بۆنى شیعرى
ئێستا شنەیەك لەسەرخۆ
رەنگاڵەیى بە نیگاى نەرمى هێورتا گوزەر دەكات
بێدەنگییەك سەرنجەكانت دەفرێنىَ و
مانگەشەوىَ لە تریفەت هەلدەكێشێت
كۆترێك لە گمەى دەگەرىَ و..
تاڵێك قژى ئەستێرەیت
بۆ هێلانەى بەربارانى تەربووى دەبات
ــ 2 ــ
جگەرەكەت داگیرسێنە
لەگەڵ سووتان و دووكەڵیا
پۆلىَ پەپوولەى ناو مشتت
دەرژێنە نێو دارستانى عەشق بردووى پەنجەكانم
من دەستێكم بوو بە باخچە و لە سێبەرى رۆژا جێمهێشت
تۆ هەردووكیان ..
قەڵەمێكم لە هەناسەى قووڵتا وونكرد
تا لە بنارى شیعرێكما بتەقییەوە
وەكو كانى ..
غەریبیم لىَ رابماڵى و..
دڵم تەركەیت بە ئاونگى كازیوەیەكى خەمناك و
جەستەم بچنى بە نۆتەو ..
رۆحم پر كەیت لە گۆرانى
-- 3 --
لە نێوانى من تۆدا
ووشەیەك باڵى بادەدا و ..
دەفرێت بەسەر وەرزى گوڵ و
بەرامەكانى شەپۆلى نەترووكانى چاوەكانا
لە ناو لەپم رادەمێنم
بۆنى چرۆى حەرفى سپى و ..
بەرسیلەى شیعرێكیان لێدێت
تۆ بەخشیتنە رەوە هەورى گلاراو .. و
هاژەى چەمى راچڵەكین و
كسپەو گڕى تێرامانا
بە تەنیایى لە ئەلبومى هاروهاجى مناڵیتا پیاسە دەكەم
درەختەكان رووتدەبنەوە
گەڵاكان نوقمى خەو دەبن
رەنگەكان دەرژێنە جۆگەى دوا چركەى لێكدابرانا
-- 4 --
دوورى هەڵیژەندووم لە تۆ
لێوان لێو بوومە لە سۆزى روانینێكى ئەرخەوانى
بە باڵاى ئاوێتە بوونا
هێشووى ووشەم
بۆنى دەست و پەنجە و شیعرى تۆیان لێدێت
لە ژێرسۆماى ساباتێكى نێرگسیدا
جەنگ و شەیتان و ئیرەیى
فواز فواز دەبن
ئاشتى لە جێگەیان دەروێت
* فاتیح سەلام *
1/9/2011