رەعنا
خۆت مەدە دەست ئەم مەرگە بێ دەرەنجامەوە
دەستت بدە با پێکەوە دەرگاکانی گازندە دابخەین
ئەم مەرگە باش باش شارەزای جەستە پڕ شەهوەتەکانە
وەرە با چاوە تینووەکان، پڕ بکەین لە لەنجەو لاری لەشمان
وتم خۆت مەدە دەست ئەم هەموو دەستە نامۆیەوە!
وتم بیانوو مەگرە
لەشت مەکە بە قوربانی سمێڵ و چەمچەو گۆچان
وتم وەرە، با قەڵەمەکەی من لە سەر جەستەت سەما بکات
وتم وەرە، با بتکەم بە میوانی وشە باکرەکانم
وتم وەرە، تابلۆکانم دەبن بە میوانخانەی لەنجەو لارت
ئەڵێم رەعنا!
تا ئێستا دڵت بوەتە میوانی هیچ ژنێک؟
خۆرپەی دڵت قورسایی دەستی هیچ مێیینەیەکی بە خۆوە دیوە؟
ویستم بە گوێتا بڵێم،
کە لێوم نزیکی گوارەکانت کردەوە...
لە سنوور تێپەڕیبووم
هێشتا بریقەی گوارەکانت... رەعنا!
ئەڵێم رەعنا!
مەمکەکانت لە نێوان دەست و لێوانمدا
نەشئە ببوون،
وەک پەرییەکی خومار، خۆت دابووە دەست لەشمەوە.
وتم وەرە!
ئەم ئاگرە بەقای بۆ کەس نەبووە
وەک هەمیشە قامک لە سەر لێو وتت:
وس بە! شەرم کە، شەرم!
قاچێکم لەمبەری سنوور و ئەویتریان لەوبەر
پاڵداوینی کراسەکەت لە نێو دەستی من و
فەقیانەکانت لە نێو دەستی ئەو
وتم: و....ە...ر........ه!
خۆت مەدە دەست ئەو مەرگەوە...
رەعنا!
لە جوانییەکەی جارانت بڵێ
مەڵی روومەتت پڕ بووە لە چرچ و لۆچ!
مەڵی کە بێ دەرەنجامتر لە مەرگی!
خۆزگا ژمارەی سووتیانەکەت هەر ٨٥ بێت
مەڵی کە مەمکەکانت داچەکاون و
کراسەکانت چیتر شانازی بە بەرزایی ژێر ملتەوە ناکەن!
تۆخوا رەعنا، وێنەیەکم بۆ بنێرە
نانا مەنێرە، قەینا!
نامەوێت دیمەنی ئاوێتە بوونی لەشمان
ببێت بە کابووسی قاقای ئەو سێبەرانەی
پاڵ داوێنی کراسەکاتیان لە چنگم دەرهێنا!
نارین محەمەدی