیت!
کاپیتان: (ئه‌له‌رزێ و ئه‌چێته‌ لای) چۆن ئه‌توانی وایان لێبکه‌یت ده‌نگ به‌ شێت بوونم بده‌ن؟
لۆرا: (نامه‌یێ له‌ گیرفان ده‌ردێنێت) به‌م نامه‌یه‌ که‌ به‌رگێکی وه‌ک خۆی لای ئه‌وانه‌.
کاپیتان: کام نامه‌یه‌؟
لۆرا: (ئه‌کشێته‌وه‌) نامه‌ی تۆ! ئه‌وه‌ی بۆ دوکتوره‌که‌ نووسیبووت و وتبووت شیت بوویت. (کاپیتان ماق ماوه‌) تۆ وه‌ک باوک و خانه‌خوێ کاری خۆتت ته‌واو کردووه‌. ئیتر نیازمان پێت نه‌ماوه‌،ئه‌توانی بڕۆیت. ئێستا تێگه‌یشتی که‌ ژیری و هێزم به‌رانبه‌رن؟ ئه‌گه‌ر ناتوانی ئه‌مه‌ په‌سه‌ند بکه‌یت،ئه‌توانی لێره‌ بڕۆیت.
(کاپیتان چرای سه‌ر مێزه‌که‌ هه‌ڵئه‌گرێت و به‌ره‌و لۆرا فڕی ئه‌دات. لۆرا پێشتر ده‌رچووه‌.)
....................................................

باوک

به شی 3

(وه‌ک به‌شی 2 به‌ڵام چرای سه‌ر مێزه‌که‌ گۆڕاوه‌. درگایێک به‌ سه‌نده‌ڵی به‌ری گیراوه‌ که‌ نه‌کرێته‌وه‌.)

1)
لۆرا: خۆی کلیله‌کانی پێدایت؟
دایه‌ن: خۆی پیدام؟ نا،تۆبه‌ خوا،له‌ گیرفانی ده‌رم هاورد. نۆژێد خه‌ریکی ماوتماڵ کێشانی باڵتاکه‌ی کاپیتان بوو.
لۆرا: بیده‌ پێم.
دایه‌ن: دزی هه‌ر وایه‌!
لۆرا: درگاکه‌ کیپه‌؟
دایه‌ن: به‌ڵێ،کیپی کیپ!
لۆرا: (له‌ پشت مێزه‌که‌ دائه‌نیشێت و که‌شاوێ ئه‌کاته‌وه‌) ئه‌بێ هۆشیار بیت مارگارێت. ته‌نیا به‌ هێمنایه‌تی ئه‌توانین پێشکه‌وین. (له‌ درگا ئه‌ده‌ن) کێ بێت؟
دایه‌ن: نۆژێده‌.
لۆرا: بڵێ بێته‌ ژور.
نۆژێد: (دێت) په‌یامی کۆلۆنێل!
لۆرا: بیده‌ پێم. (ئه‌یخوێنێته‌وه‌) (به‌ نۆژێد) ده‌مانچه‌کان خاڵین؟
نۆژێد: به‌ پێی فه‌رمانتان،خاتون. به‌ڵێ هه‌مووی.
لۆرا: ماتڵ به‌ تا جوابی کۆلۆنێل بنووسم.
(نۆژێد ئه‌ڕوات. لۆرا ئه‌نووسێت.)
دایه‌ن: خاتون،گوێ بگره‌! پێتوایه‌ ئێستا خه‌ریکی چی بێ له‌و سه‌ره‌؟
لۆرا: بێده‌نگ به‌،خه‌ریک نووسینم.
(ده‌نگی مشار کێشان)
دایه‌ن: (به‌ خۆی) خوا خۆی فریامان که‌وێت. چیمان به‌سه‌ر بێت؟
لۆرا: هۆی،بیده‌ به‌ نۆژێد. دایکم نابێ بزانێت. له‌ بیرو بمێنێت.
(دایه‌ن ئه‌ڕوات. لۆرا چه‌ن لاپه‌ڕه‌ کاغه‌ز له‌ که‌شاوه‌که‌ ده‌ر دێنێت.)

2)
مامۆستا: ئێواره‌ باش خۆشکه‌. تا ئێستا هه‌ر سه‌رقاڵ بووم بۆیه‌ زووتر نه‌هاتم بۆ لات. به‌ داخه‌وه‌م.
لۆرا: ئه‌رێ،براکه‌م. له‌مه‌ ناخۆشترم نه‌دییه‌.
مامۆستا: شوکر بۆ خوا هیچت لێ نه‌هاته‌.
لۆرا: شوکر. به‌ڵام له‌وانه‌ بوو.
مامۆستا: باشه‌ چۆن ده‌سی پێکرد؟ زۆرم بیسته‌!
لۆرا: ده‌ی،هه‌ر به‌و قۆڕیاته‌ی که‌ باوکی بێرتا نییه‌و ئا له‌مانه‌،تا چراکه‌ی بۆ فڕ دام.
مامۆستا: یا خوای گه‌وره‌! شێتی ئه‌مه‌یه‌! چی بکه‌ین؟
لۆرا: به‌ زۆر ناکرێت. دوکتور ناردویه‌ قۆڵبه‌س‌ بێنن. له‌ جوابی نامه‌ی کۆلۆنێلیش باری ماڵ و حاڵمانم نووسی.
مامۆستا: ئه‌و به‌دبه‌ختیه‌! هه‌ر له‌مه‌ ئه‌ترسام! ئاوو ئاگر! چی تیایه‌؟
لۆرا: (که‌شاوێ ئه‌کاته‌وه‌) حه‌شارگه‌!
مامۆستا: (چاوی پیا ئه‌گێڕێت) خوای گه‌وره‌! ئه‌مه‌ چیه‌،بووکه‌که‌ت! سه‌رکڵاوی منداڵیت،ئه‌شا شه‌قشه‌قه‌که‌ی بێرتا،ئه‌مه‌ش نامه‌کانی تۆ. له‌و قاپی عه‌کسه‌! دیاره‌ زۆری خۆش ئه‌وێیت. من بم ئه‌م شتانه‌ هه‌ڵناگرم.
لۆرا: سه‌رده‌مانێ خۆشمی ئه‌ویست. ئه‌رێ،پێموابێ. به‌ڵام،دنیا... هیچێ له‌ سه‌ر جێی خۆی نامێنێت‌.
مامۆستا: ئه‌وه‌یان چییه‌؟ ئه‌شا،به‌رگه‌ی قه‌بر! ده‌ی،قه‌بر باشتره‌ تا شێتخانه‌! وانیه‌؟ خه‌تای کێ بوو؟
لۆرا: کابرا شێت بووه‌ خه‌تای منه‌؟
مامۆستا: باشه‌،باشه‌. ئێمه‌ خۆشک و براین. گۆشتی یه‌ک خۆین پێشه‌ ناشکێنین!
لۆرا: ئه‌ته‌وێ بڵێی چی؟
مامۆستا: گوێ بگره‌. ناتوانی حاشا بکه‌ی به‌ ئاواته‌وه‌ نیت بێرتا به‌ ته‌نیا بۆ خۆت بێت.
لۆرا: تێناگه‌م.
مامۆستا: ناتوانم نه‌ڵێم،ده‌س خۆش!
لۆرا: ده‌سم خۆش بێ! ئه‌رێ!
مامۆستا: من ئه‌که‌ن به‌ سه‌ر وه‌سیه‌تی ئه‌م بێ دینه‌! خۆت باش ئه‌زانی قه‌ت به‌ ته‌پاڵه‌یشم نه‌زانیه‌!
لۆرا: (زه‌رده‌یه‌ ئه‌کات،ئه‌مجار به‌ گرژی) جارێتر لای من وا نه‌ڵێیت،لای ژنه‌که‌ی!
مامۆستا: تۆ به‌هێزتر له‌وه‌ی که‌ ئه‌بێ ببیت. بۆیه‌ بڕوای پێ ناکرێت! وه‌ک رێوی،پات ئه‌قرتێنی که‌ له‌ داو نه‌مێنیته‌وه‌! وه‌ک دزێکی بلیمه‌ت،حه‌ز به‌ شه‌ریکایه‌تی ناکه‌یت! سه‌یرێکی ناو ئاوێنه‌ بکه‌.
لۆرا: قه‌ت ناچمه‌ به‌ری!
مامۆستا: ناوێری! ئه‌کرێ ناو مشتت ببینم؟ نا،خوێنایی نیه‌،ژاریش نابینم و چه‌قۆت به‌ ده‌سته‌وه نیه‌! پیاوکوژێکی ئێسک سووکی بێ تاوان! یاساش ناتوانێ شکی لێبکات. کوشتنێکی نابه‌دڵ،نابه‌دڵ؟ بێ وێنه‌یه‌، دڵه‌که‌م،بێ وێنه‌یه‌! ئه‌شا چ ده‌نگ و هه‌رایێکی رێخسته‌،ئه‌یبیسیت؟ بێته‌ ده‌ر تیکه‌تیکه‌ت ئه‌کات!
لۆرا: زۆری ئه‌ڕێسیت! چیه‌ ویژدانت ناڕه‌حه‌ته‌؟ بیکه‌. ئه‌گه‌ر ئه‌توانی،تاوانبارم که‌!
مامۆستا: ناتوانم!
لۆرا: دیو! ناتوانی. که‌ وایه‌ بێ تاوانم! خه‌ریک کاری خۆت به‌و منیش کاری خۆم ئه‌که‌م. ئه‌وه‌ دوکتوریش هات.

3)
لۆرا: (هه‌ڵئه‌سێت) ئێواره‌ باش،دوکتور. هیوامان هه‌ر تؤیت. هیچیشمان پێ ناکرێت. ئه‌بینی چ ده‌نگ و هه‌رایێکی ناوه‌تۆ! دڵنیا بوون؟
دوکتور: ئه‌زانم شتێ کراوه‌و به‌ توندیش،به‌ڵام کێ نازانم. ناشزانم ئه‌مه‌ توڕه‌ییه‌ یان ناکاو هاته‌ به‌ سه‌ریا.
مامۆستا: ئه‌مه‌ شێتیش نه‌بێ،خۆ تێکچوون هه‌یه‌.
دوکتور: پێموابێ خۆت زووتر له‌مانه‌ تێک چووبێتی!
مامۆستا: ئه‌گه‌ر مه‌به‌ستت دین و ئیمانی منه‌...
دوکتور: نا،ئه‌وه‌ نیه‌. ته‌نیا که‌سێ که‌ ئه‌توانێ بڵێت بیخه‌نه‌ زیندان یان له‌ شێتخانه‌ بیبه‌سنه‌وه‌،ئێوه‌ن خاتون. راتان چیه‌؟ شێت بووه‌ یان توڕه‌یه‌؟
لۆرا: ناتوانم خێرا جواب بده‌مه‌وه‌.
دوکتور: یانی هێشتا نازانن خێرتان له‌ کامیایه‌؟ ده‌ی،رای ئێوه‌ چیه‌ مامۆستا؟
مامۆستا: هه‌ر چی بێت،حه‌یا چوونه‌و به‌س. نازانم چی بڵێم...
لۆرا: هه‌ڕه‌شه‌ به‌ ته‌نیا چاری ناکات،ره‌نگه‌ خراپتر بکات.
دوکتور: زیندانێش ماوه‌یێکه‌و دواجار ئازاد ئه‌کرێت. که‌ وایه‌ باشتره‌ به‌ شێتی بزانین. دایه‌ن له‌ کوێیه‌؟
لۆرا: بۆ چیته‌؟
دوکتور: قۆڵبه‌س کاری ئه‌وه‌. کاتێ قسه‌م له‌گه‌ڵ کاپیتان کۆتایی هات،به‌ چاو به‌ دایه‌ن ئه‌ڵێم بیکاته‌ به‌ری. نابێ زوتر بیکات! تکایه‌ بڵێن دایه‌ن بێت. (ئه‌ڕوا قۆڵبه‌سه‌که‌ بێنێت. لۆرا زه‌نگ لێده‌دات.)
مامۆستا: سامناکه‌! تۆقێنه‌ره‌!
(دایه‌ن دێت. دوکتور قۆڵبه‌س ئێنێت.)
دوکتور: ئه‌یبینی؟ کاتێ وتم،ئه‌بێ له‌ پشته‌وه‌ بیکه‌یته‌ به‌ر کاپیتان. قۆڵه‌کانی درێژه‌و ئه‌بێ له‌ پشته‌وه‌ گرێی ده‌ی. باش؟
دایه‌ن: نا،دوکتور. من ناتوانم. ناتوانم!
لۆرا: خۆتان بۆ نایکه‌ن،دوکتور؟
دوکتور: بۆ ئه‌وه‌ی نه‌خۆش له‌ دوکتور دو شکه‌. ئێوه‌ له‌ هه‌موو باشترن به‌ڵام ئه‌ترسم له‌ ئێوه‌ش بکه‌وێته‌ شک! (لۆرا ده‌مه‌لاسکێک ئه‌کات) ره‌نگه‌ ئێوه‌،مامۆستا...؟
مامۆستا: نا! نا! پێموا نیه‌ بتوانم!

4)
(نۆژێد دێت)
لۆرا: وا خێرا وه‌ری گرت؟
نۆژێد: به‌ڵێ خاتون.
دوکتور: ئه‌مه‌ش نۆژێد. چاومان روون! ئیتر ئه‌زانی چی بووه‌،ئه‌رێ؟ کاپیتان،تێکچووه‌و ئه‌بێ یارمه‌تیمه‌ن به‌یت.
نۆژێد: ئه‌وه‌ی بتوانم ئه‌یکه‌م. کاپیتان له‌مه‌ دڵنیان.
دوکتور: باشه‌،ده‌ی. ئه‌بێ ئه‌مه‌‌ که‌یته‌ به‌ری.
دایه‌ن: نا،ئه‌و ده‌ستی لێ نه‌دات،ناهێڵم! خۆم ئه‌یکه‌م. نه‌رم و نیان ئه‌یکه‌م. نۆژێد له‌ ده‌ره‌وه‌ ته‌مایه‌ر بێت که‌ پێویستم زانی یارمه‌تیم بدات.
(له‌ درگا ئه‌ده‌ن)
دوکتور: خۆیه‌تی! بیشارنه‌وه‌! هه‌موو بچنه‌ ده‌ر. من و مامۆستا ئه‌مێنینه‌وه‌. زۆر ناخایێنێت. بڕۆن. خێرا. هه‌مووتان!
دایه‌ن: (ئه‌ڕوات) یا خوای مه‌زن،خۆت فریا که‌وه‌!
(لۆراو نۆژێدیش ئه‌ڕۆن.)

5)
(درگایێک به‌ ته‌ق و پۆق ئه‌کرێته‌وه‌. کاپیتان به‌ باوه‌شێ کتێبه‌وه‌ دێت.)
کاپیتان: (کتێبه‌کان ئه‌خاته‌ سه‌ر مێزه‌که‌) هه‌موویان لێره‌ن،ئه‌یبینن،شێت نیم. ئه‌مه‌"ئۆدیسه‌" به‌شی1،لاپه‌ڕه‌ی6 ئه‌ڵێت: دایکم به‌ دڵنیایی ئه‌ڵێت ئه‌و پیاوه‌ی خه‌ڵک پی ئه‌ڵێن ئۆدیسوس،باوکی منه‌. به‌ڵام من ناتوانم له‌مه‌ دڵنیا بم. بۆ ئه‌وه‌ی که‌س ناتوانێ له‌مه‌ دڵنیا بێت. که‌یف ئه‌که‌ن،ئه‌رێ؟ ئه‌ی ئه‌مه‌،"مێژووی ئه‌ده‌بیاتی روس" نووسینی"مێڕسێلاکۆف": پوشکین،شاعێری پایه‌به‌رز،به‌ هۆی قاوی خه‌ڵک له‌ بێوه‌فایی ژنه‌که‌ی،تۆقی کرد و مرد. نه‌ک به‌و فیشه‌که‌ که‌ له‌ شه‌ڕه‌ دوانه‌دا سینگی پێکا. پوشکین له‌ دوایین هه‌ناسه‌یا سوێندی خوارد ژنه‌که‌ی بێ تاوانه‌! گه‌وج‌ و له‌وجی، که‌ره‌ پیاو! چۆن توانی سوێند بخوات؟ ئه‌ڵێم پیاوێ وای لێبێت که‌ چرایێ گڕاوی فڕ بات بۆ سه‌رو چاوی ژنێ که‌ تا ئه‌و کاته‌ خۆشی ویستووه‌،خۆت ئه‌بێ باش بزانیت...
مامۆستا: خۆت ئه‌بێ چی بزانیت؟
کاپیتان: هیچ! بنیام قه‌ت نازانێت،ته‌نیا ئیمان هاوردن ئه‌زانێت. وایه‌ یوناس؟ ئیمانی بێت رزگار ئه‌بێت. ئه‌رێ،رزگار ئه‌بێت! به‌ڵام ئه‌وه‌ ئه‌زانم که‌ ئیمان ئه‌توانێ هه‌ر به‌وبه‌ختمان بکات!
دوکتور: کاپیتان!
کاپیتان: وس! نامه‌وێ له‌گه‌ڵتا قسه‌ بکه‌م. نامه‌وێ ئه‌وه‌ی فێریان کردووی بیڵێیته‌وه‌. ئه‌رێ،یوناس؟ دڵنیای خۆت باوکی مناڵه‌کانتی؟ له‌ بیرمه‌ کابرایێ له‌ ماڵتان بوو،پێکه‌وه‌ ئه‌ژیان. له‌ ماڵی ئێوه‌و خه‌ڵکیش چیهایان ئه‌وت! ئه‌رێ،ئه‌یانوت ئه‌م چاوه‌ جوانانه‌،ئه‌ویش بووی.
مامۆستا: ئادۆڵف،حه‌یا بکه‌. ئێستا...!
کاپیتان: ده‌سێ بێنا به‌ سه‌رتا،بزانه‌ هه‌ست ناکه‌یت دوو به‌رزایی له‌و سه‌ره‌ روواوه‌! ئه‌شا چۆن سورۆ بوو! ئه‌رێ،ئه‌رێ،هه‌ر قسه‌ بوو. ئای له‌ قسه‌ی خه‌ڵک! شوو گه‌وجن،هه‌موومان! وا نیه‌ دوکتور؟ ئه‌رێ ئه‌فسه‌رێ له‌ ماڵ ئێوه‌ نه‌بوو؟ با بزانم،ناوی... ناوی چی بوو؟ ئه‌ها(به‌ گوێیا ئه‌چرپێنێت) ئه‌شا ئه‌میش سورۆ بوو! باشه‌،مه‌گری! ژنه‌ مردووه‌و ئیتر ناکرێ دیسان دوپات بێته‌وه‌! ئه‌مناسی،به‌ باشی. ئێستا بووه‌ به‌،ته‌ماشای من بکه‌ دوکتور،چاو ببڕه‌ ناو چاوم! ئێستا بووه‌ به‌ سه‌رگورد. کاری خوایه‌،پێموابێ شاخیشی ده‌ر هاورده‌!
دوکتور: کاپیتان،تکایه‌ باسه‌که‌ بگۆڕن.
کاپیتان: ئه‌شا! تا ناوی شاخ ئه‌به‌م،ئه‌یه‌وێ باسه‌که‌ بگۆڕم!
مامۆستا: کاکه‌ گیان،ئه‌زانی‌،بێ ئه‌قڵی؟
کاپیتان: ئه‌رێ،ئه‌زانم. خۆزگا پانزه‌ رۆژ،هه‌ر پانزه‌ رۆژ،زیاتر نا،شاخی ئێوه‌م بوایێت. جا ئه‌تانبینی چۆن ئه‌متوانی بتانخه‌مه‌ زیندانیش! من شێتم،به‌ڵام بۆ شێت بووم؟ ئه‌زانن؟ نا. که‌س مافی ئه‌وه‌ی نیه‌ بزانێ. نه‌ تۆ،نه‌ هیچ که‌س. باسه‌که‌ بگۆڕین. (ئه‌لبۆمی ئه‌کسێ له‌ که‌شاوی مێزه‌که‌ ده‌ردێنێت) خوایه‌،ئه‌مه‌ مناڵی منه‌! مناڵی منه‌؟ نا،دڵنیا نین. ئه‌زانن ئه‌بێ چی بکه‌ین که‌ دڵنیا بین؟ سه‌ره‌تا ئه‌بێ ژن بخوازین،دواجار،خێرا ته‌ڵاقی به‌ین! دوای ئه‌مه‌ ئیتر ببین به‌ ئاشقه‌و ماشقه‌و پێکه‌وه‌ کایه‌ی خۆش بکه‌ن و مناڵه‌که‌ به‌ مناڵی خۆتان بزانن. به‌مجۆره‌،هه‌ر هیچ نه‌بێ،دلنیا ئه‌بن که‌ مناڵی خۆتان نیه‌! وا نیه‌؟ ژیان که‌ڵکی چیه‌؟ مان و نه‌مانم مانای چیه‌؟ کاتێ هیچم نیه‌،زانست و فه‌لسه‌فه‌ چیم بۆ ئه‌کات؟ ئیتر هیچم نیه‌. من که‌ نیوه‌ی له‌ش و مێشک و مۆغه‌ره‌ی پشتم لکاند به‌ جه‌سته‌ی که‌سێتره‌وه، که‌ پێموابوو ئه‌بێته‌ داری به‌ر،ئێستا هاتوون ته‌وری لێ ئه‌ده‌ن و نیوه‌کان لێک ئه‌پچڕێنن. ئه‌رێ،توانیتان لێکمان دابڕن. به‌ڵام نیوه‌که‌یترم هه‌ر باڵا ئه‌کات و منم که‌ سیس ئه‌بم و ئه‌مرم. ئێستا ئه‌مه‌وێ بمرم! چیتان پێخۆشه‌ بیکه‌ن! ئیتر لێره‌ ناڕۆم!
(مامۆستاو دوکتور ئه‌که‌ونه‌ پچه‌و ئه‌چنه‌ ده‌ر.)

6)
(کاپیتان له‌ پشت مێزه‌که‌ی دائه‌نیشێت،کزو داماو. بێرتا دێت.)
بێرتا: باوکه‌،نه‌خۆشی؟
کاپیتان: من؟
بێرتا: ئه‌زانی چیت کرده‌؟ ئه‌زانی چراکه‌ت داوه‌ به‌ سه‌رو چاوی دایکما؟
کاپیتان: من؟
بێرتا: به‌ڵێ تۆ! ئه‌گه‌ر شتێکی به‌سه‌را بهاتایێت! بیری لێبکه‌وه‌.
کاپیتان: ده‌ی چی ئه‌بوو؟
بێرتا: وا قسه‌ بکه‌یت،ئیتر باوکی من نیت.
کاپیتان: چی؟ من باوکی تۆ نیم؟ چۆن ئه‌زانی؟ کێ پی وتی؟ ئه‌ی کێ باوکته‌؟ کێ؟
بێرتا: ده‌ی،تۆ نیت.
کاپیتان: ده‌ی،من نیم! ئه‌ی کێیه‌؟ ئه‌بێ تاقه‌ت بێنم. مناڵه‌که‌م له‌ روما بوێستێ و بڵێ من باوکی نیم؟ ئه‌زانی ئه‌مه‌ تانه‌ له‌ دایکته‌؟ ئه‌زانی ئه‌مه‌ راست بێت دایکت تاوانباره‌؟
بێرتا: نابێ هیچ به‌ دایکم بڵێیت. بیستت؟
کاپیتان: نا،هه‌مووتان دژ به‌ منن!
بێرتا: باوکه‌!
کاپیتان: ئیتر پێم مه‌ڵێ،باوکه‌!
بێرتا: باوکه‌! باوکه‌!
کاپیتان: (باوه‌شی ئه‌کاته‌وه‌) بێرتا،جه‌رگه‌که‌م،خۆشه‌ویستم ،کچی خۆم! ئه‌رێ،هه‌ر وایه‌،ئه‌بێ وا بێت. ئه‌و قسانه‌ وه‌ک سه‌ره‌تانن. ته‌ماشام بکه‌. بێڵا رۆحم له‌ چاوه‌کانتا ببینم! به‌ڵام رۆحی دایکیشت ئه‌بینم! تۆ دوو رۆحت هه‌یه‌. به‌ یه‌کیان خۆشمت ئه‌وێ و به‌ویان قینیه‌ لێم! ئه‌بێ خۆشمت بوێت! ئه‌بێ ته‌نیا یه‌ک رۆحت بێ. ئه‌گینا ژیانی خۆشمان نابێت،نه‌ تۆ نه‌ من! ئه‌بێ ته‌نیا یه‌ک بیر و ئیراده‌ت بێ،بیر و ئیراده‌ی من!
بێرتا: من نامه‌وێ! ئه‌مه‌وێ خۆم بم!
کاپیتان: ناهێڵم! چیرۆکی خوا یونانیه‌که‌ت بیستووه‌،وا خواکان ئاگاداریان کرده‌وه‌،مناڵه‌کانی ئه‌یانه‌وێ بیخۆن؟ ئیتر خێرا مناڵه‌کانی خۆی خوارد. منیش ئه‌مه‌وێ بتخۆم. نه‌تخۆم،ئه‌مخۆیت! ئه‌ترسم. کچه‌ شیرینه‌که‌م مه‌ترسه‌.هیچت لێناکه‌م. (ده‌مانچه‌یێک له‌ دیوار ئه‌کاته‌وه‌)
بێرتا: (ئه‌قیژێنێ) دایکه‌ فریام که‌وه‌! ئه‌یه‌وێ بمکوژێت!
دایه‌ن: (دێت) ئاغه‌ گیان،ئه‌وه‌ چیه‌؟
کاپیتان: (سه‌یری ده‌مانچه‌که‌ ئه‌کات) فیشه‌که‌کان،کاری تۆیه‌؟
(دایه‌ن به‌ زمان ئه‌یگرێ و له‌ سه‌ر سه‌نده‌ڵی دایئه‌نیشێنێت. قۆڵبه‌س ئێنێت و له‌ پشتیه‌وه‌ ئه‌وێستێت. بێرتا به‌ ئه‌سپایی ئه‌چێته‌ ده‌ر)
دایه‌ن: له‌ بیرته‌،کۆرپه‌ شیرینه‌که‌ی خۆم بوویت،شه‌وان به‌ لاته‌وه‌ بووم و پێکه‌وه‌ دۆعامان ئه‌کرد؟ ئه‌و شه‌وانه‌ی خه‌وت ئه‌زڕا ئه‌هاتم چیرۆکم بۆ ئه‌وتی،له‌ بیرته‌؟
کاپیتان: ئه‌رێ،مارگارێت،له‌ بیرمه‌. له‌م قسانه‌م بۆ بکه‌. قسه‌م بۆ بکه‌.
دایه‌ن: باشه‌. له‌ بیرته‌ جارێکیان چه‌قۆیێ گه‌وره‌ت به‌ ده‌سته‌وه‌ بوو ئه‌تویست کایه‌ی پێبکه‌یت،منیش چیرۆکی ماره‌که‌م گێڕایه‌وه که‌ ببو به‌ چه‌قۆ؟ ئه‌مجار چه‌قۆکه‌م لێ سه‌ندی(ده‌مانچه‌که‌ی له‌ ده‌س ئه‌سێنێت). جارێتر ئه‌تویست به‌ رووتی بگه‌ڕیت و من چیرۆکی شازاده‌که‌م بۆ وتی که‌ کۆته‌ زێڕه‌وشانه‌که‌ی ده‌س ئه‌که‌وێت. په‌ڕۆ کۆنێکی سه‌وزم به‌ ده‌سته‌وه‌ بوو پێت وابوو زێڕه‌وشانه‌و من به‌مجۆره‌ جله‌کانتم کرده‌ به‌رت. (قۆڵبه‌سی کرده‌ته‌ به‌ر کاپیتان) ده‌ی بزانم چۆنی (کاپیتان ئه‌باته‌ سه‌ر مۆبله‌که‌) ئه‌مجار کاتی خه‌وه‌.
کاپیتان: چی ئه‌ڵێی؟ به‌ جله‌وه‌ بخه‌وم؟ چه‌ن ناخۆشه‌! ئه‌وه‌ چیت کرد؟ (هه‌وڵ ئه‌دات خۆی رزگار بکات) چه‌تیوه‌ پیسه‌ی فێڵه‌باز! (را ئه‌کشێت) ده‌ست و پای به‌سراوم،قۆڵبه‌س و ده‌مبه‌س و ئه‌م داوه‌ی تێیکه‌وتم! ناهێڵن بیشمرم!
دایه‌ن: ببوره‌ ئاغه‌گیان،ببوره‌! وتم مناڵه‌که‌ نه‌کوژیت!
کاپیتان: بۆ نه‌تهێشت بیکوژم؟ ژیان جه‌حه‌نده‌مه‌و مه‌رگ به‌هه‌شت. مناڵ ئه‌چێته‌ به‌هه‌شت.
دایه‌ن: ئه‌زانی پاش مردن چیمان به‌سه‌ر دێت؟
کاپیتان: ئه‌وه‌ی ئه‌زانم هه‌ر ئه‌مه‌یه،مردن. به‌ڵام له‌ ژیان هیچ نازانم. خۆزگا هه‌ر له‌ سه‌ره‌تاوه‌ ئه‌مزانی!
دایه‌ن: ئاغه‌گیان! هێشتا ده‌رفه‌ت هه‌یه‌ له‌ خوا پاڕیته‌وه‌!
کاپیتان: هیچ نه‌بووه‌ وه‌ک قاڵاو بۆم ئه‌قڕێنی؟ ئه‌رێ،قاڵاوی پیر؟
(دایه‌ن کتێبی دۆعا ئه‌کاته‌وه‌و کاپیتان ئه‌نه‌ڕێنێت)
کاپیتان: نۆژێد! (دێت) ئه‌م ژنه‌تیوه‌ فڕ به‌ ده‌رۆ. ئه‌یه‌وێ به‌م کتێبه‌ی بممرێنێت! له‌ په‌نجه‌ره‌ فڕی ده‌!
نۆژێد: خوا پشت و په‌نات،کاپیتان. ناتوانم! قه‌ت ناتوانم! شه‌ش پیاو بوایێ ئه‌مانتوانی،به‌ڵام ژنێ...
کاپیتان: ده‌ره‌قه‌ت ژنێ نایی؟
نۆژێد: با،ده‌ره‌قه‌ت دێم. به‌ڵام ژن جۆرێکن،پیاو ناتوانێ ده‌سیان لێ به‌رز بکاته‌وه‌.
کاپیتان: چۆنن؟ ئه‌ی مه‌گه‌ر ئه‌وان ده‌سیان له‌ سه‌ر من به‌رز نه‌کردوه‌ته‌وه‌؟
نۆژێد: بۆچی نا،به‌ڵام ناتوانم کاپیتان! وه‌ک ئه‌وه‌یه‌ فه‌رمان به‌یت مامۆستا بکوتم. پیاو وایه‌،له‌ خوێنماندایه‌، وه‌ک دین. ناتوانم!

7)
(لۆرا دێت. نۆژێد ئه‌نێرێته‌ ده‌ر)
کاپیتان: شه‌یتان! شه‌یتان!
لۆرا: (دێته‌ لای) ئادۆڵف! ته‌ماشام که‌. من دوژمنتم؟
کاپیتان: ئه‌رێ. نه‌ک هه‌ر تۆ،هه‌مووتان دوژمنی منن. یه‌که‌م ژنێ که‌ ماچم کرد بوو به‌ دوژمنم. به‌ جێگه‌ی ئه‌شقێ که‌ پێمدا ئه‌و نه‌خۆشینی تووش کردم. کچه‌که‌می لێ کرده‌ دوژمنم،کاتێ ویستت یه‌کمان هه‌ڵبژێرێت.
لۆرا: من هیچ پیلانێکم بۆ ئه‌م شتانه‌ نه‌گێڕاوه‌ که‌ باسی ئه‌که‌یت. خۆت به‌ خۆتت کرد. لای خۆم و خوای خۆم بێتاوانم. تاوانباریش بم گرینگ نیه‌ بۆ ئه‌وه‌ی وه‌ک مێرده‌زمه‌ خه‌ریک بووی بمخنکێنی. نه‌مئه‌ویست بتڕه‌نجێنم. ببوره‌ ئه‌گه‌ر لێم ره‌نجاویت.
کاپیتان: ئه‌بێ به‌ چی؟ کێ تاوانباره‌؟ جاران ژن و مێردایه‌تی جۆرێتر بوو،ئێستا بووه‌ته‌ بازاڕ. بڵێ کێ باوکی مناڵه‌که‌مانه‌؟
لۆرا: شکه‌کانت بێ جێیه.
کاپیتان: هه‌ر ئه‌مه‌یه‌ ئه‌مترسێنێ. شکه‌که‌م راست بوایێ خۆشتر بوو. ئیتر ئه‌کرا له‌ شتێ دڵنیا بیت. به‌ڵام ئێستا هه‌موو شتێ تاپۆیه‌. تاپۆکان نادیارن و جارجار ده‌ر ئه‌که‌ون و قاقات بۆ ئه‌کێشن. وه‌ک ئه‌وه‌ی له‌گه‌ڵ با به‌ شه‌ڕ بیت. وه‌ک شه‌ڕی له‌قه‌ز به‌ فیشه‌کی له‌قه‌زینێ. خه‌ریکه‌ گڕ ئه‌گرم. باڵنجێک بخه‌ ژێر سه‌رم! سه‌رمامه‌،شتێکم پیا به! سه‌رمامه‌!
(لۆرا،ده‌سره‌که‌ی پیا ئه‌دات. دایه‌ن ئه‌ڕوات باڵنج بێنێت)
لۆرا: ده‌ستت به‌ به‌ ده‌سمه‌وه‌،هاوڕێ!
کاپیتان: ده‌ستم! هه‌ر ئه‌وه‌ی له‌ پشته‌وه‌ به‌ستوته‌؟ شه‌یتان! شه‌یتان! ده‌سره‌که‌ت گه‌رمه‌و نه‌رم هه‌ر وه‌ک باسکت! بۆنی وانیل ئه‌دات. وه‌ک ئه‌و کاته‌ی تازه‌ شووت پێکردم. کاتی لاویه‌تی. ئه‌و کاته‌ی له‌ نێو دارستان ئه‌گه‌ڕاین و باڵنده‌ ئه‌یچریکاند.چه‌ن جووان! چه‌ن خۆش! ژیان خۆش و جووان بوو! ئێستا وایه‌. تۆ ئه‌مه‌ت نه‌ده‌ویست و منیش،به‌ڵام وای لێهات. ژیانمان به‌ ده‌س کێیه‌؟
لۆرا: ته‌نیا،خوا.
کاپیتان: که‌ وایه‌ بڵێ،خوای شه‌ڕ. یان باشتره‌ بڵێم،خواژن! ئه‌م پشیله‌ بکه‌ ده‌رۆ وا خۆی داوه‌ به‌ سه‌رمدا! (دایه‌ باڵنج ئێرێت)‌‌ باڵتاکه‌م پیا ده‌ن! (دایه‌ن باڵتاکه‌ی ئێنێت) شه‌یتان! شه‌یتان! له‌حنه‌تتان لێ بێ،له‌ تۆی مه‌لعون و هه‌رچی ژنه‌. (ئه‌یه‌وێ تفی لێکات،له‌ خۆی ئه‌نه‌وێ به‌ڵام ناتوانێ به‌رز بێته‌وه‌و ئه‌که‌وێ به‌سه‌ر مۆبله‌که‌دا) ئه‌م باڵنجه‌ چیه‌ هێناوته‌،مارگارێت؟ زۆر ره‌قه‌،زۆریش سارده‌،سارده‌. وه‌ره‌ لام دانیشه‌.
لۆرا: ئه‌ته‌وێ مناڵه‌که‌ت ببینی،ئادۆڵف،قسه‌ بکه‌!
کاپیتان: مناڵه‌که‌م؟ هیچ پیاوێ مناڵی نیه‌. هه‌ر ژنه‌ مناڵی هه‌یه‌. بۆیه‌ داهاتوو هی ژنه‌. ئێمه‌ وجاخ کوێر ئه‌مرین. یا مه‌سیحی مێهره‌بان،هێمن و له‌سه‌رخۆ چاوێ به‌م مناڵه‌ بچوکه‌ بگێڕه‌.
دایه‌ن: گوێ بگرن! خه‌ریکه‌ له‌ خوا ئه‌پاڕێته‌وه‌!
کاپیتان: نا،له‌ خوا نا،له‌ تۆ. له‌ تۆ که‌ بمخه‌وێنی. هیلاکم،یه‌کجار هیلاکم. شه‌و خۆش مارگارێت. به‌شکم تۆ له‌ نێو ژناندا رزگار بیت. (ئه‌یه‌وێ به‌رزه‌وه‌ بێت. ئه‌نه‌ڕێنێ و ئه‌که‌وێ)

8)
لۆرا: فریا که‌وه‌ دوکتور. هه‌ناسه‌ی نیه‌.
دوکتور: مێشکی کوتوپڕی کرده‌.
مامۆستا: مردووه‌؟
دوکتور: هێشتا نا. ره‌نگه‌ بێته‌وه‌ خۆی و زیندو بمێنێ. به‌ڵام چۆن ئه‌کرێ بێته‌وه‌ خۆی ئێمه‌ نازانین.
مامۆستا: یه‌ک جار ئه‌مرین به‌ڵام حوکمی دواجار...
دوکتور: ئێمه‌ نابێ حوکم بده‌ین و تاوانباری بکه‌ین. تۆی ئیماندار باش ئه‌زانی که‌ خوایێ هه‌یه‌ که‌ چاره‌نوسمان به‌ ده‌ستی ئه‌وه‌. حوکم ئه‌بێ خوا بیدات.
دایه‌ن: ئای،دوکتور،ئه‌و له‌ دوایین هه‌ناسه‌یدا په‌نای بۆ خوا برد!
مامۆستا: (به‌ لۆرا) راسته‌؟
لۆرا: راسته‌.
دوکتور: که‌ وایه‌،زانستی من که‌ڵکی نیه. ئێستا نۆره‌ی زانستی مامۆستایه‌.
لۆرا: له‌م دوایین چرکه‌دا هیچیترتان نیه‌ بیڵێن،دوکتور؟
دوکتور: هه‌مووی ئه‌مه‌یه‌. لێره‌ زانستی من کۆتایی پێدێت. بێڵن ئه‌وه‌ی زیاتر ئه‌زانێ بێته‌ قسه‌.
بێرتا: (دێت و ئه‌چێته‌ لای دایکێ) دایکه‌،دایکه‌!
لۆرا: کچه‌که‌م! کچی خۆم!
مامۆستا: ئامین!

ته‌واو

22 پوشپه‌ڕ/تیر1390