ماوەتەوە سێو؛ خوا لە نیۆتۆن خۆش بێ
لە ئێسكم‌دا بەردێك دێشێ
بەو "من"ە كە لە خۆمەوە دەست پێ‌دەكا نابمە دیوار تەواو دەبم
بیر لە پرد كە دەكەمەوە لەگەڵ هیچ دێڕێك ناسازێم
[ ڕووخاوم و بەختێك ڕژایە ناو ئاوت ]
لە برینم‌دا ئێسقانی و لە گۆڕستانی نینۆك‌دا مناڵێك تاوانبار
لە شەمەندەفەڕ كە جێ‌دەمێنم گۆڕێكی كۆن شێعرێك دەڵێ:
"باران بە سەر من‌دا خوار دەبارێ"
شاعیرێك دەئێستامینۆفێن‌دا نووست
باڵندەیەك لە كراسەكەم‌دا دەفڕێ و تۆ لە خۆت‌دا دەمسڕیەوە
وەرگێڕانت چەندە ئەستەمە
كە لە نیۆتۆن‌دا دادەبەزم پرسیارەكان گشتیان دەڕزن / ماسییەكان جێگا دەگۆڕن و
ئەلۆ...كەسێك ون بووە؟!
ژێنێڕاڵ؟!
عاشق كە دەبی ئەستێرەكان لەت لەت دەبن
/ های ویلچێر! / دروومانێك! /
هەڵەمووتم و تا دەترسم قووڵ‌تر دەبم
لە ئێسكم‌دا بەردێك دێشێ
دایكم دەڵێ:
"تا گرێ لە لەچكەم دەدەم لە تۆ نزیك‌تر دەبمەوە/ سێوێك دەڕزێ و نیۆتۆن دەستەوئەژنۆ دانانیشێ/
ژێنێڕاڵ؟!
شەڕێك بەرئاوەژوو دەسەرم‌دا سەرگەردانە
/ ئێستامینۆفێن / هەڵەمووت /
باران كە تا خوار دەبارێ ماسییەكان زۆرتر ون دەبن ــ گۆڕێك كوتی/ چاوم پڕە لە جەهەننەم
لێم‌گەڕێ حەیف بم بۆ زەوی / هەمیشە كەسێكم زووتر لە هەواڵ پێ‌دەگەم /
كە پەپوولە لە دەنگم دەهاڵێ و
مناڵێك دەبیانووم‌دا دادەبەزێ
[ نیۆتۆن بەو باسە نەزانێ ] ــ سەد لە سەت ــ
ژێنێڕاڵ؟
قەپاڵێك لە زەینی ئەستێرەیەك‌دا جێ‌ماوە تاوانبارەكان دەڕووشێ و
نینۆك دەخاتە سەر پشتی زەوی [ لە جنسی ئەخلاق ڕۆژێكم، خۆم دەسپێرمە باوێشكی دۆزەخ و لە ئێستاوە پێم ناڵێن زەوی هەموو ئێواران لە خۆی دەهاڵێ و دەشەلێ]
...
لەو شێعرەدا ڕۆڵێك دەبەخشم بە زەمان
[ كە لە كات‌ژمێردا دایرەكان ڕاو دەنێ زیندانبان دڵی بە ساڵیش خۆش دەبێ ]
بپرسە لە نیۆتۆن دەستی بە كات‌ژمێردا هەڵە بوو لە منی پرسی:
سێو چەندە بە كاتی زەوی؟
من لە ژێنێڕاڵ، ئەو لە گورگ و گورگ لە دار، دار لە خەنجەر، خەنجەر لە حەنجەرەم‌دا كرا پەنجەرە/
گرفتێكم بۆ هاتە پێش ــ ئێوەی بۆ دەگێڕمەوە ــ
بۆ پاڕكەكانی جیهان پلەم بەزی و بووم بە تەقریبەنی ئێستا ــ / بەسە /
/ چی‌ترتان لە بیر نەمێنێ /
عاشقێك بە نیۆتۆن قەرزدارم
[ هاتم و سێو پێ‌نەگەیی ]
دایكم لە ئاو مارە كرا لەچكەكان پرسە ڕادەخەن.
ئیقرار بە زمانی مردوو
دیوارم لە خەونی گێلاسێك دزی ژێنێڕاڵ؟!
تاوانبار نیم
من لە جەهەننەم‌دا پیر بووم زەمان لە وێنەكەم‌دا سەرگەردانە/
مناڵێك ئێستاش دەنینۆكم‌دا تاوانبار دەبارێ
/چەترێك كوتی: لە بارانیش عاشق‌ترم/
خوا لە هەموو "من"ەكانم خۆش بێ
مردووی ئێوە بە سڵامەت
عەبدولقادر نیازی ــ مه‌هاباد