جه‌ژنه و قوروانی
ئازیز موباره‌ک،جه‌ژنی قوربانه‌ن
زه‌مزه‌مه‌ی نیشات جه هورامانه‌ن
شه‌مال جه‌لای یار، پیغامش ئارده‌ن
خه‌مان که‌رد فیرار، شادی میمانه‌ن
دل نه پای گولان خیمه‌ش دانه‌وه
فه‌سلی قوربانی دل په‌ی دلانه‌ن
ئازیزم چیشا، چی خه‌مباره‌نی؟
روه‌باره وه‌شی، ره‌فیق ئامانه‌ن
گه‌رده‌ن ئازادین جه‌لای خزم و یار
سه‌فه‌ر په‌ی وه‌ته‌ن په‌ی لای یارانه‌ن
هورامان دیسان ماچی به‌هه‌شته‌ن
به‌هه‌شتی ره‌نگین جه کوردستانه‌ن
قوربان، جه‌ژنه نه جه‌ژنی قوربانه‌ن
جه‌ژنی دیداری یانه‌ی باوانه‌ن
باره قوربانیت په‌ی قوربانیگای
قوربانی، ئارو ئه‌مری یه‌زدانه‌ن
ده‌سا هوربیزه په سه‌یر و سه‌فای
ئارو هورامان وه‌ختی سه‌یرانه‌ن
بولبول نه باخان مه‌که رو هاوار
فه‌سلی ته‌ماشای روی نازارانه‌ن
زردی خه‌زانان ویش دان وه نیشان
هامن ویه‌رده‌ن فه‌سلی وارانه‌ن
شه‌وق و شادیه‌نچه‌م و ده‌شت و هه‌رد
پایته‌ختی یاران جه هه‌وارانه‌ن
هورامانی ته‌خت هه‌تا کو لهون
ناوچه‌ی ژاورو گرد هورامانه‌ن
موباره‌ک ماچو، دوورکه‌وته‌ی وه‌ته‌ن
وه‌ته نیهاوارجه پایگه‌لا‌نه‌ن
مورته‌زا فه‌یزی"هاوار"ــ پایگولانی هه‌ورامان