شانوی کوردی ئازاره‌کانی کاکه‌ مه‌م ( 1 )

له نووسینی : خالید خاکی

ده‌ورگێڕان :

1- مه‌م
2- چه‌کۆ
3- تاژدین
4- زین
5- زه‌ینه‌دین
6- به‌کره‌
7- بۆره‌خان
8- پیاوه‌ کان (دوویان زیاتر،پیاوانی زه‌ینه‌دین)

کۆرسی یه‌ک
کۆرسی دوو

ده‌سپێک

شوێن : کۆڵانی به‌رده‌رکی حه‌ساری ماڵ تاژدین.له‌لای راستی شانۆوه‌ درگاودیواری ماڵ. نه‌ختێ له‌ حه‌وشی ماڵ تاژدین ده‌بینرێ ، چه‌ند کوانویه‌ک وقازان ومه‌نجه‌ڵ له‌ حه‌وشه‌ن . ژن وپیاوی رازاوه‌ تاک تاک ودوو دوو له‌ حه‌وشه‌ دێن وده‌چن.رۆژی حه‌وته‌می زه‌ماوه‌ندی تاژدین و ئه‌ستێ‌یه ‌وگشت ته‌مایه‌ری گه‌یشتنی بووکن . مه‌م ، له ‌به‌ر ده‌رکی حه‌سار ، چاوه‌نواڕی هه‌واڵ دێ‌وده‌چێ ، له‌سه‌ر زه‌ریای فیکروخه‌یاڵ باسک ده‌هاوێ ، چاوه‌کانی له‌ بێ خه‌وییا سوور، دڵ دۆڕاوی ئه‌وینی یایه‌ زین و گیرۆده‌ی ده‌ستی خه‌م له‌بینه‌ران دێته‌ پێش .
مه‌م : (رووله‌بینه‌ران) ئازیزان! به‌ڕێزان! به‌خێربێن . به‌ هاتنتان کۆڕی شایی ئێمه‌تان خه‌مڵاند . گه‌لێ سپاستان ده‌که‌م . سه‌باره‌ت به‌ که‌م وکوڕییه‌کان داوای لێبوردنتان لێده‌که‌م . هیوادارم شایی حه‌و رۆژه‌ نه‌بووبێته‌ هۆی ماندوویه‌تیتان ، هیوادارم گشت به‌پێچه‌وانه‌ی من ، بگه‌ن به‌ مورادی دڵتان .ئه‌ز مه‌مم . هه‌ڤاڵی تاژدین. ده‌بێ که‌یف خۆش بم ،نا؟ به‌ڵام بڕواتان ببێ ...من لێره‌ نیم...یانی..چ بڵێم و چۆنی بڵێم !؟ ..خۆ ئاگرێ به‌ربووه‌ته‌ جه‌سته‌م که‌ نه‌ ته‌نیا مه‌م... به‌ڵکوو ئێوه‌ش له‌گه‌ڵ خۆ،ده‌که‌مه‌خۆڵه‌مێش... تکایه‌ گوێم لێ‌راگرن‌وخۆ دوورمه‌گرن...چما ئه‌و خۆڵه‌مێشه‌ هه‌ر ئه‌وخۆڵه‌مێشه‌ پیروزه‌ی قه‌قنه‌سی چاخ بێ که‌ مه‌لی ژیانێکی پڕله‌سه‌رفرازیی‌نوێ سه‌ری لێ هه‌ڵبدات و.... ئه‌ز،یانی مه‌م ، مینا هه‌موویه‌کێک له‌ ئێوه‌، به‌ هه‌موو بوون و نه‌بوونێک راهاتووم و وه‌ک هه‌موو یه‌کێک له‌ ئێوه‌ ورته‌م له‌ زار نه‌بیستراوه‌ . هه‌رگیز هیچ کۆسپێ ، ته‌نانه‌ت برسیه‌تی و توونیه‌تیش نه‌یانتوانیوه‌ ببنه‌ به‌رهه‌ڵست و رێگری خوو وخده‌م . به‌ڵێ ...پێش له ‌ئاگره‌ سووره‌ی نه‌ورۆز ، قاقاوپێکه‌نینم به‌یتی ده‌م به‌یت بێژان بوو . نا...نا...به‌هه‌ڵه‌دامه‌چن ...هێشتا نه‌ڕماوم . ئێستایش ئاگری سوورده‌که‌مه‌ به‌ر ، قه‌ندیل ده‌که‌مه‌ تۆزی پێ ، ده‌تووانم بۆگه‌ییشتن به ‌لوتکه‌ی شاخه‌کانی ناوچه‌ی ژینی خۆ ئه‌وه‌ن تێکۆشم و عاره‌قه‌ بڕێژم که‌ هه‌موو زه‌ریاکان ئاوبیانبات...به‌ڵام مخابن ...نه‌من ته‌نیام ونه‌ته‌نیا ویست وخوازتی من مه‌رجه‌...چاره‌سه‌ر کردنی ئه‌م ئازاره‌ له‌ وزه‌ی منا نییه‌...ئێوه‌یش هه‌رگیز تاقه‌ که‌سێ شک نابه‌ن که‌ بتووانێ له‌حه‌نای ئه‌م ئازاره‌ خۆ راگرێ...ئه‌م ئازاره‌ی که‌بۆمن له‌به‌رگی دووری له‌ ئازیز، خۆده‌نوێنێ...دووری...ده‌ردی دووریی هانی داوم په‌نا به‌گشت که‌س و گشت شتێ به‌رم.. ته‌نانه‌ت به‌ به‌کره‌ی مه‌رگه‌وه‌ڕ...به‌داخه‌وه‌ ناتووانم به‌کره‌تان پێ بناسێنم...چون وه‌ک سێحربازێک خۆبه‌گشت شیوه‌ و ره‌نگێ ده‌گۆڕێ...خۆتان بیناسن چاکتره‌...گرینگتر له‌ گشت...ئه‌ز بیست و دووساڵه‌ براده‌ری تاژدینم.شه‌وو رۆژم به‌یادی ئه‌و ژیاوم...بیست و دووساڵ هه‌رچییه‌ک بۆنی تاژدینی نه‌دابێ پلاری توانجمی به‌رکه‌وتووه‌. بیست ودووساڵ دژی دوژمنی بووم و گیان له‌ رێ‌ی دۆستی .دۆستایه‌تی تاژدینم به‌ هه‌موودنیا نه‌ده‌گۆڕایه‌وه. که‌چی ئێستا...ئاخۆ گشت درۆبوو؟! (له‌گه‌ڵ خۆ)‌یانی بیست و دووساڵ له‌گه‌ڵ خۆ درۆم کردووه‌؟ بیست و دووساڵی ره‌به‌ق خۆم فریو داوه‌؟!یاخۆ...ئه‌ی کوانێ ئه‌و گشته‌خۆشه‌ویستیه‌ی تاژدین که‌نه‌مری پایه‌به‌رز ئه‌حمه‌دی خانی به‌له‌بزی شیرینی خۆباسی کردووه‌؟ کوانێ ؟وبۆله‌ده‌ستی نایه‌ت تاوێ سوکنای ده‌روونم بدات؟ بۆناتووانێ تاوێ خه‌می دووری‌ی یایه‌ زینم له‌ بیرببات؟ (رووله‌بینه‌ران) هه‌گه‌ تاژدین پێ بزانێ که ‌نیگایه‌کی زین مه‌می وه‌ها گۆڕیوه‌ ، دیسانیش خۆ به‌ دانیشتووی ده‌سه‌ڵاتداری وڵاتی دڵم ده‌زانێ!؟.باش ده‌زانم به‌ده‌رله‌ کرده‌وه‌ هه‌موو چتێ درۆیه ‌. درۆیه‌کی ناحه‌زوناشیرین . ته‌نیا کرده‌وه‌یه‌ که ‌درۆناکات...به‌ڵام مه‌می هه‌ش‌به‌سه‌ر،کوڕی نه‌دارێکی هه‌ژاروده‌ربه‌ده‌ر، ئێوه‌ بڵێن چبکه‌م؟...ئازارمێشکمی سڕکردووه‌.گۆڤه‌ندی لێ کردووم به‌شیوه‌ن...کردومیه‌ به‌تۆبه‌کاری خانه‌قای خه‌م.ده‌ سا ئێوه‌بڵێن چبکه‌م!؟ ئاگره‌وبه‌ربووه‌ته‌جه‌سته‌م .
(کۆرسی هه‌وه‌ڵ له‌ ناوبینه‌رانه‌وه‌ وڵام ده‌ده‌نه‌وه‌)
کۆرسی یه‌ک : نه‌نه‌ی خانه‌ی ته‌ن ئایر هۆرێزان
بزیسکه‌ی‌چه‌خماخ‌کام‌شه‌ش‌� �ان‌خێزان؟
کام‌دووده‌ن‌ رووی دڵ بازهه‌م پۆشاوه‌؟
کام هوونه‌ن ده‌روون دیسان نۆشاوه‌ ؟
مه‌سره‌ف خه‌زانه‌ی ده‌رد په‌نهانی ،
خه‌م هۆشت به‌رده‌ن مه‌ر نمه‌زانی !؟
شه‌راره‌ی تفه‌نگ به‌خت چاره‌ی تۆن !
دوودی هوون زام جگه‌رپاره‌ی تۆن !
جه‌سته‌ت سۆ چنا دڵ هانه‌ ته‌م دا ،
نه‌ده‌روون جام‌جام هوون دان وه‌هه‌م دا،
کوره‌ی دڵ گه‌رمه‌ی جۆش سه‌ختشه‌ن .
په‌ی فێنکی‌ی دڵ، شیوه‌ن وه‌ختشه‌ن !
(کۆرس به‌ره‌و شانۆ ده‌چن )
مه‌م : (له‌گه‌ڵ خۆ) په‌ی فێنکی‌ی دڵ،شیوه‌ن وه‌ختشه‌ن! (کۆرس گه‌ییشتووه‌ته‌ به‌رده‌م شانۆ ، مه‌م روویان تێده‌کات)شیوه‌ن؟..هه‌رخۆتان پاش مله‌ چم پێده‌ڵێن؟! ئاخررۆژی پێک گه‌یشتنی تاژدین و ئه‌ستێ وگریانی مه‌م؟!نا...نا...(کۆرش راوه‌ستاوه‌) له‌بۆخاتری یایه‌ زینیش بووه‌ نابێ به‌ گوێره‌تان بکه‌م...بمبورن!(کۆرس له‌ جێدا داده‌نیشن )ئاخر هه‌گه‌ ئه‌وه‌ن ده‌سه‌ڵاتم به‌سه‌ر خۆدا نه‌بێ؟که‌ی شیاوی‌هاوبه‌ش بوونی ژینی یایه‌ زینم؟ نا...نا...که‌چی ...به‌ڵام ئه‌ی...(بێده‌نگ ده‌بێ،کۆرسی دووه‌م له‌ناو بینه‌رانه‌وه‌ دێته‌ گۆ)
کۆرسی‌دووهه‌م : سه‌د‌ دووری‌چون‌دڵ‌ئه‌م‌مه‌می‌دڵ� ��ته‌نگ
مارۆ ئه‌وفریاد دڵه‌ی سه‌خت سه‌نگ
سزان ئه‌ر گیرۆ ته‌م دڵه‌ی کاوان
هه‌ور نه‌و وه‌جان رێز و هووناوان
به‌ڵام ، تاقه‌تێ ! های هه‌ور ئامان
هانه‌ شادیدا ، ئازیزتر له‌ گیان
مه‌یله‌ش‌چون‌حورمه‌ت‌جه‌حه� ��دبه‌رشی‌یه‌ن
خاترداریش که‌ر، وێنه‌ی که‌س نی‌یه‌ن !
مه‌م : راسته‌ ده‌ڵێن : قسه‌ی جوان و به‌جێ له ‌دڵ هه‌ڵده‌قوڵێ و له ‌قوڵایی دڵیشا جێ ده‌گرێ (کۆرسی دوو به‌ره‌و شانۆ ده‌چن ، کۆرسی یه‌کیش خۆیان ده‌که‌ن به‌ ناواخنیان وگشتیان به‌ره‌وشانۆده‌چن)
(چه‌کۆ له‌لای چه‌پی شانۆه‌و به‌په‌له‌ دێته‌ ژووره‌وه‌ و چاوی به‌ مه‌م ده‌که‌وێ)
چه‌کۆ: کاکه‌مه‌م !
مه‌م : (راده‌چه‌نێ) گیانه‌که‌م!(به‌پیرییه‌وه‌ ده‌چێ)
چه‌کۆ: کواکاکم!؟
مه‌م : کا...کاکت...بۆچته‌؟ چ بووه‌؟!
چه‌کۆ:(به‌پێکه‌نینه‌وه‌)کاکه‌مه‌م!� �اش‌حه‌وته‌یه‌ک هه‌ڵپه‌ڕین ده‌بێ چ بێ؟!!! واخاتوونه‌ ئه‌ستێ هاکاو گه‌ییشت .
مه‌م : به‌خێربێ...سه‌ر چاوه‌کانی مه‌م...کاکت! تاژدین له‌ ژووره‌.
چه‌کۆ: کاکه‌مه‌م بێ‌خه‌وی،ده‌ستی خۆی وه‌شاندووه‌، ره‌نگت له‌سه‌رخۆنییه‌.
مه‌م : نا...نا..هیچ نییه‌،زووبه‌مزگێنییان به‌رێ تا وه‌خۆ که‌ون.
چه‌کۆ: ئه‌ی به‌چاوان!(به‌په‌له‌ده‌چێته‌ن اوحه‌وشه‌.)
مه‌م : زووبه‌ چه‌کۆ! (له‌هه‌ڵ خۆ) ده‌ک کاکه ‌مه‌م! هه‌ناسه‌ت ببێته‌ قه‌فی گوریسی قه‌ناره‌ت هه‌گه‌ خه‌می خۆ به‌شادیی تاژدین پێ شێل نه‌که‌ی...پێکه‌نه‌ که‌ ئێستا، کاتی پێکه‌نین و هه‌ڵپه‌ڕینه‌.(بزه‌ ده‌گرێ وله‌خۆ ده‌نه‌وێ که‌پێبکه‌نێ. تاژدین و چه‌کۆ له‌حه‌سار دێنه‌ ده‌ر. تاژدین به‌ جل و به‌رگی زاوایه‌تییه‌وه‌ به‌ په‌له‌ بۆلای مه‌م دێ و چه‌کۆیش له ‌لای چه‌پی شانۆوه‌ ده‌چێته ‌ده‌ر،ژنێ به‌ کاسه‌یێ نوقڵ ونه‌بات به‌ده‌سته‌وه‌ ده‌چێته‌ سه‌ر دیواری حه‌وشه‌،تاژدین‌توڵێکی‌باریکی ‌رێک‌وپێکی به‌ده‌سته‌وه‌یه‌‌.
تاژدین: ببوره‌ کاکه‌ مه‌م،چه‌کۆ گوتی لێره‌ی...ئێجگار شه‌رمه‌زاری تۆم .
مه‌م : تاژدین!ئاگات له‌خۆته‌؟! چ ده‌ڵێ‌ی؟
تاژدین: مه‌می دلۆڤان! هه‌رگیز بڕوام نه‌ده‌کرد که‌هیچ چتێ بتووانێ وله‌ده‌ستی بێ ته‌نانه‌ت بۆتاوێکیش بووه‌ له‌ یادی تۆ غافڵم بکات ... نازانم چۆن...
مه‌م : تاژدین! ئه‌ڤین له‌ هه‌موومه‌یه‌ک به‌ هێزتره‌.پیاو سه‌رخۆش و مه‌ست ئه‌کات .
تاژدین: راست‌ئه‌که‌ی‌کاکه‌ مه‌م .ئه‌ستێ هه‌موو مێشکمی ته‌نیوه‌...بڕوانه‌(ژنه‌ی سه‌ر دیوار به‌ مه‌م نیشان ئه‌دات) ئه‌م توڵه‌یشیان داوه‌ به‌ ده‌ست منه‌وه‌ که‌ به‌مه‌ سێ جارله‌ سه‌ری ئه‌ستێ بده‌م .
مه‌م : ده‌ی .
تاژدین: ده‌ی!؟ من دڵم نایه‌ت بڕوانمه‌ ئه‌ستێ ،نه‌کا تیژایی نیگام کوڵمی گه‌شی بڕوشێنێ!!ئێستا چلۆن دڵم دێ به‌م توڵه‌ (ئه‌یه‌وێ توڵه‌که‌ فڕێ بدات،مه‌م ده‌ستی ده‌گرێ)
مه‌م : ناتاژدین! ئه‌مه‌ داب و نه‌ریتی باووباپیرانمانه‌... بامن و تۆیش پێمان خۆش نه‌بێ،به‌ڵام ئه‌رکی سه‌ر شانمانه‌ که ‌رێزی لێ بگرین...
تاژدین: یانی تۆ...
مه‌م : تاژدین!خۆنه‌یانگوتوه‌ وه‌های لێده‌ی که‌ ئازاری بگاتێ . به‌س....
تاژدین: ئه‌زانم ! به‌ڵام ...
مه‌م : ئێ ....(ده‌نگی ده‌هۆڵ وزوڕنا نزیک ئه‌بێته‌وه‌)
تاژدین: هه‌رچه‌ند ره‌نگی مه‌یم نه‌دییوه‌،به‌ڵام ئێجگار مه‌ستم... دڵم له‌وانه‌یه‌ له‌ سینگم بێته‌ ده‌ر.
مه‌م : شه‌رابی خۆشه‌ویستی له‌هه‌موو شه‌رابێک توندتره‌ .
تاژدین: لێم به‌ تاوان مه‌گره‌ ...
مه‌م : تاژدین ! ( ده‌نگی ده‌هۆل و زووڕنا نزیکتر ئه‌بێته‌وه‌ )
تاژدین: ببوره‌ به‌ڵام ...
مه‌م : به‌سه‌ ! وه‌خۆکه‌وه‌ وا هاتن .
تاژدین: به‌چاوان .(بووک ده‌گاته‌ به‌ره‌وه‌،به‌ پێی داب ونه‌ریتی کورده‌واری،مه‌م باڵی تاژدین ده‌گرێ و ده‌چن به‌پێشوازی بووکه‌وه‌.تاژدین پاش ماوه‌یه‌کی کورت دوودڵ بوون ، توڵه‌که‌ی ده‌ستی سێ جار زۆر به‌ ئه‌سپایی ئه‌دا به ‌سه‌ر ئه‌ستێدا و ئه‌ویش سه‌ری بۆ داده‌نه‌وێنێ . گۆرانی بێژ ده‌نگ هه‌ڵدێنی و کۆڕی هه‌ڵپه‌ڕکێ یه‌ک ده‌گرن وبه‌گه‌رمیی هه‌ڵده‌په‌ڕن . بووک به‌ره‌وحه‌سار ده‌به‌ن وژنه‌ی سه‌ربانی درگا، کاسه‌ی نوقڵ ونه‌بات ده‌کا به‌سه‌ربووکا.بووک له‌حه‌ساروه‌ژوور ده‌که‌وێ،هه‌رکه‌ده‌گات، کچان له‌حه‌سار له‌به‌رده‌میا کۆڕی‌هه‌ڵپه‌ڕکێ‌ده‌گرن.هه‌ڵ� �ه‌ڕینی کۆڵانیش به‌رده‌وامه. مه‌م وتاژدین ده‌ورێ هه‌ڵده‌په‌ڕن وپاشان مه‌م باڵی تاژدین ده‌گرێ وده‌یباته‌ ماڵه‌وه‌.کۆڕی هه‌ڵپه‌ڕکێیش به‌ دوایانا ده‌ڕۆن . له‌حه‌وشه‌ تاژدین ه‌ مه‌م باڵی ئه‌ستێ ده‌گرن و هه‌ڵپه‌ڕین ده‌بێته‌ ره‌ش به‌ڵه‌ک . په‌رده‌ ده‌کێشرێ )‌


په‌رده‌ی هه‌وه‌ڵ
شوێن : ژووری مه‌م. ده‌رگای ژوور لای راستی شانۆوه‌ و له‌ لای چه‌پ په‌نجه‌ره‌ی ژوور. به‌رانبه‌ری بینه‌ران گه‌نجه‌یه‌کی گه‌وره‌ له‌ تۆی دیوار. مه‌م و تاژدین له‌سه‌ر شانۆن. مه‌م په‌شێو دانیشتووه‌، سه‌ری ناوه‌ به‌ دیواره‌که‌وه‌ و ئه‌ژنۆی خه‌می له‌ باوه‌ش گرتووه‌. تاژدین لای په‌نجه‌ره‌که‌ راوه‌ستاوه‌ و ده‌ڕوانێته‌ دوور. درێژه‌ به‌ وت و وێژیان ئه‌ده‌ن.
تاژدین: ئه‌مڕۆش نه‌هاتبووی بۆ راو...( بێده‌نگی) تاکه‌ی ئه‌ته‌وێ خۆ له‌م ژووره‌دا زیندان بکه‌ی؟
مه‌م : نازانم!...
تاژدین: چتێکت ده‌ست ده‌که‌وێ؟!
مه‌م : به‌ ته‌مای هیچ نیم.
تاژدین: باشه‌، به‌ڵام خۆ نایشته‌وێ له‌م ژووره‌دا بڕزێ‌ی!
مه‌م : ده‌ڵێن ئێش و ئازاری مرۆڤ کاتێ گه‌ییه‌ راده‌ی هه‌ره‌ سه‌ره‌کیی خۆی، به‌ره‌ به‌ره‌ سوکنایی پێ دێت. یانی یا ده‌بێ بمری یا خوو به‌ ئازار بگری.( له‌گه‌ڵ خۆ) به‌ڵام نازانم من بۆ نه‌ ده‌مرم و نه‌ خوو به‌ ئازاری خۆ ده‌گرم...
تاژدین: مه‌م!
مه‌م : گیانه‌که‌م!
تاژدین: سه‌یره‌ لام... زۆر سه‌یره‌... تۆ به‌ ته‌واوی گۆڕیاوی... ئه‌و مه‌مه‌ی نه‌ماوی که‌ پێشتر ده‌مناسی.
مه‌م : کرمانج راست ده‌کا ده‌ڵێ: سوار ئاگای له‌ پێ خاوس نی‌یه‌!
تاژدین: ( به‌ دڵگیری) کاکه‌ مه‌م!
مه‌م : ده‌زانی چ ئاگرێ به‌ر بووه‌ته‌ جه‌سته‌م!؟
تاژدین: ( سه‌ر راده‌وه‌شێنێ)...مه‌م ئاگری ده‌تاوانه‌وه‌ ،ئێستا چ رووی داوه‌ که‌ وه‌ها بێده‌سه‌ڵاته‌؟
مه‌م : نازانم! نه‌ رۆ ئارامه‌ن، نه‌ شه‌و خاومه‌ن
چون چه‌م گل که‌ران، گلا راومه‌ن.
تاژدین: بۆ؟!
مه‌م : له‌ نه‌حسیی چاره‌م!
تاژدین: نا... نا... هه‌رگیز وا مه‌ڵێ: مرۆڤ پێ به‌سی کرده‌وه‌ی خۆیه‌تی.
مه‌م : ( سه‌ری راده‌وه‌شێنێ) هه‌زار دوکتور به‌ قه‌ده‌ر ده‌رده‌دارێ تێ ناگات.
تاژدین: له‌گه‌ڵ ئه‌وه‌یشا بۆ نه‌هێشتنی ئازاری ده‌رده‌دار به‌ دڵ و گیان هه‌وڵ ئه‌دات .
مه‌م : خوای لێ رازی بێ (گرژ) به‌ڵام ئاخۆ کارێکی پێده‌کرێ؟!
تاژدین: به‌و مه‌رجه‌ی که‌ ده‌رده‌دار خۆی بیه‌وێ به‌ڵێ.
مه‌م : بیه‌وێ؟! سه‌یره‌... کامه‌ ده‌رده‌داره‌ که‌ نه‌یه‌وێ؟!!
تاژدین: ئه‌و ده‌رده‌داره‌ی که‌ پارێز ناکات... بڕوای به‌ وته‌ی دوکتور نییه‌، چاک و خراپ تێکه‌ڵ ده‌کات.
مه‌م : که‌ی بووه‌ بڕوام پێ نه‌کردبێتی؟!
تاژدین: که‌ی؟! ئاخر کاکه‌ مه‌م! له‌ که‌نگێه‌وه‌ به‌کره‌ جێ‌ی متمانه‌ بووه‌!
مه‌م : چۆن؟
تاژدین: چۆن؟! مه‌گه‌ به‌کره‌ ناناسی؟!
مه‌م : با...
تاژدین: ده‌ی چۆن متمانه‌ی پێده‌که‌ی؟! چۆن نهێنی‌ی دڵی خۆتی بۆ باس ده‌که‌ی؟ رژدێکی نه‌گریسی وه‌ک به‌کره‌...
مه‌م : ئه‌ز...
تاژدین: به‌داخه‌وه‌، هه‌ڵه‌ت به‌ هۆی نه‌زانینه‌وه‌ نییه‌، هه‌ڵه‌ت له‌وه‌دایه‌ که‌ ده‌زانی و بڕوات به‌ خۆت و زانستی خۆت نییه‌. کرده‌وه‌ و بیرت له‌ یه‌ک دوورن. تۆ چاک ده‌زانی که‌ کاری به‌ جێ که‌ره‌سته‌ی بێ خه‌وشی ده‌وێ. هه‌ڵه‌ت له‌وه‌دایه‌ که‌ چاو ده‌قونجێنی . تۆ چاتر له‌ من ده‌زانی که‌ به‌کره‌ شۆڤار به‌ناو بانگه‌ ، چاوانه‌ی درۆ و ده‌له‌سه‌یه‌، کانگای فڕ و فێڵه‌...
مه‌م : به‌ڵام...
تاژدین: نا... تۆ ده‌ته‌وێ به‌ فڕ و فیشاڵ ببیته‌ هاوسه‌ری زین؟!
مه‌م : ( ده‌نه‌ڕێنێ) نا... هه‌رگیز...
تاژدین: ئه‌ی بۆ؟!
مه‌م : تاژدین!
تاژدین: به‌کره‌ بۆ سه‌رکه‌وتی خۆ، ته‌نانه‌ت خۆیشی ده‌فرۆشێ چ بگات به‌ تۆ...
مه‌م : تاژدین!
تاژدین: متمانه‌ کردن خراپ نییه‌، به‌ڵام ئه‌و که‌سه‌ی که‌ڵکه‌ڵه‌ی ئاشتی و ئاسایشی له‌ سه‌ردایه‌ ده‌بێ هه‌میشه‌ ئاماده‌ی شه‌ڕ و شۆڕ بێت.
مه‌م : به‌سه‌! ( تاژدین بێده‌نگ ده‌بێ، ماوه‌یه‌ک بێده‌نگی، مه‌م له‌سه‌ر خۆ) سه‌رانسه‌ری ژیانم شه‌ڕ و شۆڕ بووه‌ و تۆ چاتر له‌ گشت که‌سێ ده‌زانی که‌ هه‌میشه‌ گیان له‌سه‌ر ده‌ست و ئاماده‌ی جه‌رگه‌ی مه‌یدان بووم و هه‌م... به‌ڵام ...
تاژدین: به‌ڵآم چی؟!
مه‌م : خۆزیا هه‌موو شتێ وه‌ک شه‌ڕ کردن بووایه‌ت!
تاژدین: مه‌به‌ست!؟
مه‌م : چی له‌ شه‌ڕ کردن ساناتر؟!
تاژدین: چیش وه‌ک شه‌ڕ کردن ده‌گمه‌ن!؟
مه‌م : جا خۆ...
تاژدین: شه‌ڕکردن هه‌ربه‌ شیری رووت ناکرێت. بڕوانه مه‌م ! هه‌زار چه‌کۆش وه‌ک تلی ئاو به‌رد په‌رداخ ناکه‌ن...
مه‌م : باش تێده‌گه‌م!
تاژدین: که‌ وه‌هایه‌ ده‌ست بده‌ره‌ شیری تاقه‌ت و دێوه‌ زمه‌ی نائومێدی بتارێنه‌ با له‌وه‌ زیاتر چۆک دانه‌داته‌ سه‌ر دڵت.. (تاژدین ده‌ڕوانێته‌ ده‌ره‌وه‌)
مه‌م : خۆزیا...
تاژدین: یایه‌ زین هات بۆ لات .
مه‌م : ( ده‌شڵه‌ژێ) چی؟! یایه‌ زین؟! هات بۆ ئێره‌؟ کوا؟ له‌ کوێ‌یه‌!؟
تاژدین: له‌ سه‌ر خۆ به‌ پیاو!
مه‌م : یایه‌ زین!
تاژدین: بڕیاری دابوو بێت. به‌ڵآم ئێجگار ئاگاداری خۆتان بن، نابێ که‌س له‌م ژووانه‌ ئاگادار بێت. هۆشی خۆتان ببێت. من ده‌ڕۆم و له‌ ده‌ره‌وه‌ ئێشکتان ده‌گرم... ماڵ ئاوا( ده‌چێته‌ ده‌ر)
مه‌م : لای تۆ خۆش!( ده‌که‌وێته‌ خۆ، له‌ ده‌رکی ژووره‌که‌ ده‌ده‌ن) ئاوه‌ڵایه‌ ... فه‌رموون... فه‌رموون( یایه‌ زین دێته‌ ژووره‌وه‌، نه‌ختێ خۆی پێچاوه‌ته‌وه‌)

شانوی کوردی ئازاره‌کانی کاکه‌ مه‌م ( 2 )

له نووسینی : خالید خاکی

زین : ( به‌ شه‌رمه‌وه‌) سڵاو...
مه‌م : س... سڵاو گیانی شیرینم!
زین : به‌ دزییه‌وه‌ هاتووم!
مه‌م : هه‌ر به‌ ته‌نێ؟!
زین : ئه‌رێ ... کاک تاژدین ئه‌ستێ‌ی له‌ دووم ناردبوو.
مه‌م : به‌خێر بی... سه‌ر هه‌ر دوو چاوم...
زین : به‌ییانووی کار پێ بوونی ئه‌ستێ‌وه‌ له‌ ماڵ هاتوومه‌ته‌ ده‌ر، ده‌بێ خێرا بگه‌ڕێمه‌وه‌...
مه‌م : یانی تاوێ لای...
زین : نابێ ... ئه‌وڕۆ نه‌چبووی بۆ راو، کاکم پیاویشی له‌ دووت ناردبوو...
مه‌م : شه‌رمه‌زاری کاکتم... نه‌متووانی...
زین : ره‌نگ به‌ رووته‌وه‌ نه‌ماوه‌... چ بووه‌؟! ناساخی؟!
مه‌م : به‌س به‌ دیتنت ئازار له‌ گیانما نه‌ماوه‌.
زین : ئێجگار په‌رۆشت بووم...( له‌ دووی ده‌سره‌که‌ی ، به‌ر پشتوێنه‌له‌ی ده‌گه‌ڕێ)
مه‌م : نه‌مێنم وا بوومه‌ هۆی په‌رۆشیت...
زین : نا. وا مه‌ڵێ ( ره‌نگی تێکده‌چێ) بڵێ‌ی دامنه‌خستبێ...
مه‌م : چی؟! چیت داخستبێ؟!
زین : ده‌سره‌، ده‌سره‌که‌م... ده‌سره‌که‌م داخستووه‌...
مه‌م : قه‌زاوه‌گێڕی به‌ژن و باڵات بێ.
زین : ده‌بێ بیدۆزمه‌وه‌( ده‌یه‌وێ بڕوات)
مه‌م : بۆ ده‌سره‌یه‌ک...
زین : ده‌بێ بیدۆزمه‌وه‌ ( ده‌یه‌وێ بڕوات)
مه‌م : راوه‌سته‌ . مراخانییه‌که‌مت بۆ ده‌که‌مه‌ ده‌سره‌...
زین : نا... هه‌گه‌ نه‌یدۆزمه‌وه‌...( ده‌رکه‌ نیوه‌ تاک ده‌کات. به‌ په‌له‌ و شڵه‌ژاو ئاوڕ ئه‌داته‌وه‌) هاوار به‌ ماڵم ... ئابڕوو چوو خۆم...
مه‌م : چ بووه‌؟!
زین : کاکم بۆ دیتنی تۆ هاتووه‌... قوڕی کوێ بکه‌ین به‌ سه‌را؟!...
مه‌م : ( په‌شۆکاو) نه‌تی‌دی؟!
زین : بڕوا ناکه‌م... نا... به‌ڵام هاوکاو بمانبینێ ... چبکه‌ین... با خۆ له‌م په‌نجه‌ره‌وه‌ فڕێ ده‌م( به‌ره‌و په‌نجه‌ره‌که‌ ده‌ڕوات)
مه‌م: ( پێشی پێده‌گرێ) نا... وه‌ره‌( ده‌رگای گه‌نجه‌که‌ ده‌کاته‌وه‌) بڕۆ ئێره‌ له‌م ناوه‌ خۆت وه‌شاره‌...
زین: باشه‌ ( ده‌چێته‌ ناو گه‌نجه‌که‌، مه‌م به‌ په‌له‌ ده‌رگای گه‌نجه‌که‌ داده‌خا و خۆی له‌به‌ر گه‌نجه‌که‌ راده‌کشێ)
زه‌ینه‌دین: ( له‌ ده‌ره‌وه‌ی ژوور) کاکه‌ مه‌م!
مه‌م: ( به‌ ده‌نگی پیاوی نه‌خۆش) گیانه‌که‌م!...
زه‌ینه‌دین: هه‌ر ماوی؟!
مه‌م: فه‌رموون! ( زه‌ینه‌ دین و به‌ دوایا به‌کره‌ دێنه‌ ژووره‌وه‌)
زه‌ینه‌دین: مه‌رحه‌با کاکه‌ مه‌م...
مه‌م: ( به‌ قه‌ستی‌ی له‌ خۆی ده‌نه‌وێ که‌ هه‌ستێ) سڵاو میرم... گه‌وره‌ت کردم...
زه‌ینه‌دین: راکشێ، راکشێ، پشوو بده‌( داده‌نیشن)
مه‌م: میرم
زه‌ینه‌دین: وه‌ها دیاره‌ که‌ په‌تا په‌کی خستبێتی...
مه‌م: گه‌وره‌م! دوور بێ له‌ رووتان.
به‌کره‌: غیره‌ت بنێ به‌ر خۆت پیاو! ئه‌وه‌ چیه‌؟!
مه‌م: چ بڵێم وه‌ڵڵا، کاک به‌کر ... ( زه‌ینه‌دین گاڵته‌ ده‌کات)
زه‌ینه‌دین: باشه‌ هه‌ر که‌سێ ناساخ بێ وه‌ها بۆنی خۆشی لێ دێت؟!
به‌کره‌: ( بۆن ده‌کات) ئه‌م بۆن و به‌رامه‌یه‌ ئێجگار به‌ لووتم ئاشنایه‌...
مه‌م: بۆن و به‌رامه‌ی پێ و قه‌ده‌می گه‌وره‌مه‌!
به‌کره‌: کاکه‌ مه‌م دڵنیای که‌ جگه‌ له‌ ئێمه‌ که‌سی‌تر له‌م ژووره‌دا نییه‌؟...
مه‌م: کاک به‌کر گاڵته‌م پێده‌که‌ی...
به‌کره‌: خاوه‌نی ئه‌م بۆن و به‌رامه‌ گاڵته‌مان پێده‌کات...
( مه‌م بێده‌نگه‌)
به‌کره‌: ئه‌م بۆنه‌ وه‌ک بۆنی سمڵ و مێخه‌ک ده‌چێ...
زه‌ینه‌دین: راست ده‌که‌ی به‌کره‌... بۆنی سمڵ و مێخه‌که‌...
مه‌م: ( په‌شۆکاو و ناڕه‌حه‌ت) سمڵ و مێخه‌ک؟!
به‌کره‌: بۆنی شۆخ ژنی ته‌ڕپۆشی...
زه‌ینه‌دین: ( گاڵته‌ ده‌کات) ده‌یانشێلای؟!
مه‌م: ( بزرکاو) گه‌وره‌م! ( به‌کره‌ به‌ چاو ژووره‌که‌ ده‌پشکنێ و سه‌یرت گه‌نجه‌که‌ ده‌کات
به‌کره‌: مه‌رج ده‌که‌م هێشتا له‌م ژووره‌دایه‌...
مه‌م: کاک به‌کر...( به‌کر هه‌ڵده‌ستێ بگه‌ڕێ)
به‌کره‌: پێم خۆشه‌ مه‌رجت له‌گه‌ڵ بکه‌م به‌ڵکو بی‌به‌یته‌وه‌...
مه‌م: ( ده‌پاڕێته‌وه‌) گه‌وره‌م! کاک به‌کر...
به‌کره‌: کردبێتمان!
( ده‌نگی هاوار و قرم و قاڵێکی زۆر له‌ ده‌ره‌وه‌ دێ)
ده‌نگ: کوڕینه‌ هاواره‌، خزمینه‌ فریا که‌ون...
زه‌ینه‌دین: ئه‌و قڕم و قاڵه‌ چییه‌؟! چ بووه‌؟! چ قه‌وماوه‌؟!
به‌کره‌: نازانم گه‌وره‌م( ده‌چێته‌ به‌ر په‌نجه‌ره‌که‌ و به‌ پڕتاو) گه‌وره‌م ، ماڵی تاژدین له‌ ناو ئاگرا ده‌سووتێ... هه‌تا چاو هه‌ته‌ر ده‌کا ئاگره‌ ... ئه‌شا گڕ به‌رز ده‌بێته‌وه‌...
زه‌ینه‌دین: ( به‌ بیستنی ناوی تاژدین هه‌ستاوه‌ و به‌ره‌و په‌نجره‌ ده‌ڕوا) ماڵی تاژدین؟! بۆ راوه‌ستاوی؟!
ده‌نگ: فریا که‌ون... هاوار... هه‌موو سووتان...
زه‌ینه‌دین: خێرا که‌ با بڕۆین به‌ هاواریانه‌وه‌( به‌ په‌له‌ ده‌چێته‌ ده‌ره‌وه‌ و به‌کره‌یش له‌ دووی ده‌ڕوات. مه‌م خێرا هه‌ڵده‌ستێ، ده‌چێته‌ ده‌ر په‌نجره‌که‌، له‌ گه‌نجه‌که‌ ده‌ده‌ن به‌ڵام مه‌م ئاگای لێ نییه‌، تاژدین دێته‌ ژووره‌وه‌ و مه‌م ئاگای لێ نییه)
تاژدین: ئه‌وه‌ چییه‌ کاکه‌ مه‌م؟!
مه‌م: ( له‌ پڕ ئاوڕ ده‌داته‌وه‌ و ئێجگار په‌رێشام) تاژدین! ماڵه‌که‌ت، بوون و نه‌بوونت...
تاژدین: ( بزه‌ ده‌گرێ) بۆ تۆ قۆچی قوربانین...
مه‌م: تاژدین! ماڵه‌که‌ت... ئه‌و ئاگره‌... ماڵه‌که‌ت گڕی گرتووه‌...
تاژدین: ماڵ ده‌بێته‌وه‌... یایه‌زین رۆیی؟!
مه‌م: ( بیری زین ده‌که‌وێته‌وه‌ و به‌ په‌له‌ ده‌چێ بۆ لای گه‌نجه‌که‌ و به‌ شه‌رمه‌زارییه‌وه‌ ده‌ڵێ): ئاخ... یایه‌زین بمبوره‌... ( درگا کراوه‌ته‌وه‌ و زین هاتووه‌ته‌ ده‌ره‌وه‌ و ئێجگار په‌رێشانه‌)
زین: ئه‌ستێ!! ئه‌ستێ چی لێهاتووه‌؟... خوشکی شیرینم... ئه‌ستێ گیان...
تاژدین: له‌سه‌ر خۆ بن... نایه‌وێ بپه‌شۆکێن... مه‌ چاومان له‌ کاکت و به‌کره‌وه‌ بوو... دیتمان بۆ ئه‌وه‌ی که‌ نهێنیی تۆ و مه‌م ئاشکرا نه‌بێ ، چارمان ناچاره‌ ئه‌بێ سه‌رنجی کاکت بۆ لای خۆ راکێشین... که‌ وا بوو من و ئه‌ستێ و چه‌کۆ ئاگرمان به‌ردایه‌ ماڵ...
زین: ئاخر...
مه‌م: تاژدین یانی...
تاژدین: یایه‌ زین زووبه‌ ، پێش له‌وه‌ی ئاگره‌که‌ بکوژێته‌وه‌ ده‌بێ بگه‌یته‌وه‌ ماڵه‌ خۆ...
زین: راست ده‌که‌ی کاک تاژدین( ده‌یه‌وێ بڕوات)
تاژدین: له‌گه‌ڵت دێم!
مه‌م: شه‌رمه‌زارم تاژدین ... من...
تاژدین: هیچ مه‌ڵێ مه‌م... من براده‌ری تۆم... که‌ڵکی رۆژێکی وه‌ها نه‌گرم به‌ کاری چ دێم؟!...
مه‌م: خۆش بی تاژدین... سپاست ده‌که‌م... به‌ڵام
تاژدین: جارێ به‌ دۆعا...( تاژدین و زین ده‌ڕۆنه‌ ده‌ره‌وه‌ و مه‌م به‌ ته‌نێ ده‌مێنێته‌وه‌ ، ده‌چێته‌ ناو فێکره‌وه‌ و نه‌رمه‌ نه‌رم دێته‌ ناوه‌ راست شانۆ و روو ده‌کاته‌ بینه‌ران)
مه‌م: من چه‌ند به‌خته‌وه‌رم، نا؟! مرۆڤ هاوه‌ڵێکی وه‌ک تاژدینی هه‌بێ هه‌موو چتێکی هه‌یه‌... ده‌زانم ئێستا زۆرتان ، خۆزیاتان خاوه‌نی هاوه‌ڵێکی وه‌ها بوونه‌... به‌ڵکوو له‌ ناخی دڵتانا به‌غێڵیشم پێ ببه‌ن... به‌ڵام من هه‌رگیز خۆ به‌ به‌خته‌وه‌ر نازانم... به‌ پێچه‌وانه‌... پێم وایه‌ به‌خته‌وه‌رتر ده‌بووم هه‌گه‌ هه‌ر هیچ که‌س هاوه‌ڵم نه‌بووایه‌ت، یا خۆ له‌ باتی تاژدین به‌کره‌ هاوه‌ڵم بووایه‌ت... نا... نا... به‌ هه‌ڵه‌دا مه‌چن ... نه‌ هیچ کارێکم به‌ به‌کره‌یه‌ و نه‌ شێتیش بووم... به‌ڵام ده‌ین‌دار بوون خۆی ئازارێکی ئێجگار پڕ مه‌ترسی و گیانکێشه‌... پێم خۆش بوو که‌سێ وه‌ک به‌کره‌ هاوه‌ڵم بووایه‌ت تا هه‌رگیز له‌ ژێر قورسایی باری ده‌ینا نه‌بم، ده‌زانن چیه‌؟!... رام له‌ سه‌ر رای ئه‌و نه‌مره‌یه‌ که‌ گووتویه‌تی:
گوێم نا به‌ دڵی خاکه‌وه‌
باسی خۆشه‌ویستی باران و خۆی بۆ کردم
گوێم نا به‌ دڵی ئاوه‌وه‌
باسی خۆشه‌ویستی خۆی و سه‌رچاوه‌کانی بۆ کردم
گوێم نا به‌ دڵی داره‌وه‌
باسی خۆشه‌ویستی خۆی و گه‌ڵاکانی بۆ کردم
که‌ گوێشم نا، به‌ دڵی خۆشه‌ویستی خۆمه‌وه‌،
باسی سه‌ربه‌ستی بۆ کردم! ( تاوێکی کورت بێده‌نگی)
جیا له‌وه‌ش، هه‌گه‌ له‌ سوچێ‌تره‌وه‌ بڕوانینه‌ ئه‌م ئازاره‌، ده‌بینین که‌، چاکه‌ و پیاوه‌تیش له‌ بوون ده‌وه‌شێته‌وه‌... کاتێ نیمه‌، کاتێ ناتووانم کاڵکم بۆ که‌س ببێ، کاتێ هیچ شک نابه‌م شیاوی قۆچی قوربان بوونی که‌سی ببێ. کاتێ هه‌موو جومگه‌کانی له‌شم به‌ زه‌بری هه‌ژاری و بێده‌سه‌ڵاتی لێک پساون، چۆن ده‌تووانم به‌ ئازیزانم بسه‌لمێنم تا چ راده‌یه‌ک خۆشم ده‌وێن؟!
خۆ فریو مه‌ده‌ن...
ئه‌وه‌ی راسته‌قینه‌ بێت، هه‌گه‌ من ئه‌و کاره‌ی ئه‌مڕۆی تاژدینم بۆ ئه‌و بکردایه‌ت، به‌ هاواری که‌س به‌رز ده‌بووه‌وه‌ و نه‌ کاکی زین و به‌کره‌یش وازیان له‌ مه‌سه‌له‌ دێنا و ده‌هاتن به‌ هاوارمه‌وه‌ و نه‌...
ته‌نانه‌ت ئێوه‌ی به‌ڕێزیش ده‌تانووت: مه‌م گوێزی نه‌ماوه‌ و گزی ده‌کات... یان به‌ واته‌یه‌کی‌تر مه‌م به‌م کاره‌، خۆی به‌ سه‌ر تاژدینا ساخ ده‌کاته‌وه‌...
تکاتان لێده‌که‌م له‌گه‌ڵ خۆ درۆ مه‌که‌ن!!...
2
ده‌لاقه‌یه‌کی به‌رچاو که‌وتوو له‌ لای راستی شانۆ.
شوێن: ژووری تایبه‌تی زه‌ینه‌دین خان. رازاوه‌ به‌ فه‌رش و پشتی و... شانۆ چۆڵه‌.( بۆره‌ خان ، عاقڵێکی شێت نوێن به‌ پله‌ لێدان و گۆرانی ووتن دێته‌ ژووره‌وه‌.)
بۆره‌خان: ( ده‌خوێنێ) له‌ ماڵی گه‌وره‌ماڵان
له‌ ماڵی زه‌ینه‌دین خان
له‌ سه‌ر سفره‌ی به‌ تاڵان
ده‌بێ بمری له‌ برسان
زگت هه‌لووشی بۆ نان
هه‌موو رۆژانی حه‌وته‌
پێخۆر ئاوه‌ و ته‌ماته‌
کاتێ وه‌رزی ته‌ماته‌یش کۆتایی پێهات، نه‌خۆشه‌ر ئاوه‌ و پیاز ئاو...
شه‌ش ترنگه‌ و مزرۆکه‌ و چێشتی خا زه‌ریف و جڵفڕ و تام ئاو...
هه‌مووی هه‌ر رێزکه‌یێ پیاز و زه‌ر‌یایه‌ک ئاو...
چ ده‌که‌ی؟! چێشتی کرمانج هه‌ر ده‌بێ نانیشی تێ ووشی و به‌ نانیشه‌وه‌ بیخۆی... بێتوو ورته‌یشت له‌ ده‌م ده‌رێ، خاتوونی گه‌وره‌ ماڵان ده‌ستت لێده‌نێته‌ که‌له‌که‌، ده‌ڕوانێته‌ سه‌ر تا پات، خۆ با ده‌دات و خۆ را ده‌دات( ده‌ست ده‌نێته‌ که‌له‌که‌ی و لاسایی خاتوون ده‌کاته‌وه‌ و ده‌ڵێ): ئێ ئێ... تۆش فێره‌ قسه‌ بووی... هه‌ی دنیا قنگی نه‌مێنێ مێلوره‌ قنگ هه‌ڵته‌کێنێ...
که‌س نی‌یه‌ بڵێ ئاخر خاتوون من و مێلوره‌ چمان وه‌ک یه‌ک ده‌چێ؟! هه‌ر ئه‌وه‌ن نۆکه‌رم ئیدی نابێ قسه‌ بزانم؟!
( زه‌ینه‌دین و به‌کره‌ به‌ راوێژ کردن دێنه‌ ژووره‌وه‌)

شانوی کوردی ئازاره‌کانی کاکه‌ مه‌م ( 3)

له نووسینی : خالید خاکی

زه‌ینه‌دین: چییه‌ بۆره‌... بۆ نانت نه‌خوارد؟! ( بۆره‌ خان خۆی کز ده‌کات و هیچ ناڵێ)
زه‌ینه‌دین: ( به‌ پێکه‌نینه‌وه‌) قاوتت له‌ زار کردووه‌ یا خۆ مار زبانتی گه‌ستووه‌؟!
بۆره‌خان: گه‌وره‌م...
زه‌ینه‌دین: شه‌ڕی تۆ و خاتوون که‌ی کۆتایی دێ؟!
بۆره‌خان: ( ئیشاره‌ بێده‌نگ بوون ده‌کات) س...س...ست... گه‌وره‌م خۆتان فه‌رمووتان پیاو نابێ نهێنی لای که‌س و ناکه‌س بدرکێنێ!...
زه‌ینه‌دین: چ نهێنیێ؟! ئه‌وسا که‌س تۆ که‌س و نه‌که‌سی؟!
بۆره‌خان: گه‌وره‌م جگه‌ له‌ منی که‌س، یه‌کێ‌تریش راوه‌ستاوه‌...
به‌کره‌: ئێ... یانی ئه‌ز...
زه‌ینه‌دین: ( روو له‌ به‌کره‌) زویر مه‌به‌. بۆره‌ به‌ هه‌موو که‌سا ئه‌خوێنێ...
بۆره‌خان: گه‌وره‌م. دیسان هه‌ڵه‌تان کرد.
به‌کره: (زۆر توڕه‌) گه‌وره‌م ئیزن بده‌ن...
زه‌ینه‌دین: ( قاقا پێده‌که‌نێ) کۆتایی پێ بێنن. بۆره‌ ئه‌و شه‌تره‌نجه‌مان بۆ بێنه‌!
بۆره‌خان: باشه‌ به‌ چاوان( ئه‌ڕوات و پێش ئه‌وه‌ی له‌ چاو ون بێ ئاوڕ ده‌داته‌وه‌) که‌یفی خۆتانه‌ ( ون ده‌بێ)
زه‌ینه‌دین: ( به‌ پێکه‌نینه‌وه‌ روو له‌ به‌کره‌) دانیشه‌، هه‌ر ئه‌وه‌ی ماوه‌ قولاپه‌ی خۆم بگرێ. ( به‌کره‌ داده‌نیشێ و له‌ فیکردایه‌)
زه‌ینه‌دین: چییه‌؟! بیر له‌ چی ده‌که‌یته‌وه‌؟ گوێ بۆ قسه‌ی بۆره‌ شل مه‌که‌.
به‌کره‌: وه‌ڵڵا گه‌وره‌م...
زه‌ینه‌دین: هیچی له‌ دڵدا نییه‌.
به‌کره‌: هه‌ڵبه‌ت گه‌وره‌م، به‌ڵام...
زه‌ینه‌دین: به‌ڵام چیه‌؟ زویر بووی؟!
به‌کره‌: نا گه‌وره‌م مه‌به‌ستم ئه‌مه‌ نه‌بوو.
زه‌ینه‌دین: ئێ...
به‌کره‌: گه‌وره‌م، بمبورن! به‌ڵام لام وایه‌ گه‌وره‌م هه‌ندێ زۆر خۆیان شل ده‌گرن.
زه‌ینه‌دین: پێم گوتی زویر مه‌به‌... بۆره‌...
به‌کره‌: نا گه‌وره‌م زویر نیم، به‌ڵام ئه‌و خه‌ڵکه‌ چاک ده‌ناسم.
زه‌ینه‌دین: مه‌به‌ست؟!
به‌کره‌: گه‌وره‌م:! ئه‌و خه‌ڵکه‌ زوو بایی هه‌وا ده‌بن. زوو خۆیان لێ ده‌گۆڕدرێ.
زه‌ینه‌دین: وانی‌یه‌... بۆره‌...
به‌کره‌: گه‌وره‌م! بمبورن مه‌به‌ستم بۆره‌ نی‌یه‌. هه‌ڵبه‌ت خۆ چاک ده‌زانن که‌ گشت که‌س بۆره‌ نی‌یه‌. به‌ڵام له‌گه‌ڵ ئه‌وه‌یشا ئیزن ئه‌ده‌ن که‌ هه‌موو که‌س وه‌ک بۆره‌ هه‌رچییه‌ پێ‌ی خۆشه‌ بیڵێ.
زه‌ینه‌دین: که‌سێ چتێکی گووتوه‌؟!
به‌کره‌: گه‌وره‌م نازانم چۆنی بدرکێنم!
زه‌ینه‌دین: چ بووه‌؟! ئه‌ته‌وێ چی بڵێ‌ی زوو بڵێ و کۆتایی پێ بێنه‌.
به‌کره‌: گه‌وره‌م بمبورن. چارم ناچاره‌ و ئه‌بێ بڵێم، من نمه‌ک په‌روه‌رده‌ی ئه‌م بنه‌ماڵه‌م...
زه‌ینه‌دین: دڵم هاته‌ سه‌ر. بڵێ بزانم ئه‌ته‌وێ بڵێ‌ی چی؟!
به‌کره‌: میرم سه‌باره‌ت به‌ خاتوونه‌ زین...
زه‌ینه‌دین: ( له‌ پڕ) زین؟! کێ چی ووتووه‌؟!
به‌کره‌: هیچ گه‌وره‌م. هیچ ... ئه‌بێ رای ئێوه‌ی له‌سه‌ر بێ.
زه‌ینه‌دین: تێ‌ناگه‌م. رام له‌سه‌ر چی بێ؟!
به‌کره‌: دڵنیام پرس و را به‌ گه‌وره‌م کراوه‌.
زه‌ینه‌دین: سه‌باره‌ت به‌ چی؟!
به‌کره‌: یانی بڵێ‌ی تاژدینیش وه‌ک ئه‌و خه‌ڵکه‌ بایی‌هه‌وا بووبێ و به‌ بێ رای گه‌وره‌م بڕیاری دابێ؟!
زه‌ینه‌دین: چ بڕیارێ؟!
به‌کره‌: گه‌وره‌م وه‌ک بیستوومه‌ تاژدین بڕیاری داوه‌ یایه‌زین بۆ کاکه‌ مه‌م ماره‌ بکات!
زه‌ینده‌ن: ( زۆر توڕه‌) چی؟!
به‌کره‌: شه‌رمه‌زارم گه‌وره‌م. به‌ڵام شه‌وچه‌ره‌ی خه‌ڵکی جه‌زیرێ باسی دڵداری مه‌م و زینه‌...
زه‌ینه‌دین: ده‌ی ده‌ی...
به‌کره‌: گه‌وره‌م ئه‌زانم که‌س نه‌یوێراوه‌ لای میرم باس بکات ئه‌گینا باسی دڵداری ئه‌و جووته‌ جاجکه‌ی زاری گه‌وره‌ و بچووکه‌...
زه‌ینه‌دین: ئیتر چی؟!
به‌کره‌: هه‌ڵبه‌ت مه‌م کوڕێکی خراپ نییه‌. دلێر و ئازا و به‌ ده‌ست و برده‌، شۆڕه‌ سوارێکی بێ‌وێنه‌یه‌. ته‌نیا پله‌ی کۆمه‌ڵایه‌تیه‌که‌ی نزمه‌ و ئه‌مه‌ش ره‌نگه‌ زۆر گرینگ نه‌بێ، به‌ تایبه‌ت که‌...
زه‌ینه‌دین: به‌ تایبه‌ت چی؟!
به‌کره‌: به‌تایبه‌ت که‌ ئه‌وسا ده‌بێته‌ زاوای گه‌وره‌م و ...
زه‌ینده‌ین: ( سه‌ر راده‌وه‌شێنێ و سمێڵی خۆی ده‌جوێ)
به‌کره‌: ( به‌ رواڵه‌ت له‌ گه‌ڵ خۆ) هه‌رچه‌ن باو باپیرانی مه‌ گووتویانه‌ کاری بچووک به‌ پیاوی مه‌زن و کاری مه‌زن به‌ پیاوی بچووک مه‌سپێرن و ... ( بێده‌نگ ئه‌بێ)
زه‌ینه‌دین: ( پاش ماوه‌یه‌کی کورت بێده‌نگی) تۆ دڵنیای؟!
به‌کره‌: گه‌وره‌م...
زه‌ینه‌دین: ئه‌بێ ئه‌مه‌م پێ بسه‌لمێنی...
به‌کره‌: میرم...
زه‌ینه‌دین: دووپاتی ناکه‌مه‌وه‌... هه‌رچی زووتر چاتر...
به‌کره‌: گه‌وره‌م( بۆره‌خان به‌ شه‌تره‌نجه‌که‌وه‌ دێته‌ ژووره‌وه‌)
بۆره‌خان: گه‌وره‌م فه‌رموون( ده‌یباته‌ ناوه‌راستیان و داشه‌کان ده‌چنێ و هه‌ڵده‌ستێ) گه‌وره‌م ئاماده‌یه‌.
زه‌ینه‌دین: چاکه‌، بڕۆ...( بۆره‌خان کڕنۆش ده‌با و ئه‌ڕواته‌ ده‌ره‌وه‌)
به‌کره‌: ( پیاده‌یێک ده‌باته‌ پێشه‌وه‌ و ده‌ڵێ) گه‌وره‌م خۆتانی بۆ په‌رۆش مه‌که‌ن، مه‌م کوڕێکی پاک و بێ خه‌وشه‌، جیا له‌وه‌ش من خاتوونه‌ زین ئه‌ناسم ئه‌وه‌ن پاک و بێ گه‌رده‌ که‌ هیچ قسه‌یه‌کی پێوه‌ نالکێ، هه‌رچه‌ن...
زه‌ینه‌دین: هه‌رچه‌ن چی؟
به‌کره‌: گه‌وره‌م بمبورن به‌ڵام پێشینیان گووتویانه‌ ژن عه‌قڵ ناته‌واوه‌ و زوو فریو ئه‌خوات.
زه‌ینه‌دین: ده‌رماریان ده‌ردێنم. ( ماوه‌یه‌کی کورت بێده‌نگی و پاشان به‌کره‌ به‌ مه‌کره‌وه‌ له‌ گه‌ڵ خۆ)
به‌کره‌: بڕوا ناکه‌م. یانی بڵێ‌ی قسه‌ی خه‌ڵک راست بێ و تاژدین تا ئه‌و راده‌یه‌ بایی‌هه‌وا بووبێ که‌ پله‌ی خۆ فه‌رامۆش بکا و بڕیاری وه‌ها بدات؟!
زه‌ینه‌دین: بێتوو راست بێ...
به‌کره‌: گه‌وره‌م... راسته‌ که‌ مه‌م ئێجگار زانا و نه‌ترس و بێ باکه‌، به‌ڵام هه‌ر که‌سێ به‌ له‌ونێ فریو ئه‌خوات.
زه‌ینه‌دین: مه‌به‌ست؟!
به‌کره‌: ده‌کرێ هه‌موو چتێ له‌ زبانی خۆی ببیسین.
زه‌ینه‌دین: چۆن؟
به‌کره‌: میرم له‌ مێژووی کرمانج‌دا سه‌تره‌نج گه‌لێ جار ده‌ورێکی گرینگی بینیوه‌، بۆ ئه‌م رایش نه‌یبینێ.
زه‌ینه‌دین: بۆم شی که‌ره‌وه‌.
به‌کره‌: گه‌وره‌م! رام وایه‌( سه‌رده‌باته‌ په‌نا گوێ‌ی زه‌ینه‌دین و چپه‌ی بۆ ئه‌کات. زه‌ینه‌دینیش به‌ سه‌ر وته‌کانی ده‌سه‌لمێنێ و یه‌ک دوو جار ده‌ڵێ: ئێ... زۆر چاکه‌... وایه‌...)
(شانۆ تاریک دادێ)
( شانۆ روون ده‌بێته‌وه‌، مه‌م و تاژدین له‌ لای راستی شانۆ، چه‌کۆ و عرفۆ روو له‌ بینه‌ران، زه‌ینه‌دین و به‌کره‌ش لای چه‌پی شانۆ به‌رانبه‌ر به‌ یه‌کتر دانیشتوون و خه‌ریکی شه‌تره‌نجن. زین له‌ ده‌لاقه‌ی راستی شانۆوه‌ به‌ دزیه‌تی سه‌یریان ئه‌کات. زه‌ینه‌دین ده‌یبینێ به‌ڵام خۆ گێل ئه‌کات)
زه‌ینه‌دین: به‌کره‌! وێ ده‌چێ ئه‌م رایش دۆڕاندبێتمان ( داشێک ئاڵ و گۆڕ ئه‌کات)
به‌کره‌: میرم! من گه‌لێ جار ووتوومه‌: مه‌م و تاژدین ببن به‌ یه‌ک ده‌گمه‌نه‌ که‌سێ زه‌فه‌ریان پێ ببات.
زه‌ینه‌دین: یانی ئه‌بێ مه‌ هه‌ر بدۆڕێنین؟!
به‌کره‌: گه‌وره‌م! شه‌و به‌ری درێژه‌.
زه‌ینه‌دین: وایه‌.
تاژدین: هه‌گه گه‌وره‌م ئیزن فه‌رموون ئه‌ز سه‌یر ئه‌که‌م و کاکه‌ مه‌م به‌ ته‌نێ خۆ یاری ئه‌کات.
زه‌ینه‌دین: ( بزه‌ ده‌گرێ) کاکه‌ مه‌م به‌ ته‌نیایش جێ‌ی مه‌ترسیه‌.
مه‌م: هه‌ڵبه‌ت نه‌ بۆ گه‌وره‌م.
زه‌ینه‌دین: بڕوا بکه‌م؟!
به‌کره‌: به‌ رای من مه‌م ده‌ستی خۆی خستووه‌ته‌ پێش و باش ئاگاداری گشت لایه‌نێکه‌ له‌گه‌ڵ ئه‌وه‌یشا لام وایه‌ میرم به‌ وردی له‌ نه‌خشه‌ی کاکه‌ مه‌م تێ‌گه‌یشتبێ.
زه‌ینه‌دین: ئه‌ڵێن شه‌تره‌نج وه‌ک مه‌یانی شه‌ڕ وایه‌...
مه‌م: هه‌ڵبه‌ت نه‌ هه‌موو شه‌ڕێ...
زه‌ینه‌دین: چ ته‌وفیرێ ئه‌کا؟ مه‌گه‌ له‌ هه‌موو شه‌ڕێکدا سه‌رکه‌وتنی لایه‌نێک به‌ مانای تێشکانی لایه‌نه‌که‌ی‌تر نییه‌؟!
تاژدین: هه‌ڵبه‌ت گه‌وره‌م باش ئاگادارن که‌ له‌ هه‌موو شه‌ڕێکدا ئه‌مه‌ رواڵه‌تی کاره‌ساته‌که‌یه‌. ئه‌گینا له‌ راستیه‌قینه‌دا له‌ زۆربه‌ی شه‌ڕه‌کاندا هه‌ر دوو لایه‌نه‌که‌ تێده‌شکێن و لایه‌نی سێهه‌مه‌ که‌ که‌ڵک له‌ تێشکانی ئه‌وان وه‌ر ده‌گرێ.
به‌کره‌: هه‌گه‌ لایه‌نێک له‌ پیلانه‌که‌ی لایه‌نه‌که‌ی‌تر و لایه‌نی سێهه‌م ئاگادار بێ چی؟ ئه‌وسایش هه‌ر لایه‌نی سێهه‌م ئه‌تووانێ که‌ڵک وه‌رگرێ؟!
مه‌م: یانی لایه‌نێک و لایه‌نی سێهه‌م ده‌ستیان تێکه‌ڵ کردبێ؟!
زه‌ینه‌دین: گریمان وابێ( له‌ ژێر چاوه‌وه‌ ده‌ڕوانێته‌ تاژدین)
مه‌م: گه‌وره‌م! ئه‌وه‌ی که‌ نه‌تووانێ ته‌نیا به‌ دیتنی به‌رز و نزم بوونه‌وه‌ی تایه‌کانی شایه‌ن دامرکێ و بیه‌وێ یه‌کێ له‌ تایه‌کان قووره‌ستر بێ، ناتووانێ لایه‌نی سێهه‌م بێ. لایه‌نی سێهه‌م بۆی گرینگ نی‌یه‌ کام لایه‌ن سه‌رده‌که‌وێ.
زه‌ینه‌دین: ره‌نگه‌ وابێ ( ده‌ڕوانێته‌ به‌کره‌، به‌کره‌ ره‌نگی ده‌بزرکێ)
به‌کره‌: پێم وایه‌ ئه‌م...
مه‌م: کیش.
زه‌ینه‌دین: باش سه‌رتان قاڵ کردین...
مه‌م: گه‌وره‌م ئاگاداری وه‌زیره‌که‌شتان بن.
زه‌ینه‌دین: ئێ... وا دیاره‌ گه‌مارۆت داوم.
به‌کره‌: گه‌وره‌م. ئامان په‌له‌ مه‌که‌. نه‌هێڵی وه‌زیره‌که‌ت له‌ کیس چێ.
تاژدین: مه‌سه‌له‌ی سه‌ره‌کی رزگار بوونی شایه‌...
به‌کره‌: وه‌زیریش زۆر گرینگه‌.
مه‌م: وه‌زیرێ که‌ هیچی له‌ ده‌ست نه‌یه‌ت به‌ڵام بوونی ببێته‌ هۆی مه‌ترسی بۆ گیانی شا، بوون و نه‌بوونی چ ته‌وفیر ده‌کات؟!
به‌کره‌: به‌ڵام شای بێ وه‌زیر ته‌نیا ناوی شایه‌.
تاژدین: کاک به‌کر ئه‌ڵێ‌ی هه‌رگیز شه‌تره‌نجت نه‌کردووه‌، هه‌ر سه‌ربازێکی به‌ ده‌ست و برد ده‌تووانێ ببێ به‌ وه‌زیر به‌ڵام شا چی؟!
زه‌ینه‌دین: وا دیاره‌ زیاتر له‌ من ئێوه‌ له‌ دڵه‌ کووتێ دان!
مه‌م: کایه‌ی شه‌تره‌نج هه‌موو بینه‌رێک بۆ به‌شدار بوون راده‌کێشێ...
زه‌ینه‌دین: ( داشێک ئاڵ و گۆڕ ئه‌کات) ئێمه‌ ئاوا ئه‌که‌ین با نه‌ وه‌زیره‌که‌مان تیا چێ و نه‌کیشی شایش جێگه‌ گرێ.
مه‌م: ( داشێک ئاڵ و گۆڕ ده‌کات) زۆر باشه‌( زه‌ینه‌دین داشێک ئاڵ و گۆڕ ئه‌کات و دیسانه‌وه‌ مه‌م و ...)... کیش و... به‌ڵێ... کیش و مات.
زه‌ینه‌دین: ئێ... وایه‌... به‌کره‌ ئه‌میشمان دۆڕاند.
به‌کره‌: میرم به‌ رای من ده‌که‌ن جێ بگۆڕنه‌وه‌.
تاژدین: ( سه‌ری سووڕ ده‌مێنێ) جێ بگۆڕنه‌وه‌؟!
به‌کره‌: به‌ڵێ، ئه‌و شوێنه‌ی کاکه‌ مه‌م لێ‌ی دانیشتووه‌ شانس دێنێ.
مه‌م: کاک به‌کره‌ گاڵته‌ ده‌که‌ی؟
به‌کره‌: نا هیچ گاڵته‌ ناکه‌م. ئه‌و شوێنه‌ی تۆ شانس دێنێ، بڕوا ناکه‌ن جێ بگۆڕنه‌وه‌.
مه‌م: بۆ من ته‌وفیر ناکات. هه‌رچۆن گه‌وره‌م فه‌رمێ له‌ خزمه‌ت دام.
زه‌ینه‌دین: هه‌رچه‌ن زۆر بڕوام به‌ شانس نی‌یه‌، به‌ڵام قه‌ید ناکات. تاقی ده‌که‌ینه‌وه‌.
مه‌م: گه‌وره‌م فه‌رموو( هه‌ڵده‌ستێ، زه‌ینه‌دین هه‌ڵده‌ستێ و هه‌موو له‌به‌ری هه‌ڵده‌ستن. زه‌ینه‌دین ده‌چێته‌ جێگاکه‌ی مه‌م و به‌ پێچه‌وانه‌)
به‌کره‌: گه‌وره‌م دوو را دۆڕاندمانه‌. ( شه‌تره‌نجه‌که‌ رێک ده‌کاته‌وه‌ و کایه‌ ده‌که‌ن)
تاژدین: مه‌م! ئه‌وه‌ چت کرد...
مه‌م: بۆ؟!
تاژدین: هه‌ڵه‌ت کرد.
زه‌ینه‌دین: شه‌تره‌نج هه‌ڵه‌یشی تێدایه‌...( زین سه‌یریان ده‌کات. مه‌م چاوی به‌ زین که‌وتووه‌ و هۆشی نه‌ماوه‌، پاش یه‌ک دوو ئاڵ و گۆڕی داشه‌کان ... کیش و مات...
تاژدین: چی؟!
مه‌م: وایه‌ گه‌وره‌م.
به‌کره‌: گه‌وره‌م دێت؟!
زه‌ینه‌دین: راوه‌سته‌، جارێ رایه‌که‌مان سڕیوه‌ته‌وه‌( دیسان یاری ده‌که‌ن و ...)
تاژدین: مه‌م!
زه‌ینه‌دین: کایه‌یه‌...
مه‌م: فه‌رموو...
تاژدین: ( به‌ زینی زانیووه‌ و خۆ ده‌خواته‌وه‌) مه‌م ئاگادار به‌... ( مه‌م داشێک ئاڵ و گۆڕ ده‌کات) ئاخ... ئه‌وه‌ چت کرد...
زه‌ینه‌دین: بڕوا ناکه‌م. هه‌ر وا سووک و سانا ... ئا ئه‌مه‌یش کیش و ... به‌ڵێ ئه‌مجاره‌ش مات... کیش و ماتی.
مه‌م: ( بۆ ماوه‌یه‌ک ئاگای دێته‌وه‌ به‌ خۆدا) وایه‌ گه‌وره‌م. ئێستا هیچمان له‌ هیچ...
زه‌ینه‌دین: که‌ واتا... له‌مه‌و دوا بزانین ( کایه‌ ده‌که‌ن و ئێجگار زوو)
به‌کره‌: ئه‌م رایش کیش و مات...
زه‌ینه‌دین: دیسان یاری بکه‌ین؟! ( مه‌م هۆشی لای زینه‌)
تاژدین: نا...
مه‌م: جا چ له‌وه‌ خۆشتر... یاری بکه‌ین...
زه‌ینه‌دین: چاکه‌...
تاژدین: کاکه‌ مه‌م!
مه‌م: گیانه‌که‌م.
تاژدین: شه‌و دره‌نگه‌...
مه‌م: شه‌و؟! ( به‌کره‌ و زه‌ینه‌دین ده‌ڕواننه‌ یه‌ک، مه‌م ئاگای لێ نییه‌. تاژدین و چه‌کۆ و عرفۆ تێده‌گه‌ن و به‌یه‌کا ده‌ڕوانن)
زه‌ینه‌دین: ( داشێک ئاڵ و گۆڕ ئه‌کات) وا وه‌زیره‌که‌ت چوو...
مه‌م: سه‌رتان سڵامه‌ت...
به‌کره‌: ( به‌ ته‌شه‌ره‌وه‌) گرینگ نی‌یه‌، کاکه‌ مه‌م پیاده‌ی چالاکی زۆره‌ ده‌یانکاته‌ وه‌زیر.
مه‌م: ئه‌وه‌ی مه‌شقی عه‌شقی له‌ مه‌یدانی ژینا کردبێ وه‌زیر بوونی به‌ پووشێ ناوێ.
تاژدین: کاکه‌ مه‌م!...
به‌کره‌: کاکه‌ مه‌م شاعێریشه‌.
زه‌ینه‌دین: کیش و ... به‌ڵێ رێگه‌ت نه‌ماوه‌... کیش و مات ... ( زین لا ده‌چێ)
مه‌م: به‌سه‌... تووانم لێ بڕا.
به‌کره‌: وه‌ها زوو کۆڵت دا؟!
مه‌م: کۆڵه‌م کوترا...
تاژدین: کاکه‌ مه‌م شه‌و ئێجگار دره‌نگه‌...
زه‌ینه‌دین: بۆ وا به‌ په‌له‌ی؟!
تاژدین: گه‌وره‌م کات دره‌نگه‌ و شه‌و... ‌
به‌کره‌: شه‌و... ئه‌ڵێن قه‌ڵای مێردانه‌ شه‌و...
تاژدین: کاک به‌کره‌ رجا ده‌که‌م!
مه‌م: تاژدین زووه‌.
تاژدین: کاکه‌ مه‌م!
به‌کره‌: کاک تاژدین په‌له‌ مه‌که‌. میرم بردوویه‌ته‌وه‌.
زه‌ینه‌دین: وایه‌
به‌کره‌: بڕیار وابوو...
تاژدین: هه‌رچیه‌ دڵخوازی میرم بێ به‌ زووترین کات پێشکه‌ش ده‌کرێ. گه‌وره‌م! سه‌رم له‌ رێتانایه‌.
به‌کره‌: جا بزانین دڵخوازی میرم چییه‌.
مه‌م: گه‌وره‌م ئه‌مر فه‌رموو.
به‌کره‌: هه‌ڵبه‌ت گه‌وره‌م چۆنیه‌تی ژینی مه‌می له‌به‌ر چاوه‌.
( مه‌م راده‌چڵه‌کێ و ئاگای دێته‌وه‌ به‌ خۆیا)
تاژدین: هه‌رچیه‌ دڵخوازی میرم بێ...
به‌کره‌: گرینگ ئه‌وه‌یه‌ به‌ شانی کاکه‌ مه‌م قورس نه‌بێ.
مه‌م: سه‌رم له‌ رێ‌ی میرم دایه‌. راسته‌ که‌ ده‌ست کورت و هه‌ژارم...
تاژدین: ئه‌ی من چیم؟!
زه‌ینه‌دین: گوێ گرن.
تاژدین و مه‌م: (پێکه‌وه‌) گه‌وره‌م ئه‌مر فه‌رمون
زه‌ینه‌دین: دڵخوازی مه‌ ئه‌مه‌یه‌ که‌ کاکه‌ مه‌م نهێنی دڵی خۆیمان لا بدرکێنێ.
مه‌م: ( ده‌په‌شۆکێ) نهێنی دڵی من...
تاژدین: گه‌وره‌م...
زه‌ینه‌دین: به‌‌جێ‌هێنانی خوازتمان نابێ زۆر ده‌گمه‌ن بێ.
مه‌م: شایه‌نی باس نییه‌ گه‌وره‌م
زه‌ینه‌دین: به‌ پێچه‌وانه‌وه‌... لای مه‌ گرینگه‌...
مه‌م: گه‌وره‌م...
تاژدین: میرم ئه‌بێ نهێنی دڵی سوارکارێکی چست و چالاک چی بێ.
زه‌ینه‌دین: خۆی چاکتر ئه‌زانێ.
تاژدین: گه‌وره‌م...
زه‌ینه‌دین: ووتمان پێمان خۆشه‌ خۆی باسی نهێنی دڵیمان بۆ بکات.
تاژدین: من نهێنیه‌کی پێوه‌ شک نابه‌م.
زه‌ینه‌دین: ره‌نگه‌ وا نه‌بێ، خۆ تۆ له‌ دڵی ئه‌وا نیت.
مه‌م: گه‌وره‌م...
زه‌ینه‌دین: دڵنیا به‌ لای که‌س باسی ناکه‌ین.
تاژدین: میرم...
زه‌ینه‌دین: تاژدین ئه‌مانه‌وێ ده‌ستی بنێینه‌ ناوده‌ستی.
به‌کره‌: میرم ره‌نگه‌ ئه‌و داره‌ ره‌قه‌ به‌ژن و باڵا هه‌ڵقوچاوه‌ی چاو زاق و ده‌م زله‌ی خێچ و خواره‌ ده‌ستی گۆج بێ.
زه‌ینه‌دین: ( به‌ گاڵته‌وه‌) بڵێ‌ی؟!
مه‌م: گه‌وره‌م تکاتان لێده‌که‌م...
به‌کره‌: کاکه‌ مه‌م بۆ تێ‌ناگه‌ی میرم ئه‌یانه‌وێ هه‌م بڕیاری یاری هاتبێته‌ جێ و هه‌م داواخوازه‌که‌شیان به‌ شانی تۆ قورس نه‌بێ. میرم ئاگاداری هه‌ژاری و لێقه‌وماوی تۆ...
تاژدین: نا. سه‌ر و ماڵی من هینی کاکه‌ مه‌مه‌. میرم! دڵخوازتان فه‌رموون...
زه‌ینه‌دین: پاش‌گه‌ز نابیته‌وه‌؟!
تاژدین: هه‌رگیز...
زه‌ینه‌دین: یانی سه‌ر و سامان و خان و مانت له‌لا گرینگ نی‌یه‌؟!
تاژدین: گه‌وره‌م، ئه‌ستێ‌ی لێ ده‌رچێ هه‌موو چتێکم ته‌نانه‌ت سه‌ریشم هینی کاکه‌ مه‌مه‌.
زه‌ینه‌دین: ئافه‌رین... که‌ واته‌ دڵخوازی من...
مه‌م: نا گه‌وره‌م نا
تاژدین: کاکه‌ مه‌م!!
مه‌م: نا تاژدین نا ئه‌زانم که‌ ئه‌بێ ماڵ ئاوایی له‌سه‌ر بکه‌م جا نهێنی دڵ بدرکێنم به‌ڵام...
تاژدین: به‌ڵام چی؟!
مه‌م: ئه‌مه‌م له‌ لا خۆشتره‌.
تاژدین: ئاگات له‌ خۆته‌؟!
مه‌م: تاژدین ئاگام له‌ خۆمه‌ و ئێجگار سپاست ئه‌که‌م. به‌ڵام داواخوازم میرم داخوازی خۆ نه‌گۆڕێ.
زه‌ینه‌دین: که‌ واته‌ ئه‌ته‌وێ باسی نهێنی دڵت بکه‌ی.
مه‌م: به‌ یارمه‌تیتان...
زه‌ینه‌دین: بڵێ بزانین.
مه‌م: تاژدین بمبوره‌، سه‌د مخابن هه‌رگیز نه‌متووانی به‌ قه‌رای سه‌ره‌ ده‌رزییه‌ک وه‌ڵامی چاکه‌ت بده‌مه‌وه‌... به‌داخه‌وه‌( هه‌ناسه‌یه‌ک هه‌ڵده‌کێشێ و له‌گه‌ڵ خۆ ئه‌ڵێ) ئاخ. چه‌ن خۆشه‌ مرۆڤ له‌ ژێر قورسایی باری ده‌ینی که‌سا نه‌بێ... ( روو له‌ زه‌ینه‌دین) گه‌وره‌م. ئه‌وه‌ن ئه‌تووانم بڵێم ئه‌ز گیرۆده‌ی به‌ژن و باڵا رێکێکی به‌ لار و له‌نجه‌م که‌ کۆی جووانی له‌ هه‌تاو برده‌ته‌وه‌.
به‌کره‌: جووانی هیچ نییه‌. خوو خه‌ده‌ی... ره‌وشت و ره‌فتاری... که‌س و کاری...
مه‌م: له‌ گشت ئه‌م ناوچه‌دا هیچ که‌س به‌ پێ‌ی ناگاته‌وه‌...
به‌کره‌: وا نییه‌...
مه‌م: وا نییه‌؟!
به‌کره‌: نا وا نییه‌. ئه‌م ناوچه‌یه‌ جووانی ئێجگار تێدایه‌.
تاژدین: کاکه‌ مه‌م!
زه‌ینه‌دین: ئه‌م حۆریه‌ بێ ناوه‌ ئه‌بێ کێ بێ؟!
به‌کره‌: گه‌وره‌م. مه‌م لاوه‌، تازه‌ پێ‌گه‌ییشتووه‌. له‌م ته‌مه‌نه‌دا پشیله‌یشی هه‌ر به‌و مه‌رجه‌ی مێ بێ لا جووانه.
مه‌م: کاک به‌کره‌ ده‌مت ئاو کێشه‌ ... یایه‌زین سه‌رتر له‌وه‌یه‌ که‌ تۆ...
به‌کره‌: یایه‌ زین؟!
تاژدین: کاکه‌ مه‌م!
مه‌م: چبکه‌م؟!
به‌کره‌: گه‌وره‌م نه‌مووت.
زه‌ینه‌دین: کوڕینه‌...
مه‌م: ( شیر هه‌ڵده‌کێشێ) ناواده‌یه‌، به‌ڵام...
تاژدین: چ ده‌که‌ی مه‌م؟! ( هه‌ندێ که‌س دێنه‌ ژووره‌وه‌ و ته‌مایه‌ری فرمانی زه‌ینه‌دین ئه‌که‌ن)
مه‌م: چبکه‌م؟! بێ ویستی من شیر بووه‌ته‌ بواری ژین و مردن
ئه‌مڕۆ یا سبه‌ی ، زوو بێ و دێر بێ
ئه‌وه‌ی ناوی یایه‌ زین به‌رێ
ئه‌بێ ئه‌م شوێن پێ هه‌ڵگرێ.
تاژدین: نا.
مه‌م: با
زه‌ینه‌دین: بۆ راوه‌ستاون. زووبن بیگرن.
پیاوه‌کان: به‌ چاوان ( دێن هه‌ڵمه‌ت به‌رن. تاژدین شیر هه‌ڵده‌کێشێ و پێشیان پێده‌گرێ)
تاژدین: هه‌ر که‌س ده‌ستی بۆ به‌رێ، به‌ شیرم دوو که‌رت ئه‌کرێ( روو له‌ زه‌ینه‌دین) گه‌وره‌م خۆ چاک ئه‌زانن که‌ مه‌ چوار که‌س تووانی شکاندنی چوار سپامان هه‌یه‌.
به‌کره‌: ووته‌م هاته‌ دی.
زه‌ینه‌دین: یاخی بوون؟!
تاژدین: نا.
زه‌ینه‌دین: ئه‌ی هه‌گه‌ ئه‌مه‌ یاخی بوون نییه‌ چییه‌؟!
تاژدین: بڵێ که‌س ده‌س بۆ مه‌م نه‌با، با خوێن نه‌کرێ.
مه‌م: تاژدین نا، تۆ خۆت تووش مه‌که‌.
زه‌ینه‌دین: تاژدین!
تاژدین: گه‌وره‌م! با دوژمنمان پێ شاد نه‌بێ.
مه‌م: گرینگتر له‌ دوژمن خۆمانین.
تاژدین: کاکه‌ مه‌م! شیره‌که‌ت دانێ.
مه‌م: نا تاژدین...
زه‌ینه‌دین: کوڕینه‌...
تاژدین: نا گه‌وره‌م. من خۆم ده‌ستی مه‌م ده‌به‌ستم.
مه‌م: نا تاژدین، مه‌یه‌ پێش.
تاژدین: کاکه‌ مه‌م! من هه‌رگیز خراپی تۆم نه‌ویستووه‌.
مه‌م: به‌ڵام...
تاژدین: هیچ مه‌ڵێ، با ده‌ستت ببه‌ستم.
مه‌م: دیسانه‌وه‌ چله‌کێشی و مردن له‌ زیندانا... نا تاژدین ناڕه‌وایه‌.
تاژدین: ویستی کات وایه‌.
مه‌م: یانی...
تاژدین: با خوێن نه‌کرێ، با کۆرپه‌ی ساوا بێ باوک نه‌کرێ. با بێ تاوان له‌ دار نه‌درێ.
مه‌م: تاوان... بێ تاوان... کێ تاوانباره‌؟ کێ بێ تاوانه‌...
تاژدین: دیارده‌ کردنیان گرانه‌... بێ تاوانیش تاوانباره‌...
مه‌م: که‌ واته‌...
تاژدین: به‌ یارمه‌تیت ، با ده‌ستت به‌ستم.( به‌ره‌ولای مه‌م به‌ ئه‌سپایی هه‌نگاو هه‌ڵده‌گرێ)
مه‌م: رێ‌ی نه‌هاته‌...
تاژدین: کێ ئاگاداری سبه‌ینێ‌یه‌؟!
مه‌م: سبه‌ینێ و هه‌زاران سبه‌ی‌تر...( ده‌ستی ئه‌نێته‌ سه‌ر یه‌ک و به‌ره‌و تاژدینی ئه‌گرێ) هانێ ده‌ستم...( تاژدین ده‌ستی ده‌به‌ستێ)
تاژدین: کاکه‌ مه‌م...
مه‌م: گیانه‌که‌م...
زه‌ینه‌دین: کوڕینه‌ بیبه‌ن.
تاژدین: گه‌وره‌م!
مه‌م: تاژدین واز بێنه‌... ئه‌نجام دیارده‌ کراوه‌...( مه‌م ئه‌ده‌نه‌ به‌ر، پێش له‌وه‌ی له‌ شانۆ بچێته‌ ده‌ر، روو له‌ جه‌ماوه‌ر ئه‌کات) ویستم له‌ چوارچێوه‌که‌ی خانی نه‌مر بێمه‌ ده‌ر... به‌ڵام هه‌گه‌ خوێن نه‌کرێ چۆن مه‌مێ زینی پێ ئه‌درێ؟!

کۆتایی 24/3/ 71