تكاده‌كه‌م ...واخه‌ریكه ته‌نهاییم ده‌كه‌وێته خواره‌وه
چ پرسیارێكی ته‌نهاو په‌نهانه كه تۆ وونكه‌م ..
چ بای ناوه‌ختێك له‌م ڕۆحه‌مه‌وه هه‌ڵده‌قوڵێ،
كه‌تۆ له‌بیركه‌م...
نازانم من وادروست بووم،
له‌خوارپێیه‌كانی ئومێده‌وه دانیشم ...
نازانم من واخوڵقام،
له‌خوار ئاوابوونه‌وه ئاسۆم هه‌ڵبێ...
تكایه بوه‌سته..واخه‌ریكه ته‌نهاییم ده‌كه‌وێته خواره‌وه..
چه‌پگه‌رد بوو ئه‌و ڕۆژه له ده‌یره‌كانی غه‌زه‌ڵدا،
كچێنی له‌سه‌ر گه‌ڵایه‌كی مس ڕه‌نگی،
خۆی ده‌نووسی... دره‌خته پیره‌كان،
ده‌یانخوێنده‌وه...
تاوسه ساڵ خورده‌كان به‌بێزارییه‌وه
ده‌یان تاشی په‌یكه‌ری له‌نجه..!!
به‌بێ سۆناتاكانی گریان، له‌فه‌نه‌ری
چاوی پاسارییه‌كاندا... په‌نجه‌ی مۆمی،
ئه‌و شه‌وه زه‌نگانه، باوێزه خواردنی،
كه ده‌ستی عیشقیان نه‌گرت... عیشق پیری كردن‌و
نامه‌یه‌كیان نه‌نووسی...
عیشق كوشتنی‌‌و
ئیعترافێكیان نه‌كرد...!!
تۆ ئه‌ی عیشق چۆن توانیت خۆتم لێ وونكه‌ی
تۆیه‌ك له سبه‌ینێمدا حزوورت هه‌یه ،
تۆیه‌ك كه نامۆی به‌زۆر په‌نجه‌ره...
من باڵی په‌نجه‌ره‌یه‌كم بۆ وازكردی،
باڵنده‌ت لێ ڕوواند
كه‌چی منت وێنا كرد به دۆزه‌خ و
سیخناخت كردم له توخمی شكان...!!
لۆمه‌ت ناكه‌م ئه‌ی عیشق
من له‌نه‌خشه‌ی ئه‌و مه‌زرا قوڕاویه‌وه،
هاتووم... له‌كه‌ناره‌كانی،
عاتیفه بێ به‌ری...
گوڵی ئه‌و باخچه قه‌تمه‌رانه‌م،
گه‌ر له‌گیانه‌ڵادابم... هه‌ناسه‌ی نیگه‌رانی‌‌و
ئاخی پڕ له‌كه‌ده‌رو حه‌سره‌ت،
هه‌ل نامژن...!!
ئه‌و برینه به‌فرانه‌م، پێش ئه‌وه‌ی
جێیان هێڵم پێ ڕه‌وكه ده‌بن‌و
ده‌بن تریفه‌ی ماچ...!
ئه‌و عاده‌تی ئه‌و باخچه قه‌تمه‌رانه‌بوو،
ئه‌ی مه‌سیحه‌كه‌م...
كه گژو گیایه‌ك مه‌مكی ده‌كرد...
چوار مێخه‌یان ده‌كێشاو
ده‌یاندایه به‌ر مشته‌كۆڵه‌ی خاچ...
من له‌زووه‌وه زانیم بۆنی گوڵه عیشووه‌كانی ماڵه‌كه‌م
شعوری باران ناته‌زێنێ... من له‌زووه‌وه زانیم
كه خۆری عیشقم پڕبووه، له‌واده‌ی
كاسه‌كانی شه‌رم، به‌عورفی ئه‌و،
ڕێگه كوێرانه‌دا ئاوابوو...
كه‌بۆسه‌ی چه‌قۆكان، به‌زه‌رده‌خه‌نه‌یه‌كی
ساخته‌وه ماچیان كرد...!!
له‌ڕه‌هێڵه‌ی ئه‌م ئیعتیرافانه‌وه
چیت لێ بشارمه‌وه، ئه‌ی عیشقه دره‌نگه‌كه‌م
تكایه بوه‌سته واخه‌ریكه ته‌نهاییم ده‌كه‌وێته خواره‌وه....
بۆ ئه‌ته‌وێ جه‌نگم له‌گه‌ڵ بكه‌ی؟؟
جه‌نگ واته خنكانی هه‌موو شه‌پۆله‌كان،
له چاوی ده‌ریا...
جه‌نگ واته كاولكردنی كه‌ناره‌كانی رۆح،
له‌كوچه‌كانی خوا...
واته خه‌ساندنی جوانییه‌كان وڕاوكردنی باڵنده‌ی دڵمان...
تكایه بوه‌سته وا ته‌نهاییم ده‌كه‌وێته خواره‌وه
ژووره‌كه‌م پڕه له‌زه‌مه‌نی
ئه‌و دووكه‌ڵانه، كه‌په‌رداخێك
له‌ته‌نیایی فڕده‌كا...
به‌ره‌و كه‌وشه‌نی تاراوگه‌یه‌ك،
ڕاپێچم ده‌كه‌ن.. كاغه‌زی خه‌یاڵه ئاوییه‌كانم
ده‌دڕن به‌و مه‌زه‌نده‌یه‌ی،
كه ده‌بنه‌ئاسمان و دره‌ختی ئاسۆ،
بۆ ئه‌و فڕاندانه‌ی كه ئیمپراتۆری ،
دارستان ده‌ری كردن، به‌تۆمه‌تی
خه‌وبینین به‌فڕینێكی تر...!
تكایه بوه‌سته...من گه‌لایه‌كی وه‌ریو بووم،
كه تۆم ناسی له‌و دیو زه‌مه‌نه‌وه سه‌وزیم بانگی دا...
من مردبووم،كه‌تۆم ناسی
له‌و دیوحه‌قیقه‌ته‌وه مردنم كوشت...
من یه‌ك پارچه له‌جه‌نگی جیهانی سێیه‌مدا بووم،
كه تۆمناسی له‌سه‌روی ڕۆحمه‌وه
ئاشتبوومه‌وه له‌گه‌ڵ حكومه‌ته‌كه‌ی خۆم....
بوه‌سته ...واته‌نهاییم خه‌ریكه ده‌كه‌وێته خواره‌وه....
له‌به‌ر چرایه‌كی مه‌حزوندا... جریوه‌ی
قاڵه‌مه‌كه‌م ڕاكشاوه...
سێبه‌ری ئه‌و دێڕانه ده‌شوا،
كه ده‌نگی موحیببه‌تیان ڕنی... كه‌سه‌ده‌كانی
چاوه‌ڕوانی جێی هێشتن به‌چ ئیعتیرافێك چاوه‌كانت ،
لێم ده‌گه‌ن...
له‌وه ناچێ باوه‌شی دۆعا‌و نزات ،
هه‌ودای پرچی برینم ژیركاته‌وه...
له‌وه‌ناچێ هه‌نسكی ئه‌م ته‌مه خه‌واڵووه
له‌بوولێڵیكدا ماچ شه‌ونمی،
هه‌نیه‌ی گوڵم كا
خودایه واته‌نهاییم ده‌كه‌وێته خواره‌وه فریاد ڕه‌سێ...
خودایه له‌زه‌تی ئه‌وین چییه،كه به‌میراتی
له‌و دیو ده‌رگا پیره‌كانه‌وه دانیشتووه؟؟؟
وا ده‌ڵێن ئه‌و هه‌میشه‌چه‌مكی چاوێكه مه‌سته به چاوه‌ڕوانی...
وا ده‌ڵێن ئه‌و هه‌میشه‌خه‌تای خورپه‌یه‌كه بۆ شكانی
ڕه‌نگه‌كانی بیده‌نگی...!!
... ئه‌ی عیشقه دره‌نگه‌كه‌م...
من ده‌ڵێم پیشه‌ی عیشق و عاتیفه ئه‌وه‌یه
به‌رد بێته گۆو خۆی ووردوخاشكاو
مه‌رحه‌با له‌و ئاوانه بكا،
كه دڵی ژن دروستی كردن...
مه‌رحه‌با له‌و ئاگرانه‌بكا،
كه له‌جه‌للاده‌وه بوونه به‌خشنده...
نازانم تۆ ناسین بۆمن سه‌ختبوو یان ئاسان نازانم
تێناگه‌م له‌م فیزیایی خۆشییه‌و
له‌م كیمیایی كه‌سه‌ره تێناگه‌م...!!
واخه‌ریكه ته‌نهاییم ده‌كه‌وێته خواره‌وه...
داوای ته‌وقه‌ی پیرۆزه‌ی له‌تاریكستانی
ده‌سته‌كانم مه‌كه، كه‌چه‌پكێ مۆمی تیا خنكا...
سێوه‌كانی جلیوه، له‌م سیاسه‌تی
عاتیفه‌یه‌م مه‌وه‌رێنه... پێش تۆ
دانه‌كانی تفه‌نگ كرماندی‌‌و شۆڕشه،
شكسته‌كانی ئه‌زبه‌ریان كرد...!!
چ دیمانه‌یه‌كت پێ بناسێنم،
ئه‌ی عیشق...
من له‌ژێر سێبه‌ری ئه‌و ئێواره،
بێ مروه‌تانه‌وه هاتووم... كه‌ڕه‌نگاڵه‌ی
سه‌رنجه‌كانم، ئاسمانێك نه‌بوو
جریوه‌كانی كۆكاته‌وه...
ده‌نووكی كانیله‌یه‌ك نه‌بوو،
پرچی شیعره‌كانم تژی كا له‌زه‌نگیانه..!
هه‌ژموونی په‌نجه‌ره‌یه‌كم نه‌بوو، بیكه‌مه‌وه
هه‌تاوه‌كو... شنه‌ی سوورمه‌ی
ئه‌وبایانه له‌چاوكه‌م، له‌ناو
زه‌مبیله‌ی رۆحمدا بیانچنم
ئایه‌تی گه‌ڵایه‌كی سۆز نه‌بوو،
هاواری ئه‌و حه‌رفانه بخوێنێته‌وه،
كه به‌ده‌ستی موریده‌كانی بێ حه‌وسه‌ڵه‌وه
هه‌لا هه‌لا بوون...
لیمگه‌ڕێن واته‌نهایم عیشق كوشتی
ئاخر عیشق و ئه‌وین پیشه‌ی ژنه نه‌ك پیاو
منی ژن كه عیشقم ناسی ،
هه‌وری خه‌یاڵه‌كانم بارانی لیخوڕی و
به‌سنگی بادا پیاسه‌م كردو
نیگه‌رانیم سه‌ربڕی...
ئاخر نیگه‌رانی له‌كوێ راكشا،
له‌وێ چاوی خه‌و و پیاچوونه‌وه‌یه‌ك نییه بۆ پشوو...!!
تكا ده‌كه‌م تكام واتك تك ده‌ڕژێته
ناو سارای ڕۆحمه‌وه... ئه‌م
هاموونه‌ی جه‌سته‌م، كه‌له‌بناری
هه‌تاوێكی رووخاودا شناوه،
گه‌ر به‌ردی تێبگری... نه‌ینكی
ئه‌و گومانه له‌سه‌ر باڵی نه‌وڕسێك،
ده‌شكێ... كه ده‌ریایه‌ك نه‌بوو
مۆمی عیشق له‌كه‌ناره‌كانیا داگیرسێنێ...!!
پێكه‌نینی مۆمێك نه‌بوو، گریانی
یادگاره‌كانی بنووسێ...
من تكا ده‌كه‌م... له‌ئه‌نكێتی
ئه‌م نسێ‌ی عیشقه كه‌ڕژاوه
تۆش گه‌ڵای عاتیفه‌كانت له‌خه‌زانی
چاوه‌كانا، ڕیش‌و سمێڵیان
پیربووه... من تكا
له‌چڵی ئه‌م عیشقانه،
كه خه‌سڵه‌تیان شكانه...
من له‌ژێر پژمینی پێ‌یه‌كانی خۆرا،
هه‌ڵزنام بۆ دوا پله‌كانی،
ئه‌وجی تكا...
تۆ له‌ژێر سابیته‌ی گه‌ڵاكانی ته‌نیاییدا
دایه‌لۆكێكی نێرگزیزم‌و وه‌راند...
كه‌چاره‌كه سه‌ده‌یه‌ك له‌سه‌ر،
بانێژه‌ی خۆرا هه‌ڵم خستبوو...
ئه‌ی هه‌موو وا ته‌نهاییم ده‌كه‌وێته خواره‌وه
پێده‌چێ له‌ناو شه‌پۆلی تراویلكه‌یه‌كدا
فه‌رشێك له قیافه‌تی باران ڕاخه‌ی
وه‌لێ...ئه‌وه‌ی وتت درۆیه‌ك بوو
بێ كه‌وشه‌ن له‌سه‌ر له‌پی
زه‌مهه‌ریرا تۆپه‌ڵێك به‌فر
بێته كۆترێكی رۆبۆت...
زریكه‌ی هه‌ور، له‌چاو خوساندێكا
په‌ڕه مه‌غروره‌كانی تاوس،
موتوربه بكا بۆ له‌نجه‌ی دره‌خت...
چ شه‌ڕێكی موقه‌ده‌سه ئه‌م تكایه‌م
)انا الحق) په‌نجه‌كانی سێداره،
له‌پێكه‌نینێكت شه‌ته‌ك بده‌م...
چ كوشتنێكی به‌میهره ئه‌م تكایه‌م
)انا الحق) فڕینه‌كانی ئاسمانت،
پڕكه‌م له‌باڵی ژه‌هر...
ئاسۆی غافڵ بوون... پله‌كانی
ئه‌لف‌و بێ‌ی ئه‌م جه‌سته‌یه‌ی
ڕۆكرده كه‌ناره‌كانی هه‌ڵدێران‌و
له‌پێ ده‌شتی خۆرنشینێكی سۆزناكدا
من یاڵی ئه‌سپی شیعرێكم،
وه‌رانده قومی سمكۆڵان‌و
جۆگه‌له‌ی تیزماڵكی گوێكانم هه‌ڵخست
بۆتۆ... تۆ لۆژیكی
شه‌ریعه‌تێكت ڕووخاند.... كه‌عیشق
له‌بازگه‌كانی ترسنۆكیا پیربوو،
له‌ساتمه‌یه‌كی ته‌ڕا ڕۆحی شه‌رابی وه‌ری...!!
چ هه‌ڵكردنی خه‌ڵوه‌تێك بوو،ئه‌م تكایه
سۆمای پاكیزه‌یم سپارده پیاوه‌تیت‌و
له لۆژیكی باخچه‌یه‌كی سه‌رسوڕماندا
ڕێژنه‌ی بۆڵه ترێ‌ی چاوبوو،
ختووره‌ی دڵی هێشوو...
ئه‌مه له‌به‌ژنێكی دارێكا، سۆزنامه‌ی
كاولاشێك بوو.... بێ مانا...!!
له‌وێوه‌ڕا... گوڵ ڕشایه‌وه‌‌و
ئیرۆسیه‌ت له‌ژێرباڵی،
په‌پووله‌وه مه‌یی...!
چ گێژه‌نی درۆیه‌ك بوو،
گه‌مارۆی په‌نجه‌ره‌كه‌می دا... گۆرانی‌یه‌ك
بۆ ئه‌و ره‌شه‌بایه بڵێم، سه‌بایه‌كی زیوینیم
له‌ت ده‌كا...
ئه‌مه ئه‌و ڕیوایه‌ته‌بوو، جووكه‌ی كه‌وێك
له‌ناو قه‌فه‌زێكی شه‌ودا،
مه‌رگه‌سات...!!
چ كه‌ڕنه‌ڤاڵی قه‌هرێك بوو... به‌ویقاره‌وه
ده‌رگاكانی ترسم كڵۆم دا...
بێ باكانه نامه‌ی سێوه‌كانی شیعرێكم
له‌سیله‌ی مشتووی خه‌نجه‌رێكدا
ڕوواند...
ئه‌مه‌ئه‌و وانه‌یه‌بوو، هه‌ڵچوو
له‌مه‌راقا باڵی گرت
له‌ترۆپكی گه‌نجیما كاره‌سات...
ئه‌و ڕێگایانه چه‌نده تینووی هه‌ره‌سن
ئه‌وه‌نده گیرفانه‌كانیان پڕه له‌ماچ...
كێ ده‌ڵێ ئه‌وه سومبولی
ده‌سته‌كانی من نین
ئه‌و گوڵانه چه‌نده شه‌مزاون
ئه‌وه‌نده قردێله‌ی تیشك
له‌سه‌ریان ئه‌ده‌ن...
كێ ده‌ڵێ دێڕ... دێڕ سێبه‌ری،
من موتاڵا ناكه‌ن...!!
جه‌خار له ئاسۆی غافڵ بوون
واخه‌ریكه ته‌نهاییم ده‌كه‌وێته خواره‌وه...
ته‌ریق بنه‌وه درۆكان... كه‌له‌سپێده‌ی
ستیانی گوڵێكه‌وه گۆپكه‌ن‌و
له‌ژێر لۆچی، كراسی ئێواره‌دا
هیچاو هیچ...!!
ئێ‌ی حه‌زره‌تی درۆ...
ئه‌م دڵه‌ی من له‌ئه‌زه‌له‌وه ته‌نیا
ئه‌مه ڕمڵی ئه‌ستێره‌یه‌كه،
ماڵی وه‌رزێك نه‌بوو
عیشقی ئایدیالی تیا گه‌وره‌بێ
سڵاوی سه‌یوانێك نه‌بوو،
بارانێكی شكاوی تیا بخه‌وێ...
ئۆرگانی گه‌ڵایه‌ك نه‌بوو
غه‌ریزه‌ی مردن ته‌فسیركا...
كڵاوی ڕووناكی‌یه‌ك نه‌بوو،
تاڵ... تاڵ سه‌ره‌كانی تاریكی،
بزه‌ی سپی ئارشیف كا...
له‌خوا ته‌نیاتر، گه‌ڵاكانی ده‌ستمه
ئه‌ی حه‌زره‌تی درۆ...تكایه بوه‌سته
مێژوو پێك فڕده‌كا... له‌دوا قومی،
فه‌رامۆشیا چ ده‌ربه‌سته...
كه‌ڤاڵی چه‌قۆیه‌ك دائه‌گیرسێ‌‌و
پرچی مۆمێك ده‌خنكێ‌‌و
یادگاری دڵۆپه چراكانی تۆش
كه‌ڤاڵێكه خامۆش خامۆش
له‌سه‌ر لاپه‌ڕه‌ی كوژه‌كی لمدا ڕائه‌كشێ
له‌پێچێكی ئه‌وقدا‌و
له‌ناو زیكری بایه‌كدا چاولێك ده‌نێ‌‌و
ده‌نوێ...!!
رۆژ هه له بچه یی
سلێمانی25/11/2010