دەنا كورتێ
بۆ ڕوحی هونەرمەند سەید عەلی ئەسغەر كوردستانی
ئێوارەیەك
بە لۆژەلۆژ
ئەو كاتەی وا پیلی زەریای تووڕەی خەیاڵ دەم‌هەژێنێ
ئەو كاتەی ڕۆژ دوایین چاوی لە لووتكەكان دەقرتێنێ
بە سەر پردی هەودای شێعرێكی بەستەڵەك ڕادەبوورم
لەپڕ دەنگێ،
لە پەنجەرەی دیوەخانێكی بەرزەوە
لەگەڵ بزەی چاو جوانێكی سركی ڕووخۆش
هاتە ناو دەروونی ڕوخاو
بەڵام بەڕواڵەتی خامۆش
لە بۆ تەشقی ئاسمانێكی سەر سەوز و پڕ پیتیان بردم:
"دەنا كورتێ چت لێ كردم"
ئای كۆترەباریكەی تیژباڵ
هۆ سەقرە تیژڕۆكەی چاوكاڵ
مەڕۆن،مەڕۆن، ئەوا منیش كەوتمە سەرباڵ
دەڕۆم بەرەو ئاسۆی شەپۆلی ئەم دەنگە
ڕوو بە بزەی ئەو غونچە گوڵەی سەر پەڕ پڕ پڕ لە ئاوەنكە
هۆ سەقرەكان!
تۆ خوا لێرەم جێ مەهێڵن
لەگەڵ خۆتانم خەن ئاخر
لەم ئێوارەی لای شێوانە باڵی هەڵفڕینم گرتووە
گوێم تێوە بوو دەنگێكی تیژی ئاشنا
لە پەنجەرەی دیوەخانێكی بەرزەوە
لەگەڵ بزەی چاوجوانێكی سركی ڕووخۆش
داود ئاسا دەنگی داوە
ناسیمەوە،
باڵم گرت و منیش هاتم بەرەو گەردنە خۆشكەی متفەڕكی لای «سەڵوەتاوا»
دیسان دەنگە نزیك نزیك نزیكە بێ و
لە حەنجەرەی مەكانەوە دەچریكێنێ:
«دەنا كورتێ چت لێ كردمبە قسەی خەڵكیت لەگەڵ كردم»
***
بە دوای دەنگە
چاوم خولخولەی بین خواردوون لە جێگای خۆم هەڵدەسووڕێن
منیش بێدەنگ وشك هەڵاتووم
دەتكوت دەنگە بەرقی هەبوو
دەزانم دەنگە هی كێ بوو
بەڵام شەپۆلی ئەمجارەی لەگەڵ جاران عەرز تا ئاسمان فەڕقی هەبوو
ئەمجارە ڕوحی سەید عەلی ئەسغەری زیندوو
دێتە گیانی گەروومەوە
منیش بە تاری حەنجەرەی شێعرێكی تۆسن و سەركەش
ئەچریكێنم پڕ بە دۆڵی«ئاویەر، ئارێز و كوچكەڕەش»
هاوار دەكەم
كورتێ،كوتێ
زۆر لە مێژە ڕوحی منیش
بە هەوای هەڵمژێینێكی شنەی خۆشی كوێستانی بەرۆكی تۆیە
بۆ لێم ونی؟
بۆ خۆتم لێ دەشاریەوە
كورتێ مەڕۆ مەڕۆ ئەگەر
بچیتە ناو هەورەكانیش دڵنیام بۆم دەباریەوە
***
كورتێ بووكە ڕازاوەكەی لە تۆی جلی شێعری سووڕا
كورتێ! جوانە پەروەردەكەی خوێنی هەتاو
لە ناو پەردووی خێر و نوورا
هیچ وڵامم ناداتەوە
زانی دڵمەندی ئەم كارەم كە بۆچ هیچ جوابم پێ نادا
خودا كردی و لە پڕ
تریشقەی چەخماخەی هەوری پڕ پیت
هەوری لەسەر كورتێ لادا
تیشكی چاوە پڕ فرمێسك و گەشەكانی
وەك بریسكەی تاوی تینوو
لە ناو شەوەزەنگی ژین‌دا بگاتە سەر كانیاوێ سارد
خۆش خۆش بۆم دەترووسكایەوە
من بێ‌هۆش بووم
كورتێ كردیە بان بەرزی لێم
بە دەنگێكی زوڵاڵ و سیحراوی و خۆشتر لە هەوەڵ‌جار دواندمی
ڕاوەستابووم
ڕواندامی
كردمی بە دارێكی سەرسەوز پڕ گەڵا و تەڕ
لەسەر كێلی خەیاڵە مردووەكانی زووم چەقاندمی
***
نازانم ماوەی چەن سەعات لێكمان ڕوانی
نە من زانیم نە ئەو زانی
بەڵام لەپڕ كورتێ بووە كۆترەباریكەیێ سەرخۆش
دای لە شەققەی باڵ و هەڵفڕی
لە دوا نیگادا پێی گوتم:
«دوام مەكەوە
پێم حەیفە تۆش بە ئەوینم بسووتێنم
بڕۆ بڕۆ دیدارمان خۆش
گەر عاشق نیت با نەسووتێی
ئەم دیدارەش لە نێو گۆڕستانی دڵتا
بینێژە و بیكە فەرامۆش »
***
ئیتر من و قوڵپەی گریان
ئیتر من و فرمێسك و ئێش
لە دوای ئەم یەكەم دیدارەم
لە دوای كورتێ بوومە دەروێش
وەك مەولەوی بە دوای شەمسا
بە دەف و بە شێعر بە نەی
بوومە شێتە پەتیارەكەی ناو كۆڵانی مەیخانەكان
پیاڵە بە دەس بۆ چۆڕێ مەی
سنە گەڕام
سابڵاخ گەڕامسەردەشت، بانە، سەقز، بۆكان
پرسیم لە سولەیمانی و هەڵەبچەی شارەزوور
قامیشڵی و جزیرێ و بۆتان
بەڵام كورتێ
لە ناو مێشك و خەیاڵم‌دا شوێنی دیار بوو
دڵی لەگەڵ دڵم پاك بوو
كەچی بۆ خۆی لێم بووە بووكێكی ڕەش‌پۆش
لەگەڵ ڕوحی منا خاك بوو
***
جار جار بە زیندەخەو دەم دی
كیژێ بەرەو لووتكەی كێوەكان هەڵدەشكا
كاتێ چاوم هەڵدەهێنا بزر دەبوو
چاوم وەسەر یەكتر دەنا
كورتێ بێدەنگ لفكەی لەچكەكەی شۆڕ و جوان
لۆێی لە هەور لۆیێكی لە ئەرزی دەخشا
***
ئێستا ساڵەهایە كورتێ
دەسگیرانی هەتا هەتای شێعر و هەست و عەشق و دەنگ و لاوەتیمە
كە پیریش بم شەرتە خوایە
گراوی دی بێجگە لە ئەو چی دی نیمە
كورتێ بۆ من هەستە، گڕە، ڕوحە، تینە
كورتێ بۆ من ئاوی ژینە
نەك ئاوی ژین وەك ژیانە
كورتێ لای من «كوردستانە»
سه‌عید نه‌جاڕی "ئاسۆ" ــ بۆکان