ئەوەی ببوورێ و هەڵفڕێ و
سڵا‌و لە سەرەتای شینی كات كا
ئەگەر داشڕژێ بە سەر لاقی و هیچیدا
لە خەفەتی مندا هەر سەرەتای پلیكانە
دەمرم بۆ ئەو شەوەی حەوا میوانداری لە بەرژەوەندی سێو نەكرد و نیسێكانی بە ژنێك بەخشی كە هۆگری ئیستعاریە كە چەقۆ تێیدا خەو بردوویە،
بایخی شەو تەنیا تاوانی رووحی من دەیدا و
ئەو ژنەی حەوسەلەی بزەی دێڕی نییە[ هەڵبەت بەداخم بۆ ئەو وشانەی مشك لە بەرزەخیاندا دەترەكێ و وەك شەیتان بوون بە ویلچێری بیگاری].
...
خوشكان و برایان؛
هەر كاتێك كە ساڵ نەیویستن، داببارن بە سەر خەونی حەشیمەتی بەفر دا
نیسێكانیان گەر جێش بێڵن
هیچ قوڵینگێك نابێ بە قورمیشی كاتژمێر[ من سوێند بە درەخت دەخۆم ئێوە بە حەوتوو تا ساڵ چیتر نەتوێنەوە
سەرەتای من با پلیكان بێ هاوڕێیان
بێقەراریم لە ئۆقرەی هیچ قوتبنەمایەكدا ناشكێ
بەو مەرجەی هەموو بەیانییەكانی جیهان
بە سەر جەنگڵی وەسوەسەمدا هەڵنەیەن.
بۆ شەوێكی كە بە سەر نیسێدا دەڕوا
ئەگەر شكیشتان لە دەسپێكی مرۆڤ هەیە
دۆزینەوەی تەناف لە باراندا
پێوەندییەكی بە تێڵدڕوو نییە
تەنانەت
هەر لە باراندا
ئەگەر شێتێك خورمای خواردبێ یا مار [ كە بە رواڵەت لە هیچ چاوێكدا عاشق نییە ] خۆی پێوابێ یا لە تێڵدڕوو بڕوانێ
نیشانەی بەختەوەری ئاوێنەیە.
[شێت كە بەردەوام مینیاتۆڕی ئەقڵە]
كە ساڵەكانی بوون بە بێژێنگ ناسنامەی هەموومان بەتڵاوە لانیكەم لەگەڵ ئاویش كە نووستین وەسییەتنامەی بارانین .
هەڵبەت نووستن لە دیاردەی شەودا
بەو مەرجەی ژنی دراوسێ نەڵێ:
پاش خەون دیتن بە ئێسكی سەگ دەبێ ترسمان لە ماسی منداریش هەبێ یا برۆی قەڵشیو لە خەوندا حوكمی جەسارەتی هەناری هەیە ـــ وەك ناشتنی پەری دەریاییە لە ژێر دەماری ماندووی كەشتیدا.
...
هاوڕێیان ؛
كە دێڕ سەری لێ دەشێوێ بەڵێن بدەین عاشق نەبین
خاكی ژەنگ‌گرتوو بسپێرین بە نیسێەی پەپوولە و
كە شارێك لە لوولەی تفەنگدا لە خۆی گەڕا
هیچ ئێوارەیەك بەرگری لە عاشق‌بوونی ئەو سەربازە بێ پارەیە نەگرین كە بریندارە و خوشكی، لە چاوی پڵینگدا خۆی دەبڕێ[ بۆ هەموو ئەو عاشقانەی نامە بە مانگ دەنووسن و بە تامی ترێ دەینێرن دێڕ بێكارە وشەو جاڕز و پلیكان بێ‌عار]
ئێرە بەندیخانەیە و
یاسای زەمان كە چووە ژێر پێی دەبینین بە هەوڵێك وەك تامی " با" [وەرناگیرێین]
پیویست‌تر لە بەلارێداچوونی قوتبنەما
لانیكەم ئاو كۆتایی هیچ دێڕیك نییە
بە تایبەت ئەو دێڕانەی خاوەن بزەن و ژن لێیان بێزارە[ چەلێ لە كاترژمێر گەڕێن]
بە گوێرەی ئەوەكە وشەكان پڕ مەترسی‌ترین شەمچەن و
دڵم ئەوەندەی جەسارەت لە جنسی هەنار هەیە
هیچ ژنێكی دراوسێ تەعبیری خەونی كلیل و دندووكی پەرەسێلكە و شووشەی ماچیی بۆ ناكرێ
...
لە هەموو ئەوانەی دەبوورن و هەڵدەفڕن
دەبێ دێڕ بشاردرێتەوە و ئاو سرنجراكێش بێ بۆ نەستی پەپوولە
چتان لێ بشارمەوە یاران ؟!
سەگ لە خەونی دراوسێدا و پلیكان لە ئەخلاقی چەتردا و خوێنی گوری كە لە ئەنگۆستی زەمان هاڵان
ئێمەش زووتر گەورە دەبین بۆ ئیسكۆڕتی رەگی شێت و مینیاتوڕی ئەقڵی پەپوولەئاساییە
كە سەربازێك لە تاڵووكەی لوولەێ تفەنگدا ئاشق بوو
عەقرەبەی سرنجی كاتژمێر ئەگەر روو لە وێستگەی دەست و ئامبوڵانسیش نەكا
شار بە شوێن خۆیدا دەگێڕێ
[ وەك ئەوەی وا غەڕغەڕەیەك مانیفستی هەزار دەروازەی لە لابێ].
ئەگەر دەڵێم لە وازی كاتژمێر گەڕێن
بەختەوەری ئاو لە سەرەتای چەترێكی كۆن تا كۆتایی باران
جیاوازی لەگەڵ حیكمەتی لێبوردن و فڕین نییە
دێڕ هەمیشە خۆی لە كۆڵانێكدا جێ دێڵێ
كە شوێن كراوە یا نیسێی دێكارتی لە لاقی ئێمە هاڵاندووە
ئەوە پێویستی بە فەلسەفە نییە كە نەبزی كۆڵان بەپەلەترە لە بڕیاری باڵندە بێ‌بەرنامەكانی شار..
...
ژنی دراوسێ خەونێكی بێ‌تەعبیری دیتبوو كە تێیدا
دوانی ئەقڵ كە كەوت
سەربازێكی رق ئەستوور نیشانەێ لە برۆی هەموومان گرت
پاساویشی ئەوە بوو كە هەنار دۆزینەوە و سازكردنی گوارە لە ئێسكی مار لە خەوندا پێوەندی بە داهاتووی ئاو و عاشق‌بوونیئێواران نییە.
بۆ ئەوانەی لە نەبزی كۆڵان دەگەڕێن
باشترین رێكار ئەوەیە؛ بەر لەوەی بە سەر ئاگردا بڕۆن واز لە باڵا هەلدانی بێنن
لانیكەم ئەگەر بیر لە ماندوویی نیسێش ناكە‌نەوە تەدبیرێك بۆ گوڵفرۆشەكانی جیهان بكەن كە پاساوی هەموو دیوارەكانی جیهانن لە نەورۆزدا...
خوشكان و برایان ...
كەمێك ئەوبەرتر لە جیهان
وێڕای ئەوە كە هیچ رەنگێك ملكەچی ژماردن و پەژاندن نییە
دیواریش لە هەر رەنگێك ببەسترێ حوكمی تابڵۆی شەڕی هەیە
ئەوەی ببوورێ و هەڵفڕێ
ئەگەر داشڕژێ بە سەر لاقی و هیچیدا
لە خەفەتی مندا هەر سەرەتای پلیكانە
من پاوانكراوی دێڕم و ئێوەش ناو نیشانێكی هاوبەش بۆ مەرگ
وەك ئەوەی وا [ ئەرێ راستە دەڵێن هەر كاتێك رەنگ سڵاوی لە دروشم كرد هەموو شێتەكان زگماك نیگاركێشن ]
خوشكان و برایان؛
سەرەتای هەموو شێتەكان تەنیاییە
بۆیە تەعبیری خەونی جادووگەر بوختانە بە شێت و خورما
ئەگەر ژنی دراوسێ بە چاوی ماریش دیتبێتی
یا بۆ سزادانی دێڕ بیری لە داهاتووی سەگ كردبێتەوە
یا لە گەشبینانەترین واژۆدا
گورگی لە قامكتان هاڵاندبێ لە سەرەتای باراندا...
ئەوەی ببوورێ و هەڵفڕێ
شێتێكە كێشك لە بارانیش دەكێشێ ....
عه‌بدولقادر نیازی