پخشــان...

[behnam5555]

"هەرچی خۆشم ویستووە جێم هێشتووە"

بە دڵی خەمبار و چاوی بە فرمێسکەوە، بەری بەیانی، بە تاقی تەنێ، دە دۆڵێک لە دۆڵەکانی بناری قەندیل هەڵبووم و ڕۆژهەڵاتی نیشتمانم جێهێشت. لە ڕێگادا ئەوەندی ترسم هەبوو بەسەر بۆسەی هێزەکانی ڕیژیمدا بکەوم، دە ئەوەندە پەرۆشی ئەو شاخ و چۆم و کەوێ بەفر و گوێنی و تیروێ و هەڵز و مەندۆکەم بوو کە ئەوبەرئەوبەر سەری دەبەر یەک نابوو. داخی قاسپەی کەو و چریکەی ئەو مەل و بولبولانەم نەدەچوو کە بە هەزار ئاواز دەیانخوێند.
بیرم دەکردەوە: وڵات وڵاتی خۆمە، ژیانم لە وڵاتەکەی خۆم پێ لە هەموو جێیەک خۆشترە، خەڵکەکەی خۆمم بە هەموو کەموکووڕییەکانیەوە قەبووڵە و خۆشم دەوێن، شارەکەمم خۆش دەوێ، چیاکانم خۆش دەوێن، باشە بۆ دەبێ بڕۆم؟
وەرە تۆ بە تەواوی وجوودەوە ئاشقی وڵاتێک بی، سروشتە جوانەکەی وەک ئامێزی دایک سوکنایی بەخش و خەمڕەوێنت بێ، بەرەبەیانێک کە هێشتا هەتاو لە سەرانی نەداوە، خۆت لەو باوەشە فێنک و بلاوێنەدا ببینیەوە و بەو ترسەوە لە دیمەنی زەنوێر و خەمڵیوی بڕوانی کە ڕەنگە هەرگیز جارێکی دی نەیبینیەوە. لەوە جەرگبڕتر هەیە؟
لە تەواوی ڕێگادا پێم نەبوو بڕۆم، لە ماندوویەتییان نا، دڵم لە دوو نەدەهات.
چ تراژیکە چارەنووسی ئینسان لە سایەی دەسەڵاتی ملهوڕدا: یان سەرشۆڕ کردن و بێدەنگی، یان دەربەدەری و زیندان.
بەڵام داخوا ئەوە چارەنووسی بێ ئەملاولای ئێمەیە؟ تۆ بڵێی ڕێگای سێهەمێک نەبێ تا لەو زەلالەتە ڕزگارمان بێ؟