یادهکانی ههور
-1-
ئهو شهوانهی
ئاسمان ڕۆبی ههور ئهپۆشێ
جاڵجاڵۆکهی خهم لهدڵما لانه ئهکاو
منیش زیاتر ههست بهچێژی
شهرابی تهنیایی ئهکهم
چونکێ چیتر ئهستێرهکان ناجریوێنن
مانگهشهویش لهژێر تریفهی تاڤگهیا
بهڕوتو قوتی نابینم
ئهو شهوانه ، ئاسمان لهپیره ژنێکی
قژ خۆڵهمێشیی کهساس و خهمگین ئهچێ
منیش ، لهپیره مێردێکی
خهیاڵ .. بهشهرابی تهمهن
-2-
ئهو شهوانهی
ههور ئهبێت بهنیگارکێش
گوڵهسوورهکانی نزا
لهبهلهکۆنهکهی روحما ڕهش ئهبینم
زیاتر ههر ڕهنگی ڕهش ئهگونجێ
لهگهڵ ڕهنگی خۆڵهمێشیی
پشتهوهی ئهم تابلۆیهدا
ئاخر گوڵهسوورهکانی خۆشهویستی
کهگڕ بهرئهدهنه خۆیان
بۆنی بۆنکڕوز ئهگرن و
ڕهنگی قهقنهس
-3-
ئهو شهوانهی
ههور بهنیازی سهفهره لهگهڵ بایا
منیش پڕ بهدڵ حهز ئهکهم
خۆم بهچمکی کۆڵوانهکهیهوه ههڵواسم
ئاخر ئهم زهویه جهنجاڵه
ههموو بیابانهکانی لهیهک ئهچن
ههموو دڕکهزیهکانیشی
ههر بهپێکی ئارقهی مرۆڤه کۆیلهکان
سهرخۆش ئهبن
ئهوانهی خۆشنودی لێیان بێ بهریهو
پهڕهندهی بهخت ، بهڕێکهوتیش
لهسهر چڵه ووشکهکانی ڕۆژهکانیان
ههڵناکوڕمێ
-4-
ئهو شهوانهی
ههور ههگبهی خهمی قورسهو
بهدهم قریشکهوه ئهگری
بهبێ ئهوهی بزانم بۆ
ناخی منیش لهگهڵ ئهوا ههڵئهوهرێ و
دیهم نغرۆی گۆمی ئهسرین
ئاخر مهزاجی ههردوکمان ههر لهشهوا
پڕاوپڕی حوزن ئهبن و لێیان ئهڕژێ
وهلێ ئهو بهم لێڕژانه
ههگبهی خهمی سوکتر ئهبێ و
روحه ئیسفنجیهکهی منیش
تهڕو پڕتر
بهندی عهلی .. 2011