بووم به ژێر ڕۆژه خێراكانى مۆدێرنه‌وه
نامپه‌رژێت بزانم، كامه ڕه‌نگى جل و به‌رگم لێدێت
چۆن به ڕێگادا بڕۆم، ده‌م وچاوم چۆن بێت
خه‌ڵكى ڕقیان لێم نه‌بێت؟
نامپه‌رژێت سه‌ردانێكى قوتابخانه‌كه‌ى سه‌ره‌تاییم بكه‌م
له دووى ئه‌دره‌سی دڵداره كۆنه‌كانم بگه‌ڕێم
هه‌ناسه‌یه‌ك له باخچه بچوكه‌كه‌ى گه‌ڕه‌كدا هه‌ڵبمژم.
به ناو مانگ و ساڵه نادیاره‌كاندا بلاَوبوومه‌ته‌وه
بووم به ژێر ڕۆژه خێراكانى مۆدێرنه‌وه.
له ڕابردوودا زۆر شتم به‌جێهێشت
زۆر شتم له ده‌ستچوو
له دڵه‌وه تامه‌زرۆیانم و
بیریان ده‌كه‌م.
ڕابردووم خۆش نه‌بوو
له داهاتووشدا هیچ نابینم
ده‌روازه‌یه‌كى مین ڕێژ نه‌بێت، به‌ره‌و ڕیزێك ڕۆژى خراپ
من بانگه‌شه‌ى نائومێدى ناكه‌م
جیهان خۆی ڕه‌شه.
مرۆڤ له هه‌ر شوێنێكى جیهاندا بێت
بوونه‌وه‌رێكى ته‌نیایه
ته‌نیایی سیماى ئه‌م چه‌رخه‌یه.
من هاتوومه‌ته دونیاوه
بۆ ئه‌وه‌ى حاڵم ئاسایی نه‌بێت.
ئه‌وه‌ى وایكردووه بۆچوونم له‌سه‌ر ژیان باش نه‌بێت
په‌ڕپوتى و ناله‌باریی خۆیه‌تى
ده‌نا ئاره‌زووم ده‌كرد ژیان به‌هه‌شت بێت و
به قه‌مه‌ره‌یه‌كى گاڵتینه پیاسه‌یه‌كى به ناودا بكه‌م.
ئه‌وه‌ى من له‌وانى دیكه جیا ده‌كاته‌وه
بیركردنه‌وه‌یه له جه‌نگه به‌دفه‌ڕه‌كان
له خوێنى ڕژاوى مرۆڤ
له‌و ڕۆژه‌ى زه‌وى ده‌بێته خۆڵه‌مێش.
بیر له خنكانى مرۆڤ ده‌كه‌مه‌وه
له وردوخاش بوونى ئێسكى
له‌و وشانه‌ى ده‌مانكه‌نه ئاسن
له ڕۆژێكى خۆڵبارین
ده‌بینه به‌رد.
بیر له‌و ڕۆگاره ده‌كه‌مه‌وه
دارستان به ڕاستى سه‌وزبوو
شاخ چرچ نه‌كه‌وتبوو ده‌موچاوى
هه‌وا پاكبوو.
بیر له ڕۆژێك ده‌كه‌مه‌وه
ماڵه‌كانمان پڕ نه‌ببوون له سه‌گ
خۆشی به‌مجۆره تاڵ نه‌بوو.
بیر له زۆرشت ده‌كه‌مه‌وه
له‌وشتانه‌ى ده‌مشێوێنن
له‌و شتانه‌ى بڕستم لیده‌بڕن و
ڕێگه‌م ناده‌ن بسره‌وم.
ئه‌م سه‌ده‌یه ناو ده‌نێم
سه‌ده‌ى ته‌فروتوونابوونى مرۆڤ
سه‌ده‌ى گه‌وره‌بوونى تۆ به خوێنى من
سه‌ده‌ى ته‌قینه‌وه‌ى ڕۆژهه‌لاَت
سه‌ده‌ى درزبردنى ژیان
سه‌ده‌ى به‌ربوونه‌وه‌ى زه‌وى
سه‌ده‌ى گه‌ڕانه‌وه‌ى تاعون
سه‌ده‌ى قیامه‌تى خه‌یاڵ
سه‌ده‌ى نائومێدییه قووڵه‌كان
سه‌ده‌ى دیكتاتۆره كۆمیدییه‌كان
سه‌ده‌ى بانكى گه‌وره و
ناوى گه‌وره و
خه‌ونى گه‌وره و
جیهانی وێران
سه‌ده‌ى تێپه‌ڕبوونى تۆ به‌ناو مندا و
ڕووخانى هه‌میشه‌ییم.
هه‌مووان وه‌ك یه‌ك به‌ر ژیان ده‌كه‌وین
هه‌مووان وه‌ك یه‌ك له‌به‌رده‌م كاپیتالیزمدا به‌هامان نامێنێت
ولاَتانى زلهێز به سیاسه‌ت و هونه‌ر و ڕێكخراوه‌كانیان
كردوینیانه‌ته مێش
به چه‌پۆك نا،به چه‌كى كۆكوژ قڕمان ده‌كه‌ن.
دیگیتاڵ سه‌رى ئاوساندووین
چاومان پڕبووه له ساندویج
فرمێسكمان بۆته كۆكاكۆلا
ئۆتۆمبێل و ژنه دڵڕه‌قه‌كانى مۆدێرنه سوارمان بوون
ته‌لاره بێته‌ربێته‌كان بینینیان بردووین بۆ ئاسمان
ژیان له مۆدێرنه‌دا بێناموسانه فڕیوه .
ئومێدم به جیهان نامێنێت.
زه‌وى به ده‌ست ته‌كنه‌لۆژیاوه گچكه‌تر ده‌بێت
په‌یوه‌ندییه‌كان بوونه‌ته دوگمه
ده‌ستمان به ڕاستى به‌ر پێستى یه‌كتر ناكه‌وێت
به ڕاستى بۆنى یه‌كتر ناچێت به سه‌رماندا
به‌ڕاستى له‌ره‌ى ده‌نگى یه‌كتر نابیستین
ئومێدم به جیهان نامێنێت.
مۆدێرنه گویكردۆته هه‌ستمانه‌وه
ئێستا كه ئه‌م شیعره ده‌نوسم
به چات سێكس له‌گه‌ڵ هۆمۆیه‌ك ده‌كه‌م له ئه‌مریكا
وێبكامه‌كه‌م له‌سه‌ر چوكم داناوه بۆ ژنێكى 70ساڵ له پاریس
ئێمه له یه‌كتر تێناگه‌ین
زمانی سێكس هاوبه‌شه.
ئومێدم به جیهان نامێنێت.
جوانى له شه‌قامه‌كانى مۆدێرنه‌دا فه‌رامۆشه
ته‌نیایی له فه‌وزاى ڕۆژه‌كاندا شوێنێك نییه ئۆقره‌ى تێیدا بگرێت
ئه‌خلاق ده‌ستبه‌سه‌ره لاى جه‌نگه‌كانى ڕاگه‌یاندن
هه‌ر ساته‌ى ناخمان به جۆرێك ده‌گۆڕین
درۆ ده‌كه‌ین ده‌قیقه‌یه‌ك بڕده‌كات
ماسك نه‌بێت هه‌موو ده‌مرین
تێرۆر له ته‌نیشتماندا وه‌ك ئێمه ده‌ژی و
گوو ده‌كاته ناوه‌ڕاستى ژیانه‌وه.
ئومێدم به جیهان نامێنێت.
تونێل و پرده‌كانى مۆدێرنه به‌ناو ئێمه‌دا ده‌ڕۆن
ماركێته‌كانى له ئێمه‌دا خۆیان ساغ ده‌كه‌نه‌وه
شوشه و نایلۆن و ده‌به‌كانى له ئێمه‌دا نوقم ده‌بن
مه‌لهاكانى جمه‌یان دێت له ڕۆحى كوژراوى ئێمه
كافتریاكانى پڕن له ئه‌ڤینى له‌قوتونراو بۆ ئێمه.
ئومێدم به جیهان نامێنێت.
گریان بوو به شه‌رمه‌زارى
شاعیره‌كان به بازرگان
شۆڕشگێڕه‌كان به په‌ناهه‌نده
مامۆستاكان به شه‌للاتى
ئومێدم به جیهان نامێنێت
له گه‌ردێك ئاو ده‌چین، له ئاسمانێك ته‌مدا
سه‌یركه چه‌نده بچوكین
له ئاهێك ده‌كه‌ین، له گه‌رده‌لولی بیاباندا
سه‌یركه چه‌نده ونیین
كه‌س له كه‌س تێناگات
بوار نه‌ماوه بۆ بێده‌نگى
كه‌لله‌مان بووه‌ته ته‌نه‌كه‌یه‌كى به‌تاڵ
له تاو پیسی وه‌خته شه‌ق ده‌به‌ین.
له ڕۆژه‌كانى مۆدێرنه‌دا كه‌س عاشق نابێت
مایه پووچن ئه‌وانه‌ى ده‌سوتێن
كه‌س خه‌ون نابینێت
خه‌یاڵ مایه‌ى به‌دبه‌ختییه
ده‌بێت شه‌و و ڕۆژ له خودا بپاڕێبنه‌وه
بمانكوژێت خودا بمانكوژێت.
نه به عاره‌ق و ویسكى خواردنه‌وه
نه به جگه‌ره و نێرگه‌له‌كێشان
نه به ئه‌فیون و كۆكاین و هێرۆین
نه به ئارتین و سۆماڵدرین و بیلمۆ
ژیان به‌ڕێوه‌ناچێت.
له مۆدێرنه‌دا تاقه‌تت نییه بژیت
ده‌ته‌وێت تێیپه‌ڕێنیت.
ئه‌م ڕۆژانه بۆ مرۆڤ نه‌كراون
مرۆڤى ڕاسته‌قینه به‌رگه‌ى ئه‌م ڕۆژانه ناگرێت.
بووم به ژێر خێرایى ئه‌م ڕۆژانه‌وه
ماندوو ماندوو ده‌ڕۆم و
تێیناپه‌ڕێنم.
وه‌ك ئه‌م شیعره له جێی خۆمم.
داستان به‌رزان _ سلێمانی