پخشــان...

[behnam5555]

نادر خزریان ( ئاژوان )

ئێره‌ زه‌ویه‌ ، شوێنێک که‌ تا بڵێی مرۆڤ ده‌س ده‌که‌وێ به‌ڵام مافی مرۆڤ ... ، هه‌ندێ جار بێ سه‌رنج به‌ ئه‌رکه‌کانم دڵم ده‌خوازێ بفڕم ، فڕین بۆ ئه‌و لای هه‌وره‌کان . خۆزگه‌ په‌ری مردن بگاته‌ جێ و من له‌ ئامێزی ئه‌و گۆ زه‌ویه‌ چڵپاوه‌ بدزێ ، شوێنێک که‌ که‌سێ زمانم تێناگا و کڕیاری بزه‌کانم نییه‌ و بۆ پیاسه‌ له‌ شه‌قامه‌کانی ئه‌وین هاوشانم نابێ به‌ڵام من تا دوایین تاقه‌ساته‌کان ده‌مێنمه‌وه‌ و ده‌گه‌ڵ هه‌موو که‌م و کورتیه‌کان شه‌ڕ ده‌که‌م .
شار وشه‌یه‌کی نامۆ ، شه‌قام سه‌روچاوی تێکشکاو ، پارک حه‌سارێک و به‌س ، زانکۆ شوێنی دۆمینه‌چیه‌کان ، من ون و هه‌ڵکوڕماو ، تۆش نوقم له‌ ناو هزره‌کانی پڕ و پوچ ؛ سه‌یر نییه‌ ! به‌ هه‌زاران لاپه‌ڕه‌ خوێندنه‌وه‌ ، وه‌رنه‌گرتنی مێشکه‌کان ، سازبوونی بیره‌کانی زیبکاوی و خنکانی نووسراوه‌ له‌ ته‌پ و تۆزی نه‌زانیدا ، سه‌یر نییه‌ ! لێره‌ خاکی شێعر خه‌ریکه‌ ده‌به‌زێ به‌ڵام من ته‌واوی وشه‌کان بۆ پاراستنی شێعر ده‌نێرمه‌ ریزی یه‌که‌می شه‌ڕ .
لێره‌ ژین و ژان هاو واتان و که‌س پێناسه‌ی له‌ دایک بوون نازانێ به‌ڵام من ده‌ڵێم : گرنگ له‌ دایک بوون نییه‌ گرنگ بوون له‌ مرۆڤایه‌تییه‌ که‌واته‌ رۆژی نووسراو له‌ ناسنامه‌دا رۆژی له‌ دایک بوونمان نییه‌ به‌ڵکوو رۆژێ که‌ ده‌بینه‌ مرۆڤ رۆژی له‌ دایک بوونمانه‌ ، ئاخ چ زۆرن ئه‌وانه‌ی پێش له‌ دایک بوون ده‌مرن .
هیوا ، نازانم له‌ کام قوژبن خۆی حه‌شار داوه‌ ، ماومه‌وه‌ که‌ زاتی هه‌یه‌ یا ... ؟ بیر بکه‌نه‌وه‌ له‌ زه‌ریایه‌ک که‌وتوون به‌ ناوی دنیا ، له‌ سه‌ره‌تاوه‌ ده‌س ده‌که‌ن به‌ مه‌له‌ کردن و هه‌ر بیر له‌ نوقم بوون ناکه‌نه‌وه‌ تا ده‌گه‌نه‌ شوێنێک به‌ ناوی گێژ ( خه‌م ) ، ئێستا دوو رێگاتان هه‌یه‌ یان ئه‌وه‌ی له‌ گێژدا نوقم بن یان به‌رده‌وام بن له‌ مه‌له‌ کردن و گێژه‌که‌ تێپه‌ڕ بکه‌ن ، رێگای سێهه‌مێک نییه‌ واته‌ ناتوانن بگه‌ڕێنه‌وه‌ شوێنی ده‌سپێکی مه‌له‌ که‌واته‌ باشترین رێ مه‌له‌ کردنه‌ ئه‌رێ به‌رده‌وامی ژیان .