خۆزگە
خۆزگە دەكرا و پِێی خەیاڵی خۆم دەبەست
باڵی بشكێ وچیدی نەفڕێ دوورە دەسـت
رۆژ و شەو دێ من لەجەستەی خۆم جیام
هەر كەوی نابێ خەیاڵی ئەشقیـام
داوی خـاوی ژینـی دیلیـم نایگـرێ
دڵ دەتۆقێ گەر قەفەس بێ و ڕایگری
دەمفڕێنێ بـۆ ژوانگـەی كـۆنـە یـار
بـۆ هـەواری عەشقـبـار وئەشكـبـار
مۆمی تاسەم دادەگرسێن سەر لە نـۆ
كۆنـە زامی یـادەكانم دێنـە ســـۆ
تازەسازێ بووم لەخۆزگە و ڕازی دڵ
كەس نەبـوو لێم تێبـگا ئاوازی دڵ
نۆتەكانم ئەشك وژانی پڕ جەخـار
بووم بە كایەی دەستی پەستی ڕۆژگار
خۆزگەكانم بوو بە بەفری بەرهەتاو
خەونەكانم كەوتەگـۆمی شیـنی چاو
بووم بە سوتووی شێعرەساتی دەردی خۆم
گـڕ دەچێژم گـڕ دەبێـژم چەشنـی مـۆم
سـاڵـەهایە گـڕگـڕانیـە ســۆزی دڵ
عیشق و شیعروخۆم دەسووتین وەك سكڵ
نەمدی یارێ تێم بگاچیم چەشتـووە
چەندە زووخی نامورادیـم ڕشتــووە
گوێگرانی شینی شێعرم گوێ گـران!
شەوگەڕانی بووكی هەستم بێ چران!
رەمزی عیشقە سووتن و گریانی نەی
بێدڵان كەی تێدەگەن لە زمانی نەی
ئێـستە ئیـتر نـامـەوێ ژینـی درۆ
تێك دەدەم تەلبەند و پەرژینی درۆ
هەستی تینووم چۆن بژی لای وشكەچۆم!
روو لە زەریای عەشقی تازەی دڵ دەڕۆم
وردە مـاسی شێـعرەكانـم ئـاگـرن
مەستی دەریان لای گەناو خۆ ناگرن
خەونی عیشقێ پڕ شەپۆلی وەك زرێ
دەست لە رۆحی سەركەشم هەڵناگرێ
بۆیە دایم باڵی خولیـام نـانـەوێ
چەشنی منداڵ سەد بیانووی لێم دەوێ!
دەمـفـڕێنـێ بـۆ ژوانـێ بێ قــەرار
تـازە یـاریـش نـادیـار و نـادیـار...
((رەحیم لوقمانی))