[behnam5555]

ئای باڵا به‌رزی سینه‌ به‌فراوی
به‌ کام ئه‌ستۆنده‌گ وا دابه‌سراوی

جوانترین چیای مه‌ڵبه‌ندی سه‌قز
ئێشک چی گه‌وره‌ی بێ پاره‌ و بێ مز

هاوسێی گه‌واڵی هه‌ور و هه‌تاویت
ئیلهامی شیعری جوان و گڕاویت

من به‌و به‌رزیه‌ت هاتوومه‌ سه‌ما
دوندت خۆی ده‌سوێ له‌ سینه‌ی سه‌ما

هه‌وارگه‌ی کیژی لادێی ده‌ور و به‌ر
هه‌یاسه‌ی سپی جستان له‌ که‌مه‌ر

هاتم و سه‌رم نا به‌ پاته‌وه‌
هه‌ستی شاعیریم جووڵاوه‌ته‌وه‌

کیژ له‌ سه‌ر سینگت ڕێواسانیانه‌
له‌گه‌ڵ شۆڕه‌ لاو چاو بڕکانیانه‌

هه‌ر له‌ نه‌که‌رۆز تا ده‌ربه‌ندی خان
گۆرانی کۆنه‌ له‌ ده‌م پیر و جوان

ئاڵپ له‌ ئه‌ورووپا پاڵه‌ی کاڵه‌ته‌
سێبه‌ری چووکی سووچی نواڵه‌ته‌

ئه‌ڵوه‌ند کامه‌یه‌ ده‌ماوه‌ند چییه‌
هیچ کێوێ وێنه‌ی نه‌که‌رۆز نییه‌

هه‌واره‌ به‌رزه‌ی شاره‌ کۆنه‌که‌م
چیای پڕ عه‌تر و تام و بۆنه‌که‌م

کام به‌رزی ئه‌ڵێن لای تۆ نه‌مه‌یه‌
به‌هه‌شتی سه‌وزی خودا ئه‌مه‌یه‌

ئێڵاخت هه‌موو باخی ئێره‌مه‌
گه‌وره‌یوو گه‌وره‌ش خاوه‌ن که‌ره‌مه‌

ئه‌و نه‌قش و ڕه‌نگه‌ی تۆ له‌ خۆت داوه‌
مانی قه‌ت تابلۆی وای نه‌کێشاوه‌

غه‌وری دڵ ده‌با دیمه‌نی جوانت
ده‌نگی بلوێر و شمشاڵی شوانت

زه‌نوێرت درگای فیرده‌وسی به‌رین
کۆکمه‌ دێنێته‌ سه‌ما و هه‌ڵپه‌ڕین

نێرگز و مه‌ندۆک له‌ شاخ و له‌ دۆڵ
ته‌شگای ئاوری نه‌ورۆزت له‌ کۆڵ

خوڕه‌ی به‌فراوت نه‌کیسایی یه‌
سروه‌ی نه‌سیمت مه‌سیحایی یه‌

لاله‌ و ئالاله‌ که‌روێشکه‌یانه‌
ساوای خه‌یاڵمان له‌ بێشکه‌یانه‌

ڕێواس له‌ لاپاڵ مه‌نێ له‌ داوێن
بارێزه‌ هاوسێی به‌فراوی خاوێن

مۆسیقا ژه‌نت کووکوو و سینه‌ زه‌رد
یه‌ک له‌ سه‌ر گوڵ و یه‌کێ له‌ سه‌ر هه‌رد

لایێ شینایی، لایێ به‌سته‌ڵه‌ک
له‌ هه‌ر دوو لایان کۆڕی ڕه‌ش به‌ڵه‌ک

لایێ زۆزان و لایێ ئارانه‌
له‌ لایێ ساو و لایێ بارانه‌

ئه‌گه‌ر ئه‌بینن شیعرم به‌ سۆزه‌
ئه‌م تۆزه‌ سۆزه‌ بۆ نه‌که‌رۆزه‌

که‌ مردم گۆڕم وا دابڕێژن
ڕوو به‌ نه‌که‌رۆز ته‌رمم بنێژن


حامید شافێعی