خِرمه من تَنگ زمستون نونِ خالي، دايني ته؟
ياكه أتّا لَمه تيكّه جاي قالي، دايني ته؟
هَسّه تِه گرم خِنه مثل تابستون و بهار،
أتّا ذرّه بَهرِ من يك جاي خالي، دايني ته؟
تِه كه شوتا صباحي، هَفتا بهشتِ خودَري
مِره باو أتّا قِلَم شو تا صباحي، دايني ته؟
تِه سوار و من پياده، ته غني و من فقير
هَردِو دايمي رنج راه، خرج تو راهي، دايني ته؟
تِنه خِرجين مشت بار، اسبِ كِمَرِّه تُو بَهيت
أتّا يارِ راه بِلَد بَهر دِو راهي، دايني ته؟
اينجوري راه كه شوني، فكر كمّه كه هَسّي خدا!!!
با همه جاه و جلال، لطف خدايي، دايني ته؟
همه چي دايني شه همراه، دايني ته هر چي خواني
بَاو كه با اينهمه يك سينة راضي، دايني ته؟
تنِ سالم، سرخِ ديم، مالِ فراوون، پِر و مار،
هم برار و هم وَچه، أَي دلِ شاكي، دايني ته؟
هرچي خواسّي، ته خدا، بهتر از اونّه هِدائه
شكر نكردي أتّاره، ميل اضافي، دايني ته؟
مگه من چي گُمه كه هرچي گُمه دل نَدِني
فكر كمه باخِتي و، دل به تباهي، دايني ته
اگه من عبدالحسن مه، ته نخواني، خا نَووش
گدايي دايمه كه هَسّه سَرِ شاهي، دايني ته
عباس مرادی آملی